Nghena endzeni

Swiletelo Swa Nhlangano Wa Mahanyelo Ni Ntirho Wa Hina Wo Chumayela

Swiletelo Swa Nhlangano Wa Mahanyelo Ni Ntirho Wa Hina Wo Chumayela

Leswi Nga eNdzeni

 

Ndzimana

Marito Yo Pfula

 2

Leswi Hi Swi Dyondzaka eBibeleni

 3

Ndzetelo Wa Ntirho Wo Chumayela

 4

Mahanyelo Ya Vakreste

 5

Marito Yo Gimeta

 6

Tinyiketele Eku Hlayeni Ni Le Ku Dyondziseni

 7

Ndzayo

 8

Nkarhi

 9

Riendzo Ra Mulanguteri Wa Muganga

 10

Vhiki Ra Nhlengeletano Ya Muganga Kumbe Ya Xifundzha

 11

Vhiki Ra Xitsundzuxo

 12

Mulanguteri Wa Mahanyelo Ni Ntirho Wa Hina Wo Chumayela

 13

Mutshamaxitulu Wa Mahanyelo Ni Ntirho Wa Hina Wo Chumayela

 14

Muhlanganisi Wa Huvo Ya Vakulu

 15

Mutsundzuxi Wa Vakulu Ni Malandza

 16

Titlilasi Ta Vumbirhi

 17

Tivhidiyo

 18

1. Tidyondzo leti ti ta fambisiwa hi ndlela leyi kombisiweke eka Xiyimiso Xa Mahanyelo Ni Ntirho Wa Hina Wo Chumayela ni hi ku landza swiletelo leswi nga laha hansi. Kombelani vahuweleri hinkwavo leswaku va tsarisa va ta nyikela mimbulavulo eka tidyondzo leti. Van’wana lava taka nkarhi ni nkarhi etidyondzweni va nga tsarisa loko va pfumela eka leswi Bibele yi swi dyondzisaka naswona va hanya tanihi Vakreste.—be tl. 282.

 2. Marito Yo Pfula: U nga hundzi timinete tinharhu. Endzhaku ka risimu ro pfula ni xikhongelo, mutshamaxitulu u ta chumbutela vayingiseri leswi nga ta dyondziwa a tlhela a vutisa xivutiso lexi nga ta kambisisiwa hi vhiki rero lexi nga eka Phepha Ra Tinhlamulo Ra Mahanyelo Ni Ntirho Wa Hina Wo Chumayela.

 3. Leswi Hi Swi Dyondzaka eBibeleni:

  • Mbulavulo: 10 wa timinete. Nhlokomhaka leyi nga ni tinhla timbirhi kumbe tinharhu yi kumeka eka Xiyimiso Xa Mahanyelo Ni Ntirho Wa Hina Wo Chumayela. Mbulavulo lowu wu ta averiwa nkulu kumbe nandza wa vutirheli la fanelekaka. Loko ku sunguriwa buku leyintshwa ya Bibele eka ku hlaya ka Bibele ka vhiki rero, ku ta tlangiwa ni vhidiyo ya xingheniso xa buku yoleyo. Xivulavuri xi ta hlamusela ndlela leyi vhidiyo yi fambisanaka ha yona ni nhlokomhaka. Kambe xi fanele xi tiyiseka leswaku xi ti hlanganisa kahle tinhla leti boxiweke eka xiyimiso. Loko nkarhi wu pfumela, xi ta vulavulela swifaniso ni Matsalwa lama kombisiweke leswi fambisanaka ni mhaka leyi ku dyondziwaka ha yona.

