Nghena endzeni

Hundzela eka leswi nga endzeni

 XIHLOKO LEXI DYONDZIWAKA 29

“Fambani Mi Ya Endla . . . Vadyondzisiwa”

“Fambani Mi Ya Endla . . . Vadyondzisiwa”

“Fambani mi ya endla vanhu va matiko hinkwawo va va vadyondzisiwa”—MAT. 28:19.

RISIMU 60 Swi Khumba Vutomi Bya Vona

LESWI HI NGA TA SWI DYONDZA *

1-2. (a) Hi ku ya hi xileriso xa Yesu lexi tsariweke eka Matewu 28:18-20 hi xihi xikongomelonkulu xa Vakreste? (b) Hi swihi swivutiso leswi hi nga ta swi tlhuvutsa eka xihloko lexi?

A SWI kanakanisi leswaku vaapostola a va tsake ngopfu loko va hlengeletanile entshaveni. Yesu endzhaku ka loko a pfuxiwile, u va kombele leswaku va ya hlangana na yena kwale ntshaveni. (Mat. 28:16) Kumbexana lowu hi wona nkarhi lowu a nga “humele[la] eka vamakwerhu vo tlula 500 hi nkarhi wun’we.” (1 Kor. 15:6) Hikwalaho ka yini Yesu a va kombele leswaku va ya hlangana na yena kwale? Leswaku a ta va nyika xileriso xo tsakisa swinene, lexi nge: “Hikokwalaho fambani mi ya endla vanhu va matiko hinkwawo va va vadyondzisiwa.”—Hlaya Matewu 28:18-20.

2 Vadyondzisiwa lava tweke marito ya Yesu va hundzuke Vakreste vo sungula. Xikongomelo lexikulu xa Vakreste volavo a ku ri ku endla vanhu va va vadyondzisiwa va Kreste. * Namuntlha emisaveni hinkwayo, ku ni mavandlha yo tala ya Vakreste va ntiyiso, naswona xikongomelo xa vona xa ha fana ni xa Vakreste vo sungula. Exihlokweni lexi hi ta tlhuvutsa swivutiso swa mune leswi nge: Hikwalaho ka yini ntirho wo endla vadyondzisiwa wu ri wa nkoka? Ku laveka yini leswaku hi kota ku endla vadyondzisiwa? Xana Vakreste hinkwavo va katseka eku endleni ka vadyondzisiwa? Ni lexi nge, hikwalaho ka yini hi fanele hi lehisa mbilu loko hi endla vadyondzisiwa?

 HIKWALAHO KA YINI NTIRHO WO ENDLA VADYONDZISIWA WU RI WA NKOKA?

3. Hi ku ya hi Yohane 14:6 na 17:3, hikwalaho ka yini ntirho wo endla vadyondzisiwa wu ri wa nkoka?

3 Hikwalaho ka yini ntirho wo endla vadyondzisiwa wu ri wa nkoka? Hikuva vanhu lava vaka vanghana va Xikwembu va fanele va rhanga va va vadyondzisiwa va Kreste. Ku engetela kwalaho, lava va landzelaka Kreste va cinca vutomi bya vona naswona va ni ntshembo wo kuma vutomi lebyi nga heriki. (Hlaya Yoh. 14:6; 17:3.) Handle ko kanakana, Yesu u hi nyike vutihlamuleri bya nkoka, kambe ntirho lowu a hi wu endli hi ri hexe. Loko muapostola Pawulo a tsala hi ta ntirho lowu yena ni vanghana vakwe va wu endlaka u te: “Hina hi vatirhi-kulobye ni Xikwembu.” (1 Kor. 3:9) Hakunene leri i lunghelo lerikulu leri Yehovha na Kreste va ri nyikeke vanhu lava nga hetisekangiki!

