Nghena endzeni

Hundzela eka leswi nga endzeni

U Nga Byi Kuma Njhani Vutomi Byo Antswa?

U Nga Byi Kuma Njhani Vutomi Byo Antswa?

NAMUNTLHA vutomi a byi hi laha Xikwembu a xi lave ha kona. Misava a yi fanele yi tele hi vanhu lava xiximaka Muvumbi wa vuako hinkwabyo, lava lavaka ku fumiwa ni ku kongomisiwa hi yena va tlhela va tekelela vumunhu byakwe. Xikwembu a xi lava leswaku va tshama va tsakile loko va ri karhi va wundla mindyangu ya vona, loko va dyondza ku endla swilo leswintshwa ni ku endla leswaku misava hinkwayo yi va paradeyisi.

XIKWEMBU XI TSHEMBISA KU CINCA MISAVA YI VA LESWI A YI FANELE YI VA XI SWONA

  • “U herisa tinyimpi ku ya fika emakumu ya misava.”Pisalema 46:9.

  • ‘Nkarhi lowu vekiweke wa leswaku . . . ku lovisiwa lava onhaka misava.’Nhlavutelo 11:18.

  • “Ku hava munhu la tshamaka kona la nga ta ku: ‘Ndza vabya.’”Esaya 33:24.

  • “Ntirho wa mavoko ya vona, vahlawuriwa va mina va ta wu tirhisa hi xitalo.”Esaya 65:22.

Xana vuprofeta lebyi byi ta hetiseka njhani? Xikwembu xi hlawule N’wana wa xona Yesu leswaku a va Hosi ya mfumo wa xona, u ta fuma misava hinkwayo a ri etilweni. Bibele yi wu vitana Mfumo wa Xikwembu. (Daniyele 2:44) Loko Bibele yi vulavula hi Yesu yi ri: “Xikwembu xi ta n’wi nyika xiluvelo . . . , naswona u ta va Hosi.”—Luka 1:32, 33.

Loko a ha ri laha misaveni Yesu u endle masingita yo tala lama a ma kombisa leswaku vanhu va ta hanya vutomi lebyinene loko a sungula ku fuma.

YESU U KOMBISE LESWI A NGA TA SWI ENDLELA LAVA N’WI YINGISAKA

  • U horise swifo swa mixaka hinkwayo, a kombisa ndlela leyi a nga ta herisa mavabyi ha yona.Matewu 9:35.

  • U miyete xidzedze, a kombisa leswaku u ta va sirhelela vanhu tanihi leswi a nga ni matimba yo lawula ntumbuluko.Marka 4:36-39.

  • U phamele vanhu va magidi, a kombisa leswaku u ta enerisa swilaveko swa vona.Marka 6:41-44.

  • U hundzule mati ma va vhinyo, a kombisa leswaku ku nga ri khale vanhu va tiphina hi vutomi.Yohane 2:7-11.

U nga byi kuma njhani vutomi lebyi Xikwembu xi lavaka ku byi nyika vanhu lava va xi rhandzaka? Ku ni “gondzo” leri u faneleke u ri teka. Bibele yi ri vitana “nyangwa leyi yisaka evuton’wini naswona a hi vangani lava ri kumaka.”—Matewu 7:14.

KUMA GONDZO LERI YISAKA EVUTON’WINI LEBYI NGA HERIKI

I yini gondzo leri yisaka evuton’wini? Xikwembu xi ri: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.” (Esaya 48:17) Loko u tirhisa ndzayo leyi u ta hanya vutomi byo antswa.

 Yesu u te: “Hi mina ndlela ni ntiyiso ni vutomi.” (Yohane 14:6) Loko hi endla leswi Yesu a hi dyondziseke swona ni ku tekelela xikombiso xakwe hi ta tshinela ekusuhi ni Xikwembu naswona hi ta hanya vutomi byo antswa.

U nga ri kuma njhani gondzo leri yisaka evuton’wini? Ku ni vukhongeri byo tala kambe Yesu u lemukise a ku: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni.” (Matewu 7:21) U tlhele a ku: “Mi ta va vona hi mihandzu ya vona.” (Matewu 7:16) Bibele yi nga ku pfuna ku tiva vukhongeri bya ntiyiso ni ku byi hambanisa ni vukhongeri bya mavunwa.—Yohane 17:17.

I yini leswi u nga swi endlaka leswaku u famba egondzweni ra vutomi? U fanele u dyondza leswaku i mani Munyiki wa vutomi? Vito ra yena i mani? I munhu wa njhani? I yini leswi a hi endlelaka swona? U lava leswaku hi endla yini? *

Ku ni leswi Xikwembu xi lavaka leswaku vanhu va swi endla ku tlula ku tirha, ku dya, ku hungasa ni ku hlayisa mindyangu ya vona. Xi lava hi va vanghana va xona. Hi nga kombisa leswaku ha n’wi rhandza hi ku endla ku rhandza ka yena. Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso.”—Yohane 17:3.

HI KU TIRHISA BIBELE, XIKWEMBU XI KU DYONDZISELA “KU KU PFUNA.”​Esaya 48:17

TEKA GOZA

Loko se hi tiva leswi Xikwembu xi swi lavaka hi ta cinca ndlela leyi hi hanyaka ha yona. A swi olovi. Sweswo swi vula leswaku vutomi bya hina byi ta antswa loko hi famba egondzweni leri yisaka evuton’wini. Leswaku u kuma tinhlamulo ta swivutiso swo olova malunghana ni Xikwembu, Timbhoni ta Yehovha ti nga dyondza Bibele na wena mahala endhawini leyi u yi tsakelaka ni hi nkarhi lowu u wu tsakelaka. U nga tihlanganisa na hina hi ku tirhisa website ya www.jw.org.