Nghena endzeni

Hundzela eka leswi nga endzeni

 XIHLOKO LEXI DYONDZIWAKA 46

Xana Wa Xi Khathalela “Xitlhangu Lexikulu Xa Ripfumelo” Ra Wena?

Xana Wa Xi Khathalela “Xitlhangu Lexikulu Xa Ripfumelo” Ra Wena?

“Rhwalani xitlhangu lexikulu xa ripfumelo.”—EFE. 6:16.

RISIMU 119 Hi Fanele Hi Va Ni Ripfumelo

LESWI HI NGA TA SWI DYONDZA *

1-2. (a) Hi ku ya hi Vaefesa 6:16, hikwalaho ka yini hi lava “xitlhangu lexikulu xa ripfumelo”? (b) Hi swihi swivutiso leswi hi nga ta bula hi swona?

XANA u na xona “xitlhangu lexikulu xa ripfumelo”? (Hlaya Vaefesa 6:16.) Ina, u na xona. Ku fana ni xitlhangu lexikulu lexi sirhelelaka miri, ripfumelo ra wena ra ku sirhelela eka mahanyelo yo biha, madzolonga ni le ka minkucetelo yo biha ya misava leyi.

2 Hambiswiritano, hi hanya “emasikwini yo hetelela” naswona ripfumelo ra hina ri ta ya emahlweni ri ringiwa. (2 Tim. 3:1) U nga xi kambela njhani xitlhangu xa wena xa ripfumelo ku vona loko xi tiyile? Naswona u nga endla yini leswaku xitlhangu xa wena xi tshama xi tiyile? A hi buleni hi swivutiso leswi.

KAMBELA XITLHANGU XA WENA HI VUKHETA

Loko ma vuya enyimpini, masocha a ma lunghisa switlhangu swa wona (Vona ndzimana 3)

3. Masocha a ma endla yini hi xitlhangu xa wona naswona hikwalaho ka yini?

3 Emikarhini ya Bibele, hakanyingi masocha a ma khoma xitlhangu lexi tsondzeriweke hi dzovo. Masocha a ma tota xitlhangu mafurha leswaku dzovo ri nga onhaki ni tinsimbi ta xona ti nga rhusi. Loko socha ri vona leswaku xitlhangu xa rona xi onhakile, a ri xi lunghisa hi ku hatlisa leswaku ri ta lunghekela nyimpi leyi landzelaka. Xikombiso lexi xi nghena njhani emhakeni ya ripfumelo ra wena?

4. Hikwalaho ka yini u fanele u kambela xitlhangu xa ripfumelo ra wena naswona u nga swi endla njhani sweswo?

4 Ku fana ni masocha ya khale, u fanele u tshamela ku kambela ni ku khathalela xitlhangu xa wena xa ripfumelo leswaku u ta tshama u lunghekele nyimpi. Leswi hi nga Vakreste, hi  le nyimpini ya moya naswona valala va hina va katsa mimoya yo biha. (Efe. 6:10-12) Hi wena ntsena u nga kotaka ku khathalela xitlhangu xa ripfumelo ra wena. U nga swi tiva njhani leswaku u swi lunghekerile ku langutana ni miringo? Xo sungula, khongela u kombela mpfuno eka Xikwembu. Endzhaku, tirhisa Rito ra Xikwembu leswaku ri ku pfuna u ti vona hilaha Xikwembu xi ku vonaka hakona. (Hev. 4:12) Bibele yi ri: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini.” (Swiv. 3:5, 6) Loko wa ha ri na sweswo emiehleketweni, hikwalaho ka yini u nga kambisisi swiboho leswi wa ha ku swi endlaka? Hi xikombiso, xana a wu langutane ni xiphiqo lexikulu xa timali? Xana u ehleketile hi xitshembiso lexi nga eka Vaheveru 13:5 lexi nge: “Ndzi nga ka ndzi nga ku tshiki naswona ndzi nga ka ndzi nga ku fularheli”? Xana xitshembiso xexo xi ku tiyisekisile leswaku Yehovha u ta ku pfuna? Loko swi ri tano, swi vula leswaku wa xi khathalela xitlhangu xa wena xa ripfumelo.

