Nghena endzeni

Hundzela eka leswi nga endzeni

Vumundzuku Bya Wena Byi Le Mavokweni Ya Wena!

Vumundzuku Bya Wena Byi Le Mavokweni Ya Wena!

XANA U NGA SWI KOTA KU HLAWULA LESWI VUMUNDZUKU BYA WENA BYI NGA TA VA XISWONA?

Vanhu van’wana va tshemba leswaku a va nge swi koti ku lawula vutomi bya vona hikuva Xikwembu xi va hlawulele leswi vutomi bya vona byi nga ta va xiswona. Loko va tsandzeka ku fikelela tipakani to karhi va namba va swi ba hi makatla tanihi leswi va vulaka leswaku a va nge swi cinci. Va ri: “Hi leswi a swi ta va xiswona.”

Van’wana va hela matimba loko va vona xiyimo xa misava leyi hi hanyaka eka yona xi ya xi nyanya ku biha. Va nga ha va va ringete ku antswisa vutomi bya vona kambe tinyimpi, vugevenga, timhangu ta ntumbuluko ni vuvabyi swi onha makungu ya vona nkarhi ni nkarhi. Va tivutisa: ‘Ha yini hi fanele hi tikarhata?’

I ntiyiso leswaku swiyimo swin’wana evuton’wini swi nga ha onha makungu ya wena. (Eklesiasta 9:11) Hambiswiritano, leswaku u kuma vutomi lebyi nga heriki enkarhini lowu taka swi titshege hi wena. Entiyisweni Bibele yi hi byela leswaku vumundzuku bya wena byi titshege hileswi u swi hlawulaka. A hi kambisise leswi yi swi vulaka.

Muxe, murhangeri wa tiko ra Israyele wa khale u byele vanhu lava a va fanele va nghena eTikweni leri Tshembisiweke leswi: “Ndzi veke vutomi ni rifu, nkateko ni ndzhukano emahlweni ka n’wina; mi fanele mi hlawula vutomi leswaku mi ta ya emahlweni mi hanya, n’wina ni vana va n’wina, hi ku rhandza Yehovha Xikwembu xa n’wina, hi ku yingisa rito rakwe ni ku n’wi namarhela.”Deteronoma 30:15, 19, 20.

“Ndzi veke vutomi ni rifu, nkateko ni ndzhukano emahlweni ka n’wina; mi fanele mi hlawula vutomi.”​—Deteronoma 30:19

I ntiyiso leswaku Xikwembu xi humese Vaisrayele evuhlongeni aEgipta kutani xi va tshembisa vutomi lebyi tsakisaka eTikweni leri Tshembisiweke. Kambe sweswo hinkwaswo a swi nga to tiendlekela. Leswaku va kuma mikateko yoleyo, a va fanele va “hlawula vutomi.” A va ta swi endlisa ku yini sweswo? ‘Hi ku rhandza Yehovha Xikwembu xa vona, hi ku yingisa rito rakwe ni ku n’wi namarhela.’

Hilaha ku fanaka namuntlha, ku hlawula swi le mavokweni ya wena, ndlela leyi u hlawulaka ha yona, hi yona yi nga ta kombisa leswi vumundzuku bya wena byi nga ta va swona. Loko u hlawula ku rhandza Xikwembu, ku xi yingisa ni ku xi namarhela u ta va u hlawula vutomi lebyi nga heriki emisaveni leyi nga Paradeyisi. Kambe, ku katseka yini eka leswi boxiweke?

HLAWULA KU RHANDZA XIKWEMBU

Xikwembu i xihlovo xa Rirhandzu. Muapostola Yohane, u huhuteriwe ku tsala leswaku “Xikwembu i rirhandzu.” (1 Yohane 4:8) Hikwalaho ka sweswo loko va n’wi vutisile leswaku hi xihi xileriso lexikulu ku tlula hinkwaswo, Yesu u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.” (Matewu 22:37) Vuxaka lebyinene na Yehovha Xikwembu, byi fanele byi va kona hikwalaho ka leswi hi n’wi rhandzaka. Kambe, ha yini hi fanele hi hlawula ku n’wi rhandza?

Ndlela leyi Yehovha a rhandzaka vanhu ha yona yi fana ni leyi vatswari va rhandzaka vana va vona ha yona. Hambileswi va nga hetisekangiki, vatswari lava rhandzaka vana va vona, va va kongomisa, va va khutaza, va va seketela ni ku va laya hikuva va lava leswaku va tsaka ni leswaku va humelela. I yini leswi vatswari va languteleke leswaku vana va vona va va endlela swona? Va lava leswaku vana va vona va va rhandza ni ku yingisa leswi va va byeleke swona leswaku va ta vuyeriwa. Swa twala leswi Tata wa hina wa le tilweni a languteleke leswaku hi kombisa ku tlangela eka hinkwaswo leswi a hi endleleke swona.

