Nghena endzeni

Hundzela eka leswi nga endzeni

Hikwalahokayini Hi Xaniseka, Hi Dyuhala Hi Tlhela Hi Fa?

Hikwalahokayini Hi Xaniseka, Hi Dyuhala Hi Tlhela Hi Fa?

Muvumbi wa hina u hi teka tanihi vana vakwe. Kutani a nga swi lavi leswaku hi xaniseka. Kambe, ha xaniseka swinene. Hikwalahokayini ku ri ni ku xaniseka ko tani?

Vatswari Va Hina Vo Sungula Va Hi Vangele Ku Xaniseka

‘Rifu ri nghene emisaveni hikwalaho ka xidyoho, kutani rifu ri tlulele vanhu hinkwavo hikuva hinkwavo va dyohile.’—VARHOMA 5:12.

Xikwembu xi vumbe vatswari va hina vo sungula Adamu na Evha va ri ni miehleketo ni mimiri leyi hetisekeke. Xi tlhele xi va nyika kaya leri nga paradeyisi emisaveni, leri vuriwaka ntanga wa Edeni. Xi va byele leswaku va nga dya mihandzu ya mirhi hinkwayo leyi nga entangeni, handle ka wun’we ntsena. Hambiswiritano, Adamu na Evha va hlawule ku dya wun’wana wa muhandzu wa murhi wolowo naswona sweswo a ku ri xidyoho. (Genesa 2:15-17; 3:1-19) Endzhaku ka loko va nga yingisanga, Xikwembu xi va hlongorile entangeni naswona vutomi byi sungule ku va tikela. Hi ku famba ka nkarhi, va ve ni vana, na vona vutomi a byi va tikela. Hinkwavo va dyuharile kutani va fa. (Genesa 3:23; 5:5) Ha vabya, ha dyuhala hi tlhela hi fa hikuva hi huma eka Adamu na Evha.

Hi Tlhela Hi Xaniseka Hikwalaho Ka Tintsumi Leti Xandzukeke

“Misava hinkwayo yi le hansi ka matimba ya lowo homboloka.”—1 YOHANE 5:19.

“Lowo homboloka” i Sathana. I ntsumi leyi nga vonakiki leyi xandzukeleke Xikwembu. (Yohane 8:44; Nhlavutelo 12:9) Endzhakunyana, tintsumi tin’wana ti endle leswi fanaka kutani ti landzela Sathana. Ti vitaniwa madimona. Tintsumi leti to homboloka ti tirhisa matimba ya tona ku kanganyisa vanhu leswaku va nga n’wi yingisi Muvumbi. Ti kucetela vanhu vo tala leswaku va endla swilo swo biha. (Pisalema 106:35-38; 1 Timotiya 4:1) Sathana ni madimona va tsaka loko va twisa vanhu ku vava va tlhela va va xanisa.

Mikarhi Yin’wana Hi Xaniseka Hileswi Hi Endlaka Swiboho Leswi Hoxeke

“Xin’wana ni xin’wana lexi munhu a xi byalaka, u ta tlhela a tshovela xona.”—VAGALATIYA 6:7.

Hinkwerhu ha xaniseka hi tindlela to hambanahambana hikwalaho ka xidyoho lexi hi tswariweke na xona ni hikwalaho ka leswi Sathana a kucetelaka vanhu lava hi hanyaka na vona. Kambe mikarhi yin’wana, vanhu va tivangela ku xaniseka. Njhani? Loko va endla swilo swo biha kumbe va endla swiboho swa vuphukuphuku, va tala ku tshovela vuyelo byo biha. Hi hala tlhelo, loko vanhu va endla swilo leswinene, va tshovela vuyelo lebyinene. Hi xikombiso, wanuna tlhelo tatana loyi a tshembekaka, a tirhaka hi matimba a tlhela a rhandza ndyangu wakwe u ta tshovela swilo swo tala leswinene ni ku endla leswaku ndyangu wakwe wu tsaka. Kambe loyi a gembulaka, a nwaka ngopfu kumbe a lolohaka a nga endla leswaku yena ni ndyangu wakwe va hlupheka. Kutani hi tlharihile loko hi yingisa Muvumbi wa hina. U lava leswaku hi tshovela swilo swo tala leswinene, ku katsa ni ku “rhula lokukulu.”—Pisalema 119:165.

Ha Xaniseka Hikuva Hi Hanya “eMasikwini Yo Hetelela”

“Emasikwini yo hetelela . . . , vanhu va ta va lava tirhandzaka, varhandzi va mali, . . . lava nga yingisiki vatswari, . . . lava nga tikhomiki, lava nga ni tihanyi, lava nga rhandziki vunene. —2 TIMOTIYA 3:1-5.

Namuntlha, vanhu vo tala va hanya hilaha Matsalwa ma profeteke hakona eka tindzimana toleto. Mahanyelo ya vona i vumbhoni lebyi nga erivaleni bya leswaku hi hanya “emasikwini yo hetelela” ya misava leyi. Matsalwa ma tlhele ma profeta leswaku enkarhini wa hina ku ta va ni tinyimpi, ku kayivela ka swakudya, ku tsekatseka lokukulu ka misava ni mavabyi. (Matewu 24:3, 7, 8; Luka 21:10, 11) Swilo leswi swi vanga ku xaniseka lokukulu ni rifu.