Nghena endzeni

Hundzela eka leswi nga endzeni

Ha Yini Hi Fanele Hi ‘Tshama Hi Rindzile’?

Ha Yini Hi Fanele Hi ‘Tshama Hi Rindzile’?

“A mi ri tivi siku leri Hosi ya n’wina yi nga ta ta ha rona.”​—MATEWU 24:42.

TINSIMU: 136, 129

1. Kombisa leswaku ha yini swi ri swa nkoka ku xiya leswaku i nkarhi muni ni leswi nga eku endlekeni hi nkarhi wolowo. (Vona xifaniso lexi nga eku sunguleni ka xihloko lexi.)

NHLENGELETANO yi lava ku sungula. Mutshamaxitulu u ye exitejini ni ku amukela vanhu hinkwavo. Vuyimbeleri se a byi lava ku sungula. Vayingiseri va swi tiva leswaku i nkarhi wa ku tshama ehansi. Va lava ku yingisela vuyimbeleri byo xonga naswona va swi langutele hi mahlongati ku twa tinkulumo leti nga ta landzela. Kambe ku ni van’wana lava nga swi xiyiki leswaku mutshamaxitulu u le xitejini ni leswaku vuyimbeleri byi le ku tlangeni. Kutani a va swi xiyi leswaku nhlengeletano yi sungurile naswona va ha ya hala na hala kumbe va vulavula ni vanghana va vona. Xiyimo lexi xi kombisa leswi nga humelelaka loko hi nga swi xiyi leswaku sweswi i nkarhi muni kumbe leswi nga eku endlekeni hi nkarhi wolowo. Leyi i dyondzo ya nkoka eka hina hikuva ku nga ri khale ku ta va ni xiendlakalo lexikulu swinene naswona hi fanele hi xi lunghekela. Hi xihi xiendlakalo xa kona?

2. Ha yini Yesu a byele vadyondzisiwa vakwe leswaku va ‘tshama va rindzile’?

2 Yesu Kreste u lemukise vadyondzisiwa vakwe hi nkoka wo tshama va xalamukile ni ku lunghekela “makumu ya mafambiselo ya swilo.” U va byele leswi: “Tshamani mi langutile, tshamani mi hitekile, hikuva a mi swi tivi leswaku nkarhi lowu vekiweke wu fika rini.” Endzhaku ka sweswo u va byele leswi ko hlayanyana: “Tshamani mi rindzile.” (Matewu 24:3; hlaya Marka 13:32-37.) Rungula ra Matewu ri kombisa leswaku Yesu u lemukise vadyondzisiwa vakwe hi mhaka leyi. U te: “Tshamani mi rindzile, hikuva a mi ri tivi siku leri Hosi ya n’wina yi nga ta ta ha rona.” U tlhele a va byela a ku: “Tshamani mi lunghekile, hikuva N’wana wa munhu u ta ta hi nkarhi lowu mi nga wu ehleketiki.” Kutani a tlhela a kandziyisa a ku: “Tshamani mi rindzile, hikuva a mi ri tivi siku hambi ku ri nkarhi wa kona.”​—Matewu 24:42-44; 25:13.

3. Ha yini hi yingisa xilemukiso xa Yesu?

3 Timbhoni ta Yehovha ti yingisa xilemukiso xa Yesu. Ha swi tiva leswaku hi hanya “enkarhini wa makumu” naswona “nhlomulo lowukulu” wu ta sungula ku nga ri khale! (Daniyele 12:4; Matewu 24:21) Hilaha Yesu a profeteke hakona, vanhu va Yehovha va chumayela mahungu lamanene ya Mfumo emisaveni hinkwayo. Hi hala tlhelo, ku ni tinyimpi, mavabyi, ku tsekatseka ka misava ni ndlala etindhawini to tala. Vukhongeri byi avanile naswona vugevenga ni madzolonga swi ya swi nyanya. (Matewu 24:7, 11, 12, 14; Luka 21:11) Sweswi hi wu langutele hi mahlongati nkarhi lowu Yesu a nga ta ta ha wona ni ku hetisisa xikongomelo xa Tata wakwe.—Marka 13:26, 27.

SIKU RI YA RI TSHINELA SWINENE!

