Nghena endzeni

Hundzela eka leswi nga endzeni

1 Yi Nga Ku Pfuna Leswaku U Papalata Mikhuva Yo Biha

1 Yi Nga Ku Pfuna Leswaku U Papalata Mikhuva Yo Biha

Bibele yi vula leswaku ndzayo ya yona yi huhuteriwile naswona ‘yi pfuna ku dyondzisa, ku tshinya, ku lulamisa swilo.’ (2 Timotiya 3:16) Xana sweswo i ntiyiso? Kambisisa ndlela leyi Bibele yi pfuneke vanhu ku papalata mikhuva yo biha yi nga si dzima timitsu.

KU NWA BYALA KU TLULA MPIMO

Delphine, loyi a boxiweke exihlokweni lexi hundzeke, u vone onge swiphiqo leswi a ri na swona hi swona swi n’wi susumeteleke ku nwa byala ku tlula mpimo. Bibele a yi va siveli vanhu ku nwa byala hi ku ringanisela kambe yi ri: “U nga vi exikarhi ka lava va nwaka ngopfu vhinyo.” (Swivuriso 23:20) Ku nwa byala ku tlula mpimo swi hoxa xandla eka mavabyi yo tala lama dlayaka, ku hahluka ka mindyangu naswona vanhu va timiliyoni va fa lembe na lembe hikwalaho ka xiphiqo lexi. Swo tala swa swiphiqo leswi a swi ta papalatiwa loko vanhu a va landzela switsundzuxo swa le Bibeleni.

Delphine u swi endlile sweswo. Sweswi u ri: “Ndzi xiye leswaku byala a byi ndzi pfunanga ku tlhantlha swiphiqo swa mina. Ndzi tirhise xitsundzuxo lexi kumekaka eka Vafilipiya 4:6, 7 lexi nge: “Mi nga vileli ha nchumu, kambe . . . tivisani Xikwembu swikombelo swa n’wina.” Vusiku byin’wana ni byin’wana loko ndzi tikeriwa hi swiphiqo, a ndzi khongela eka Yehovha. Ndzi n’wi phofulele ndlela leyi a ndzi ti twa ha yona, ku katsa ni ku hlundzuka ka mina, ku vava loku a ndzi ku twa ni ntshikilelo lowu a ndzi ri na wona naswona ndzi n’wi kombele leswaku a ndzi pfuna ndzi va ni langutelo lerinene. Nimixo a ndzi ringeta ku papalata miehleketo yo biha. Mukhuva wolowo wo khongela wu ndzi pfune leswaku ndzi anakanyisisa hi leswi ndzi nga na swona ni ku tshika ku anakanya hi leswi ndzi nga riki na swona. Ndzi endle xiboho xo tshika byala. Hikuva a ndzi nga swi lavi ku lahlekeriwa hi ku rhula loku a ndzi ri na kona.”

KU TIKHOMA KO BIHA HI TLHELO RA MASANGU

Ku tikhoma ko biha hi tlhelo ra masangu i xin’wana xa swivangelo leswikulu lexi endlaka vanhu vo tala vava ni  gome ni ntshikilelo. Kambe Bibele yi tamele misinya ya milawu leyi nga hi pfunaka ku papalata swiphiqo sweswo, hi ku hi pfuna hi tshika mikhuva yo fana ni ku tlanga hi rirhandzu ni ku hlalela swifaniso swa vanhu lava nga ambalangiki. Muntshwa la vuriwaka Samuel u ri: “A swi ndzi olovela ku tlanga hi rirhandzu. Mikarhi yin’wana hambi ndzi nga n’wi rhandzi munhu wa kona kambe a ndzi swi vona loko a ndzi rhandza kutani sweswo a swi endla leswaku ndzi tiphina hi ku tlanga hi rirhandzu.” Samuel u vula leswaku mikarhi yo tala a lumbetiwa hi ku tlanga hi rirhandzu hambiloko yena a nga tiyimiselanga ku endla sweswo, naswona sweswo swi endle leswaku eku heteleleni a tlanga hi rirhandzu hi xikongomelo xo twisa van’wana ku vava. Kambe mukhuva wolowo wu sungule ku n’wi karhata. Sweswi Samuel u ri: “Mukhuva wolowo a wu bihile hikuva a wu endla leswaku ndzi ehleketa hi leswi vuyerisaka mina ntsena.”