4. Hi dyondza yini eka mhaka ya Ivan na Matilde?

4 Ntirho wo endla vadyondzisiwa wu nga hi tisela ntsako lowukulu. Xiya xikombiso xa Ivan na Matilde va le Colombia. Endzhaku ko chumayela Davier, u va va byele leswi: “Ndzi lava ku cinca mahanyelo ya mina, kambe swa ndzi tsandza.” Jaha leri a ri ri mubi wa xibakele, a ri tirhisa swidzidziharisi, ri kukutlela byala naswona a ri tshama ni ntombhi ya rona Erika va nga tekananga. Ivan u ri: “Hi sungule ku endzela Davier emugangeni lowu a a tshama eka wona naswona a hi famba tiawara to tala endleleni leyi nga ni ndzhope hi basikiri. Loko Erika a vona Davier a cinca mahanyelo yakwe, na yena u sungule ku dyondza Bibele.” Endzhaku ka nkarhi, Davier u tshike ku tirhisa swidzidziharisi, ku kukutlela byala ni ku ba xibakele. U tlhele a teka Erika hi nawu. Matilde u ri: “Loko Davier na Erika va khuvuriwa hi 2016, hi tsundzuke marito lama Davier a a tshamela ku ma vula a ku, ‘Ndzi lava ku cinca mahanyelo ya mina, kambe swa ndzi tsandza.’ A hi tsake ngopfu lerova hi xiririka ni mihloti.” A swi kanakanisi leswaku loko hi pfuna vanhu va va vadyondzisiwa va Kreste ha tsaka swinene!

KU LAVEKA YINI LESWAKU HI KOTA KU ENDLA VADYONDZISIWA?

5. Hi wihi nchumu wo sungula lowu hi faneleke hi wu endla leswaku hi kota ku endla vadyondzisiwa?

5 Xo sungula lexi hi xi endlaka leswaku hi kota ku endla vadyondzisiwa i ku ‘lavisisa’ lava navelaka ku dyondza hi Yehovha. (Mat. 10:11) Loko hi chumayela vanhu hinkwavo lava hi hlanganaka na vona, hi kombisa leswaku hi Timbhoni ta Yehovha. Nakambe loko hi landzela xileriso xa Yesu xo chumayela hi kombisa leswaku hi Vakreste va ntiyiso.

6. Hi nga endla yini leswaku vanhu lava hi va chumayelaka va hi yingisela?

6 Vanhu van’wana va ni torha ro dyondza ntiyiso wa le Bibeleni, kambe van’wana va nga ha tikomba va nga ri na mhaka loko u vulavula na vona ro sungula. Hi nga ha boheka ku va khutaza leswaku va navela ku dyondza Bibele. Leswaku hi va ni vuyelo lebyinene ensin’wini, hi fanele hi lunghiselela kahle. Hlawula tinhlokomhaka leti nga ta tsakeriwa hi vanhu va le nsin’wini ya n’wina. Kutani u lunghiselela xingheniso xa nhlokomhaka yin’wana ni yin’wana.

7. U nga ri sungula njhani bulo, naswona hikwalaho ka yini u ehleketa leswaku i swa nkoka ku rhiya ndleve ni ku xixima lava u vulavulaka na vona?

7 Hi xikombiso, u nga ha kombela n’wini wa muti u ku: “Ndzi kombela ku twa vonelo ra wena hi mhaka leyi. Vanhu vo tala emisaveni hinkwayo va ni swiphiqo swo tala. Xana u ehleketa leswaku mfumo wa vanhu wu nga swi kota ku tlhantlha swiphiqo leswi nga kona laha misaveni?” Kutani u nga ha bula na yena hi Daniyele 2:44. Kumbexana u nga ha ku: “U ehleketa leswaku hi yihi ndlela yo dyondzisa vana mahanyelo lamanene? Ndzi kombela u ndzi byela, u swi vona njhani?” Kutani u bula na yena hi Deteronoma 6:6, 7. Ku nga khathariseki mhaka yihi na yihi leyi mi nga ta bula ha yona, ehleketa hi vanhu lava u  nga ta bula na vona. Ehleketa hi ndlela leyi va nga ta vuyeriwa ha yona loko va dyondza leswi Bibele yi swi dyondzisaka hakunene. Loko u ri nkarhi u vulavula na vona, i swa nkoka leswaku u va yingisela ni ku xixima vonelo ra vona. Loko u endla tano u ta tiva ndlela leyi u nga va pfunaka ha yona naswona va ta ku yingisela.       

