Nghena endzeni

Hundzela eka leswi nga endzeni

Lexi Endlaka Vutomi Byi Va Bya Nkoka

Lexi Endlaka Vutomi Byi Va Bya Nkoka

Faizal a fanele a endliwa vuhandzuri bya mbilu endzhaku ka lembe nsati wakwe a lovile. U ri: “Loko ndzi hlaya buku ya Yobo, ndza swi xiya leswaku Yehovha u yi tsale hi xivangelo lexi twalaka. Loko hi hlaya hi swikombiso swa le Bibeleni swa vanhu lava weriweke hi swiyimo leswi fanaka ni swa hina, sweswo swi vohlisa mabibi ya mbilu.” U tlhele a ku: “Vutomi i bya nkoka.”

Tarsha loyi a ri ntsongo loko mana wakwe a lova. U ri: “Ku tiva Muvumbi swi endla leswaku ndzi hanya vutomi lebyi nga ni xikongomelo, ndzi va ni ntshembo ni ntsako ku nga khathariseki swiyimo swo tika leswi ndzi hlanganaka na swona. Hi nga tiyiseka leswaku siku ni siku Yehovha u ta hi pfuna leswaku hi tiyisela.”

SWIHLOKO leswi hundzeke swi kombise leswaku loko hi ri ni swiphiqo swi nga endla leswaku vutomi byi tika. Loko u ri karhi u tiyisela swiphiqo, u nga ha tivutisa loko vutomi byi ri bya nkoka kumbe loko van’wana va ri na mhaka na wena. Tiyiseka leswaku Xikwembu xa khathala hi wena loko u ri ni swiphiqo. U wa risima eka xona.

Mutsari wa Pisalema 86 u kombise ndlela leyi a xi tshembaka ha yona Xikwembu loko a ku: “Esikwini ra maxangu ya mina ndzi ta vitana wena,hikuva u ta ndzi hlamula.” (Pisalema 86:7) U nga ha tivutisa leswaku, ‘Xana Xikwembu xi ta ndzi hlamula njhani “esikwini ra maxangu ya mina”?’

Hambileswi Xikwembu xi nga ta ka xi nga swi lulamisi hi nkarhi wolowo swiphiqo swa wena kambe Rito ra xona ku nga Bibele, ri kombisa leswaku xi ta ku nyika ku rhula leswaku u kota ku tiyisela: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo.” (Vafilipiya 4:6, 7) Anakanyisisa hi ndlela leyi Matsalwa lama landzelaka ma hi tiyisekisaka ha yona leswaku Xikwembu xa khathala hi hina.

Xikwembu Xa Khathala Hi Wena

“Ku hava [xindzingiri] ni xin’we lexi rivalekaka emahlweni ka Xikwembu. . . . Mi ni risima ro tlula swindzingiri swo tala.”—Luka 12:6, 7.

XIYA LESWI: Swinyenyana swo tanihi swindzingiri swi tikomba swi nga ri swa nkoka eka vanhu vo tala kambe Xikwembu xa khathala hi swona. A ku na xindzingiri ni xin’we lexi Xikwembu xi nga xi xiyiki; hinkwaswo i swa risima eka xona. Vanhu i va nkoka swinene eka Xikwembu ku tlula swindzingiri. Vanhu i swivumbiwa swo hlawuleka eka swivumbiwa hinkwaswo leswi nga kona emisaveni hikuva va vumbiwe hi “xifaniso” xa Xikwembu naswona va kota ku kombisa vumunhu bya xona.—Genesa 1:26, 27.

“Oho Yehovha, u ndzi lavisisile, naswona wa ndzi tiva. . . . U ehleketisise hi miehleketo ya mina . . . Ndzi kambele, u tiva miehleketo ya mina leyi karhataka.”Pisalema 139:1, 2, 23.

XIYA LESWI: Xikwembu xi ku tiva kahle. Xi tiva ndlela leyi u titwaka ha yona ni leswi ku karhataka. Hambiloko van’wana va nga ma twisisi maxangu ya wena Xikwembu xa khathala hi wena naswona xi lava ku ku pfuna. Sweswo swi endla leswaku vutomi byi va bya nkoka.

 Vutomi Byi Ni Xikongomelo

“Oho Yehovha, yingisa xikhongelo xa mina; onge ku kombela ka mina mpfuno ku nga fika eka wena. . . . Rhiya ndleve eka mina; hatlisa, u ndzi hlamula. . . . U ta hundzulukela exikhongelweni xa lava va tekeriweke hinkwaswo.”Pisalema 102:1, 2, 17.

XIYA LESWI: Ku sukela loko ku ve ni maxangu emisaveni, Yehovha wa swi vona loko vanhu va dya mbitsi va xeva hi nhlomulo. (Pisalema 56:8) Naswona wa swi xiya loko u khome nyarhi hi timhondzo. Xikwembu xa ku vona loko u ri emaxangwini hikuva u wa risima eka xona.

“U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna . . . Mina, Yehovha Xikwembu xa wena . . . yena Loyi a ku byelaka a ku, ‘U nga chavi. Mina ndzi ta ku pfuna.’” Esaya 41:10, 13.

XIYA LESWI: Xikwembu xi tiyimisele ku ku pfuna. Loko u wa xi ta ku pfuxa.

Hi Langutele Vumundzuku Lebyinene

“Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” Yohane 3:16.

XIYA LESWI: U wa nkoka eka Xikwembu lerova xi kale xi nyikela hi N’wana wa xona Yesu leswaku a va nkutsulo hikwalaho ka wena. Nkutsulo lowu wu endle leswaku u kuma lunghelo ro hanya vutomi byo tsakisa lebyi nga ni xikongomelo hilaha ku nga heriki. *

Hambiloko u weriwa hi swiyimo swo tika, hlaya Rito ra Xikwembu hi vukheta ni ku tshemba leswaku switshembiso swa xona swi ta hetiseka. Sweswo swi ta endla leswaku u tsaka u tlhela u tshemba leswaku vutomi i bya nkoka.

^ par. 19 Leswaku u dyondza leswi engetelekeke mayelana ni ndlela leyi u nga vuyeriwaka ha yona eka nkutsulo wa Yesu, hlalela vhidiyo leyi nge, Tsundzuka Rifu Ra Yesu eka www.jw.org/ts. Nghena ehansi ka nhlokomhaka leyi nge, MINKANDZIYISO > TIVHIDIYO > NTIRHO WA HINA WO CHUMAYELA.