Nghena endzeni

Hundzela eka leswi nga endzeni

“Onge A Nga . . . Hetisisa Swikongomelo Swa Wena Hinkwaswo”

“Onge A Nga . . . Hetisisa Swikongomelo Swa Wena Hinkwaswo”

“Kuma ntsako lowu heleleke eka Yehovha, kutani u ta ku nyika leswi komberiwaka hi mbilu ya wena.”—PS. 37:4.

TINSIMU: 89, 140

1. I yini leswi muntshwa a faneleke a swi hlela ka ha ri emahlweni naswona ha yini a nga fanelanga a vilela? (Vona xifaniso lexi nga eku sunguleni ka xihloko lexi.)

VANTSHWA kumbexana ma swi tiva leswaku loko munhu a nga si teka riendzo, u sungula hi ku hlela kahle. Phela vutomi byi fana ni ku teka riendzo, naswona mi fanele mi sungula sweswi ku hlela leswaku mi lava ku endla yini hi vutomi bya n’wina. Hambiswiritano, ku hlela ka ha ri emahlweni a swi olovi. Nhwanyana la vuriwaka Heather u ri: “Ku hlela leswi u lavaka ku swi endla hi vutomi bya wena a hi matlangwana.” Kambe mi nga vileli hikuva Yehovha u ri: “U nga chavi . . . hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna.”—Esa. 41:10.

2. U swi tiva njhani leswaku Yehovha u lava leswaku u va ni vumundzuku lebyinene?

2 Yehovha u lava leswaku u hlela vumundzuku bya wena hi vutlhari. (Ekl. 12:1; Mat. 6:20) U lava u tiphina hi vutomi. Swilo swo saseka leswi u swi vonaka, mimpfumawulo ni ntumbuluko, swi kombisa leswaku hakunene u Yehovha u lava u tiphina hi vutomi. Wa khathala ha hina naswona u hi dyondzisa ndlela leyinene leyi hi faneleke hi hanya ha yona. Loko Yehovha a vulavula hi lava nga swi yingisiki switsundzuxo swakwe u ri:  “Mi hlawule nchumu lowu ndzi nga wu tsakeriki. . . . Maswivo! Malandza ya mina ma ta tsaka, kambe n’wina mi ta khomiwa hi tingana. Maswivo! Malandza ya mina ma ta huwelela hi ku tsaka hikwalaho ka xiyimo lexinene xa mbilu.” (Esa. 65:12-14) Loko hi endla swiboho leswinene, ku dzuneka hinkwako ku ya eka Yehovha.—Swiv. 27:11.

TIPAKANI LETI NGA TA ENDLA LESWAKU U TSAKA

3. I yini leswi Yehovha a lavaka leswaku u swi endla hi vutomi bya wena?

3 Yehovha u lava leswaku u endla yini hi vutomi bya wena? U vumbe vanhu leswaku va tiphina hi ku dyondza ha yena ni ku n’wi tirhela hi ku tshembeka. (Ps. 128:1; Mat. 5:3) Hikwalaho, vanhu va hambanile ni swiharhi leswi enerisiwaka ntsena hi ku dya, ku nwa ni ku tswala vana. Ku hambana ni swiharhi, Xikwembu xi lava leswaku u tivekela tipakani leti nga ta endla leswaku u tsaka. Muvumbi wa hina i “Xikwembu xa rirhandzu,” “Xikwembu lexi tsakeke” lexi hi vumbeke hi “xifaniso xa xona.” (2 Kor. 13:11; 1 Tim. 1:11; Gen. 1:27) Loko u tekelela Xikwembu xa hina lexi nga ni rirhandzu u ta tsaka. Xana u tshame u tsaka hikwalaho ko nyika van’wana hilaha tsalwa leri ri vulaka hakona loko ri ku: “Ku nyika swi tisa ntsako lowukulu ku tlula ku amukela?” (Mint. 20:35) Leyi hi yona ndlela leyi vanhu va faneleke va hanya ha yona. Xisweswo, Yehovha u lava leswaku leswi u swi hlelaka, swi kombisa leswaku wa n’wi rhandza naswona u rhandza vanhu van’wana.—Hlaya Matewu 22:36-39.

