Nghena endzeni

Hundzela eka leswi nga endzeni

Tshinela Ekusuhi Ni Mutwi Wa Xikhongelo

Tshinela Ekusuhi Ni Mutwi Wa Xikhongelo

 Tshinela Ekusuhi Ni Mutwi Wa Xikhongelo

VANHU vo tala lava vulaka leswaku va pfumela eka Xikwembu a va swi koti ku hlamusela xivangelo xa leswaku ha yini va ri ni ripfumelo. Nakambe a va nge swi koti ku hlamusela xivangelo xa leswaku ha yini vukhongeri byi tala ku endla swilo swo biha kumbe leswaku ha yini Xikwembu xi pfumelela ku xaniseka. Lexi va nga xi endlaka, i ku khongela ntsena eka Xikwembu lexi va nga xi tiviki.

Hambiswiritano, u nga swi kota ku tshinela ekusuhi ni Xikwembu. U nga aka ripfumelo ra wena hi ku tiva Xikwembu, leswi nga ta ku endla leswaku u xi rhandza ni ku xi teka xi ri xa nkoka. Ripfumelo ra xiviri ri sekeriwe eka vumbhoni. (Vaheveru 11:1) Loko u dyondza ntiyiso malunghana ni Xikwembu, u nga xi tiva ni ku vulavula na xona tanihi munghana wa wena. Xiya mintokoto ya van’wana lava a va tshamela ku khongela hambiloko va kanakana leswaku Xikwembu xi kona.

Patricia, loyi a boxiweke eka xihloko xo sungula. “Siku rin’wana a ndzi ri ni vanghana va mina va kwalomu ka khume loko va sungula ku bula hi vukhongeri. Ndzi va byele leswaku ndzi hume endlwini ndzi baleka bulo leri Tatana, loyi a a nga pfumeli leswaku Xikwembu xi kona, a ri na rona ni Mbhoni yin’wana ya Yehovha leyi a yi te ekaya ka hina. Un’wana wa vanghana va mina u te: ‘Swi nga endleka leswaku Timbhoni ta Yehovha ti tiyisile.’

“Un’wana wa vona u ndzi byele leswi: ‘Ha yini hi nga yi eka wun’wana wa minhlangano ya tona leswaku hi ya tivonela hi ya hina?’ Kutani hi endle tano. Hambileswi a hi kanakana, van’wana va hina hi hambete hi ya eminhlanganweni ntsena hileswi Timbhoni a ti ri na xinghana.

“Hambiswiritano, hi Sonto yin’wana ndzi twe mhaka leyi cinceke langutelo ra mina. Xivulavuri xi hlamusele xivangelo lexi endlaka vanhu va xaniseka. A ndzi nga si tshama ndzi swi xiya leswaku eku sunguleni munhu a a vumbiwe a hetisekile naswona xidyoho ni rifu swi sunguriwe hi munhu un’we kutani swi tlulela eka vanhu hinkwavo. Nakambe xivulavuri xi hlamusele xivangelo xo va rifu ra Yesu ri ri ra nkoka eku vuyeteleni ka vanhu eka leswi munhu wo sungula a swi lahleke. * (Varhoma 5:12, 18, 19) Hi ku hatlisa, ndzi twisise hinkwaswo. Ndzi tibyele leswi, ‘Hakunene ku ni Xikwembu lexi khathalaka ha hina.’ Ndzi hambete ndzi dyondza Bibele naswona hi ku hatlisa, a ku ri ro sungula evuton’wini bya mina ndzi kuma leswaku ndzi nga khongela eka munhu un’wana loyi a nga wa xiviri.”

Allan, loyi na yena a boxiweke eka xihloko xo sungula.  “Siku rin’wana Timbhoni ta Yehovha ti te ekaya ra hina naswona nsati wa mina u ti byele leswaku ti nghena hikuva a a tsakisiwe hileswi ti swi vuleke malunghana ni ku hanya hilaha ku nga heriki emisaveni. A ndzi hlundzukile. Kutani ndzi siye vaendzi laha a va rhurheriwe kona, ndzi landza nsati wa mina ekhixini kutani ndzi n’wi byela leswi, ‘U nga endliwi xiphukuphuku. U nga swi tshembi swilo swo fana ni leswi!’

“Hiloko a ku: ‘Famba u ya va komba leswaku va hoxisa.’

“I ntiyiso leswaku a ku ri hava lexi a ndzi ta va kaneta eka xona. Kambe a va ri ni musa naswona va ndzi siyele buku leyi vulavulaka hi malunghana ni loko swilo leswi hanyaka swi lo tumbuluxiwa kumbe swi lo tiendlekela. Mhaka ya kona a yi ri erivaleni ni ku tlhela yi seketeriwa kahle kutani ndzi endle xiboho xa leswaku ndzi fanele ndzi tiva leswi engetelekeke hi Xikwembu. Ndzi sungule ku dyondza Bibele ni Timbhoni naswona hi ku hatlisa ndzi xiye leswaku leswi yi swi vulaka swi hambane swinene ni leswi a ndzi swi anakanya hi vukhongeri. Loko ndzi ri karhi ndzi dyondza hi Yehovha, ndzi sungule ku khongela eka yena hi ku kongoma. A ndzi ri ni mahanyelo man’wana lawa a ma nga ri manene, kutani ndzi khongele leswaku a ndzi pfuna. Ndza tiyiseka leswaku Yehovha u hlamule swikhongelo swa mina.”