4. (a) Ha yini hi tshemba leswaku sweswi Yesu wa swi tiva leswaku Armagedoni yi ta sungula rini? (b) Hambileswi hi nga swi tiviki leswaku nhlomulo lowukulu wu ta sungula rini, i yini lexi hi nga tiyisekaka ha xona?

4 Loko hi ya enhlengeletanweni, ha swi tiva leswaku xiyenge ha xin’we xi ta va hi nkarhi muni. Kambe, a swi koteki leswaku hi wu tiva kahle nkarhi lowu nhlomulo lowukulu wu nga ta sungula ha wona. Loko a ha ri emisaveni, Yesu u te: “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi ta le matilweni hambi ku ri N’wana, kambe swi tiviwa hi Tatana ntsena.” (Matewu 24:36) I ntiyiso leswaku leswi Yesu ku nga yena a nga ta rhangela enyimpini ya Armagedoni, kumbexana sweswi wa swi tiva leswaku yi ta va rini nyimpi leyi. (Nhlavutelo 19:11-16) Kambe hina a hi ri tivi siku kumbe nkarhi lowu makumu ma nga ta fika ha wona. Hi yona mhaka swi ri swa nkoka leswaku hi tshama hi rindzile. Yehovha u veke nkarhi lowu nhlomulo lowukulu wu nga ta sungula ha wona naswona siku ni siku wu ya wu tshinela. ‘A wu nge hlweli!’ (Hlaya Habakuku 2:1-3.) Ha yini hi nga tiyisekaka hi mhaka leyi?

Yehovha u veke nkarhi lowu nhlomulo lowukulu wu nga ta sungula ha wona

5. Vula xikombiso lexi kombisaka leswaku leswi Yehovha a swi vulaka minkarhi hinkwayo swi hetiseka hi nkarhi lowu faneleke.

5 Leswi Yehovha a swi vulaka minkarhi hinkwayo swi hetiseka hi nkarhi lowu faneleke! Hi xikombiso, anakanya hi siku leri a ntshunxeke vanhu vakwe ha rona aEgipta. A ku ri Nisani 14 hi lembe ra 1513 Kreste a nga si velekiwa. Endzhakunyana Muxe u tsale leswi mayelana ni siku rero: “Eku heleni ka malembe ya 430, hi rona siku leri, mavuthu hinkwawo ya Yehovha ma huma etikweni ra Egipta.” (Eksoda 12:40-42) Hi Nisani 14 hi lembe ra 1943 Kreste a nga si velekiwa, ku nga malembe ya 430 Vaisrayele va nga si ntshunxiwa, xitshembiso xa Yehovha xa leswaku u ta katekisa mbewu ya Abrahama xi sungule ku hetiseka. (Vagalatiya 3:17, 18) Endzhaku ka sweswo, Yehovha u byele Abrahama a ku: “Entiyisweni, tiva leswaku mbewu ya wena yi ta va muluveri etikweni leri nga riki ra yona, yi ta va tirhela, kunene vona va ta yi xanisa malembe ya 400.” (Genesa 15:13; Mintirho 7:6) Malembe ya 400 ma sungule hi lembe ra 1913 Kreste a nga si velekiwa loko Iximayele a sungule ku khoma Isaka hi ndlela yo biha. Ma hele loko Yehovha a ntshunxa Vaisrayele aEgipta. (Genesa 21:8-10; Vagalatiya 4:22-29) I ntiyiso leswaku loko ka ha sale malembe ya madzana, Yehovha u veke siku leri a nga ta ntshunxa vanhu vakwe ha rona!

6. Ha yini hi nga tiyisekaka leswaku Yehovha u ta ponisa vanhu vakwe?

6 Yoxuwa a a ri un’wana wa Vaisrayele lava ntshunxiweke aEgipta. Endzhaku ka malembe yo tala, u tsundzuxe vanhu leswi: “Mi swi tiva kahle hi timbilu ta n’wina hinkwato ni mimoya-xiviri ya n’wina hinkwayo leswaku a ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina. A ku wanga ni rito rin’we eka wona.” (Yoxuwa 23:2, 14) Yehovha u tshembise leswaku u ta ponisa vanhu vakwe hi nkarhi wa nhlomulo lowukulu ni ku va nyika vutomi lebyi nga heriki emisaveni leyintshwa. Kutani ha tiyiseka leswaku xitshembiso lexi xi ta hetiseka. Loko hi lava ku hanya emisaveni leyintshwa, hi fanele hi tshama hi rindzile.

