Nghena endzeni

Hundzela eka leswi nga endzeni

Xana Xikwembu Xi Na Ntwelavusiwana?

Xana Xikwembu Xi Na Ntwelavusiwana?

LESWI NTUMBULUKO WU HI DYONDZISAKA SWONA

Ntwelavusiwana wu hlamuseriwa tanihi ‘vuswikoti byo twisisa ndlela leyi munhu un’wana a titwaka ha yona kumbe ku tiveka exiyin’weni lexi un’wana a nga eka xona.’ Dokodela Rick Hanson, mutivi wa vuvabyi bya miehleketo u vule leswaku “hi tswariwa hi ri ni vuswikoti byo kombisa ntwelavusiwana.”

ANAKANYA HI LESWI: Hikwalaho ka yini hi ri ni vuswikoti byo kombisa ntwelavusiwana ku tlula swivumbiwa leswin’wana hinkwaswo? Bibele yi vula leswaku Xikwembu xi vumbe vanhu hi xifaniso xa xona. (Genesa 1:26) Hi vumbiwe hi xifaniso xa Xikwembu, leswi vulaka leswaku hi kota ku tekelela ni ku kombisa vumunhu bya xona. Hikwalaho, loko ntwelavusiwana wu susumetela vanhu ku pfuna van’wana, va tekelela Muvumbi wa hina, Yehovha Xikwembu loyi a nga na ntwelavusiwana na tintswalo.—Swivuriso 14:31.

LESWI BIBELE YI HI DYONDZISAKA SWONA HI NTWELAVUSIWANA WA XIKWEMBU

Xikwembu xi ni ntwelavusiwana naswona xa swi venga ku hi vona hi xaniseka. Loko Bibele yi vulavula hi Vaisrayele va khale, lava tiyiseleke ku va mahlonga eEgipta naswona va tiyiseleke swiyimo swo tika malembe ya 40 emananga yi ri: “Enkarhini wa maxangu ya vona hinkwawo na yena [Yehovha] a a ri emaxangwini.” (Esaya 63:9) Xiya leswaku Xikwembu a xi nga voni maxangu ya vona ntsena. Na xona a xi twa ku vava. Xi te: “Ndza ku tiva swinene ku vava loku va ku twaka.” (Eksoda 3:7) Xikwembu xi ri: “Loyi a mi khumbaka u khumba ndzololo ya tihlo ranga.” (Zakariya 2:8) Loko van’wana va hi vavisa na xona xi twa ku vava.

Bibele yi hi tiyisekisa leswaku hambiloko hi titwa hi nga pfuni nchumu naswona hi twa onge ntwelavusiwana wa Xikwembu a wu hi faneli, “Xikwembu i xikulu eka timbilu ta hina naswona xi tiva swilo hinkwaswo.” (1 Yohane 3:19, 20) Xikwembu xi hi tiva ku antswa ku tlula ndlela leyi hi titivaka ha yona. Xi twisisa swiyimo swa hina hinkwaswo, mianakanyo ya hina ni ndlela leyi hi titwaka ha yona. Xi hi twela vusiwana.

Hi nga lava nchavelelo, vutlhari ni nseketelo eka Xikwembu hikuva ha swi tiva leswaku xa va pfuna lava nga emaxangwini

 Matsalwa lama hi tiyisekisaka

  • ‘U ta vitana, kutani Yehovha u ta hlamula; u ta kombela ku pfuniwa, yena u ta ku, Hi mina loyi!’—ESAYA 58:9.

  • “‘Hikuva ndzi yi tiva kahle miehleketo leyi ndzi yi ehleketaka malunghana na n’wina,’ ku vula Yehovha, ‘miehleketo ya ku rhula, ku nga ri ya khombo, ku mi nyika vumundzuku ni ntshembo. Kunene mi ta ndzi vitana, mi ta, mi tlhela mi ndzi khongela, kutani ndzi ta mi yingisa.’”—YEREMIYA 29:11, 12.

  • “Chela mihloti ya mina eguleni ra wena ra dzovo. Xana a yi kona ebukwini ya wena?”—PISALEMA 56:8.

XIKWEMBU XI NI MHAKA NA HINA, XI TWISISA XIYIMO XA HINA NASWONA XI HI TWELA VUSIWANA

Xana ku tiva leswaku Xikwembu xi hi twela vusiwana swi nga hi pfuna loko hi langutane ni swiyimo swo tika? Xiya ntokoto wa Maria, u ri:

“Ndzi vone vutomi byi tika naswona ku nga ri na vululami endzhaku ka loko ndzi lahlekeriwe hi n’wana wa mina wa malembe ya 18 loyi a karhatiwa hi vuvabyi bya khensa ku ringana malembe mambirhi. A ndzi hlundzukele Yehovha hi leswi a nga nghenelangiki ni ku horisa n’wananga!

“Endzhaku ka malembe ya tsevu, makwerhu la nga ni rirhandzu ni twela vusiwana u rhiye ndleve loko ndzi ri karhi ndzi n’wi byela leswi endlaka ndzi anakanya leswaku Yehovha a nga ndzi rhandzi. Endzhaku ko ndzi yingisela tiawara handle ko ndzi kavanyeta, u tshahe ndzimana leyi ndzi khumbeke ya 1 Yohane 3:19, 20 leyi nge: ‘Xikwembu i xikulu eka timbilu ta hina naswona xi tiva swilo hinkwaswo.’ U hlamusele leswaku Yehovha wa ma twisisa maxangu ya hina.

“Hambiswiritano, a swa ha ndzi tikela ku cinca langutelo ra mina! Kutani ndzi hlaye Pisalema 94:19 leyi nge: ‘Loko miehleketo ya mina leyi ndzi karhataka yi tele endzeni ka mina, nchavelelo wa wena wu sungule ku vukarha moya xiviri wa mina.’ A ndzi twa onge tindzimana toleto a ti tsaleriwe mina! Hi ku famba ka nkarhi ndzi xiye leswaku swa chavelela ku vulavula na Yehovha hi swilo leswi ndzi karhataka hikuva ndza swi tiva leswaku wa yingisa a tlhela a twisisa.

Swa chavelela hakunene ku tiva leswaku Xikwembu xa swi twisisa swiyimo swa hina naswona xi ni twela vusiwana! Kambe hikwalaho ka yini ku tele ku xaniseka? Xana swi vangiwa hileswi Xikwembu xi hi xupulaka hikwalaho ka swiendlo swo biha? Xana Xikwembu xi ta herisa ku xaniseka hinkwako? Swivutiso leswi swi ta hlamuriwa eka swihloko leswi landzelaka.