Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

APRIL 7, 2014
JARIMANI

Richard Rudolph, Wanuna Loyi A Poneke eTikampeni Ta Nxaniso, U File eJarimani A Ri Ni Malembe Ya 102

Richard Rudolph, Wanuna Loyi A Poneke eTikampeni Ta Nxaniso, U File eJarimani A Ri Ni Malembe Ya 102

ESELTERS, le Jarimani—Richard Rudolph, un’wana wa Timbhoni ta Yehovha, loyi a poneke etikampeni ta ntlhanu ta nxaniso ta mfumo wa Manazi ni ku tiyiselela ku pfaleriwa ekhotsweni ehansi ka mfumo wa Makhomunisi, u file hi January 31, 2014. A a ri ni malembe ya 102.

Endzhaku ka loko mfumo wa Manazi wu sungule ku fuma hi 1933, ntirho wo chumayela wa Timbhoni ta Yehovha wu yirisiwile etindhawini to tala ta Jarimani. Hikwalaho ka sweswo, Timbhoni ta Yehovha ta 11 300 ti khotsiwile hi mfumo wa Manazi naswona ta 4 200 ti pfaleriwe etikampeni ta nxaniso, ku katsa na Nkulukumba Rudolph. Timbhoni ta kwalomu ka 1 500 ti file. Ehansi ka mfumo wa Manazi, Nkulukumba Rudolph u hete malembe ya kaye ekhotsweni naswona u ponile etikampeni ta ntlhanu ta nxaniso, ku katsa ni kampa ya Sachsenhausen ni ya Neuengamme leti a ti ri ni ndhuma yo biha, leti eka tona a ku pfaleriwe vanhu vo tlula 300 000 naswona ku feke vo tlula 140 000.

Richard Rudolph (elwangwini, emakumu le xineneni) a a ri un’wana wa swivochwa leswi sindzisiweke ku aka kampa ya nxaniso ya Neuengamme hi 1940.

Hi 1944, Nkulukumba Rudolph u rhurhiseriwe ekampeni ya Salzgitter-Watenstedt, leyi a yi lawuriwa hi kampa ya Neuengamme. Tidyondzo ta vukhongeri byakwe a ti nga n’wi pfumeleli leswaku a endla ntirho wihi ni wihi lowu fambisanaka ni ku endla tikulu naswona hikwalaho ka sweswo, u xungetiwe hi ku dlayiwa. Hambiswiritano, socha rin’wana ra SS leri a ri ri ni musa, ri fihle Nkulukumba Rudolph eka lori leri a ri rhwala swakudya hikwalaho ka leswi a ri hlamarisiwa hi tidyondzo ta vukhongeri bya Rudolph, naswona sweswo swi endle leswaku a pona ku dlayiwa.

Endzhaku ka Nyimpi ya Vumbirhi ya Misava, Rudolph u hambeta a chumayela tanihi un’wana wa Timbhoni ta Yehovha exiphen’wini xa tiko lexi vuriwaka Soviet Occupation Zone, lexi endzhaku ka nkarhi xi veke tiko ra German Democratic Republic (GDR). U tlhele a khomiwa hi 1950 ivi a gweviwa ku tshama ekhotsweni. U hete malembe yo tlula 19 ekhotsweni loko ma hlanganisiwa hinkwawo, hikwalaho ka tidyondzo ta vukhongeri byakwe.

Ann-Jacqueline Frieser na Richard Rudolph, loyi matimu ya vutomi lawa a ma tsaleke ma kumeke sagwadi hi 2009.

Ku ringana makume ya malembe, Richard Rudolph u tivekele pakani yo chumayela van’wana rungula ra le Bibeleni ni ku va hlamusela leswi a swi dyondzeke enkarhini lowu hundzeke malunghana ni vuyelo byo biha bya xihlawuhlawu. Hi 2009, Ann-Jacqueline Frieser, xichudeni xa Mujarimani, xi kume tisagwadi timbirhi eka mphikizano wa Federal President’s History Competition lowu a wu ri ni nhloko-mhaka leyi nge “Tinghwazi: Leti Xiximiwaka – Leti A Ti Nga Twisisiwi – Ni Leti Rivariweke,” hikwalaho ka leswi a swi tsaleke hi ta matimu ya vutomi bya Richard Rudolph ni mbulavurisano wakwe na yena. U kume ndhawu yo sungula exifundzeni xa Rheinland-Palatinate naswona u ve un’wana wa swichudeni swinharhu leswi kumeke sagwadi ya Federal.

Wolfram Slupina, muvulavuleri wa Timbhoni ta Yehovha eJarimani, u te: “Richard Rudolph a a nga ri munghana loyi a rhandzekaka tlhelo mugandzeri-kulobye ntsena kambe u tlhele a va xihlovo xa nkoka xa matimu. Ndlela leyi a hanyeke ha yona tanihi wanuna wa ripfumelo ni xivindzi lexi hlamarisaka i xikombiso eka hina hinkwerhu.”

Media Contact(s):

International: J. R. Brown, Office of Public Information, tel. +1 718 560 5000

Germany: Wolfram Slupina, tel. +49 6483 41 3110