TSHAMA U RINDZILE LESWAKU U PONA

7, 8. (a) A ku ri wihi ntirho wa murindzi eminkarhini ya khale naswona hi dyondza yini emhakeni yoleyo? (b) Vula xikombiso xa leswi nga endlekaka loko varindzi vo etlela loko va ha rindzile.

7 Hi nga dyondza swo karhi eka varindzi lava a va rindza miti eminkarhini ya khale. Miti yo tala ku katsa ni wa Yerusalema, a yi ri ni makhumbi yo leha lawa a ma rhendzela muti leswaku valala va nga koti ku nghena. Varindzi a va yima ehenhla ka makhumbi lawa naswona loko va ri kwalaho a va kota ku vona ndhawu hinkwayo leyi rhendzeleke muti. Varindzi van’wana a va yima etinyangweni ta muti. Vavanuna lava a va fanele va rindza vusiku ni nhlikanhi naswona loko va vona valala va ta, a va fanele va tivisa vanhu va le mutini. (Esaya 62:6) A va swi tiva leswaku i swa nkoka swinene ku tshama va xalamukile ni ku languta hi vukheta leswi nga eku endlekeni. Loko va nga endli tano, a ku ta fa vanhu vo tala.​—Ezekiyele 33:6.

8 Josephus, loyi a tsaleke hi matimu ya Vayuda, u hlamusele ndlela leyi Varhoma va ngheneke ha yona eYerusalema hi lembe ra vu-70 endzhaku ka ku fa ka Kreste. Varindzi lava a va rindza tindhawu tin’wana ta muti va etlerile. Hikwalaho ka sweswo, masocha ya Varhoma ma kote ku nghena emutini. Ma ye etempeleni kutani ma yi hisa naswona ma lovisa muti hinkwawo wa Yerusalema. Koloko a ku ri ku hetiseka ka xiphemu xo hetelela xa nhlomulo lowukulu lowu tiko ra Yuda ri tshameke ri langutana na wona.

9. I yini lexi vanhu vo tala va nga xi tekeriki enhlokweni?

9 Mimfumo yo tala namuntlha yi tirhisa masocha ni switirhisiwa swa sweswinyana swa thekinoloji swo rindza ha swona ku rindza mindzilakano ya matiko ya wona. Mimfumo leyi yi veka munhu un’wana ni un’wana kumbe nchumu wihi na wihi tihlo lowu vonakaka wu ri nxungeto eka vuhlayiseki bya tiko ra yona. Kambe mimfumo leyi a yi swi xiyi leswaku ku ni mfumo lowu nga ni matimba swinene etilweni lowu fumiwaka hi Kreste Yesu. Ku nga ri khale mfumo lowu wu ta lwa ni mimfumo hinkwayo ya laha misaveni. (Esaya 9:6, 7; 56:10; Daniyele 2:44) Hi ri rindzerile siku leri leswaku ri fika naswona hi lava ku ri lunghekela. Kutani hi yingisa vuprofeta bya le Bibeleni ni ku ya emahlweni hi tirhela Yehovha hi ku tshembeka.​—Pisalema 130:6.

U NGA KAVANYETIWI

10, 11. (a) Hi fanele hi tivonela eka yini naswona ha yini? (b) I yini lexi ku tiyisekisaka leswaku Diyavulosi u kucetela vanhu leswaku va nga byi tekeli enhlokweni vuprofeta bya Bibele?

10 Ehleketa hi murindzi loyi a rindzeke vusiku hinkwabyo. Loko ku sale tiawara titsongo leswaku ri xa, swi ya swi n’wi tikela ku tshama a xalamukile hikuva u karhele swinene. Hilaha ku fanaka, hi hanya emasikwini yo hetelela ya misava leyi. Naswona loko hi ya hi tshinela swinene emakumu, swi ya swi tika swinene leswaku hi tshama hi rindzile. Swi ta vava ngopfu loko hi nga tshami hi rindzile! A hi kambisiseni swilo swinharhu leswi nga hi sivelaka ku tshama hi rindzile.