YINGISA RITO RAKWE

Eka tindzimi to sungula leti Bibele a yi tsariwe ha tona rito leri nge, “rhiya ndleve” ri katsa “ku yingisa.” Xana leswi a hi swona leswi hi swi vulaka loko hi byela n’wana ku a “yingisa vatswari vakwe”? Ku tlula kwalaho ku yingisa Rito ra Xikwembu swi katsa ku ri dyondza ni ku yingisa leswi xi swi vulaka. Tanihi leswi hi nga swi kotiki ku twa rito ra Xikwembu hi ku kongoma, hi xi yingisa hi ku hlaya Rito ra xona ku nga Bibele ni ku tirhisa leswi nga eka rona.—1 Yohane 5:3.

Ku kombisa leswaku ku yingisa Xikwembu i swa nkoka, eka xiendlakalo xin’wana Yesu u te: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Matewu 4:4) Tanihi leswi swakudya swi nga swa nkoka eka hina, ku dyondza hi Xikwembu i swa nkoka ngopfu ku tlula swakudya. Ha yini? Solomoni Hosi yo tlhariha u te: “Vutlhari i xisirhelelo ku fana nileswi mali yi nga xisirhelelo; kambe mpfuno wa vutivi hileswaku vutlhari hi byoxe byi londzovota vini va byona va hanya.” (Eklesiasta 7:12) Vutivi ni vutlhari bya Xikwembu swa hi sirhelela namuntlha naswona swi hi pfuna ku endla swiboho hi vutlhari, leswi nga ta endla leswaku hi kuma vutomi lebyi nga heriki enkarhini lowu taka.

XI NAMARHELE

Tsundzuka xikombiso xa Yesu lexi hi buleke ha xona exihlokweni lexi hundzeke, laha a nga te: “Gondzo ra kona ri larile, naswona a hi vangani lava ri kumaka.” (Matewu 7:13, 14) Loko hi famba eka gondzo rolero, hi ta vuyeriwa swinene hi ku tshama hi ri ekusuhi ni mukongomisi leswaku hi ta fika laha hi yaka kona, ku nga evuton’wini lebyi nga heriki. Hikwalaho, hi ni xivangelo lexi twalaka xo tshama hi ri ekusuhi na Xikwembu. (Pisalema 16:8) Kambe, hi nga swi endlisa ku yini sweswo?

Siku ni siku hi ni swilo swo tala leswi hi faneleke hi swi endla ni swo tala leswi a hi ta tsakela ku swi endla. Swilo swo tano, swi nga ha endla leswaku hi tshama hi khomekile kumbe swi hi kavanyeta lerova hi nga vi na wona nkarhi wo anakanyisisa hi leswi Xikwembu xi lavaka leswaku hi swi endla. Hi yona mhaka Bibele yi hi tsundzuxaka leswi: “Tshamani mi ri karhi mi languta leswaku ndlela leyi mi fambaka ha yona a yi fani ni ya lava nga tlharihangiki kambe yi fana ni ya vanhu vo tlhariha, mi tixavela nkarhi lowunene, hikuva masiku ma hombolokile.” (Vaefesa 5:15, 16) Hi va ekusuhi na Xikwembu hi ku va hi rhangisa vuxaka bya hina na xona ku sungula evuton’wini.—Matewu 6:33.

KU HLAWULA SWI LE MAVOKWENI YA WENA

Hambileswi ku nga riki na leswi u nga ta swi endla ku cinca leswi endlekeke enkarhini lowu hundzeke, u nga tihlawulela vumundzuku lebyinene wena ni lava u va rhandzaka. Bibele yi boxa leswaku Tata wa hina wa le tilweni Yehovha Xikwembu wa hi rhandza swinene naswona u hi byela leswi a tsakelaka ku hi vona hi swi endla. Xiya marito lama vuriweke hi muprofeta Mikiya:

“Wena munhu wa la misaveni, u ku byerile leswi swi nga swinene. Xana Yehovha u kombela leswaku u n’wi tlherisela yini, loko ku nga ri ku kombisa vululami ni ku rhandza musa ni ku titsongahata loko u famba ni Xikwembu xa wena?”Mikiya 6:8.

Xana u ta xi amukela xirhambo xa Yehovha xo famba na yena kutani u vuyeriwa hi mikateko leyi a yi hlayiseleke lava fambaka na yena? Xiboho i xa wena!