Nghena endzeni

Hundzela eka leswi nga endzeni

Ndlela Leyi U Nga Vuyeriwaka Ha Yona Eka Nkhathalelo Wa Xikwembu

Ndlela Leyi U Nga Vuyeriwaka Ha Yona Eka Nkhathalelo Wa Xikwembu

Xikwembu xi tumbuluxe mimiri ya hina hi ndlela yo hlamarisa leswaku yi kota ku titshungula. Loko munhu la hanyeke kahle o tshuka a tsemeka, a khuhleka kumbe a tlhaviwa, ‘miri wu sungula ku tirha hi ndlela leyi rharhanganeke leswaku wu horisa mbanga yoleyo, leyikulu kumbe leyitsongo.’ (Johns Hopkins Medicine) Miri wu sungula ku tirha leswaku wu yimisa ku huma ka ngati eka ndhawu leyi vavisekeke, wu anamisa misiha ya ngati, wu pfala mbanga naswona wu tlhela wu tiyisa nyama.

ANAKANYA HI LESWI: Loko Muvumbi a kote ku endla leswaku mimiri ya hina yi kota ku ti horisa hi yoxe, xana a hi fanelanga hi va ni ripfumelo eka xitshembiso xa leswaku u ta hi pfuna leswaku hi hlakarhela loko hi twisiwe ku vava hi swiyimo swo karhi? Mupisalema u tsale a ku: “U [Xikwembu] horisa vanhu lava timbilu ta vona ti vavisekeke, Naswona u boha timbanga ta vona leti vavaka.” (Pisalema 147:3) Loko u tshikileriwa hi swilo swa nkarhi lowu hundzeke kumbe swa sweswi, u nga tiyiseka njhani leswaku Yehovha u ta boha timbanga ta wena sweswi ni le nkarhini lowu taka?

LESWI BIBELE YI HI DYONDZISAKA SWONA HI RIRHANDZU RA XIKWEMBU

Xikwembu xi tshembise xi ku: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna.” (Esaya 41:10) Munhu loyi a tshembaka leswaku Yehovha wa khathala ha yena, u ta va ni ku rhula ka miehleketo naswona u ta va ni matimba yo lwisana ni miringo yo hambanahambana. Muapostola Pawulo u vule leswaku ku rhula koloko i “ku rhula ka Xikwembu loku tlulaka miehleketo hinkwayo.” U engetele a ku: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.”—Vafilipiya 4:4-7, 9, 13.

Matsalwa ma hi pfuna leswaku hi va ni ripfumelo eka switshembiso swa Yehovha hi vumundzuku. Hi xikombiso, Nhlavutelo 21:4, 5 (leyi tshahiweke eka tluka leri landzelaka) yi hi byela leswi a nga ta swi endla ni leswaku hikwalaho ka yini hi fanele hi tshemba leswaku u ta swi endla:

  • “Xi ta sula mihloti hinkwayo” ematihlweni ya vanhu. Yehovha u ta herisa ku xaniseka hinkwako ni ku karhateka, hambi ku ri swiphiqo leswi van’wana va nga swi tekiki swi ri nchumu.

  • “Loyi a tshameke exiluvelweni” endhawini leyi vangamaka, Hosi ya Matimba hinkwawo leyi tumbuluxeke swilo hinkwaswo yi ta tirhisa matimba ya yona ni vulawuri bya yona leswaku yi herisa ku xaniseka ni ku tlhela yi hi nyika mpfuno lowu hi wu lavaka.

  • Yehovha u hi tiyisekisa leswaku switshembiso swakwe swa ‘tshembeka naswona i ntiyiso.’ Leswi swi vula leswaku Yehovha u hi tiyisekisa hi vito rakwe tanihi leswi a nga Xikwembu lexi hetisisaka switshembiso swa xona.

“‘Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.’ Kutani Loyi a tshameke exiluvelweni a ku: ‘Waswivo, ndzi endla swilo hinkwaswo swi va leswintshwa.’ A tlhela a ku: ‘Tsala, hikuva marito lawa ma tshembekile, i ya ntiyiso.’”—Nhlavutelo 21:4, 5

Ntumbuluko hinkwawo na Bibele, havumbirhi bya swona swi paluxa vumunhu bya Tata wa hina la nge matilweni. Tanihi leswi ntumbuluko wu hi susumetelaka leswaku hi lava ku va munghana wa Xikwembu, Bibele yi hi rhamba yi ku: “Tshinelani eka Xikwembu, kutani xi ta tshinela eka n’wina.” (Yakobo 4:8) Mintirho 17:27 yi ri: ‘A xi le kule ngopfu ni un’wana ni un’wana wa hina.’

Loko u ya emahlweni u tiva Xikwembu, u ta ya u khorwiseka leswaku ‘xa ku khathalela.’ (1 Petro 5:7) I yini leswi u nga vuyeriwaka ha swona loko u tshemba Yehovha hi ndlela leyi?

Xiya xikombiso xa Toru, loyi a tshamaka eJapani. U kurisiwe hi manana la nga Mukreste kambe Toru u katseke eka ntlawa wa swigevenga wa Majapani lowu vuriwaka yakuza. U hlamusela a ku: “A ndzi tshemba leswaku Xikwembu xa ndzi venga naswona a ndzi twa onge ndzi le ku xupuriweni loko vanhu va fa, ngopfungopfu lava a ndzi va rhandza.” Toru u vule leswaku emisaveni leyi, leyi hombolokeke u sungule ku va munhu la nga “riki na ntwelavusiwana ni loyi a nga khathaliki hi vanhu van’wana.” Hi ku ya hi leswi a tiyimisele ku swi endla, loko a tsundzuka u ri: “A ndzi lava ku fa ndza  ha ri ntsongo endzhaku ko dlaya munhu la dumeke ku tlula mina leswaku ndzi ta tiendlela vito.”

Hambiswiritano, loko Toru ni nsati wakwe Hannah va dyondze Bibele, Toru u cinca ndlela leyi a hanya ha yona ni ndlela leyi a languta swilo ha yona. Hannah u ri: “Ndzi tivonele hi ya mina ndlela leyi nuna wa mina a cinceke vutomi bya yena ha yona. Sweswi Toru u vula hi ku tiyiseka a ku: “Ku ni Xikwembu lexi hakunene xi khathalaka hi un’wana ni un’wana wa hina. Lexi nga swi laviki leswaku ku lova ni un’we wa hina naswona xi tiyimisele ku rivalela lava hundzukaka eswidyohweni swa vona hilaha ku heleleke. Xi yingisela swilo leswi hi tikelaka ku swi byela van’wana ni leswi ku nga riki na un’wana loyi a nga swi twisisaka. Ku nga ri khale Yehovha u ta herisa swiphiqo hinkwaswo, ku xaniseka ni maxangu. Hambi ku ri sweswi, u hi pfuna hi tindlela leti hi nga ti langutelangiki. Wa khathala hi hina naswona wa hi rhandza ni ku hi pfuna loko hi titwa hi hele matimba.”—Pisalema 136:23.

Hilaha ntokoto wa Toru wu kombisaka ha kona, ku tiva leswaku ku nga ri khale Xikwembu xi ta herisa maxangu hinkwawo ni ku tlhela xi hi sula mihloti, a swi hi nyiki ntshembo ntsena hi vumundzuku kambe swi tlhela swi hi pfuna leswaku hi hanya vutomi byo antswa sweswi. Hambileswi emisaveni ku taleke ku xanisekaka, u nga vuyeriwa eka rirhandzu ra Xikwembu.