11 Diyavulosi u kanganyisa vanhu. I “mufumi wa misava leyi.” Loko Yesu a nga si fa, u tsundzuxe vadyondzisiwa vakwe hi mhaka leyi kanharhu. (Yohane 12:31; 14:30; 16:11) Diyavulosi u tirhisa vukhongeri bya mavunwa ku kanganyisa vanhu. Hi yona mhaka vanhu vo tala namuntlha va nga byi tekeliki enhlokweni vuprofeta bya Bibele lebyi kombisaka leswaku makumu ya misava leyi ma tshinele swinene. (Sofaniya 1:14) Swi le rivaleni leswaku Sathana u ‘dlaye mianakanyo ya lava nga riki vapfumeri.’ (2 Vakorinto 4:3-6) Hikwalaho, loko hi ringeta ku byela vanhu leswaku makumu ya misava leyi ma kwala nyongeni ni leswaku sweswi Kreste wa fuma, vo tala va vona a va swi lavi ku yingisela. Minkarhi yo tala va ri, “A ndzi swi tsakeli.”

12. Ha yini hi nga fanelanga hi pfumelela Diyavulosi a hi kanganyisa?

12 Hambileswi vo tala va nga byi tsakeliki vuprofeta bya Bibele, a hi fanelanga hi pfumelela sweswo swi hi heta matimba. Ha swi tiva leswaku ha yini swi ri swa nkoka ku tshama hi rindzile. Pawulo u byele vamakwavo a ku: “N’wina mi swi tiva kahle swinene leswaku siku ra Yehovha ri [le ku teni].” U ye emahlweni a ku: “Ri ta kukotisa khamba nivusiku.” (Hlaya 1 Vatesalonika 5:1-6.) Yesu u hi lemukise a ku: “Tshamani mi lunghekile, hikuva N’wana wa munhu u ta hi nkarhi lowu mi nga ehleketiki leswaku wu nga va wona.” (Luka 12:39, 40) Ku nga ri khale, Sathana u ta kanganyisa vanhu hi ku va endla va ehleketa leswaku ku ni “ku rhula ni nsirhelelo” laha misaveni. Kutani, siku ra Yehovha ri ta fika hi xitshuketa naswona va ta tikhoma xihlaya. Ku vuriwa yini hi hina? Loko hi lava ku lunghekela siku leri ni ku nga kanganyisiwi ku fana ni van’wana hi fanele hi “[hiteka] hi hlayisa mianakanyo ya hina leyi hlutekeke.” Hi yona mhaka leyi hi faneleke hi hlaya Rito ra Xikwembu siku ni siku ni ku anakanyisisa hi leswi Yehovha a hi byelaka swona.

13. Moya wa misava wu va kucetela njhani vanhu, naswona hi nga ri papalata njhani khombo leri?

13 Moya wa misava wu kucetela ndlela leyi vanhu va ehleketaka ha yona. Vanhu vo tala namuntlha va vona onge a swi bohi ku va va tiva Xikwembu. (Matewu 5:3) Ku ri na sweswo, va tirhisa matimba ni nkarhi wa vona wo tala leswaku va kuma swilo swo tala swa misava leyi. (1 Yohane 2:16) Nakambe, namuntlha ku ni vuhungasi byo tala lebyi tsakisaka vanhu ni ku va khutaza leswaku va rhandza ku titsakisa ni ku enerisa ku navela ka vona. (2 Timotiya 3:4) Swilo leswi swi kavanyeta vanhu ku endla swilo swa nkoka naswona a va anakanyi hi vuxaka bya vona ni Xikwembu. Hi yona mhaka leyi Pawulo a tsundzuxeke Vakreste leswaku va fanele va “xalamuka evurhongweni,” va nga endli leswi va swi lavaka.​—Varhoma 13:11-14.

