Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

DECEMBER 3, 2012
ARMENIA

Tiko Ra Armenia Ri Lerisiwe Ku Riha Timbhoni Ta Yehovha Ta 17

Tiko Ra Armenia Ri Lerisiwe Ku Riha Timbhoni Ta Yehovha Ta 17

STRASBOURG, eFurwa—Hi November 27, 2012, Huvo ya Yuropa ya Timfanelo ta Vanhu yi humese xiboho xa leswaku mfumo wa Armenia wu fanele wu hakela vanhu va 17 lava aleke ku ya evusocheni hikwalaho ka ripfumelo ra vona mali ya R1 321 600 yo riha ni ya swikoxo swa magqweta hileswi wu deleleke timfanelo ta vona.

Hi 2005, majaha ya 17 lama nga Timbhoni ta Yehovha a ma ri eku endleni ka ntirho wa tiko. Hambiswiritano, loko ma xiye leswaku ntirho wolowo a wu lawuriwa hi vuthu ra nyimpi, ripfalo ra wona a ra ha ma pfumelelanga ku ya emahlweni ma tirha kutani ma suke ma famba. Endzhaku ka sweswo ma khomiwile ivi ma tengisiwa ehubyeni. Majaha man’wana ma pfaleriwile tin’hweti to hlayanyana endhawini leyi ku pfaleriwaka vanhu lava nga siki tengisiwaka kasi man’wanyana ya 11 ma hetelele ma gweviwa ku tshama ekhotsweni malembe lama sukelaka eka mambirhi ku ya eka manharhu.

Huvo ya Yuropa yi humese xiboho xa leswaku ku voniwa nandzu ni ku khotsiwa ka majaha lawa a swi nga ri enawini hikuva hi 2005 a wu nga si va kona nawu eArmenia lowu vulaka leswaku ku tshika ku endla ntirho wa tiko i ku tshova nawu. Huvo yi vule leswaku tiko ra Armenia ri tlule mfanelo ya ntshunxeko ni ya nsirhelelo ya Timbhoni hilaha swi vuriwaka hakona eka Xiboho xa vuntlhanu xa Ntwanano wa Yuropa wa Timfanelo ta Vanhu. Hambileswi hi ku famba ka nkarhi mfumo wa Armenia wu suleke milandzu leyi a wu yi veke majaha lawa ya 17, wu arile ku ma riha hikwalaho ka leswi wu ma tengiseke ni ku ma pfalela ekhotsweni swi nga ri enawini. Hikwalaho, Huvo yi lerise mfumo wa Armenia leswaku wu ma riha hileswi wu ma khomeke hi ndlela yo biha naswona wu hakela swikoxo swa magqweta.

Xiboho lexi xi landzela swiboho swinharhu leswi humesiweke hi Huvo ya Yuropa leswi lwisanaka ni tiko ra Armenia malunghana ni mhaka ya ku nga hlanganyeli etimhakeni ta tipolitiki. Eka milandzu hinkwayo ya mune, valawuri va le Armenia va ti khome hi ndlela yo biha Timbhoni ta Yehovha leti aleke ku ya evusocheni hikwalaho ka ripfalo ra tona naswona va ti khome onge hiloko ti ri swigevenga leswi nga ni khombo.

André Carbonneau, muyimeri wa vahehliwa, u te: “Xiboho lexi tekiweke hi Huvo ya Yuropa xi pfuna ku lulamisa ku khomiwa hi ndlela yo biha ka majaha lawa lama nga Timbhoni ta Yehovha. Ku hlula loku, loku landzelelanaka eka Huvo ya Yuropa loku lwisanaka ni tiko ra Armenia ku rhumela rungula leri nga ni matimba ematikweni man’wana lama nga swirho swa Huvo ya Yuropa swin’we ni matiko yo tanihi Eritrea, Korea Dzonga ni matiko man’wana lama nga eAsia Xikarhi malunghana ni mfanelo ya Timbhoni ta Yehovha yo ala ku ya evusocheni.”

Media Contacts:

David Semonian, Office of Public Information, tel. +1 718 560 5000

Armenia: Tigran Harutyunyan, tel. +374 93 900 482