  •   Endla Ndzavisiso: 8 wa timinete. Leri i bulo ra swivutiso ni tinhlamulo leri nga riki na xingheniso kumbe mahetelelo. Ri fanele ri fambisiwa hi nkulu kumbe nandza wa vutirheli la fanelekaka. Xivulavuri xi ta hlela nkarhi lowu xi nga wu hetaka eka xivutiso ha xin’we hi ku ya hi ndlela leyi rungula rero ri nga pfunaka vandlha ha yona. Hambiswiritano, xi fanele xi vutisa swivutiso hinkwaswo. Xi ta kambisisa ku vona loko Matsalwa lama kombisiweke eka swivutiso swimbirhi swo sungula ma fanele ma hlayiwa hinkwawo kumbe e-e. Lava hlamulaka a va fanelanga va hundza tisekoni ta 30.

  • Ku Hlayiwa Ka Bibele: U nga hundzi timinete ta mune. Mbulavulo lowu wu ta nyikeriwa hi makwerhu wa xinuna. U fanele a hlaya rungula leri a averiweke rona handle ko vula xingheniso kumbe mahetelelo. Mutshamaxitulu u ta pfuna lava hlayaka leswaku va hlaya kahle, va hlaya hi ndlela leyi twisisekaka, va khuluka, va kandziyisa mongo hi ndlela leyi faneleke, va cincacinca rito, va hefemula hi ndlela leyi faneleke ni ku hlaya hi ndlela ya ntumbuluko.

  4. Ndzetelo Wa Ntirho Wo Chumayela: U nga hundzi 15 wa timinete. Xiyenge lexi xi endleriwe ku nyika hinkwavo nkarhi wo praktisa ku chumayela ni ku antswisa ndlela leyi va chumayelaka ni ku dyondzisa ha yona. Swichudeni leswi averiweke ku endla riendzo ro sungula ni ku vuyela ro sungula ni ra vumbirhi, swi fanele swi tirhisa swiringanyeto swo sungula mabulo leswi nga eka tluka ro sungula ra Xiyimiso Xa Mahanyelo Ni Ntirho Wa Hina Wo Chumayela. Vahuweleri va ta tihlawulela loko va lava ku nyika n’wini wa muti buku kumbe ku n’wi komba vhidiyo leyi nga eka Switirhisiwa Swo Pfuna Ku Dyondzisa. Eka Xiyimiso ku kombisiwe nkarhi wa mbulavulo ha wun’we wa swichudeni naswona mikarhi yin’wana xichudeni xi nga ha nyikiwa swiletelo leswi engetelekeke. Swichudeni a swi fanelanga swi nghenisa rungula rin’wana leri nga riki kona eka nkongomiso hi xikongomelo xo lava ku tirhisa nkarhi hinkwawo lowu swi nyikiweke wona. Mikombiso yin’wana leyi lunghiseleriweke kahle yi nga hela ku nga si hela ni minete. Mikarhi yin’wana vakulu va nga ha averiwa mimbulavulo ya swichudeni.

  • Tivhidiyo Ta Swiringanyeto Swo Sungula Mabulo: Tivhidiyo ta swiringanyeto swo sungula mabulo ti ta tlangiwa hi ku landzelana ka tona ku tlhela ku buriwa ha tona n’hweti ni n’hweti. Tivhidiyo leti ti ta kombisa riendzo ro sungula, ku vuyela ro sungula ni ku vuyela ra vumbirhi. Xiyenge lexi xi fanele xi fambisiwa hi mutshamaxitulu.

  • Riendzo Ro Sungula: Ri nga ha nyikiwa makwerhu wa xinuna kumbe wa xisati. Loyi a pfunetaka u fanele a ri wa rimbewu leri fanaka kumbe xirho xa ndyangu. Va nga ha hetisisa xiavelo lexi va yimile kumbe va lo tshama. Xichudeni xi fanele xi xeweta hi ndlela leyi tolovelekeke endhawini yoleyo. Mhaka leyi ku vulavuriwaka ha yona yi fanele yi sekeriwa eka xiringanyeto xo sungula mabulo.

