Nghena endzeni

Hundzela eka leswi nga endzeni

 NHLOKOMHAKA LEYI DYONDZIWAKA 5

Hi Ta Famba Na N’wina

Hi Ta Famba Na N’wina

“Hi ta famba na n’wina, hikuva hi swi twile leswaku Xikwembu xi na n’wina.”—ZAK. 8:23.

RISIMU 26 Mi Swi Endlele Mina

LESWI HI NGA TA SWI DYONDZA *

Lava tinyimpfu tin’wana (“vavanuna va khume”) va fundzhiwile hileswi va gandzelaka Yehovha swin’we ni vatotiwa ku nga (“Muyuda”) (Vona tindzimana 1-2)

1. Yehovha u profete leswaku ku ta endleka yini enkarhini lowu hi hanyaka eka wona?

LOKO Yehovha a profeta mayelana ni nkarhi lowu hi hanyaka eka wona u te: “Vavanuna va khume lava humaka eka tindzimi hinkwato ta matiko va ta khoma, ina, entiyisweni va ta khoma nguvu ya wanuna la nga Muyuda, va ku: ‘Hi ta famba na n’wina, hikuva hi swi twile leswaku Xikwembu xi na n’wina.’” (Zak. 8:23) “Muyuda” loyi ku vulavuriwaka hi yena laha, u yimela vanhu lava Xikwembu xi va toteke hi moya wa xona lowo kwetsima. Lava nakambe va vuriwaka “Israyele wa Xikwembu.” (Gal. 6:16) “Vavanuna va khume,” va yimela vanhu lava nga ni ntshembo wo hanya laha misaveni hilaha ku nga heriki. Va swi tiva leswaku Yehovha u katekise ntlawa lowu wa vatotiwa naswona va swi teka ku ri nkateko ku gandzela swin’we na vona.

2. Xana “vavanuna va khume” va “famba” ni vatotiwa hi ndlela yihi?

2 Hambileswi swi nga kotekiki ku tiva mavito hinkwawo ya vatotiwa lava nga kona laha misaveni namuntlha, * lava nga ni ntshembo wo hanya laha misaveni va nga swi kota ku “famba” ni vatotiwa. Njhani? Bibele yi vula leswaku “vavanuna va khume va ta khoma nguvu ya wanuna la nga Muyuda, va ku: ‘Hi ta famba na n’wina, hikuva hi swi twile leswaku Xikwembu xi na n’wina.’” Tsalwa leri ri vulavula hi Muyuda un’we kambe rito leri nge “n’wina” ri kombetela eka vanhu vo tala. Leswi swi vula leswaku rito leri nge Muyuda, a ri kombeteli eka munhu un’we kambe ri kombetela eka ntlawa hinkwawo wa vatotiwa. Vatotiwa ni vanhu lava nga riki vatotiwa, va tirhela Yehovha swin’we. Hambiswiritano, lava nga riki vatotiwa va swi tiva leswaku Murhangeri wa vona i Yesu, ku nga ri vatotiwa.—Mat. 23:10.

3. Hi swihi swivutiso leswi nga ta hlamuriwa eka nhlokomhaka leyi?

3 Leswi Vakreste lava totiweke va ha riki kona exikarhi ka vanhu va Xikwembu namuntlha, van’wana va tivutisa leswi:  (1) Vatotiwa va fanele va titeka njhani? (2) Lava va dyaka swifanekiselo hi siku ra Xitsundzuxo va fanele va khomiwa njhani? (3) Xana hi fanele hi vilela loko nhlayo ya lava dyaka swifanekiselo yi ya yi tlakuka? Nhlokomhaka leyi yi ta hlamula swivutiso leswi.

VATOTIWA VA FANELE VA TITEKA NJHANI?

4. Hi xihi xilemukiso lexi nga eka 1 Vakorinto 11:27-29, lexi vatotiwa va faneleke va xi tekela enhlokweni naswona hikwalaho ka yini?

