Nghena endzeni

Hundzela eka leswi nga endzeni

Xana Hakunene Yesu U Ndzi Ferile?

Xana Hakunene Yesu U Ndzi Ferile?

EBIBELENI ku ni marito yo tala ya vanhu lava “nga ni mintlhaveko yo fana ni ya hina.” (Yak. 5:17) Hi xikombiso, ha swi twisisa leswaku Pawulo a a vula yini eka marito lama nga eka Varhoma 7:21-24 lama nge: “Loko ndzi navela ku endla leswi lulameke, leswo biha swi kona eka mina. . . . Mina munhu wa maxangu!” Loko hi ri karhi hi lwisana ni swihoxo swa hina, swa hi chavelela ku tiva leswaku munhu wo tshembeka ku fana na Pawulo a a titwa hi ndlela yoleyo.

Pawulo u tlhele a phofula swin’wana. Eka Vagalatiya 2:20, u phofule leswaku Yesu u n’wi “rhandz[ile] kutani a tinyiketa hikwalaho ka [yena].” Xana na wena u titwa hi ndlela yoleyo? Kumbexana mikarhi yin’wana u pfa u nga titwi tano.

Loko u titwa u ri xikangalafula hikwalaho ka swidyoho leswi u swi endleke khale, mikarhi yin’wana swi nga ha ku tikela ku pfumela leswaku Yehovha wa ku rhandza, u ku rivalerile, naswona swi nga ha ku tikela ku pfumela leswaku Yesu u ku ferile. Xana Yesu u lava leswaku hi teka rifu rakwe ri ri nyiko? Loko swi ri tano, i yini lexi nga ta hi pfuna leswaku hi kota ku endla tano? A hi tlhuvutseni swivutiso sweswo swimbirhi.

NDLELA LEYI YESU A TEKA RIFU RAKWE HA YONA

Entiyisweni, Yesu u lava leswaku u teka rifu rakwe ri ri nyiko leyi a ku nyikeke yona. I yini lexi endlaka hi swi tshemba sweswo? Anakanya hi mhaka leyi tsariweke eka Luka 23:39-43. Wanuna loyi a beleriwe etlhelo ka Yesu u pfumerile leswaku u dyohile. U pfumerile leswaku u endle vugevenga lebyikulu. Hikuva vanhu lava endleke vugevenga lebyikulu ku fana na yena hi vona lava a va dlayiwa hi ndlela ya tihanyi hi ku hayekiwa emhandzini. Wanuna loyi, hi mbilu ku vava u kombele Yesu a ku: “U ndzi tsundzuka loko u nghena eMfun’weni wa wena.”

Xana Yesu u endle yini? Ehleketa ku vava loku Yesu a ku tweke loko a jikisa nhloko yakwe a languta xigevenga xexo. Hambileswi Yesu a a twa ku vava, u n’wayiterile kutani a chavelela wanuna yoloye a ku: “Ndzi tiyisile namuntlha ndzi ri eka wena, U ta va na mina eParadeyisini.” Xiya leswaku Yesu a nga hlamulanga wanuna yoloye a ku: “N’wana wa munhu a . . . [tele] ku nyikela moya-xiviri wakwe wu va nkutsulo wa lavo tala.” (Mat. 20:28) Ematshan’weni ya sweswo, Yesu u ve ni musa eka wanuna yoloye kutani a kombisa leswaku a a fela na yena. A ri ni xinghana naswona u tirhise rito leri nge “wena” ni leri nge “mina.” U tlhele a byela wanuna yoloye leswaku u ta hanya emisaveni leyi nga paradeyisi.

A swi kanakanisi leswaku Yesu a lava wanuna yoloye a amukela gandzelo leri ra nkutsulo tanihi nyiko leyi humaka eka yena leyi nga ta n’wi pfuna. Loko Yesu a titwe hi ndlela yoleyo hi xigevenga lexi a xi nga si tshama xi tirhela Xikwembu, swa twala ku tshemba leswaku u titwa hi ndlela yoleyo hi vanhu lava khuvuriweke, lava tirhelaka Xikwembu. I yini lexi nga ta hi pfuna ku tshemba leswaku rifu ra Yesu ri pfuna hina vini ku nga khathariseki swidyoho leswi hi nga tshama hi swi endla?

