Nghena endzeni

Hundzela eka leswi nga endzeni

Vito ra Xikwembu leri tsariweke hi maletere ya khale ya Xiheveru, ri humelela ko tala ematsalweni ya khale ya Bibele lama tsariweke hi voko

 LESWI BIBELE YI SWI VULAKA

Vito Ra Xikwembu

Vito Ra Xikwembu

Loko vanhu va timiliyoni va vulavula ni Xikwembu, va tirhisa swithopo leswi kombisaka xichavo swo tanihi Hosi, La nga riki na makumu, Allah kumbe Xikwembu. Hambiswiritano, Xikwembu xi ni vito. Xana u fanele u ri tirhisa?

Vito ra Xikwembu i mani?

LESWI VAN’WANA VA SWI VULAKA

 

Vanhu vo tala lava tivulaka Vakreste va tshemba leswaku vito ra Xikwembu i Yesu. Van’wana va vula leswaku leswi ku nga ni Xikwembu xin’we xa Matimba Hinkwawo, a swi kali swi lava hi xi vitana hi vito. Nakambe van’wana va vula leswaku ku tirhisa vito ra Xikwembu a swi fanelanga.

LESWI BIBELE YI SWI VULAKA

 

Vito ra Xikwembu xa Matimba Hinkwawo a hi Yesu, tanihi leswi Yesu a nga riki xona Xikwembu xa Matimba Hinkwawo. Entiyisweni, Yesu u dyondzise valandzeri vakwe ku khongela va ku: “Tatana, vito ra wena a ri kwetsimisiwe.” (Luka 11:2) Yesu hi byakwe u khongele eka Xikwembu a ku: “Tatana, vangamisa vito ra wena.”—Yohane 12:28.

EBibeleni Xikwembu xi vule hi ku kongoma xi ku: “Hi mina Yehovha. Rero i vito ra mina; naswona ku vangama ka mina a ndzi ku nyiki un’wana.” (Esaya 42:8) Vito ra Xitsonga leri nge Yehovha, ri huma eka maletere ya mune ya Xiheveru, YHWH, lama vumbaka vito ra Xikwembu. Vito rero ri humelela mikarhi ya kwalomu ka 7 000 eMatsalweni ya Xiheveru. * Ri tirhisiwe ko tala ku tlula swithopo swin’wana swo tanihi “Xikwembu,” “Wa Matimba Hinkwawo” kumbe “Hosi” naswona ri tlhela ri humelela mikarhi yo tala ku tlula mavito laman’wana hinkwawo yo tanihi Abrahama, Muxe kumbe Davhida.

A ku kona eBibeleni laha Yehovha a sivelaka ku tirhisiwa ka vito rakwe hi ndlela leyi xiximekaka. Ematshan’wini ya sweswo, Matsalwa ma hi byela leswaku malandza ya Xikwembu a ma ri tirhisa hi ku ntshunxeka vito rakwe. Malandza ya Xikwembu ma katse Vito ra Xikwembu eka mavito lawa a va ma thya vana va vona, ku fana ni leri nge Eliya, leri vulaka leswaku “Xikwembu xa mina i Yehovha” ni leri nge Zakariya, leri vulaka leswaku “Yehovha U Tsundzukile.” Naswona a ma nga chavi ku tirhisa vito ra Xikwembu eka mabulo ya wona ya siku ni siku.—Rhuti 2:4.

Xikwembu xi lava leswaku hi tirhisa vito ra xona. Matsalwa ma hi khutaza ma ku: “Nkhensani Yehovha, vitanani vito rakwe.” (Pisalema 105:1) U tsakela hambi ku ri lava va “anakanyaka hi vito ra yena.”—Malakiya 3:16.

Leswaku vanhu va ta swi tiva leswaku wena loyi vito ra wena u nga Yehovha, Wena u ri wexe u La nge Henhla-henhla emisaveni hinkwayo.”—Pisalema 83:18.

 Xana vito ra Xikwembu ri vula yini?

Swidyondzi swin’wana swi tshemba leswaku hi Xiheveru vito leri nge Yehovha ri vula leswaku “U Endla Leswaku Swi Va Kona.” Nhlamuselo yoleyo yi kombisa leswaku Xikwembu xi nga tiendla lexi xi lavaka ku va xona kumbe xi nga tirhisa nchumu wun’wana ni wun’wana lowu xi wu endleke leswaku xi hetisisa xikongomelo xa xona. A ku na munhu un’wana la nga endlaka leswi vito leri ri vulaka swona, handle ka Muvumbi wa matimba hinkwawo.

LESWI RI VULAKA SWONA EKA WENA

 

Ku tiva vito ra Xikwembu swi ta cinca leswi u swi ehleketaka ha xona. Swi ta ku olovela ku va ni vuxaka na xona. Kambe, u nga swi kotisa ku yini ku va ni vuxaka ni munhu loyi u nga tiviki vito ra yena? Entiyisweni, mhaka ya leswaku Xikwembu xi hi tivise vito ra xona, yi kombisa leswaku xi lava hi va ni vuxaka na xona.—Yakobo 4:8.

U nga tiyiseka leswaku Yehovha mikarhi hinkwayo u ta hetisisa switshembiso swakwe hi ku pfumelelana ni vito rakwe. Hi yona mhaka leyi Bibele yi vulaka leswi ha yena: “Lava tivaka vito ra wena va ta ku tshemba.” (Pisalema 9:10) U ta tshemba Yehovha swinene loko u dyondza ndlela leyi vito rakwe ri fambisanaka ha yona ni timfanelo takwe, to tanihi rirhandzu, nsovo, ntwelavusiwana ni vululami. (Eksoda 34:5-7) Swa chavelela ku tiva leswaku hambileswi Yehovha a hetisisaka switshembiso swakwe, a nge endli leswi hambaneke ni timfanelo takwe.

Swi le rivaleni leswaku i lunghelo ku tiva Xikwembu xa Matimba Hinkwawo hi vito. Swi ta ku tisela mikateko sweswi ni le nkarhini lowu taka. Xikwembu xi tshembisa xi ku: “Ndzi ta n’wi sirhelela hikuva u tiva vito ra mina.”—Pisalema 91:14.

“Un’wana ni un’wana loyi a vitanaka vito ra Yehovha u ta pona.”—Yuwele 2:32.

Vito ra Xikwembu hi tindzimi to hambanahambana

^ ndzim. 9 Tibibele to tala ti suse vito ra Xikwembu kutani ti ri siva hi xithopo lexi nge “HOSI” xi tsariwe hi maletere lamakulu, kasi tin’wana ti boxa vito ra Xikwembu eka tindzimana to karhi ta Bibele ntsena kumbe eka tinhlamuselo ta le hansi. Vuhundzuluxeri Bya Misava Leyintshwa Bya Matsalwa Yo Kwetsima byi tirhise vito ra Xikwembu mikarhi yo tala eka matsalwa hinkwawo.