Nghena endzeni

Hundzela eka leswi nga endzeni

Ku fana ni nchumu lowu kongomisaka xikepe leswaku xi kota ku famba, ku tshinya n’wana swi endla leswaku a kula kahle

 TA VATSWARI

6: Ku tshinya

6: Ku tshinya

LESWI SWI VULAKA SWONA

Ku tshinya swi nga ha vula ku letela kumbe ku dyondzisa. Mikarhi yin’wana, sweswo swi katsa ku lulamisa n’wana loko a endla swihoxo. Hakanyingi swi katsa ku dyondzisa n’wana mahanyelo lama nga ta n’wi pfuna leswaku a endla swiboho leswinene.

LEXI ENDLAKA SWI VA SWA NKOKA

Emakaya man’wana vana a va ha tshinyiwi masiku lawa, tanihi leswi vatswari va chavaka leswaku ku endla tano swi nga endla vana va nga ha titshembi. Kambe vatswari vo tlhariha va veka milawu leyi faneleke ni ku dyondzisa vana va vona leswaku va hanya hi yona.

“Vana va fanele va byeriwa leswi va faneleke va swi endla ni leswi va nga fanelangiki va swi endla leswaku va ta kula kahle. Loko vana va nga tshinyiwi va ta endla swiboho leswi hoxeke, leswi nga ta endla leswaku va langutana ni vuyelo byo biha.”—Pamela.

LESWI U NGA SWI ENDLAKA

U nga cincacinci. Loko n’wana a nga yingisi milawu leyi u n’wi vekeleke yona, u nga kanakani ku n’wi tshinya kambe loko a yingisa n’wi bumabumele.

“Ndzi tshamela ku bumabumela vana va mina loko va yingisa hikuva emisaveni leyi vana a va ha yingisi. Loko u va bumabumela, swi ta va olovela ku amukela ndzayo leyi u va nyikaka yona.”—Christine.

NSINYA WA NAWU WA LE BIBELENI: “Xin’wana ni xin’wana lexi munhu a xi byalaka, u ta tlhela a tshovela xona.”—Vagalatiya 6:7.

Anakanyela. Loko u tshinya n’wana n’wi tshinye hi ku ya hi malembe yakwe ni hi ku ya hi vukulu bya xidyoho xakwe. Vuyelo bya kona byi fanele byi fambisana ni xidyoho xakwe. Hi xikombiso, loko a tirhisa foni hi ndlela yo biha u nga ha yi teka ku ringana nkarhi wo karhi. U nga hlundzukisiwi hi mhaka yi ntsongo hikwalaho ka leswi u nga swi rhandziki leswi a swi endleke.

“Ndzi sungula ndzi kambisisa loko n’wana wa mina a dyohe hi vomu kumbe a lo endla xihoxo. Ku ni ku hambana eka mukhuva lowu nga lavaka leswaku n’wana a xupuriwa ni xihoxo lexi ngo lava leswaku a tsundzuxiwa ntsena.”—Wendell.

NSINYA WA NAWU WA LE BIBELENI: “Mi nga dyisi vana va n’wina mbitsi, leswaku va nga heli mbilu.”—Vakolosa 3:21.

Vana ni rirhandzu. Vana swi nga va olovela ku amukela ndzayo loko va tiva leswaku vatswari va vona va va tsundzuxa hileswi va va rhandzaka.

“Loko n’wana wa hina a endle swihoxo, ha n’wi bumabumela hikwalaho ka swilo leswinene leswi a swi endleke enkarhini lowu hundzeke. Hi n’wi hlamusela leswaku xihoxo xin’we a xi n’wi endli munhu wo biha, ntsena loko a tiyimisele ku xi lulamisa nileswaku hi ta n’wi pfuna ku endla tano.”—Daniel.

NSINYA WA NAWU WA LE BIBELENI: “Rirhandzu ri ni mbilu yo leha ni musa.”—1 Vakorinto 13:4.