 LESWI PFUNEKE PAWULO

Ntirho wo chumayela a wu endla Pawulo a swi xiya leswaku Yesu u fele yena. Njhani? U ri: “Ndzi nkhensa Kreste Yesu Hosi ya hina, loyi a ndzi nyikeke matimba, hikuva u ndzi teke ndzi tshembekile hi ku ndzi avela evutirhelini, hambileswi eku sunguleni a ndzi ri musandzi ni muxanisi ni murhukani.” (1 Tim. 1:12-14) Xiavelo lexi Pawulo a nyikiweke xona xa vutirheli xi n’wi endle a tshemba leswaku Yesu u ni musa, wa n’wi rhandza ni ku n’wi tshemba hambileswi a nga tshama a endla swilo swo biha. Hilaha ku fanaka, Yesu u nyike un’wana ni un’wana wa hina xiavelo xo chumayela mahungu lamanene. (Mat. 28:19, 20) Xana xiavelo xa hina xo chumayela xi nga hi endla hi pfumela leswaku na hina Yesu u hi ferile?

Albert loyi a ha ku tlhelelaka eka Yehovha endzhaku ko susiwa kwalomu ka malembe ya 34, u ri: “A ndzi swi rivali swidyoho leswi ndzi nga tshama ndzi swi endla. Kambe hilaha Pawulo a vuleke hakona, loko ndzi ri eku chumayeleni ndza swi xiya leswaku Yesu u ndzi avele vutirheli. Sweswo swi ndzi endla ndzi tsaka ndzi tlhela ndzi va ni ntshembo hi vumundzuku.”—Ps. 51:3.

Loko u ri nkarhi u dyondza ni vanhu vo hambanahambana va pfune va swi tiva leswaku Yesu wa va rhandza.

Allan loyi a hanya hi vugevenga ni ku rhandza tinyimpi loko a nga si dyondza Bibele, u ri: “Ndza ha yi tsundzuka ndlela leyi ndzi va twiseke ku vava ha yona vanhu. Mikarhi yin’wana loko ndzi swi tsundzuka swi ndzi dyisa mbitsi. Kambe ndza n’wi khensa Yehovha hikuva u pfumelela mudyohi wo fana na mina leswaku byela van’wana mahungu lamanene. Loko ndzi vona vanhu va amukela mahungu lamanene, swi ndzi tsundzuxa leswaku Yehovha u ni rirhandzu naswona hi lonene. Ndzi twa onge u ndzi tirhisa ku pfuna vanhu lava endleke swilo swo biha ku fana na mina.”

Loko hi ri evutirhelini hi endla leswinene naswona hi anakanya hi swilo leswinene. Swi hi endla hi tiyiseka leswaku Yesu u ni musa, wa hi rhandza naswona wa hi tshemba.

YEHOVHA U NKULU EKA TIMBILU TA HINA

Loko misava ya Sathana yi nga si lovisiwa, timbilu ta hina ti ta pfa ti sola hikwalaho ka swidyoho leswi hi nga tshama hi swi endla. I yini lexi nga ta hi pfuna hi tshika ku titwa hi ndlela yoleyo.

Jean loyi a tshamelaka ku titwa nandzu hikwalaho ka leswi a hanya vutomi bya mikoka yimbirhi loko a ha ri muntshwa u ri: “Ndzi rhandza mhaka ya leswaku ‘Xikwembu i xikulu eka timbilu ta hina.’” (1 Yoh. 3:19, 20) Ku fana na Jean, swa hi chavelela ku tiva leswaku Yehovha na Yesu va swi twisisa leswaku hi vadyohi. Tsundzuka, va kombise rirhandzu hi ku humesa gandzelo ra nkutsulo leswaku ku ta pfuneka vadyohi lava hundzukaka ku nga ri vanhu lava hetisekeke.—1 Tim. 1:15.

Ha tiyiseka leswaku nkutsulo wa tirha eka hina loko hi khongela hi tlhela hi anakanyisisa hi ndlela leyi Yesu a a va khoma ya yona vanhu lava nga ni xidyoho ni loko hi tirha hi matimba entirhweni wo chumayela lowu a hi nyikeke wona. Loko u endla tano u nga vula hilaha Pawulo a vuleke ha kona u ku: Yesu u “ndzi rhandz[ile] kutani a tinyiketa hikwalaho ka mina.”