4 Vatotiwa va fanele va xi tekela enhlokweni xilemukiso lexi nga eka 1 Vakorinto 11:27-29. (Yi hlaye.) Mutotiwa a nga dya swifanekiselo “swi nga fanelanga” eXitsundzuxweni hi ndlela yihi? Hi ku dya swifanekiselo a ri karhi a swi tiva leswaku mahanyelo yakwe a ma fambisani ni milawu ya Yehovha. (Hev. 6:4-6; 10:26-29) Vatotiwa va swi tiva leswaku va fanele va tshama va tshembekile loko va lava ku kuma “hakelo ya ku vitaneriwa ehenhla hi Xikwembu hi ku tirhisa Kreste Yesu.”—Filp. 3:13-16.

5. Vakreste lava totiweke va fanele va titeka njhani?

5 Hi ku tirhisa moya lowo kwetsima, Yehovha u pfuna malandza yakwe leswaku ma titsongahata naswona ma nga tikukumuxi. (Efe. 4:1-3; Kol. 3:10, 12) Hikwalaho, vatotiwa a va titeki va tlakukile ku tlula van’wana. Va swi tiva leswaku Yehovha a nga va nyiki  moya wo tala wo kwetsima ku tlula malandza yakwe laman’wana. A va titeki va tiva Bibele ku antswa ku tlula vanhu hinkwavo. Nakambe a va nge byeli munhu leswaku u totiwile naswona u fanele a sungula ku dya swifanekiselo eXitsundzuxweni. Ku ri na sweswo, hi ku titsongahata va swi tiva leswaku i Yehovha ntsena loyi a hlawulaka vanhu lava yaka etilweni.

6. Hi ku ya hi 1 Vakorinto 4:7, 8, Vakreste lava totiweke va fanele va tikhoma njhani?

6 Hambileswi vatotiwa va titwaka va fundzhiwile hileswi va hlawuriweke ku ya hanya etilweni kambe a va swi lavi leswaku vanhu van’wana va va khoma hi ndlela yo hlawuleka. (Filp. 2:2, 3) Va swi tiva leswaku loko Yehovha a va tota a nga byelanga munhu. Hikwalaho ka sweswo, munhu loyi a totiweke a nga hlamali loko van’wana va nga tshembi leswaku u totiwile. U swi twisisa kahle leswi Bibele yi hi byelaka swona loko yi ku, hi nga hatliseli ku tshemba munhu loyi a vulaka leswaku Xikwembu xi n’wi nyike vutihlamuleri byo hlawuleka. (Nhlav. 2:2) Leswi a nga laviki ku tikokela mahlo, Mukreste loyi a totiweke a nge byeli vanhu leswaku u totiwile. Nakambe a nge tikukumuxi hikwalaho ka leswi a totiweke.—Hlaya 1 Vakorinto 4:7, 8.

7. Hi swihi swilo leswi vatotiwa va nga ta ka va nga swi endli naswona hikwalaho ka yini?

7 Vakreste lava totiweke a va tibyeli leswaku va fanele va tihlanganisa ni vatotiwakulobye ntsena, onge hiloko va ri swirho swa ntlawa wo karhi wo hlawuleka. A va fambi va lavana ni vatotiwakulobye leswaku va ta bula hi ta ku totiwa ka vona kumbe va vumba mitlawa yo dyondza Bibele exihundleni. (Gal. 1:15-17) Sweswo a swi ta vanga ku avana evandlheni. A va ta va va lwisana ni moya lowo kwetsima lowu endlaka leswaku vanhu va Xikwembu va hanyisana hi ku rhula ni vun’we.—Rhom. 16:17, 18.

VATOTIWA VA FANELE VA KHOMIWA NJHANI?

Hi nga khomi vatotiwa kumbe vanhu van’wana lava rhangelaka onge hiloko va ri vanhu lava dumeke (Vona ndzimana 8) *

8. Hikwalaho ka yini u fanele u xalamukela ndlela leyi u va khomaka ha yona vanhu lava dyaka swifanekiselo eXitsundzuxweni? (Vona nhlamuselo ya le hansi.)