4, 5. Yesu a a tsakisiwa hi yini?

4 Yesu Kreste u vekele vantshwa xikombiso lexinene ngopfu. A swi kanakanisi leswaku loko a ha ri ntsongo a tlanga ni ku titsakisa ku fana ni vana van’wana. Rito ra Xikwembu ri vula leswaku ku ni “nkarhi wa ku hleka . . ni nkarhi wa ku tlulatlula.” (Ekl. 3:4) Yesu u tlhele a tiyisa vuxaka bya yena na Yehovha hi ku dyondza Matsalwa. Loko a ri ni malembe ya 12, vadyondzisi va le tempeleni va hlamarisiwe hi “ku twisisa kakwe ni tinhlamulo takwe” leti a ti sekeriwe eMatsalweni.—Luka 2:42, 46, 47.

5 Yesu a a tshama a tsakile. I yini lexi a xi endla leswaku a tsaka? A a swi tiva leswaku Xikwembu a xi lava leswaku a ‘vula mahungu lamanene eka swisiwana . . . ni ku endla lava feke mahlo leswaku va tlhela va vona.’ (Luka 4:18) Ku endla leswi Xikwembu xi n’wi rhumeke swona, hi swona leswi a swi endla Yesu a tsaka. Pisalema 40:8 yi hlamusela ndlela leyi a a titwa ha yona, yi ri: “Oho Xikwembu xanga, ndzi tsakisiwe hi ku endla ku rhandza ka wena.” A a swi rhandza ku dyondzisa vanhu hi Tata wakwe wa le Tilweni. (Hlaya Luka 10:21.) Endzhaku ko dyondzisa wansati un’wana hi vugandzeri bya ntiyiso, Yesu u byele vadyondzisiwa vakwe a ku: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yoh. 4:31-34) Ku rhandza Xikwembu ni vanhu hi swona leswi a swi endla leswaku Yesu a tsaka. Na wena swi nga ku tsakisa.

6. Hikwalaho ka yini swi ri swinene ku bula ni Vakreste lava nga ni ntokoto hi tipakani ta wena?

6 Vakreste vo tala va kume ntsako lowukulu hikwalaho ka leswi a va ri maphayona loko va ha ri vantshwa. Tinyike nkarhi wo bula ni van’wana va vona hi tipakani ta wena. Bibele yi ri: “Makungu ma pfilunganyeka laha ku nga riki na ku kanerisana ka le xihundleni, kambe laha ku nga ni vatsundzuxi vo tala swilo swa humelela.” (Swiv. 15:22) Vanhu volavo lava rhandzaka Xikwembu, va ta ku hlamusela swilo swo tala leswi u nga swi dyondzaka loko u phayona naswona swi nga ta ku pfuna vutomi bya wena hinkwabyo. Endzhaku ka loko Yesu a dyondze swo tala eka Tata wakwe loko a ha ri etilweni, u tlhele a dyondza swo tala ni loko a endla ntirho wakwe wo chumayela laha misaveni. Hi xikombiso, u dyondze ndlela yo fikelela timbilu ta vanhu hi mahungu lamanene ni ku tshama a tshembekile loko a ringiwa. (Hlaya Esaya 50:4; Hev. 5:8; 12:2) Sweswi a hi kambisiseni mitirho yin’wana ya nkarhi hinkwawo leyi nga ku tiselaka ntsako.