5. I yini leswi u nga swi kumaka loko u ri karhi u kambela ripfumelo ra wena?

5 Swi ta ku hlamarisa leswi u nga ta swi kuma loko u ri karhi u kambela ripfumelo ra wena hi vukheta. U nga kuma leswaku u ni ku tsana ko karhi loku a wu nga ku xiyi. Hi xikombiso, u nga kuma leswaku ku vilela ngopfu, mavunwa ni ku hela matimba swi onhe ripfumelo ra wena. Loko leswi swi tshame swi ku endlekela, u nga ri sirhelela njhani ripfumelo ra wena leswaku ri nga yi ri vaviseka?

TISIRHELELE EKA KU VILELA, MAVUNWA NI LE KA KU HELA MATIMBA

6. Hi swihi swilo swin’wana leswi nga bihangiki ku vilela hi swona?

6 Mikarhi yin’wana ku vilela a swi bihanga. Hi xikombiso, ha vilela hi ndlela leyi hi nga tsakisaka Yehovha na Yesu ha yona. (1 Kor. 7:32) Loko hi endle xidyoho lexikulu, ha vilela hi ndlela leyi hi nga byi lunghisaka ha yona vuxaka bya hina ni Xikwembu. (Ps. 38:18) Nakambe, ha vilela hi ndlela leyi hi nga va tsakisaka ha yona vanghana va hina va vukati, hi nga yi wundlaka ha yona mindyangu ya hina ni hi ndlela leyi hi nga va khomaka ha yona vamakwerhu.—1 Kor. 7:33; 2 Kor. 11:28.

7. Hi ku ya hi Swivuriso 29:25, hikwalaho ka yini hi nga fanelanga hi chava vanhu?

7 Hi hala tlhelo, ku vilela ngopfu ku nga endla leswaku ripfumelo ra hina ri tsana. Hi xikombiso, hi nga tshamela ku vilela hi ku kuma swakudya leswi ringaneke ni swiambalo. (Mat. 6:31, 32) Leswaku hi herisa ku vilela ko tano, hi nga sungula ku tilavela rifuwo. Hi nga tlhela hi sungula ku rhandza mali ku tlula mpimo. Loko hi pfumelela sweswo, ripfumelo ra hina eka Yehovha ri ta tsana naswona vuxaka bya hina na yena byi ta onhaka. (Mar. 4:19; 1 Tim. 6:10) Kumbe hi nga sungula ku vilela ngopfu hikwalaho ko lava ku tsakeriwa hi vanhu van’wana. Hi nga chava ku hlekuriwa kumbe ku xanisiwa hi vanhu ku tlula ku tsakisa Yehovha. Leswaku hi tisirhelela eka khombo rero, hi fanele hi kombela Yehovha a hi nyika ripfumelo ni xivindzi xo kota ku langutani ni miringo yoleyo.—Hlaya Swivuriso 29:25; Luka 17:5.

(Vona tindzimana 8) *

8. Hi fanele hi endla yini loko hi byeriwa mavunwa?

8 Sathana, “tata wa mavunwa,” u tirhisa vanhu vakwe leswaku a hangalasa mavunwa hi Yehovha ni hi vamakwerhu. (Yoh. 8:44) Hi xikombiso, vagwinehi va tirhisa ti-website, thelevhixini ni swihaxamahungu swin’wana leswaku va hangalasa rungula ra mavunwa mayelana ni nhlangano wa Yehovha. Mavunwa wolawo i yin’wana ya “miseve . . . leyi pfurhaka” ya Sathana. (Efe. 6:16) Hi fanele hi  endla yini loko un’wana a hi byela mavunwa yo tano? A hi fanelanga hi ma yingisa! Hikwalaho ka yini? Hikuva hi ni ripfumelo eka Yehovha naswona ha va tshemba vamakwerhu. A hi lavi ku tihlanganisa ni vagwinehi nikatsongo. Hi papalata swilo hinkwaswo leswi nga endlaka hi tikuma hi burisane na vona.