8 Hi fanele hi va khoma njhani vamakwerhu lava totiweke? A hi fanelanga hi xixima munhu ku tlula mpimo, swi nga ri na mhaka leswaku i mutotiwa loyi a nga makwavo wa Kreste. (Mat. 23:8-12) Loko Bibele yi vulavula hi vakulu, yi hi khutaza leswaku hi “tekelela ripfumelo ra vona” kambe a yi vuli leswaku hi teka munhu wo karhi tanihi murhangeri wa hina. (Hev. 13:7) I ntiyiso leswaku Bibele yi ri van’wana va faneriwa “hi ku xiximiwa loku andzisiweke kambirhi.” Hikwalaho ka yini? Hikwalaho ka leswi va “ungamelaka hi ndlela leyinene” naswona va “tirhaka hi matimba  eku vulavuleni ni le ku dyondziseni,” ku nga ri hi leswi va nga vatotiwa. (1 Tim. 5:17) Loko hi xixima vatotiwa ku tlula mpimo, hi ta endla leswaku va titwa va nga ntshunxekanga. * Xo biha no tlurisa, hi nga endla leswaku va sungula ku tikukumuxa. (Rhom. 12:3) A hi swi lavi nikatsongo ku endla swilo leswi nga ta endla leswaku makwavo wa Kreste loyi a totiweke a endla xihoxo lexikulu xo fana ni lexi!—Luka 17:2.

9. Hi nga swi kombisa njhani leswaku ha va xixima Vakreste lava totiweke?

9 Hi nga swi kombisa njhani leswaku ha va xixima vanhu lava Yehovha a va toteke? A hi fanelanga hi va vutisa leswaku swi te njhani va va vatotiwa. Leyi i mhaka ya munhu hi yexe, a yi hi lavi nikatsongo. (1 Tes. 4:11; 2 Tes. 3:11) Nakambe, a hi fanelanga hi tibyela leswaku vanuna kumbe vasati va vona, vatswari kumbe maxaka ya vona man’wana na wona ma totiwile. Munhu a nga vi na ntshembo wo ya hanya etilweni hikwalaho ka leswi maxaka yakwe ma nga ni ntshembo wolowo. I Xikwembu lexi hlawulaka vanhu lava faneleke va ya hanya etilweni. (1 Tes. 2:12) Hi fanele hi tlhela hi papalata ku vutisa swivutiso leswi nga ta khunguvanyisa van’wana. Hi xikombiso, hi nga vutisi nsati wa makwerhu loyi a totiweke leswaku u titwa njhani leswi a nga ta hanya hilaha ku nga heriki laha misaveni nuna wakwe a nga ri kona. Lexi hi tiyisekaka hi xona hileswaku emisaveni leyintshwa, Yehovha u ta “enerisa ku navela ka xilo xin’wana ni xin’wana lexi hanyaka.”—Ps. 145:16.

10. Hi tisirhelela njhani loko hi papalata ku “ndhundhuzela vanhu”?

10 Loko hi xixima vatotiwa ku fana ni ndlela leyi hi xiximaka vanhu van’wana ha yona, ha tisirhelela. Njhani? Bibele yi vula leswaku swi nga endleka vatotiwa van’wana va nga tshembeki. (Mat. 25:10-12; 2 Pet. 2:20, 21) Kambe loko hi papalata ku “ndhundhuzela vanhu,” a hi nge va landzeli vanhu van’wana hambi ku ri vatotiwa kumbe vanhu lava dumeke kumbe lava tirheleke Yehovha malembe yo tala. (Yudha 16) Loko va tshika ku tshembeka kumbe va sukela vandlha, a hi nge tshiki ku tirhela Yehovha naswona hi ta tshama hi tshembekile eka yena.