8. Hikwalaho ka yini ku endla maendzo yo vuyela swi lava matshalatshala?

8 Loko munhu a nga si pfumela ku dyondza Bibele, u fanele u tinyika nkarhi wo endla maendzo yo vuyela. Hikwalaho ka yini? Hikuva swi nga endleka mikarhi yin’wana hi nga va kumi loko hi tlhelela eka vona. Nakambe u nga ha boheka ku tlhelela mikarhi yo hlaya, n’wini wa muti a nga si pfumela ku dyondzeriwa Bibele. Tsundzuka, ximilana xi kula loko xi cheletiwa nkarhi ni nkarhi. Hilaha ku fanaka, rirhandzu leri munhu yoloye a rhandzaka Yehovha na Yesu ha rona ri ta kula loko hi tshamela ku bula na yena hi Rito ra Xikwembu.

XANA VAKRESTE HINKWAVO VA KATSEKA EKU ENDLENI KA VADYONDZISIWA?

Timbhoni emisaveni hinkwayo ta katseka eku laveni ka vanhu lava lavaka ku dyondza hi Yehovha (Vona tindzimana 9-10) *

9-10. Hikwalaho ka yini hi vula leswaku Mukreste un’wana ni un’wana wa ntiyiso wa katseka eku laveni ka lava va lavaka ku va vadyondzisiwa?

9 Mukreste un’wana ni un’wana wa ntiyiso wa katseka eku laveni ka lava va lavaka ku va vadyondzisiwa. Ntirho wo lava vadyondzisiwa hi nga wu fanisa ni vanhu lava lavaka n’wana la lahlekeke. Hi ndlela yihi? Ehleketa hi leswi humeleleke xifanyetana xa malembe manharhu lexi a xi lahlekile. Vanhu va kwalomu ka 500 va fambe va xi lava. Endzhaku ka kwalomu ka tiawara ta 20 va ri eku laveni, un’wana wa vanhu lava a va ri eku laveni u hetelele a xi kume ensin’wini ya mavele. Munhu yoloye u ale ku themendheriwa. U te: “Xifanyatana xi kumeke hileswi a hi khomisane hi tele.”

10 Vanhu vo tala va fana ni xifanyetana xexo lexi a xi lahlekile. A va na ntshembo naswona va lava ku pfuniwa. (Efe. 2:12) Hina lava tlulaka nhungu wa timiliyoni ha khomisana leswaku hi  lava vanhu lava. Swi nga endleka wena u nga n’wi kumi munhu loyi u nga dyondzaka Bibele na yena. Kambe vahuweleri van’wana lava u tirhaka na vona ensin’wini, va nga ha n’wi kuma munhu loyi a lavaka ku dyondza ntiyiso lowu nga eRitweni ra Xikwembu. Loko makwerhu a kuma munhu kutani munhu wa kona a hundzuka mudyondzisiwa wa Kreste, hinkwavo lava katsekeke va tsaka.

11. Hambiloko u nga ri na dyondzo ya Bibele, hi tihi tindlela tin’wana leti u nga pfunetaka ha tona entirhweni wo endla vadyondzisiwa?

11 Hambiloko u nga ri na dyondzo ya Bibele sweswi, u nga hoxa xandla hi tindlela tin’wana eka ntirho wo endla vadyondzisiwa. Hi xikombiso, loko u vona munhu loyi a taka ro sungula eHolweni ya Mfumo, u nga n’wi amukela hi mandla mambirhi u tlhela u bula na yena. Hi ndlela yoleyo, u ta va u n’wi tiyisekisa leswaku hina Vakreste va ntiyiso hi dume hi rirhandzu. (Yoh. 13:34, 35) Loko u nyikela tinhlamulo to koma eminhlanganweni, u dyondzisa lava sungulaka ku ta eminhlanganweni ndlela yo phofula ripfumelo ra vona hi ndlela leyi xiximekaka. U nga ha famba ni muhuweleri lontshwa ensin’wini, u n’wi pfuna ku tirhisa Matsalwa loko a dyondzisa vanhu. Loko u endla tano, u ta va u ri karhi u n’wi dyondzisa ku tekelela Kreste.—Luka 10:25-28.   