  • Ku Vuyela Ro Sungula: Ri nga ha nyikiwa makwerhu wa xinuna kumbe wa xisati. Loyi a pfunetaka u fanele a ri wa rimbewu leri fanaka. (km 5/97 tl. 2) Va nga ha hetisisa xiavelo lexi va yimile kumbe va lo tshama. Xichudeni xi fanele xi kombisa ndlela yo sungula bulo loko ku vuyeriwa eka munhu loyi a kombiseke ku tsakela eka riendzo ro sungula. Mhaka leyi ku vulavuriwaka ha yona yi fanele yi sekeriwa eka xiringanyeto xo sungula mabulo.

  • Ku Vuyela Ra Vumbirhi: Ri nga ha nyikiwa makwerhu wa xinuna kumbe wa xisati. Loyi a pfunetaka u fanele a ri wa rimbewu leri fanaka. (km 5/97 tl. 2) Va nga ha hetisisa xiavelo lexi va yimile kumbe va lo tshama. Xichudeni xi fanele xi kombisa ndlela yo sungula bulo loko ku vuyeriwa ra vumbirhi eka munhu loyi a kombiseke ku tsakela. Mhaka leyi ku vulavuriwaka ha yona yi fanele yi sekeriwa eka xiringanyeto xo sungula mabulo.

  •   Dyondzo Ya Bibele: Yi nga nyikiwa makwerhu wa xinuna kumbe wa xisati. Loyi a pfunetaka u fanele a ri wa rimbewu leri fanaka. (km 5/97 tl. 2) Va nga ha hetisisa xiavelo lexi va yimile kumbe va lo tshama. Xichudeni xi fanele xi kombisa ndlela yo fambisa dyondzo ya Bibele leyi se swi nga ni mavhiki yi sunguriwile. A swi bohi leswaku ku va ni xingheniso kumbe mahetelelo handle ka loko xichudeni xi tirhela eka yin’wana ya tidyondzo leti. A hi xikolokolo ku hlaya tindzimana hinkwato leti bulo ri sekeriweke eka tona, hambileswi sweswo swi nga ha endliwaka. Ku fanele ku kombisiwa ndlela leyinene yo dyondzisa.

  • Mbulavulo: Xiavelo lexi xa xichudeni a xi lavi mupfuni i mbulavulo lowu nga ta nyikeriwa hi makwerhu wa xinuna.

  5. Mahanyelo Ya Vakreste: Endzhaku ka risimu, eka timinete leti landzelaka ta 15 ta xiyenge lexi ku ta va ni mbulavulo wun’we kumbe yimbirhi leyi lunghiseleriweke ku pfuna vayingiseri leswaku va hanya hi ku pfumelelana ni Rito ra Xikwembu. Handle ka loko ku kombisiwile, mimbulavulo hinkwayo yi ta fambisiwa hi vakulu kumbe malandza ya vutirheli lama fanelekaka kambe swilaveko swa vandlha swi ta fambisiwa hi vakulu ntsena.

  • Dyondzo Ya Bibele Ya Vandlha: 30 wa timinete. Dyondzo leyi yi fanele yi fambisiwa hi vakulu lava fanelekaka. (Loko vakulu va ri vatsongo va nga ha tirhisa ni malandza ya vutirheli lama fanelekaka loko va vona swi fanerile). Huvo ya vakulu yi fanele yi endla xiboho xa leswaku i vamani lava fanelekaka ku fambisa Dyondzo ya Bibele ya Vandlha. Lava hlawuriweke va fanele va kota ku fambisa dyondzo hi ndlela leyi vuyerisaka va tlhela va hlayisa nkarhi, va kandziyisa matsalwankulu ni ku pfuna hinkwavo leswaku va tlangela rungula leri a ri dyondziwa. Va ta kuma leswi nga va pfunaka loko va pfuxeta nkongomiso lowu humesiweke wa ndlela leyi Dyondzo ya Xihondzo Xo Rindza yi faneleke yi fambisiwa ha yona. Loko swi koteka, ku fanele ku tirhisiwa vafambisi ni vahlayi vo hambanahambana vhiki ni vhiki. Loko mutshamaxitulu a vula leswaku dyondzo yi fanele yi katsakanyiwa, mufambisi wa dyondzo u ta vona leswaku a nga yi katsakanya njhani. A nga ha hlawula leswaku tindzimana tin’wana ti nga hlayiwi.