9. Ku hela matimba swi nga hi khumba njhani?

9 Ku hela matimba ku nga endla leswaku ripfumelo ra hina ri tsana. A hi nge swi bi hi makatla swiphiqo leswi hi nga na swona. Swi ta va swi nga kombisi vutihlamuleri ku endla tano. Mikarhi yin’wana hi nga hela matimba. Kambe a hi fanelanga hi tshamela ku ehleketa hi swiphiqo swa hina. Ku endla tano, swi nga endla hi rivala hi ntshembo wo tsakisa lowu Yehovha a hi tshembisaka wona. (Nhlav. 21:3, 4) Ku hela matimba swi nga hi tekela ntsako kutani hi wa mapa. (Swiv. 24:10) Kambe sweswo a swi fanelanga swi endleka eka hina.

10. U dyondza yini eka papila leri tsariweke hi makwerhu un’wana wa xisati?

10 Twana hi ta makwerhu un’wana wa xisati wa le United States loyi a khathalelaka ripfumelo rakwe loko hi hala tlhelo a hlayisa nuna wakwe loyi a vabyaka ngopfu. Eka papila leri a ri tsaleleke ntsindza wa misava hinkwayo u te: “Mikarhi yin’wana xiyimo xa hina xa tshikilela ni ku heta matimba kambe ntshembo lowu hi nga na wona wa hi tiyisa. Ndza tlangela hikwalaho ka rungula leri hi ri kumaka leri hi chavelelaka ni ku hi tiyisa ripfumelo. Ha swi lava switsundzuxo leswi ni swikhutazo. Swi endla hi kota ku tiyisela miringo leyi Sathana a hi tiselaka yona.” Leswi makwerhu loyi a swi vuleke swi endla hi xiya leswaku hi nga swi kota ku hlula ku hela matimba! Njhani? Teka miringo leyi u langutanaka na yona tanihi leyi humaka eka Sathana. Teka Yehovha tanihi Muchaveleri lonkulu naswona u tlangela swakudya swa moya leswi a ku nyikaka swona.

Xana wa xi khathalela “xitlhangu lexikulu xa ripfumelo” ra wena? (Vona ndzimana 11) *

11. Leswaku hi kambela ripfumelo ra hina, hi swihi swivutiso leswi hi faneleke hi tivutisa swona?

11 Xana u vona onge ku na laha xitlhangu xa wena xa ripfumelo xi lavaka ku lunghisiwa kona? Eka tin’hweti leta ha ku hundzaka, xana u swi kotile ku papalata ku vilela ngopfu? Xana u swi kotile ku papalata ku yingisa  mavunwa lawa vagwinehi va ma hangalasaka? Xana u swi kotile ku hlula ku titwa u hele matimba? Loko swi ri tano, ripfumelo ra wena ri le xiyin’weni lexinene. Kambe hi fanele hi tshama hi xalamukile hikuva Sathana u ni marhengu man’wana lawa a ringetaka ku hi hlasela hi wona. A hi buleni hi rin’wana ra wona.

PAPALATA KU RHANDZA RIFUWO

12. Rifuwo ri nga endla leswaku hi endla yini?

12 Rifuwo ri nga endla leswaku hi kavanyeteka ni ku honisa xitlhangu xa ripfumelo ra hina. Muapostola Pawulo u te: “A nga kona munhu la nga socha la tinghenisaka entirhweni wa bindzu wa vutomi, leswaku a ta amukeriwa hi loyi a n’wi tsariseke.” (2 Tim. 2:4) Masocha ya le Rhoma a ma nga pfumeleriwi ku endla mitirho yin’wana. A ku ta endleka yini loko socha ri honisa mhaka yoleyo?