XANA HI FANELE HI KARHATEKA HI NHLAYO YA VANHU LAVA DYAKA SWIFANEKISELO?

11. Ku endleka yini hi nhlayo ya vanhu lava dyaka swifanekiselo eXitsundzuxweni?

11 Khale nhlayo ya vanhu lava a va dya swifanekiselo eXitsundzuxweni a yi ya yi hunguteka. Kambe sweswi, yi ya yi tlakuka lembe ni lembe. Xana hi fanele hi karhateka hi mhaka leyi? Doo! A hi buleni hi swivangelo leswi endlaka hi nga fanelanga hi karhateka.

12. Hikwalaho ka yini hi nga fanelanga hi karhateka hi nhlayo ya vanhu lava dyaka swifanekiselo eXitsundzuxweni?

12 “Yehovha wa va tiva lava nga vakwe.” (2 Tim. 2:19) Ku hambana na Yehovha, vamakwerhu lava hlayelaka vanhu lava dyaka swifanekiselo eXitsundzuxweni, a va va tivi vatotiwa va ntiyiso. Hikokwalaho, nhlayo yoleyo yi katsa ni lava va ehleketaka leswaku i vatotiwa kasi a hi vona. Hi xikombiso, van’wana lava a va dya se va tshikile. Van’wana va nga ha va va ri ni ntshikilelo wa mianakanyo kumbe swiphiqo swin’wana kutani va titwa onge va faneleka ku ya fuma na Kreste etilweni. Swi le rivaleni leswaku a hi swi tivi leswaku i vangani vatotiwa lava ha riki kona laha misaveni.

13. Xana Bibele ya yi boxa nhlayo ya vatotiwa lava va nga ta va va sele laha misaveni loko nhlomulo lowukulu wu sungula?

13 Ku ta va ku ri ni vatotiwa ematikweni yo tala loko Yesu a tela ku va teka va ya etilweni.  (Mat. 24:31) Bibele yi vula leswaku emasikwini ya makumu, ku ta va ku ri ni nhlayo yitsongo ya vatotiwa lava saleke laha misaveni. (Nhlav. 12:17) Kambe a yi vuli leswaku ku ta va ku sale vatotiwa vangani loko nhlomulo lowukulu wu sungula.

Hi fanele hi angula njhani loko munhu un’wana a dya swifanekiselo eXitsundzuxweni? (Vona ndzimana 14)

14. Hi ku ya hi Varhoma 9:11, 16, i yini leswi hi faneleke hi swi twisiwa mayelana ni ku hlawuriwa ka vatotiwa?

14 Yehovha hi yena la endlaka xiboho xa leswaku u ta va hlawula rini vatotiwa. (Rhom. 8:28-30) Yehovha u sungule ku hlawula vatotiwa endzhaku ka loko Yesu a pfuxiwile. Swi tikomba onge emikarhini ya vaapostola, Vakreste hinkwavo va ntiyiso a va ri vatotiwa. Kambe endzhaku ka malembe yo tala, vunyingi bya lava a va tivula Vakreste, a va nga ha tshembekanga eka Kreste. Hambiswiritano, emalembeni wolawo, Yehovha u tote vanhu vatsongo lava a va ri Vakreste va ntiyiso. A va fana ni koroni leyi Yesu a vuleke leswaku a yi ta kula swin’we ni mfava. (Mat. 13:24-30) Emasikwini lawa ya makumu, Yehovha u ye emahlweni a hlawula vanhu lava nga ta va xiphemu xa lava 144 000. * Kutani loko Xikwembu xi endla xiboho xo hlawula vatotiwa van’wana hambileswi makumu ma nga kwala nyongeni, hi ta seketela xiboho xa xona. (Hlaya Varhoma 9:11, 16.) * Hi fanele hi tivonela leswaku hi nga tikhomi ku fana ni vatirhi lava Yesu a vulavuleke hi vona eka xin’wana xa swifaniso swakwe. A va vilela hikwalaho ka ndlela leyi muthori wa vona a va khomeke ha yona vanhu lava sunguleke ku tirha hi awara yo hetelela.—Mat. 20:8-15.