12. Xana hi fanele hi va ni vuswikoti byo hlawuleka leswaku hi kota ku endla vadyondzisiwa? Hlamusela.

12 A hi fanelanga hi anakanya leswaku swi lava hi va ni vuswikoti byo hlawuleka leswaku hi ta kota ku dyondzisa van’wana leswaku va va vadyondzisiwa va Yesu. Hikwalaho ka yini? Xiya xikombiso xa Faustina, wansati la tshamaka eBolivia. Loko a hlangana ni Timbhoni ta Yehovha ro sungula a nga swi koti ku hlaya. Kambe sweswi wa swi kotanyana ku hlaya. Sweswi Faustina i Mbhoni leyi khuvuriweke naswona u rhandza ku dyondzisa van’wana. U fambisa tidyondzo ta Bibele ta ntlhanu vhiki ni vhiki. Hambileswi swichudeni swo tala swa Faustina swi kotaka ku hlaya ku n’wi tlula, u pfune vanhu va tsevu leswaku va khuvuriwa.—Luka 10:21.

13. Hi yihi mikateko yin’wana leyi hi nga yi kumaka loko hi endla vadyondzisiwa hambiloko hi khomekile?

13 Vakreste vo tala va khomekile hikwalaho ka vutihlamuleri lebyi va nga na byona. Hambiswiritano, va kuma nkarhi wo fambisa tidyondzo ta Bibele naswona sweswo swa va tsakisa. Xiya xikombiso xa Melanie. A a ri mutswari la nga yexe loyi a tshama eAlaska naswona a ri ni n’wana wa nhwanyana la nga ni malembe ya nhungu. Melanie a a tirha ntirho wa ku tihanyisa naswona a pfa a khathalela mutswari wakwe loyi a nga ni vuvabyi bya khensa. Melanie a ku ri yena ntsena Mbhoni emugangeni wa ka vona. U kombele Yehovha leswaku a n’wi nyika matimba yo kota ku tiyisela xirhami loko a ya eku chumayela, hikuva a navela ku kuma munhu loyi a nga ta dyondza na yena Bibele. Eku heteleleni u hlangane na Sara, naswona a tsake ngopfu loko a twa leswaku Xikwembu xi ni vito. Hi ku famba ka nkarhi,  Sara u pfumele ku dyondzeriwa Bibele. Melanie u ri: “Hi Wavuntlhanu wun’wana ni wun’wana, a ndzi va ndzi lo lakahla hi ku karhala, kambe mina ni ntombhi yanga a hi famba hi ya dyondzela Sara Bibele naswona a hi vuya hi tsakile. A hi tiphina hi ku lavisisa tinhlamulo ta swivutiso swa Sara naswona a hi tsake ngopfu loko hi n’wi vona a va munghana wa Yehovha.” Sara u tiyiserile hambiloko a kanetiwa, u tshike kereke ya yena kutani a khuvuriwa.

LEXI ENDLAKA KU ENDLA VADYONDZISIWA SWI LAVA KU LEHISA MBILU

14. (a) Lava endlaka vadyondzisiwa va fana njhani ni vaphasi va tihlampfi? (b) Marito ya Pawulo lama nga eka 2 Timotiya 4:1, 2, ma ku khumba njhani?

14 Hambiloko u nga si kuma munhu loyi a navelaka ku va mudyondzisiwa u nga wi mapa, yana emahlweni u lavisisa. Yesu u vule leswaku lava endlaka vadyondzisiwa va fana ni vaphasi va tihlampfi. Vaphasi va tihlampfi va nga ha tirha tiawara to tala va nga si phasa nhlampfi na yin’we. Mikarhi yo tala va phasa nivusiku kumbe hi matakuxa naswona mikarhi yin’wana va boheka ku famba mpfhuka wo leha. (Luka 5:5) Hilaha ku fanaka, Vakreste van’wana va heta tiawara to tala va ri karhi va chumayela hi mikarhi yo hambanahambana etindhawini to hambanahambana. Hikwalaho ka yini? Leswaku va ta hlangana ni vanhu vo tala. Lava tikarhataka hi ndlela leyi hakanyingi va kuma vanhu lava tsakelaka rungula ra hina. Xana u nga ringeta ku chumayela endhawini leyi vanhu va kumekaka hi nkarhi wo karhi eka yona?—Hlaya 2 Timotiya 4:1, 2.    