Hi lava moya wa Xikwembu leswaku wu kongomisa ndlela leyi hi anakanyaka ha yona ku nga ri ku kongomisiwa hi moya wa misava

14. Hi xihi xilemukiso lexi nga eka Luka 21:34, 35?

14 Hi lava moya wa Xikwembu leswaku wu kongomisa ndlela leyi hi anakanyaka ha yona ku nga ri ku kongomisiwa hi moya wa misava. Yehovha wa hi pfuna hi ku tirhisa moya wakwe leswaku hi twisisa leswi nga ta endleka ku nga ri khale. (1 Vakorinto 2:12) [1] (Vona nhlamuselo ya le hansi.) Kambe hi fanele hi tivonela. Hambi ku ri swilo leswi hi swi toloveleke swi nga hi kavanyeta ku tirhela Yehovha. (Hlaya Luka 21:34, 35.) Van’wana va nga vula leswaku hi swiphukuphuku loko hi tshemba leswaku hi hanya emasikwini yo hetelela. (2 Petro 3:3-7) Kambe a hi fanelanga hi va pfumelela leswaku va hi heta matimba. Hi ni vumbhoni lebyi nga erivaleni bya leswaku makumu ma ta fika ku nga ri khale. Loko hi lava leswaku moya wa Xikwembu wu hi kongomisa hi fanele hi va kona eminhlanganweni ni vamakwerhu nkarhi ni nkarhi.

Xana u endla leswi u nga swi kotaka leswaku u ‘tshama u rindzile’? (Vona tindzimana 11-16)

15. I yini leswi nga endleka eka Petro, Yakobo na Yohane leswi nga endlekaka ni le ka hina?

15 Ku tsana ka hina ku endla leswaku swi hi tikela ku tshama hi rindzile. Yesu a a swi twisisa leswaku vanhu a va hetisekanga naswona va tsanile. Anakanya hi leswi endlekeke hi vusiku byo hetelela Yesu a nga si fa. Hambileswi a a hetisekile, a a swi tiva leswaku loko a lava ku tshama a tshembekile, a a fanele a khongela eka Tata wakwe leswaku a n’wi pfuna. Yesu u kombele muapostola Petro, Yakobo na Yohane leswaku va nga etleli loko a ri eku khongeleni. Kambe vaapostola lava a va swi xiyanga leswaku a swi ri swa nkoka hi ndlela yihi eka vona ku nga etleli. A va karhele naswona va etlerile. Yesu na yena a a karhele, kambe a nga etlelanga u khongele eka Tata wakwe. Vaapostola lava na vona a va fanele va ri eku khongeleni hi nkarhi wolowo.​—Marka 14:32-41.

16. Hi ku ya hi Luka 21:36, Yesu u hi dyondzisa njhani ku ‘tshama hi hitekile’?

16 I yini leswi nga hi pfunaka ku ‘tshama hi hitekile’ ni ku lunghekela siku ra Yehovha? Hi fanele hi hisekela ku endla swilo leswinene minkarhi hinkwayo. Kambe sweswo a swi ringananga. Loko ku sale masikunyana leswaku Yesu a fa, u byele vadyondzisiwa vakwe leswaku va fanele va tshama va ri karhi va khongela eka Yehovha leswaku a va pfuna. (Hlaya Luka 21:36.) Leswaku hi tshama hi xalamukile enkarhini lowa makumu, na hina hi fanele hi khongela eka Yehovha nkarhi ni nkarhi.​—1 Petro 4:7.

TSHAMANI MI RINDZILE

17. Hi nga tiyiseka njhani leswaku hi swi lunghekerile ku langutana ni leswi nga ta endleka ku nga ri khale?

17 Yesu u vule leswaku makumu ma ta fika “hi nkarhi lowu mi nga wu ehleketiki.” (Matewu 24:44) Kutani hi fanele hi lungheka minkarhi hinkwayo. Sweswi a hi wona nkarhi wo hanya vutomi lebyi misava ya Sathana yi vulaka leswaku byi tisa ntsako. Sweswo i norho. Ku ri na sweswo, Yehovha na Yesu va hi byela ndlela leyi hi nga tshamaka hi rindzile ha yona hi ku tirhisa Bibele. Kutani a hi yingiseni vuprofeta bya Bibele ni ku xiya ndlela leyi byi hetisekaka ha yona. Nakambe onge hi nga ya emahlweni hi tshinela eka Yehovha ni ku rhangisa Mfumo wakwe evuton’wini bya hina. Kutani hi ta va hi lunghekile loko makumu ma fika. (Nhlavutelo 22:20) Vutomi bya hina byi titshege hi sweswo!

^ [1] (ndzimana 14) Vona ndzima 21 ya buku leyi nge, Mfumo Wa Xikwembu Wa Fuma!