KU ENDLA VADYONDZISIWA I NTIRHO WO TSAKISA SWINENE

7. I yini lexi endlaka vantshwa vo tala va rhandza ntirho wo endla vadyondzisiwa?

7 Yesu u te: “Fambani mi ya endla vanhu . . . vadyondzisiwa, . . . mi va dyondzisa.” (Mat. 28:19, 20) Loko u tivekela pakani yo endla vanhu  vadyondzisiwa, u ta va u hlawula ntirho lowunene lowu tsakisaka Xikwembu. Kambe ku fana ni mitirho hinkwayo, swi ta ku tekela nkarhi ku va ni vutshila entirhweni lowu. Timothy loyi a sunguleke ku phayona a ha ri muntshwa u te: “Swa ndzi tsakisa ku tirhela Yehovha ndzi ri eka ntirho wa nkarhi hinkwawo hikuva i ndlela leyi ndzi n’wi kombisaka ha yona leswaku ndza n’wi rhandza. Loko ndza ha ku sungula, a swi ndzi tikela ku sungula tidyondzo ta Bibele, kambe hi ku famba ka nkarhi ndzi rhurhele endhawini yin’wana laha ndzi koteke ku sungula tidyondzo to hlayanyana ku nga si hela ni n’hweti. Munhu un’wana loyi ndzi dyondzaka na yena Bibele u sungule ku ta emihlanganweni. Endzhaku ka loko ndzi vuye hi le Xikolweni Xa Bibele Xa Vamakwerhu Va Xinuna Lava Nga Tekangiki, lexi xi tekeke tin’hweti timbirhi, * ndzi kume xiavelo lexintshwa laha ndzi fikeke ndzi sungula tidyondzo ta mune ta Bibele. Swa ndzi tsakisa ku dyondzisa vanhu Bibele, hikuva ndza swi xiya leswaku moya lowo kwetsima wa va pfuna leswaku va cinca vutomi bya vona.”—1 Tes. 2:19.

8. Vakreste van’wana lava ha riki vantshwa va endle yini leswaku va ta tiphina hi ntirho wo endla vadyondzisiwa?

8 Vakreste van’wana lava ha riki vantshwa va dyondze tindzimi tin’wana. Hi xikombiso, Jacob, wa le Amerika-N’walungu u ri: “Loko ndzi ri ni malembe ya nkombo, vanhu vo tala lava a ndzi dyondza na vona exikolweni a va vulavula Xivietnam. A ndzi lava ku va dyondzisa hi Yehovha, kutani ndzi tivekele pakani yo dyondza Xivietnam. Ndzi hete nkarhi wo tala ndzi ri karhi ndzi xi dyondza hi ku pimanisa Xihondzo xo Rindza xa Xinghezi ni xa Xivietnam. Ndzi tlhele ndzi endla xinghana ni vamakwerhu va le vandlheni ra Xivietnam leri a ri ri ekusuhi ni ndhawu ya ka hina. Loko ndzi ri ni malembe ya 18, ndzi sungule ku phayona. Hi ku famba ka nkarhi ndzi ye eXikolweni Xa Bibele Xa Vamakwerhu Va Xinuna Lava Nga Tekangiki. Xikolo lexi xi ndzi pfunile leswaku ndzi hetisisa xiavelo xa mina, tanihi leswi ndzi nga nkulu la nga yexe eka ntlawa lowu vulavulaka Xivietnam. Vanhu vo tala lava vulavulaka Xivietnam, va hlamala loko va ndzi twa ndzi vulavula ririmi ra vona. Loko ndzi ri ensin’wini va ndzi amukela naswona mikarhi yo tala ndzi sungula tidyondzo ta Bibele na vona. Van’wana va vona se va khuvuriwile.”—Ringanisa na Mintirho 2:7, 8.

