Nghena endzeni

Hundzela eka leswi nga endzeni

 NHLOKOMHAKA YA XIFUNENGETO | XANA BIBELE YI HUMA EKA XIKWEMBU HAKUNENE?

Bibele—Xana Yi “Huhuteriwe Hi Xikwembu” Hakunene?

Bibele—Xana Yi “Huhuteriwe Hi Xikwembu” Hakunene?

XANA wa tshemba leswaku Bibele yi huma eka Xikwembu? Kumbe u anakanya leswaku yi tamele miehleketo ya vanhu?

Se i khale vanhu va ri karhi va tivutisa hi mhaka leyi ku katsa ni lava tivulaka Vakreste. Hi xikombiso, ndzavisiso lowu endliweke eUnited States hi 2014 wu kombise leswaku vanhu vo tala lava tivulaka Vakreste va pfumela leswaku “Bibele yi huma eka Xikwembu.” Hi hala tlhelo, kwalomu ka 20 wa tiphesente ta vanhu lava vutisiweke va teka Bibele tanihi buku “ya mintsheketo, ya matimu ni leyi nga ni swiletelo leswi tsariweke hi vanhu.” Leswi swi kombisa leswaku vanhu vo tala a va swi twisisi leswaku Bibele yi huma kwihi hambileswi yi vulaka leswaku “Matsalwa hinkwawo ma huhuteriwe hi Xikwembu.” Kutani a hi rhange hi kambisisa leswi xiga lexi nge “Matsalwa hinkwawo ma huhuteriwe hi Xikwembu” xi vulaka swona.—2 Timotiya 3:16.

XIGA LEXI NGE “MATSALWA HINKWAWO MA HUHUTERIWE HI XIKWEMBU” XI VULA YINI?

Bibele yi vumbiwe hi tibuku letitsongo ta 66, leti tsariweke hi vatsari va 40 naswona swi teke malembe ya kwalomu ka 1 600 leswaku yi hetiwa. Kambe loko ku ri hileswaku Bibele yi tsariwe hi vanhu, xana yi “huhuteriwe hi Xikwembu” hi ndlela yihi? Xiga lexi nge “huhuteriwe hi Xikwembu” xi vula leswaku Xihlovo xa rungula leri tsariweke eBibeleni i Xikwembu. Bibele yi ri: “Vanhu a va vulavula leswi humaka eka Xikwembu va ri karhi va susumetiwa hi moya lowo kwetsima.” (2 Petro 1:21) Hi marito man’wana Xikwembu xi tirhise matimba lama nga vonakiki, ku nga moya lowo kwetsima leswaku xi hundzisela rungula ra xona eka vatsari va Bibele. Leswi swi nga ha fana ni loko n’wamabindzu a byela matsalana wakwe leswi a faneleke a swi tsala epapileni. Papila leri a ri humi eka matsalana, kambe eka n’wamabindzu loyi a n’wi byeleke leswi a faneleke ku swi tsala epapileni.

Tintsumi ti byele vatsari van’wana va Bibele rungula leri humaka eka Xikwembu. Van’wana va vone swivono leswi humaka eka Xikwembu. Minkarhi yin’wana, Xikwembu a xi vulavula ni vanhu emilorhweni. Hambileswi Xikwembu a xi pfumelela vatsari va Bibele leswaku va tirhisa marito ya vona vini loko va tsala, kambe minkarhi yin’wana a xi va byela hi ku kongoma leswi va faneleke va swi tsala. Eka swiendlakalo leswi hinkwaswo, vatsari lava a va tsala leswi humaka eka Xikwembu.

Hi nga tiyiseka njhani leswaku i Xikwembu lexi huhuteleke vatsari va Bibele? Xiya swilo swinharhu leswi hi tiyisekisaka leswaku Bibele yi huhuteriwe hi Xikwembu.