  6. Marito Yo Gimeta: U nga hundzi timinete tinharhu. Mutshamaxitulu u ta pfuxeta tinhla ta nkoka leti ku buriweke ha tona eka siku rero ni ku kambisisa nhlamulo ya xivutiso xa vhiki rero lexi nga eka Phepha Ra Tinhlamulo Ra Mahanyelo Ni Ntirho Wa Hina Wo Chumayela. U fanele a chumbutela vandlha leswi nga ta dyondziwa vhiki leri landzelaka kumbexana a boxa xivutiso lexi nga ta hlamuriwa vhiki leri landzelaka. A nga vula ni mavito ya vamakwerhu lava nga ta va ni swiavelo vhiki leri landzelaka loko nkarhi wu pfumela. Handle ka loko swi kombisiwile, switiviso leswi bohaka ni mapapila swi fanele swi hlayeriwa vandlha hi mutshamaxitulu loko a ri karhi a gimeta tidyondzo. Switiviso leswi tolovelekeke swo tanihi malunghiselelo ya nsimu ni ku basisa a swi fanelanga swi tivisiwa exitejini kambe swi fanele swi nameketiwa ebodweni ya switiviso. Loko switiviso ni mapapila lama faneleke ma hlayeriwa vandlha ma lehile, mutshamaxitulu u fanele a kombela vamakwerhu lava nga ni mimbulavulo eka xiyenge xa Mahanyelo Ya Vakreste leswaku va komisa mimbulavulo ya vona. (Vona  tindzimana 5 na  9.) Tidyondzo leti ti ta gimeta hi risimu ni xikhongelo.

 7. Tinyiketele Eku Hlayeni Ni Le Ku Dyondziseni: Ku sukela hi vhiki ra January 7, 2019, mutshamaxitulu u fanele a tirhisa broxara leyi nge Tinyiketele Eku Dyondziseni loko a bumabumela ni ku tsundzuxa swichudeni. Xichudeni xi fanele xi tirhela eka dyondzo leyi nga eka swiangi leyi nga etlhelo ka xiavelo xa xona lexi nga eka Xiyimiso Xa Mahanyelo Ni Ntirho Wa Hina Wo Chumayela. Eka vhiki ro sungula ra n’hweti, mutshamaxitulu u ta burisana ni vayingiseri hi  dyondzo leyi kumekaka eka broxara leyi nge Tinyiketele Eku Dyondziseni. Eka ndhawu leyi ku tsariweke marito lama nge “U Tirhe Njhani? Tsala Laha,” ku ta tsala xichudeni ntsena naswona mutshamaxitulu a nga fanelanga a tsala eka yona.

  8. Ndzayo: Endzhaku ka loko xichudeni ha xin’we xi hetile xiavelo xa xona, mutshamaxitulu u ta tirhisa broxara leyi nge Tinyiketele Eku Dyondziseni leswaku a bumabumela ni ku tsundzuxa xichudeni hi minete yin’we. Loko mutshamaxitulu a tivisa mbulavulo wa xichudeni, a nge boxi dyondzo leyi xi tirhelaka eka yona. Hambiswiritano, loko xichudeni xi xi hetisisile xiavelo xa xona, mutshamaxitulu u ta xi bumabumela kutani a boxa dyondzo leyi a xi tirhela eka yona ivi a vula leswaku hikwalaho ka yini a vula leswaku xi endle kahle kumbe hikwalaho ka yini xi fanele xi tlhela xi tirhela eka dyondzo yoleyo. Mutshamaxitulu a nga boxa tinhla tin’wana leti a vonaka onge ti ta pfuna xichudeni kumbe vandlha leti a ti xiyeke loko xichudeni xi ri karhi xi hetisisa xiavelo xa xona. Xichudeni xi nga ha nyikiwa ndzayo yin’wana exihundleni leyi sekeriweke eka broxara leyi nge Tinyiketele Eku Dyondziseni kumbe eka buku leyi nge Xikolo Xa Vutirheli endzhaku ka tidyondzo kumbe hi nkarhi wun’wana.—Leswaku u twa hi ta ntirho wa mulanguteri wa Mahanyelo Ni Ntirho Wa Hina Wo Chumayela ni wa mutsundzuxi wa vakulu ni malandza vona  tindzimana 13 na  16.