9. Hi swihi swilo swa nkoka leswi ntirho wo endla vadyondzisiwa wu nga hi dyondzisaka swona?

9 Ntirho wo endla vadyondzisiwa wu nga hi dyondzisa swilo swa nkoka swo tanihi mikhuva leyinene ya ku endla ntirho, ndlela leyinene yo vulavurisana ni vanhu, ku titshemba ni ku va ni vuxiyaxiya. (Swiv. 21:5; 2 Tim. 2:24) Kambe ku endla vadyondzisiwa swa tsakisa swinene hikuva swi endlaka leswaku u ma tiva kahle Matsalwa tanihi leswi ripfumelo ra wena ri sekeriweke eka wona. Nakambe u ta xiya ndlela leyi Yehovha a ku seketelaka ha yona loko u ri karhi u endla ntirho wa wena.—1 Kor. 3:9.

10. U nga wu kuma njhani ntsako loko u endla vadyondzisiwa ensin’wini leyi nga tswariki mihandzu?

10 U nga wu kuma ntsako entirhweni wa wena wo endla vadyondzisiwa hambiloko u tirha ensin’wini leyi nga tswariki mihandzu. Ku endla vadyondzisiwa swi lava ntirhisano. Vandlha hinkwaro ra katseka eku lavisiseni ka vanhu lava tsakelaka. Hambileswi ku nga makwerhu un’we loyi a nga ha kumaka munhu la nga hetelelaka a ve mudyondzisiwa kambe hinkwavo evandlheni va tsaka tanihi leswi va katsekeke eku lavisiseni ka vanhu lava tsakelaka. Hi xikombiso, Brandon u hete malembe ya kaye a ri karhi a phayona ensin’wini leyi nga tswariki mihandzu. U ri: “Ndzi rhandza ku chumayela mahungu lamanene hikuva i ntirho lowu Yehovha a hi kombeleke leswaku hi wu endla. Ndzi sungule ku phayona loko ndzi heta xikolo. Swa ndzi tsakisa ku khutaza majaha evandlheni ni ku ma vona ma endla nhluvuko. Endzhaku ka loko ndzi vuye eXikolweni Xa Bibele Xa Vamakwerhu Lava Nga Tekangiki, ndzi averiwe ku ya phayona endhawini yin’wana. Hambiswiritano, a ndzi si tshama ndzi dyondzela munhu lerova a kala a khuvuriwa kambe vamakwerhu van’wana va swi kotile sweswo. Ndza tsaka hi leswi ndzi tivekeleke pakani yo nghenela ntirho wa nkarhi hinkwawo wo endla vadyondzisiwa.”—Ekl. 11:6.

 LESWI TIPAKANI TA WENA TI NGA KU PFUNAKA LESWAKU U SWI FIKELELA

11. Hi wihi ntirho wun’wana wo kwetsima lowu vantshwa vo tala va tiphineke ha wona?

11 Ku ni tindlela to tala to tirhela Yehovha. Hi xikombiso, vantshwa vo tala va tirha entirhweni wo aka. Ku laveka Tiholo ta Mfumo to tala swinene. Ku aka Tiholo teto i ntirho wo kwetsima lowu yisaka ku dzuneka eka Xikwembu naswona wu nga endla leswaku u tsaka. Ku fana ni mitirho yin’wana yo kwetsima, ku tirha swin’we ni vamakwerhu swi tisa ntsako. Nakambe u nga dyondza swo tala entirhweni wo aka miako ya nhlengeletano, tanihi leswi yi ku dyondzisaka ku khathala hi vuhlayiseki, ku tirha hi matimba ni ku tirhisana ni lava va rhangelaka entirhweni wolowo.