Lehisa mbilu loko u ri karhi u dyondzisa swichudeni swa wena ku tiva Yehovha ni ku n’wi rhandza ni ku n’wi yingisa (Vona tindzimana 15-16) *

15. Hikwalaho ka yini hi fanele hi lehisa mbilu loko hi fambisa tidyondzo ta Bibele?

15 Hikwalaho ka yini hi fanele hi lehisa mbilu  loko hi fambisa tidyondzo ta Bibele? Hikuva hi fanele hi pfuna xichudeni xi tiva leswi Bibele yi swi dyondzisaka xi tlhela xi yi rhandza. Hi fanele hi pfuna xichudeni leswaku xi tiva Yehovha ku nga Mutsari wa Bibele, xi tlhela xi n’wi rhandza. Nakambe loko hi dyondzisa xichudeni leswi Yesu a swi languteleke eka vadyondzisiwa va yena, hi fanele hi xi pfuna xi tiva ndlela leyi xi faneleke xi hanya ha yona tanihi Mukreste wa ntiyiso. Hi fanele hi xi lehisela mbilu loko xi ri karhi xi ringeta ku hanya hi misinya ya milawu ya Bibele. Swichudeni swin’wana swa swi kota ku tshika mikhuva ni ku cinca ndlela leyi swi ehleketaka ha yona hi tin’hweti ti nga ri tingani; kambe vanhu van’wana swi va tekela nkarhi wo leha.    

16. I yini leswi u swi dyondzeke eka xikombiso xa Raúl?

16 Murhumiwa un’wana wa le Peru u kote ku pfuna xichudeni xa Bibele hikwalaho ko lehisa mbilu. U ri: “Ndzi dyondze tibuku timbirhi na Raúl, xichudeni xa mina xa Bibele. Hambiswiritano, a ha ri na swiphiqo swo tala. A a ri ni swiphiqo swo tala evukatini byakwe, a a phyandlasela nhlambha naswona vana vakwe a va nga n’wi xiximi hikwalaho ka mahanyelo yakwe. Hambiswiritano, a ta eminhlanganweni nkarhi na nkarhi, hikwalaho ndzi ye emahlweni ndzi n’wi endzela leswaku ndzi n’wi pfuna swin’we ni ndyangu wakwe. Endzhaku ka malembe manharhu u khuvuriwile.”

17. Hi ta kambisisa yini exihlokweni lexi landzelaka?

17 Yesu u hi byele leswaku hi ‘famba hi ya endla vanhu va matiko hinkwawo va va vadyondzisiwa.’ Leswaku hi endla ntirho wolowo hi fanele hi vulavula ni vanhu lava ehleketaka hi ndlela leyi nga faniki ni ya hina, lava nga ngheniki kereke ni lava nga tshembiki leswaku Xikwembu xi kona. Eka xihloko lexi landzelaka hi ta kambisisa ndlela leyi hi nga va chumayelaka ha yona vanhu vo tano.

RISIMU 68 Ku Byala Mbewu Ya Mfumo

^ par. 5 Xikongomelonkulu xa Vakreste i ku pfuna vanhu va va vadyondzisiwa va Kreste. Xihloko lexi xi hi nyika swiringanyeto leswi nga hi pfunaka leswaku hi fikelela xikongomelo xa hina.

^ par. 2 NHLAMUSELO YA RITO: Vadyondzisiwa va Kreste va yingisa leswi a va dyondziseke swona, va tlhela va hanya hi swona. Va ringeta ku landzelerisisa mikondzo ya Yesu.—1 Pet. 2:21.

^ par. 52 NHLAMUSELO YA XIFANISO: Wanuna loyi a nga eriendzweni u teke xiphephana eka Timbhoni leti nga ni xigolonyana exitichini xa swihahampfhuka. Loko a ri karhi a valanga etikweni leri a nga endzela eka rona u vona Timbhoni ti ri karhi ti chumayela hi xigolonyana exitarateni. Endzhaku ka loko a tlhelele ekaya u endzeriwa hi vahuweleri

^ par. 54 NHLAMUSELO YA XIFANISO: Wanuna yoloye u pfumele ku dyondzeriwa Bibele. Eku heteleleni u khuvuriwile.