    9. Nkarhi: A ku na mbulavulo ni wun’we lowu faneleke wu hundza nkarhi lowu pimeriweke wona hambi ku ri mutshamaxitulu a nga fanelanga a tlurisa nkarhi lowu a nyikiweke wona. Loko swichudeni swi dya nkarhi swi fanele swi yimisiwa hi ndlela ya vutlhari. Loko vakulu ni malandza va dya nkarhi, mutsundzuxi wa vakulu ni malandza u fanele a va nyika ndzayo exihundleni. Tidyondzo hinkwato ku katsa swikhongelo ni tinsimu swi fanele swi heta awara ni timinete ta 45.

 10. Riendzo Ra Mulanguteri Wa Muganga: Loko vandlha ri endzeriwe hi mulanguteri wa muganga, tidyondzo ti fanele ti fambisiwa hilaha swi hlamuseriweke ha kona eka Xiyimiso Xa Mahanyelo Ni Ntirho Wa Hina Wo Chumayela handle ka leswi landzelaka: Dyondzo Ya Bibele Ya Vandlha a yi nge vi kona, yi ta siviwa hi mbulavulo wa mulanguteri wa muganga lowu nga ta teka 30 wa timinete. Emahlweni ka mbulavulo, mutshamaxitulu u ta pfuxeta leswi dyondziweke ni ku chumbutela vayingiseri leswi nga ta dyondziwa vhiki leri landzelaka a tlhela a hlaya switiviso ni mapapila lama bohaka ku hlayeriwa vandlha endzhaku ka sweswo u ta vitana mulanguteri wa muganga. Endzhaku ka mbulavulo, mulanguteri wa muganga u ta gimeta tidyondzo hi risimu leri a ri hlawuleke. A ku na titlilasi leti faneleke ti khomiwa hi vhiki ra riendzo ra mulanguteri wa muganga. Ntlawa wa ririmi rimbe wu nga ha khoma tidyondzo ta wona hambi loko mulanguteri wa muganga a endzele vandlha rero. Hambiswiritano, ntlawa wolowo wu fanele wu hlangana ni vandlha hi nkarhi wa mbulavulo wa mulanguteri wa muganga.

 11. Vhiki Ra Nhlengeletano Ya Muganga Kumbe Ya Xifundzha: Tidyondzo a ti nge vi kona hi vhiki ra nhlengeletano ya muganga kumbe ya xifundzha. Un’wana ni un’wana u fanele a tidyondzela rungula leri a ri fanele ri dyondziwa eminhlanganweni hi vhiki rero kumbe va tidyondzela rona tanihi ndyangu.

 12. Vhiki Ra Xitsundzuxo: Loko Xitsundzuxo xi ri exikarhi ka vhiki, tidyondzo ta le xikarhi ka vhiki a ti nge vi kona. Kambe ku nga hlanganiwa leswaku ku yiwa ensin’wini hi siku ra Xitsundzuxo.