Yehovha u ta va katekisa swinene hinkwavo lava n’wi tirhelaka va ri eka ntirho wa nkarhi hinkwawo (Vona tindzimana 11-13)

12. Ku phayona swi nga endla leswaku u pfulekeriwa hi yini?

12 Makwerhu loyi a vitaniwaka Kevin u ri: “Ku sukela loko ndza ha ri ntsongo, a ndzi lava ku tirhela Yehovha ndzi ri eka ntirho wa nkarhi hinkwawo. Ndzi sungule ku phayona loko ndzi ri ni malembe ya 19. A ndzi tirha eka makwerhu un’wana loyi a tirha ku aka leswaku ndzi kuma swimalana swo tihanyisa. Ndzi dyondze ku fulela malwangu, ku hoxa mafasitere ni mavanti. Hi ku famba ka nkarhi, ndzi tirhe malembe mambirhi ni ntlawa wo phalala, hi pfuxeta Tiholo ta Mfumo ni makaya ya vamakwerhu. Loko ndzi twa leswaku ku laveka vatirhi vo aka eAfrika Dzonga, ndzi endle xikombelo naswona xi amukeriwile. Laha Afrika, endzhaku ka mavhiki ma nga ri mangani ndzi ya etindhawini to hambanahambana leswaku ndzi ya pfuneta eku akiweni ka Tiholo ta Mfumo. Loko ndzi ri ni ntlawa lowu ndzi tirhaka na wona, ndzi titwa ndzi ri ekaya. Hi tshama swin’we, hi dyondza Bibele swin’we ni ku tlhela hi tirha swin’we. Nakambe swa ndzi tsakisa ku tirha nsimu vhiki ni vhiki ni vamakwerhu va laha hi akaka kona. Tipakani leti ndzi tivekeleke tona loko ndza ha ri xifanyetana, ti ndzi tisele ntsako lowukulu swinene.”

13. Ku tirha eBethele swi endla leswaku vantshwa va tsaka hi ndlela yihi?

13 Van’wana lava tivekeleke tipakani to tirhela Yehovha eka ntirho wa nkarhi hinkwawo sweswi va tirha eBethele. Ku tirha eBethele swa tsakisa hikuva  hinkwaswo leswi u swi endlaka kwalaho u swi endlela Yehovha. Ndyangu wa Bethele wu pfuneta eku kandziyisiweni ka mikandziyiso leyi pfunaka vanhu ku dyondza ntiyiso. Dustin loyi a tirhaka eBethele u ri: “Ndzi tivekele pakani yo nghenela ntirho wa nkarhi hinkwawo loko ndzi ri ni malembe ya kaye kutani loko ndzi heta xikolo ndzi ve phayona ra nkarhi hinkwawo. Endzhaku ka lembe ni hafu, ndzi rhambiwe ku ya tirha eBethele, laha ndzi dyondzeke ku tirhisa muchini wo kandziyisa naswona hi ku famba ka nkarhi ndzi dyondze ku hoxa tiprogreme eka khompyuta. Lexi ndzi tsakisaka hi ku tirha eBethele i ku twa swiviko swa ndlela leyi ntirho wo chumayela wu fambaka ha yona emisaveni hinkwayo, swi nga si tivisiwa emavandlheni. Xin’wana lexi ndzi tsakisaka swinene, i ku tiva leswaku ntirho lowu hi wu endlaka laha Bethele wu pfuna vanhu leswaku va va ni vuxaka lebyinene na Yehovha.”

HI TIHI TIPAKANI LETI U NGA TI VEKELAKA TONA?

14. U nga hlela njhani leswaku u kota ku nghenela ntirho wa nkarhi hinkwawo?

14 U nga hlela njhani leswaku u kota ku nghenela ntirho wa nkarhi hinkwawo? Lexi nga ku pfunaka swinene leswaku u tsakela ku tirhela Yehovha eka ntirho wa nkarhi hinkwawo, i ku hlakulela timfanelo letinene ta Vukreste. Tikarhatele ku dyondza Rito ra Xikwembu, u anakanyisisa ha rona ni ku lava tindlela leti u nga kombisaka ripfumelo ra wena ha tona evandlheni. Loko wa ha ri exikolweni, u nga dyondza vutshila byo kota ku chumayela mahungu lamanene. Dyondza ku vulavurisana ni vanhu van’wana hi ku va vutisa swivutiso hi vutlhari kutani u rhiya ndleve loko va vula mavonelo ya vona. U nga tlhela u kombela ku pfuneta hi mitirho yin’wana evandlheni yo tanihi ku basisa ni ku khathalela Holo ya Mfumo. Tsundzuka leswaku Yehovha u tirhisa vanhu lava titsongahataka hi mbilu hinkwayo. (Hlaya Pisalema 110:3; Mint. 6:1-3) Muapostola Pawulo u rhambe Timotiya entirhweni wa vurhumiwa hileswi “a ku vulavuriwa kahle ha yena hi vamakwavo.”—Mint. 16:1-5.