Samuel u hlaye xihloko lexi tsaleriweke vantshwa eka website ya jw.org. Kutani u anakanyisise hi tsalwa ra Swivuriso 20:11, leri nge: “Mufana u tiviwa hi ndlela leyi a hanyaka ha yona loko mintirho yakwe yi tengile naswona yi lulamile.” Xana sweswo swi n’wi pfune njhani? Samuel u xiye leswaku ku tlanga hi rirhandzu a swi nga tenganga naswona a swi nga lulamanga. Sweswi u ri: “Ndzi tlhele ndzi dyondza leswaku muntshwa loyi a tlangaka hi rirhandzu u hlakulela timfanelo leti nga ta n’wi endla a nga vi munghana lonene wa vukati. Ndzi sungule ku anakanya leswaku nsati loyi ndzi nga ta n’wi teka a ta titwa njhani loko a ndzi vona ndzi tlanga hi rirhandzu ni wansati un’wana. Sweswo swi ndzi endle ndzi vona khombo leri nga vangiwaka hi mukhuva wolowo. Hambileswi a swi ndzi olovela ku tlanga hi rirhandzu, a hi swinene.” Hikwalaho, Samuel u tshike mukhuva wolowo. Leswi a papalateke ku tlanga hi rirhandzu swi n’wi pfune leswaku a papalata ni ku tikhoma ko biha hi tlhelo ra masangu.

Antonio a ri ekhombyeni ra ku tikhoma hi ndlela yo biha hi tlhelo ra masangu hikuva a godzomberiwe hi ku languta swifaniso swa vanhu lava nga ambalangiki. Hambileswi a rhandza nsati wakwe swinene, a a tshamela ku wongiwa hi mukhuva wolowo. U vula leswaku ku anakanya hi tsalwa ra 1 Petro 5:8 swi n’wi pfunile swinene. Ri ri: “Hlayisani mianakanyo ya n’wina leyi hlutekeke, mi hiteka. Xirha xa n’wina, Diyavulosi, xa famba-famba ku fana ni nghala leyi vombaka, yi lava wa ku n’wi dya.” Antonio u ri: “Swifaniso leswi pfuxaka ku navela timhaka ta masangu swi kumeka kun’wana ni kun’wana, naswona swi nga dzika emianakanyweni. Ndzimana yoleyo yi ndzi pfune ndzi tiva loyi a ndzi vangelaka ndzingo wolowo. A ndzi fanele ndzi tsundzuka leswaku swifaniso sweswo swi huma eka Diyavulosi. Sweswi se ndza swi tiva leswaku i Yehovha ntsena loyi a nga ndzi pfunaka leswaku ndzi ‘hlayisa mianakanyo ya mina yiri leyi hlutekeke’ leswaku ndzi kota ku lwisana ni leswi ndzi ringaka emianakanyweni, embilwini ni le ndyangwini wa mina.” Eku heteleleni, Antonio u swi kotile ku tshika mukhuva wolowo wo biha. Ku endla sweswo swi tlhele swi n’wi pfuna a kota ku papalata swiphiqo swin’wana leswikulu.

Hakunene, Bibele yi ni switsundzuxo leswi nga hi pfuna leswaku hi papalata mikhuva yo biha. Kambe ku vuriwa yini loko u ri swiphiqo leswi dzimeke timitsu, leswi phikelelaka? A hi kambisiseni ndlela leyi rito ra Xikwembu ri nga hi pfunaka ha yona ku tlhantlha swiphiqo swo tano.

Switsundzuxo swa Bibele swi nga hi pfuna hi papalata mikhuva yin’wana yo biha