15. Xana vatotiwa hinkwavo i xiphemu xa “hlonga ro tshembeka ni ro tlhariha,” leri boxiweke eka Matewu 24:45-47? Hlamusela.

 15 A hi hinkwavo lava nga ni ntshembo wo ya hanya etilweni lava nga xiphemu xa “hlonga ro tshembeka ni ro tlhariha.” (Hlaya Matewu 24:45-47.) Ku fana ni le mikarhini ya vaapostola, ninamuntlha Yehovha na Yesu va tirhisa vanhu vatsongo leswaku va phamela kumbe ku dyondzisa vanhu vo tala. Enkarhini wa vaapostola, i Vakreste va nga ri vangani lava totiweke lava tirhisiweke ku tsala Matsalwa ya Vukreste ya Xigriki. Ninamuntlha, i Vakreste va nga ri vangani lava totiweke lava byarhisiweke vutihlamuleri byo phamela vanhu va Xikwembu “swakudya . . . hi nkarhi lowu faneleke.”

16. U dyondze yini eka nhlokomhaka leyi?

16 Hi dyondze yini eka nhlokomhaka leyi? Yehovha u endle xiboho xo nyika malandza yakwe yo tala vutomi lebyi nga heriki laha misaveni ni malandza yakwe ma nga ri mangani nkateko wo ya fuma na Yesu etilweni. Yehovha u katekisa malandza yakwe hinkwawo, ku nga “Muyuda” swin’we ni “vavanuna va khume” naswona u lava leswaku hinkwawo ma yingisa milawu yakwe ni ku tshama ma tshembekile. Hinkwawo ma fanele ma titsongahata naswona ma fanele ma n’wi tirhela swin’we hi vun’we. Nakambe hinkwawo ma fanele ma tikarhatela ku kondletela ku rhula evandlheni. Leswi makumu ma nga kwala nyongeni, onge hinkwerhu hi nga ya emahlweni hi tirhela Yehovha ni ku landzela Kreste tanihi “ntlhambi wun’we.”—Yoh. 10:16.

^ par. 5 Nyan’waka, Xitsundzuxo xa Rifu ra Kreste xi ta va hi Wavumbirhi, April 7. Hi fanele hi va teka njhani lava nga ta dya swifanekiselo hi siku rero? Xana hi fanele hi vilela hileswi nhlayo ya lava dyaka yi yaka yi tlakuka? Eka nhlokomhaka leyi hi ta hlamula swivutiso leswi, leswi sekeriweke eka Xihondzo xo Rindza xa January 2016.

^ par. 2 Hi ku ya hi Pisalema 87:5, 6, swi nga endleka leswaku enkarhini lowu taka Xikwembu xi paluxa mavito ya lava va fumaka na Yesu etilweni.—Rhom. 8:19.

^ par. 8 Vona bokisi leri nge “Rirhandzu ‘A Ri Tikhomi Hi Ndlela Leyi Nga Tengangiki’” eka Xihondzo xo Rindza xa January 2016.

^ par. 14 Hambileswi Mintirho 2:33, yi kombisaka leswaku moya lowo kwetsima wu chuluriwa hi ku tirhisa Yesu kambe i Yehovha loyi a hlawulaka vatotiwa.

^ par. 14 Leswaku u kuma rungula leri engetelekeke, vona “Swivutiso Swa Vahlayi” eka Xihondzo xo Rindza xa May 1, 2007.

RISIMU 34 Ku Famba Hi Ku Tshembeka

^ par. 56 NHLAMUSELO YA XIFANISO: Ehleketa hi muyimeri wa rhavi ni nghamu yakwe va rhendzeriwe hi ntshungu, wu lava ku teka swifaniso na vona enhlengeletanweni ya xifundzha. Sweswo swa nyumisa hakunene!