13. Hikwalaho ka yini socha ri nga fanelanga ri tirha mitirho yin’wana?

13 Ehleketa hi xiyimo lexi. Ntlawa wa masocha nimixo wu karhi wu tiletela ku tirhisa matlhari ya wona kambe rin’wana ra wona a ri kona. Socha rero ri le dorobeni ri khomekile hi ku xavisa swakudya. Nimadyambu, masocha ma karhi ma kambela switlhangu ni ku lota matlhari ya wona. Kambe leri nga ni xitolo ri khomekile hi ku lunghisa swakudya leswi ri nga ta swi xavisa hi xa mundzuku xa kona. Kutani hi siku leri landzelaka nimixo, valala va hlasela swi nga languteriwanga. Eka masocha wolawo, hi rihi leri nga ta va ri lunghekile naswona ri nga ta tsakeriwa hi murhangeri wa rona? Hi rihi eka masocha lawa leri a wu ta lava ku yima ekusuhi na rona, hi leri lunghekeleke nyimpi kumbe leri a ri khomekile hi ku lunghiselela swakudya?

14. Leswi hi nga masocha ya Kreste, i yini lexi nga xa nkoka eka hina?

14 Ku fana ni masocha lama lunghekeke, a hi swi lavi ku kavanyeteka leswaku hi nga xi fikeleli xikongomelo xa hina, xa ku tsakisa Varhangeri va hina ku nga Yehovha na Kreste. Sweswo i swa nkoka eka hina ku tlula swilo hinkwaswo leswi hi nga swi kumaka emisaveni leyi yi lawuriwaka hi Sathana. Hi tirhisa nkarhi ni matimba ya hina entirhweni wa Yehovha naswona hi tikarhatela ku khathalela  xitlhangu xa ripfumelo ra hina ni mahavelo ya hina hinkwawo ya moya.

15. Hi xihi xilemukiso lexi Pawulo a hi nyikeke xona naswona hikwalaho ka yini?

15 Hi fanele hi tshama hi xalamukile! Hikwalaho ka yini? Muapostola Pawulo u hi lemukisile a ku, “lava tiyimiseleke ku fuwa” va ta ‘lahlekisiwa eripfumelweni.’ (1 Tim. 6:9, 10) Xiga lexi nge ku ‘lahlekisiwa’ xi kombisa leswaku hi nga kavanyeteka hikwalaho ko ringeta ku tilavela rifuwo. Kutani, hi nghenisa timbilu ta hina eku “naveleni ko tala ka vuhunguki ni loku vavisaka.” Ematshan’wini yo pfumelela ku navela koloko ku dzima timintsu etimbilwini ta hina, hi fanele hi ku xalamukela hikuva i rin’wana ra marhengu lawa Sathana a ringetaka ku hi hlasela hi wona.

16. Rungula leri nga eka Marka 10:17-22, ri fanele ri hi susumetela ku anakanyisisa hi swivutiso swihi?

16 A hi nge hi ni mali yo xava swilo swo tala leswi hi swi lavaka. Xana hi endla xihoxo loko hi xava swilo leswi hi swi lavaka kambe swi nga riki swa nkoka? A swi tano. Kambe ehleketa hi swivutiso leswi: Hambiloko hi ri ni mali yo xava nchumu wo karhi, xana hi ta va na wona nkarhi ni matimba yo wu khathalela? Xana hi nga sungula ku rhandza rifuwo ra hina ku tlula mpimo? Xana ndlela leyi hi rhandzaka rifuwo ra hina ha yona yi nga endla leswaku hi angula ku fana ni jaha leri aleke xirhambo xa  Yesu leswaku ri endla leswi engetelekeke entirhweni wa Xikwembu? (Hlaya Marka 10:17-22.) Onge hi nga papalata ku rhandza rifuwo kutani hi tirhisa nkarhi ni matimba ya hina leswaku hi endla ku rhandza ka Xikwembu!