  13. Mulanguteri Wa Mahanyelo Ni Ntirho Wa Hina Wo Chumayela: Nkulu loyi a hlawuriweke hi huvo ya vakulu u ta va mulanguteri wa Mahanyelo Ni Ntirho Wa Hina Wo Chumayela. U  fanele a tiyiseka leswaku tidyondzo ti fambisiwa hi ndlela leyi hlelekeke ni hi ku landza nkongomiso lowu. Ku fanele ku va ni ku vulavurisana lokunene exikarhi ka yena ni mutsundzuxi wa vakulu ni malandza. Loko Xiyimiso Xa Mahanyelo Ni Ntirho Wa Hina Wo Chumayela xa n’hweti yoleyo se xi kumeka, u fanele a nyika swichudeni swiavelo swa n’hweti yoleyo. (Vona  ndzimana 4.) Swichudeni swi fanele swi nyikiwa swiavelo swa swona ka ha sale mavhiki manharhu leswaku swi hetisisa xiavelo xexo, ku tirhisiwa fomo ya Xiavelo Xa Mahanyelo Ni Ntirho Wa Hina Wo Chumayela (S-89).

 14. Mutshamaxitulu Wa Mahanyelo Ni Ntirho Wa Hina Wo Chumayela: Vhiki ni vhiki, nkulu un’we u ta va mutshamaxitulu wa Mahanyelo Ni Ntirho Wa Hina Wo Chumayela. (Laha ku nga ni nhlayo yitsongo ya vakulu, malandza ya vutirheli ma nga ha averiwa ku va mutshamaxitulu loko ma faneleka.) U ta vula marito yo pfula ni yo gimeta nakambe hi yena a nga ta rhula tivhidiyo ta swiringanyeto swo sungula mabulo ku katsa ni tivhidiyo ta xingheniso xa dyondzo leyi kumekaka eka broxara leyi nge Tinyiketele Eku Dyondziseni. U tlhela a tivisa mimbulavulo hinkwayo naswona a nga tlhela a va ni mbulavulo wo karhi na yena kambe swi ta ya hi ku, ku ni vakulu vangani evandlheni. A nga fanelanga a vulavula ngopfu loko tidyondzo ti ri karhi ti ya emahlweni. Huvo ya vakulu hi yona yi nga ta hlawula vamakwerhu lava fanelekaka kahle eka xiavelo lexi. Nkulu ha un’we la fanelekaka u ta averiwa ku va mutshamaxitulu nkarhi ni nkarhi. Mulanguteri wa tidyondzo ta Mahanyelo Ni Ntirho Wa Hina Wo Chumayela a nga ha averiwa ku va mutshamaxitulu hi ku phindhaphindha ku tlula vakulu lavan’wana kambe swi ta ya hi leswaku evandlheni rero ku ni vakulu vangani. Loko nkulu a faneleka ku fambisa Dyondzo Ya Bibele Ya Vandlha, swi le rivaleni leswaku wa faneleka ku va mutshamaxitulu. Hambiswiritano, hi kombela mi xiya leswaku nkulu loyi a nga mutshamaxitulu u fanele a bumabumela swichudeni hinkwaswo a tlhela a swi nyika ndzayo loko swi fanerile. Nakambe u fanele a tiyiseka leswaku tidyondzo ti hela hi nkarhi. (Vona  tindzimana 6 na  9.) Loko mutshamaxitulu a swi tsakela naswona ku ri ni ndhawu leyi eneleke eplatifomo ku nga ha vekiwa xikurisamarito leswaku a ta kota ku vitana xivulavuri ha xin’we a ri kwalaho leswaku xi ya yima laha xi faneleke xi nyikela mbulavulo xi ri kona. Hilaha ku fanaka, loko mutshamaxitulu a swi lava a nga tshama eplatifomo hi nkarhi wa mbulavulo wa ku hlayiwa ka Bibele ni hi nkarhi wa xiyenge lexi nge Ndzetelo Wa Ntirho Wo Chumayela. Leswi swi nga ha hlayisa nkarhi.