15. U nga endla yini leswaku u kota ku kuma ntirho wo tihanyisa?

15 Hi ntolovelo maphayona ma endla mitirho yin’wana leswaku ma tiwundla. (Mint. 18:2, 3) Kumbexana u nga ha endla khoso yo koma leyi nga ta endla leswaku u kuma ntirho lowu nga ta ku nyika nkarhi wo phayona. Loko u ri karhi u hlela ku endla tano, vulavurisana ni mulanguteri wa muganga swin’we ni maphayona ya le mugangeni wa ka n’wina. Va vutise leswaku i ntirho wa njhani lowu wu nga endlaka leswaku u kota ku phayona. Hilaha Bibele yi vulaka hakona, “andlala mintirho ya wena eka Yehovha, kutani makungu ya wena ma ta simekiwa ma tiya.”—Swiv. 16:3; 20:18.

16. Ku tirhela Yehovha eka ntirho wa nkarhi hinkwawo wa ha ri muntshwa swi nga ku vuyerisa njhani enkarhini lowu taka?

16 Tiyiseka leswaku Yehovha u lava leswaku u “khomelela swinene” entirhweni lowu nga ta endla leswaku u tsaka. (Hlaya 1 Timotiya 6:18, 19.) Ntirho wa nkarhi hinkwawo wu ta endla leswaku u tolovelana ni vamakwerhu van’wana lava na vona va nga eka ntirho wa nkarhi hinkwawo naswona wu endla leswaku vuxaka bya wena na Yehovha byi tiya swinene. Vo tala va xiye leswaku ku tirhela Yehovha eka ntirho wa nkarhi hinkwawo va ha ri vantshwa, swi va pfunile leswaku swilo swi va fambela kahle evukatini loko se va nghenele vukati. Vo tala lava sunguleke ku phayona va nga si nghenela vukati, va hambete va phayona ni vanghana va vona va vukati ni loko se va nghenele vukati.—Rhom. 16:3, 4

17, 18. Mbilu ya wena yi katseka njhani loko swi ta emhakeni ya ku tivekela tipakani?

17 Mbilu ya wena ya katseka loko swi ta emhakeni ya ku tivekela tipakani. Pisalema 20:4 yi ri: “Onge a nga ku nyika hi ku ya hi mbilu ya wena, naswona onge a nga hetisisa swikongomelo swa wena hinkwaswo.” Hikwalaho, anakanyisisa hi leswi u lavaka ku swi endla hi vutomi bya wena. Anakanyisisa hi leswi Yehovha a swi endlaka enkarhini wa hina ni ndlela leyi u nga katsekaka ha yona entirhweni wakwe. Kutani tivekele tipakani leti nga ta n’wi tsakisa.

18 Ku tirhela Yehovha u ri eka ntirho wa nkarhi hinkwawo swi ta ku tisela ntsako hikuva sweswo swi yisa ku dzuneka eka Yehovha Xikwembu. Hikwalaho, “kuma ntsako lowu heleleke eka Yehovha, kutani u ta ku nyika leswi komberiwaka hi mbilu ya wena.”—Ps. 37:4.

^ ndzim. 7 Sweswi xi vuriwa Xikolo Xa Vachumayeri Va Mfumo.