KHOMELELA SWI TIYA EKA XITLHANGU XA RIPFUMELO RA WENA

17. I yini leswi hi nga fanelangiki hi swi rivala?

17 A hi fanelanga hi rivala leswaku hi le nyimpini naswona hi fanele hi tshama hi lunghekele ku lwa siku ni siku. (Nhlav. 12:17) Vamakwerhu a va nge hi rhwaleli xitlhangu xa hina xa ripfumelo. Hi hina hi faneleke hi ti khomela xona xi tiya.

18. Hikwalaho ka yini khale masocha a ma khoma switlhangu swa wona swi tiya?

18 Khale, loko socha ri kombisa xivindzi enyimpini a ri xiximiwa. Kambe a ri titwa ri chichiwe xindzhuti loko ro tlhelela ekaya ri nga ri na xitlhangu. N’wamatimu wa Murhoma Tacitus u tsale a ku: “Ku baleka u siya xitlhangu a swi khomisa tingana letikulu.” Hi swona leswi a swi endla masocha ma tikarhatela ku khoma xitlhangu xa wona xi tiya.

Makwerhu wa xisati u khoma xitlhangu xa yena xa ripfumelo xi tiya hi ku hlaya Rito ra Xikwembu, hi ku ya etinhlengeletanweni ta Vukreste ni hi ku hisekela ntirho wo chumayela (Vona ndzimana 19)

19. Hi nga xi khoma njhani xitlhangu xa ripfumelo ra hina leswaku xi tshama xi tiyile?

19 Hi khomelela swi tiya eka xitlhangu xa hina xa ripfumelo hi ku ya etinhlengeletanweni ta Vukreste ni hi ku byela van’wana hi Yehovha ni Mfumo wakwe. (Hev. 10:23-25) Ku engetela kwalaho, hi hlaya Rito ra Xikwembu siku ni siku ni ku hanya hi leswi hi swi dyondzaka. (2 Tim. 3:16, 17) Hikokwalaho, a ri kona tlhari ni rin’we leri Sathana a ri tirhisaka leri nga ta hi vavisa hilaha ku nga heriki. (Esa. 54:17) “Xitlhangu lexikulu xa ripfumelo” ra hina xi ta hi sirhelela. Hi ta yima hi tiyile, hi tirhisana swin’we ni vamakwerhu. Hi ta hlula eka nyimpi leyi hi yi lwaka siku ni siku nakambe hi ta kuma nkateko wo yima na Yesu loko a hlula Sathana ni valandzeri vakwe.—Nhlav. 17:14; 20:10.

RISIMU 118 “Hi Nyike Ripfumelo Leri Engetelekeke”

^ par. 5 Masocha ma titshege hi xitlhangu leswaku ma tisirhelela eka khombo. Ripfumelo ra hina ri tirha ku fana ni xitlhangu. Ku fana ni xitlhangu xa xiviri, ripfumelo ra hina ri lava ku khathaleriwa. Nhlokomhaka leyi yi vulavula hi leswi hi nga swi endlaka leswaku “xitlhangu lexikulu xa ripfumelo” ra hina xi tshama xi ri exiyin’weni lexinene.

^ par. 58 NHLAMUSELO YA XIFANISO: Loko eka TV ku vikiwa xiviko  xa mavunwa mayelana ni Timbhoni ta Yehovha lexi hangalasiwaka hi vagwinehi, ndyangu lowu nga Timbhoni wu tiva TV.

^ par. 60 NHLAMUSELO YA XIFANISO: Hi nkarhi wa vugandzeri bya ndyangu, tatana u tirhisa Bibele leswaku a tiyisa ripfumelo ra ndyangu wakwe.