 15. Muhlanganisi Wa Huvo Ya Vakulu: Muhlanganisi wa huvo ya vakulu u ta endla swiavelo swa mimbulavulo hinkwayo handle ka mimbulavulo ya swichudeni. Leswi swi katsa ni ku avela nkulu ha un’we vhiki ni vhiki leswaku a va mutshamaxitulu eka vakulu lava hlawuriweke hi huvo ya vakulu. Hi ku tirhisana ni mulanguteri wa Mahanyelo Ni Ntirho Wa Hina Wo Chumayela, muhlanganisi wa huvo ya vakulu u fanele a tiyiseka leswaku kopi ya xiyimiso xa tidyondzo ya nameketiwa ebodweni ya switiviso.

  16. Mutsundzuxi wa Vakulu Ni Malandza: Swi nga va kahle ngopfu loko xiavelo lexi xo nyikiwa nkulu loyi a nga xivulavuri lexi nga ni ntokoto. Vutihlamuleri bya mutsundzuxi wa vakulu ni malandza i ku nyika vakulu ni malandza ya vutirheli ndzayo exihundleni loko swi fanerile mayelana ni mimbulavulo hinkwayo leyi va yi nyikelaka ku katsa ni mimbulavulo ya le rivaleni, ku fambisa Xihondzo xo Rindza ni Dyondzo Ya Bibele Ya Vandlha ku katsa ni ku hlaya tipharagrafu etidyondzweni. (Vona  ndzimana 9.) Loko ku ri ni vakulu vo hlayanyana lava nga swivulavuri leswi nga ni ntokoto evandlheni, vakulu lava fanelekaka va nga ha cincana lembe ni lembe ku endla xiavelo lexi. A swi bohi leswaku mutsundzuxi wa vakulu ni malandza a nyikela xitsundzuxo endzhaku ka mbulavulo wun’wana ni wun’wana.

 17. Titlilasi Ta Vumbirhi: Loko mavandlha ma ri ni swichudeni swo tala ma nga ha khoma titlilasi ta vumbirhi leswaku swichudeni swi ta kota ku nyikela mimbulavulo. Tlilasi ha yin’we yi  fanele yi va ni mutsundzuxi wa vakulu ni malandza loyi a fanelekaka. Loko nhlayo ya va kulu yi ri yitsongo, ku nga ha tirhisiwa nandza wa vutirheli loyi a fanelekaka. Huvo ya vakulu yi fanele yi endla xiboho xa leswaku i mani loyi a nga ta endla xiavelo lexi kumbe yi lava leswaku vamakwerhu vo hambanahambana va cincana ku endla xiavelo lexi. Mutsundzuxi u fanele a landzela nkongomiso lowu hlamuseriweke eka  ndzimana 8. Loko ku ri ni titlilasi ta vumbirhi, swichudeni swi fanele swi komberiwa ku ya etitlilasini ta swona endzhaku ka xiyenge lexi nge Endla Ndzavisiso. Swi fanele swi tlhela swi hlangana ni vandlha hinkwaro loko ku sungula xiyenge lexi nge Mahanyelo Ya Vakreste. Loko ku buriwa hi vhidiyo ya swiringanyeto swo sungula mabulo, lava nga etlilasini ya vumbirhi va nga hlalela kumbe va yingisela va ri etlilasini yoleyo loko swi koteka. Loko sweswo swi nga koteki, mutsundzuxi u fanele a burisana na vona hi vhidiyo ya kona hi ku tirhisa xitirhisiwa xa elektroniki lexi rhwalekaka.

 18. Tivhidiyo: Ku ta va ni tivhidiyo tin’wana leti nga ta tlangiwa leti fambisanaka ni tidyondzo leti. Tivhidiyo ta kona ti ta kumeka eka JW Library app naswona u nga ti dawuniloda hi ku tirhisa switirhisiwa swo hambanahambana. Endzhaku ka loko tivhidiyo ta swiringanyeto swo sungula mabulo ti tlangiwile eka tidyondzo ta le xikarhi ka vhiki, ti nga tlangiwa loko vamakwerhu va hlengeletanile va lunghekela ku ya ensin’wini.