Nghena endzeni

Hundzela eka leswi nga endzeni

Ntiyiso Hi Xikwembu Na Kreste

Ntiyiso Hi Xikwembu Na Kreste

Hambileswi vanhu va gandzelaka swikwembu swo hambanahambana kambe ku ni Xikwembu xin’we xa ntiyiso. (Yohane 17:3) Xi ‘Tlakukile,’ xi Tumbuluxe swilo hinkwaswo naswona hi xona xihlovo xa vutomi. Ku fanele ku gandzeriwa xona ntsena.—Daniyele 7:18; Nhlavutelo 4:11.

Xikwembu I Mani?

Vito ra Xikwembu ematsalweni yo sungula MIKARHI YA KWALOMU KA 7 000

YEHOVHA I vito ra Xikwembu

HOSI, XIKWEMBU, TATANA Swithopo swin’wana swa Yehovha

I Mani Vito Ra Xikwembu? Loko xi hlamula xi ri: “Hi mina Yehovha. Rero i vito ra mina.” (Esaya 42:8) Vito ra Xikwembu ri humelela mikarhi ya kwalomu ka 7 000 eBibeleni. Hambiswiritano, vahundzuluxeri vo tala va Bibele va sive vito ra Xikwembu hi Xithopo xo fana ni lexi nge “Hosi.” Xikwembu xi lava leswaku u va munghana wa xona hikwalaho xi lava leswaku u xi ‘vitana hi vito ra xona.’—Pisalema 105:1.

Swithopo swa Yehovha. Loko Bibele yi vulavula hi Yehovha yi pfa yi ku “Xikwembu,” “Wa matimba hinkwawo,” “Muvumbi,” “Tatana,” “Hosi,” “Lalawulaka.” Eka swikhongelo swo tala leswi tshahiweke eBibeleni Yehovha u vitaniwa hi vito rakwe ni hi swithopo leswi, leswi xiximekaka.—Daniyele 9:4.

 Xivumbeko Xa Xikwembu. Xikwembu i moya lowu nga vonakiki. (Yohane 4:24) Bibele yi vula leswaku “a ku na munhu la tshameke a vona Xikwembu.” (Yohane 1:18) Bibele yi hi byela ndlela leyi xi titwaka ha yona. Vanhu va nga xi ‘tsakisa’ kumbe va xi hlundzukisa.—Swivuriso 11:20; Pisalema 78:40, 41.

Timfanelo Ta Xikwembu Ta Nkoka. Xikwembu xi rhandza vanhu va tinxaka hinkwato. (Mitirho 10:34, 35) Nakambe xi ni ‘tintswalo ni nsovo, xi hlwelaka ku hlundzuka, xi tele musa wa rirhandzu ni ntiyiso.’ (Eksoda 34:6, 7) Kambe ku ni timfanelo ta mune leti nga ta nkoka ku tlula hinkwato.

Matimba. Leswi xi nga ni “Matimba Hinkwawo,” xi ni matimba yo endla hinkwaswo leswi xi swi tshembiseke.—Genesa 17:1.

Vutlharhi. Vutlharhi bya Xikwembu byi tlula bya vanhu hinkwavo. Hi yona mhaka Bibele yi vulaka leswaku hi “xona ntsena xi tlhariheke.”—Varhoma 16:27.

Vululami. Mikarhi hinkwayo Xikwembu xi endla leswi lulameke. Leswi xi swi endlaka swi “hetisekile,” naswona ‘a xi na vuhomboloki.’—Deteronoma 32:4.

Rirhandzu. Bibele yi vula leswaku “Xikwembu i rirhandzu.” (1 Yohane 4:8) Xikwembu a xo kombisa rirhandzu ntsena, xo va rirhandzu. Hinkwaswo leswi xi swi endlaka xi swi endla hi rirhandzu naswona ri hi vuyerisa hi tindlela to tala.

Vunghana Bya Xikwembu Ni Vanhu. Xikwembu i Tata wa hina wa le tilweni la nga ni rirhandzu. (Matewu 6:9) Loko hi va ni ripfumelo eka xona, hi nga va vanghana va xona. (Pisalema 25:14) Entiyisweni xi ku rhamba leswaku u tshinela eka xona hi xikhongelo ni ku ‘lahlela ku vilela hinkwako ka wena eka xona, hikuva xa ku khathalela.’—1 Petro 5:7; Yakobo 4:8.

Kreste Na Xikwembu Va Hambane Njhani?

Yesu A Hi Xikwembu. Yesu u hlawulekile hikuva hi yena ntsena la vumbiweke hi Xikwembu hi ku kongoma. Hi yona mhaka Bibele yi n’wi vitanaka N’wana wa Xikwembu. (Yohane 1:14) Endzhaku ka loko a vumbe Yesu, Yehovha u tirhise n’wana wakwe wa mativula la nga “mutirhi la nga ni vuswikoti” leswaku a vumba swilo hinkwaswo ku katsani vanhu.—Swivuriso 8:30, 31; Vakolosa 1:15, 16.

 Yesu a nga si tshama a lava ku va Xikwembu. Ku hambana ni sweswo u te: “Ndzi muyimeri la humaka eka [Xikwembu] naswona ndzi rhumiwe hi Xona.” (Yohane 7:29) Loko a a ri karhi a vulavula ni un’wana wa vadyondzisiwa vakwe Yesu u vitane Yehovha a ku i “Tatana ni Tata wa n’wina” ni “Xikwembu xa mina ni Xikwembu xa n’wina.” (Yohane 20:17) Endzhaku ka loko Yesu a file Yehovha u n’wi pfuxile leswaku a tlhelela etilweni ivi a n’wi nyika xikhundlha lexikulu evokweni Rakwe ra xinene.—Matewu 28:18; Mitirho 2:32, 33.

Yesu Kreste A Nga Ku Pfuna Leswaku U Tshinela Eka Xikwembu

Loko Yesu a ta emisaveni a tela ku ta hi dyondzisa hi Tata wakwe. Loko Yehovha a vulavula hi Yesu u te: “Loyi i N’wananga, la rhandzekaka; n’wi yingiseni.” (Marka 9:7) Yesu u xi tiva kahle Xikwembu ku tlula munhu un’wana ni un’wana. U te: ‘ku hava loyi a tivaka Tatana handle ka N’wana, ni loyi N’wana a rhandzaka ku n’wi hlavutela eka yena.’—Luka 10:22.

Yesu u byi kombise hi ku helela vumunhu bya Xikwembu. Ndlela leyi Yesu a byi tekeleleke ha yona vumunhu bya Tata wakwe yi endle leswaku a nga kanakani ku vula a ku: “Loyi a ndzi voneke u vone na Tatana.” (Yohane 14:9) Yesu u tekelele Tata wakwe hi ku kombisa rirhandzu hi marito ni hi swiendlo, leswi endleke leswaku vanhu vo tala va tshinela eka Yehovha. U te: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.” (Yohane 14:6) U tlhele a ku: ‘Vagandzeri va ntiyiso va ta gandzela Tatana hi moya ni ntiyiso, hikuva, hakunene, Tatana u lava lavo tano leswaku va n’wi gandzela.’ (Yohane 4:23) Ehleketa hi mhaka leyi, phela Yehovha u lava vanhu vo fana na wena, lava lavaka ku tiva ntiyiso hi yena.