Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

MARCH 20, 2014
MAHUNGU YA MISAVA

Guy H. Pierce, Xirho Xa Huvo Leyi Fumaka Ya Timbhoni Ta Yehovha, U File

Guy H. Pierce, Xirho Xa Huvo Leyi Fumaka Ya Timbhoni Ta Yehovha, U File

ENEW YORK—Guy H. Pierce, xirho xa Huvo leyi Fumaka ya Timbhoni ta Yehovha entsindza wa tona wa misava hinkwayo eBrooklyn, le New York, u file hi Ravumbirhi, March 18. A a ri ni malembe ya 79.

Nkulukumba Pierce u tirhe eka tikomiti to hambana-hambana leti langutelaka mintirho ya Timbhoni swin’we ni ntirho wa tona wa misava hinkwayo wo dyondzisa Bibele. Vutihlamuleri byakwe byo langutela ntirho a byi lava leswaku a endzela matiko swinene naswona a a tirhisa nkarhi wolowo ku khutaza Timbhoni ta Yehovha emisaveni hinkwayo. Ku nga khathariseki ntirho wakwe wo tala, a a dume hi ku tinyika nkarhi wo yingisela lava lavaka mpfuno kumbe switsundzuxo naswona a a endla van’wana va titwa va tshunxekile hi ku n’wayitela ka yena ni ku rhandza ku hleka. Vanghana vakwe lavakulu va xiye leswaku vanhu va mindhavuko yo hambana-hambana a va n’wi rhandza. Eka nkulumo leyi Nkulukumba Pierce a yi nyikeleke eka nongonoko wa vamathwasana lava nga vatirheli va nkarhi hinkwawo, u vule marito lawa a a tiveka hi ku hanya ha wona lama nge: “Khomelela eka milawu yo lulama kambe pfumelelana ni swiyimo. U nga va tekeli ehansi lava u tirhaka na vona hileswi ndhavuko wa vona wu hambaneke ni wa wena.”

Guy Hollis Pierce u velekiwe eAuburn, le California, hi November 6, 1934. U khuvuriwe tanihi Mbhoni ya Yehovha hi August 14, 1955, a ri ni malembe ya 20. U tekane ni Mbhoni-kulobye, Penelope (Penny) Wong, hi May 30, 1977, naswona va ve ni vana swin’we. Vaka Pierce va ve vadyondzisi va Bibele va nkarhi hinkwawo (lava Timbhoni ti va vulaka maphayona ya nkarhi hinkwawo). Endzhaku ka nkarhi, u ve mutirheli la famba-fambaka wa Timbhoni ta Yehovha, a endzela mavandlha ya Timbhoni ta Yehovha etikweni hinkwaro ra United States leswaku a khutaza vadyondzisi van’wana va nkarhi hinkwawo va Bibele ni swirho swa mavandlha. Hi 1997, vaka Pierce va rhambiwe ku ya tirha nkarhi hinkwawo erhavini ra United States ra Timbhoni ta Yehovha. Hi October 2, 1999, ku tivisiwe leswaku Nkulukumba Pierce u ta va xirho lexintshwa xa Huvo leyi Fumaka.

Nkulukumba Pierce a a ri mutshama-xitulu wa nhlangano wa lembe ni lembe wa vu-129 wa Watch Tower Bible and Tract Society of Pennsylvania, hi mahelo-vhiki ya October 5 na 6, 2013. Vayingiseri va 1 413 676 ematikweni ya 31 va ve kona eka xiendlakalo xexo hi xiviri kumbe hi ku xi hlalela eka Internet. Hi ku ya hi web site ya le nawini ya Timbhoni, lowu a ku ri nhlangano lowukulu wa Timbhoni lowu tshameke wu khomiwa.

Handle ka nsati wakwe, Penny, Nkulukumba Pierce u siye vana va tsevu, vatukulu ni vatukulu-xinguwe vo hlayanyana. U ta tsundzukiwa hi Timbhoni ta Yehovha emisaveni hinkwayo leti a a ti teka tanihi ndyangu wakwe.

Swirho-kulobye swa Huvo leyi Fumaka swi vulavule hi “ripfumelo rakwe leri tiyeke ni ku khomelela kakwe eka milawu ya Yehovha,” naswona swi engetele swi ku: “Ku tsundzuka xivindzi ni ripfumelo rakwe evuton’wini byakwe bya laha misaveni swi ta hambeta swi hi tiyisa hi masiku.”

Media Contact(s):

International: J. R. Brown, Office of Public Information, tel. +1 718 560 5000