Nghena endzeni

Hundzela eka leswi nga endzeni

Loko mi tirhisana swi vula leswaku mi fana ni muhahisi wa xihahampfhuka ni mupfuni wa yena lava tiyimiseleke ku tirhisana

 TA VATEKANI

2: Ntirhisano

2: Ntirhisano

LESWI SWI VULAKA SWONA

Loko nuna ni nsati va tirhisana evukatini, va fana ni muhahisi wa xihahampfhuka ni mupfuni wa yena lava tiyimiseleke ku tirhisana. Loko va langutana ni swiphiqo, ha un’we wa vona u ri “hi” ematshan’weni ya ku “ndzi.”

NSINYA WA NAWU WA LE BIBELENI: “A va ha ri vambirhi, kambe i nyama yin’we.”—Matewu 19:6.

“Vukati a hi bya munhu un’we. Nuna ni nsati va fanele va tirhisana leswaku swilo swi ta famba kahle evukatini bya vona.”—Christopher.

LEXI ENDLAKA SWI VA SWA NKOKA

Loko ku va ni xiphiqo, nuna ni nsati lava nga tirhisaniki va tala ku kombana hi tintiho ematshan’weni yo lulamisa xiphiqo xexo. Xiphiqo xitsongo xi nga hundzuka mhaka leyikulu.

“Ku tirhisana swi endla leswaku vukati byi tiya. Loko mina na nkatanga a hi nga tirhisani loko hi endla swiboho swa nkoka, a hi ta va ho tshama swin’we ntsena kambe ku nga ri na rirhandzu.”—Alexandra.

LESWI U NGA SWI ENDLAKA

TIKAMBELE

  • Xana ndzi teka mali leyi ndzi yi holaka yi ri ya “mina hinkwayo”?

  • Leswaku ndzi kota ku wisa kahle, xana ndzi tihambanisa ni murhandziwa wa mina?

  • Xana ndzi fambela ekule ni maxaka ya nkatanga hambiloko a ri ni vuxaka lebyikulu na wona?

BURISANA NI NKATAKU

  • Hi le ka swiyimo swihi laha hi kotaka ku tirhisana hi vun’we?

  • Hi kwihi laha hi nga antswisaka kona?

  • I yini leswi hi nga swi endlaka leswaku hi antswisa ndlela leyi hi tirhisanaka ha yona?

SWIRINGANYETO

  • Anakanya hi ntlangu wa thenisi laha wena ni nkataku mi nga yimiki swin’we. Ematshan’weni ya sweswo, i yini leswi u nga swi endleka leswaku wena ni nkataku mi yima swin’we?

  • Ematshan’weni yo ehleketa hi leswi u nga swi endlaka leswaku u wina, ehleketa hi leswi mi nga swi endlaka leswaku mi wina.

“Leswaku i mani loyi a endleke xihoxo a hi swa nkoka, xa nkoka i ku va ni ku rhula ni vun’we evukatini bya n’wina.”—Ethan.

NSINYA WA NAWU WA LE BIBELENI: “Mi nga veki tihlo etimhakeni ta n’wina ntsena, kambe ni le timhakeni ta van’wana.”—Vafilipiya 2:3, 4.