Nghena endzeni

Hundzela eka leswi nga endzeni

Vuxaka Bya Wena Ni Xikwembu

Vuxaka Bya Wena Ni Xikwembu

Hilaha swi boxiweke ha kona eku sunguleni vanhu vo tala va teka Bibele tanihi buku yo kwetsima. Va kume leswaku loko va hlaya Bibele va tlhela va tirhisa leswi va swi dyondzeke, ya va khutaza naswona va kota ku twisisa xikongomelo xa vutomi.

Loko Bibele yi tirhisisa rito “vumoya” yi kombetela eka mahanyelo kumbe vutomi. (Yuda 18, 19) Vanhu lava nga laviki leswaku Xikwembu xi va kongomisa va ti endlela ku rhandza ka vona kambe lava va xi rhandzaka va yi teka yi ri ya nkoka milawu ya xona.—Vaefesa 5:1.

NTSHEMBO

TSALWA: “Xana u tikombise u hele matimba hi siku ra maxangu? Matimba ya wena ma ta va matsongo.”—Swivuriso 24:10.

LESWI SWI VULAKA SWONA: Loko hi hele matimba, a hi nge swi koti ku lwisana ni swiphiqo. Hi hala tlhelo ntshembo wu nga hi nyika xivindzi ni matimba yo ya emahlweni ni vutomi. Swa chavelela ku tiva leswaku swiphiqo leswi hi langutanaka na swona i swa xinkarhana kambe hi nga dyondza swo karhi eka swona.

LESWI U NGA SWI ENDLAKA: Ehleketa hi swilo leswinene leswi nga ta endleka enkarhini lowu taka. Ematshan’wini yo tshamela ku ti byela leswaku swilo swi ta lungha tiyimisele ku hanya hi leswi u swi kunguhateke. Intiyiso leswaku “xiendlakalo lexi nga languteriwangiki” xi nga ha hi wela. (Eklesiasta 9:11) Kambe hakanyingi swilo a swi tali ku hi fambela ximatsi hi laha a hi ehleketa ha kona. Hikwalaho Bibele yi fanisa mhaka leyi ni swa vurimi yi ri: “Byala mbewu ya wena nimixo, naswona u nga ri wisisi voko ra wena ku fikela nimadyambu; hikuva a wu swi tivi leswaku leswi swi ta lulama kwihi, laha kumbe lahaya, kumbexana haswimbirhi swi ta va leswinene.”—Eklesiasta 11:6.

TINHLAMULO TA SWIVUTISO SWA NKOKA

TSALWA: “Ndzi endle ndzi twisisa . . . Rito ra wena i ntiyiso.”—Pisalema 119:144, 160.

 LESWI SWI VULAKA SWONA: Bibele yi hlamula swivutiso leswi vanhu vo tala va ti vutisaka swona. Hi xikombiso yi hlamula swivutiso leswi nge,

  • Xana Hi Huma Kwihi?

  • Ha yini hi ri laha misaveni?

  • Ku endleka yini loko hi fa?

  • Xana vutomi byi ta tshama byi ri hi ndlela leyi ntsena?

Vanhu va timiliyoni emisaveni hinkwayo va hanya vutomi byo antswa hi leswi va kambisiseke tinhlamulo ta swivutiso sweswo ni swin’wana eBibeleni.

LESWI U NGA SWI ENDLAKA: Tikambisisele leswi Bibele yi swi dyondzisaka. Kombela un’wana wa Timbhoni ta Yehovha leswaku a ku pfuna u twisisa Bibele. Nghena eka website ya jw.org, kumbe u ta emihlanganweni ya hina, ku ngheniwa mahala naswona hi amukela vanhu hinkwavo.

MATSALWA MAN’WANA LAMA PFUNAKA

Hlalela vhidiyo leyi nge Ha Yini U Fanele U Dyondza Bibele? eka  jw.org/ts. Naswona ya kumeka hi tindzimi ta 880

KHATHALELA XILAVEKO XA WENA XA MOYA.

“Va tsaka lava khathalaka hi xilaveko xa vona xa moya, hikuva mfumo wa matilo i wa vona.”—MATEWU 5:3.

DYONDZA HI XIKWEMBU, MUTSARI WA BIBELE.

‘Lava Xikwembu . . . Kutani u xi kuma hakunene . . . A xi kule ngopfu ni un’wana ni un’wana wa hina.’—MITIRHO 17:27.

HLAYA U TLHELA U ANAKANYA HI LESWI U SWI DYONDZEKE EBIBELENI.

“U tsakela nawu wa Yehovha * . . . Naswona nawu wakwe u wu hlaya hi rito ra le hansi vusiku ni nhlikanhi. . . . Hinkwaswo leswi a swi endlaka swi ta humelela.”—PISALEMA 1:2, 3.

^ par. 23 Vito ra Xikwembu i Yehovha hilaha ri kombisiweke ha kona eBibeleni.