Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

DECEMBER 3, 2014
DENMARK

Timbhoni Ta Yehovha Ti Khutaze Madokodela Ya Le Denmark Ku Endla Vuhandzuri Handle Ko Tirhisa Ngati

Timbhoni Ta Yehovha Ti Khutaze Madokodela Ya Le Denmark Ku Endla Vuhandzuri Handle Ko Tirhisa Ngati

ECOPENHAGEN, le Denmark—Swihaxamahungu leswi dumeke swa le Denmark swi vike leswaku madokodela ya le Ntsindza wa Tiko ma le ku laveni ka tindlela to tshungula ha tona handle ko pompela ngati. Phephahungu ra Kristeligt Dagblad, ri vule leswaku “vanhu vo tala va nga endliwa vuhandzuri handle ko pomperiwa ngati.” Ri ye emahlweni ri ku, “Hikwalaho ka Timbhoni ta Yehovha, sweswi ku tirhisiwa vuhandzuri lebyi nga tirhisiki ngati.” Hikwalaho ka leswi ti swi pfumelaka, Timbhoni ta Yehovha to tlula 8 000 000 emisaveni hinkwayo, leti to tlula 14 000 ti tshamaka eDenmark ti lava vutshunguri bya xiyimo xa le henhla lebyi nga katsiki ku pomperiwa ngati.

Swibedlhele swa le Denmark a swi tiveka hi ku tirhisa ngati yo tala ku tlula swin’wana swa le Yuropa hilaha ku phindhiweke kambirhi. Hambiswiritano, nhlokomhaka ya phephahungu ra Politiken leyi nge “Vuhandzuri Lebyi Nga Tirhisiki Ngati Byi Ya Byi Toloveleka” yi vula leswaku, “Timbhoni ta Yehovha ti endla leswaku madokodela ma lavisisa tindlela ta vutshunguri” lebyi nga tirhisiki ngati. Loko ku pfuniwa vavabyi lava nga Timbhoni, madokodela man’wana ma tirhisa tindlela to hlayanyana to engetela ngati loko ma nga se endla vuhandzuri ni ku endla leswaku yi nga humi ngopfu hi nkarhi wa vuhandzuri. Phephahungu ra The Copenhagen Post ri vule leswaku, “lembe ni lembe, Timbhoni ta Yehovha ta ntlhanu ku ya eka khume ti endliwa vuhandzuri bya mbilu eXibedlhele xa Yunivhesiti ya Skejby eAarhus” handle ko pomperiwa ngati.

Xibedlhele lexikulu xa Rigshospitalet lexi nga ni vutshila xi tlhele xi va yin’wana ya tindhawu letikulu leti dyondzisaka vutshunguri eDenmark, xi sungule tsima ra matirhiselo lamanene ya ngati hi 2009 eNtsindza wa Tiko.

Madokodela ya le Denmark ma vone vumbhoni lebyi nga erivaleni bya leswaku ku pomperiwa ngati swi ni makhombo lamakulu. Hi 2009, xibedlhele xa Rigshospitalet, le Copenhagen, xi sungule tsima ro tirhisa ngati hi ndlela leyinene naswona phephahungu ra Berlingske ri vike leswaku sweswo swi hungute ku tirhisiwa ka ngati, leswi endleke leswaku “ku hunguteka nhlayo ya vavabyi lava vaka ni swiphiqo ni ya lava faka.” Swibedlhele swo tala eNtsindza wa Tiko swi sungule ku tirhisa maendlelo lama naswona swibedlhele leswi nga eswifundzheni swin’wana swi kunguhata ku tirhisa endlelo leri fanaka.

Phephahungu ra Berlingske ri tlhele ri vika leswaku Dokodela Morten Bagge Hansen, mulavisisi tlhelo mukongomisi wa ndhawu yo veka ngati exibedlhele xa Rigshospitalet, u vule leswaku ku hunguteka ka ku tirhisiwa ka ngati eDenmark “i nhluvuko lowukulu lowu vuyerisaka vavabyi.” Ku engetela kwalaho, Denmark Radio na phephahungu ra Kristeligt Dagblad swi tshahe Dokodela Astrid Nørgaard, Mukongomisi wa Vutshunguri exibedlhele xa Rigshospitalet la vuleke leswaku, “Timbhoni ta Yehovha hi tona ti endleke leswaku vuhandzuri lebyi nga tirhisiki ngati byi tiviwa hi vanhu vo tala.”

Media Contact(s):

International: J. R. Brown, Office of Public Information, tel. +1 718 560 5000

Denmark: Erik Jørgensen, tel. +45 59 45 60 00