Andrew, loyi a tshamaka eNghilandhi. “A ndzi ehleketa leswaku ndzi ni mavonelo lamanene ni ku  rhandza sayense hi mbilu ya mina hinkwayo, a ndzi pfumela eka dyondzo ya ku tiendlekela ka swilo ntsena hileswi vanhu van’wana a va vula leswaku i ntiyiso. A ndzi nga pfumeli eka Xikwembu hikwalaho ka vubihi hinkwabyo lebyi endlekaka.

“Kambe minkarhi yin’wana a ndzi tibyela leswi: ‘Ndzi lava ku tiva leswaku ha yini swilo leswi hinkwaswo swi endleka loko ku ri hileswaku Xikwembu xi kona. Ha yini ku ri ni vugevenga ni tinyimpi to tala swonghasi?’ Loko ndzi ri ni swiphiqo, minkarhi yin’wana a ndzi khongelela mpfuno, kambe a ndzi nga n’wi tivi loyi a ndzi vulavula na yena.

“Kutani un’wana u nyike nsati wa mina xiphephana lexi kandziyisiweke hi Timbhoni ta Yehovha lexi nga ni nhloko-mhaka leyi nge: Xana Misava Leyi Yi Ta Pona? Xivutiso xexo hi xona lexi hakanyingi a ndzi tshamela ku tivutisa xona. Xiphephana lexi xi endle leswaku ndzi tivutisa xivutiso malunghana ni Bibele lexi nge, ‘Xana tinhlamulo ta yona i ta nkoka lerova ti fanele ti kambisisiwa?’ Endzhakunyana, loko ndzi ri eka holideyi, un’wana u ndzi nyike buku leyi nge Bibele—I Rito Ra Xikwembu Kumbe I Ra Munhu? * Loko ndzi swi xiya leswaku Bibele yi pfumelelana ni sayense ya ntiyiso, ndzi vone xilaveko xo dyondza leswi engetelekeke hi Bibele. Kutani Timbhoni tin’wana ta Yehovha ti kombele ku dyondza Bibele na mina naswona ndzi pfumerile. Loko ndzi ri karhi ndzi twisisa xikongomelo xa Yehovha, ndzi titwe ndzi n’wi tiva tanihi munhu wa xiviri, loyi ndzi nga vulavulaka na yena hi ku ntshunxeka hi xikhongelo.”

Jan, loyi a kurisiweke tanihi Muprotestente eLondon. “Vukanganyisi ni ku andza ka ku xaniseka evukhongerini swi endle leswaku ndzi tshika vukhongeri. Ndzi tlhele ndzi tshika ku ya ekholichini kutani ndzi sungula ku yimbelela ni ku tlanga katara leswaku ndzi ta kuma mali. Hi nkarhi wolowo ndzi hlangane na Pat. U kurisiwe tanihi Mukhatoliki naswona u tshike kereke ku fana na mina.

“A hi tshama endlwini leyi nga ha tirhisiwiki ni vanhu van’wana vo hlayanyana lava tshikeke xikolo lava a va tsakela vukhongeri bya le Vuxeni. Nivusiku, a hi heta tiawara hi ri ni mabulo yo leha malunghana ni nkoka wa vutomi. Hambileswi mina na Pat a hi nga pfumeli eka Xikwembu, hi swi xiyile leswaku ku ni munhu un’wana loyi a tumbuluxeke vutomi.

“Endzhaku ka loko hi rhurhele en’walungwini wa Nghilandhi leswaku hi ya lava ntirho wa vuyimbeleri, hi kume n’wana wa jaha. Hi vusiku byin’wana, n’wana u sungule ku vabya naswona ndzi tikume ndzi ri karhi ndzi khongela eka Xikwembu lexi ndzi nga pfumeriki eka xona. Hi ku hatlisa endzhaku ka sweswo, vuxaka bya mina na Pat byi onhakile hiloko ndzi teka n’wana wa hina ndzi famba na yena. Nakambe, ndzi khongelele mpfuno, ndzi ri ni ntshembo wa leswaku ku ni loyi a ndzi twaka. A ndzi nga swi tivi kambe Pat na yena u endle hilaha ku fanaka.

“Endzhakunyana hi siku rero, Timbhoni timbirhi ta Yehovha ti gongondze ekaya ka Pat kutani ti n’wi komba ndzayo yin’wana ya le Bibeleni. Pat u ndzi bele riqingho kutani a ndzi vutisa loko ndzi swi tsakela leswaku mina na yena hi dyondza Bibele ni Timbhoni. Hi ku hatlisa hi dyondze leswaku loko hi lava ku tsakisa Xikwembu, hi fanele hi tsarisa vukati bya hina hi nawu. A swi vonaka ku ri nchumu wo tika swinene loko hi languta vuxaka bya hina lebyi a byi tsekatseka.

“A hi lava ku tiva leswi engetelekeke malunghana ni ku hetiseka ka vuprofeta bya Bibele, xivangelo xo va hi xaniseka ni leswi Mfumo wa Xikwembu wu nga swona. Hakatsongo-tsongo, hi swi xiyile leswaku Xikwembu xa khathala naswona a hi lava ku endla leswi xi swi vulaka. Hi tekane hi nawu. Vutlhari bya Rito ra Xikwembu byi hi pfunile leswaku hi kurisa vana va hina vanharhu. Ha tiyiseka leswaku Yehovha u yingise swikhongelo swa hina.”

Kambisisa Vumbhoni Hi Wexe

Ku fana ni timiliyoni ta vanhu van’wana, vanhu lava tshahiweke eka xihloko lexi a va xisiwanga hi vukhongeri bya mavunwa kutani va kumisise leswi endlaka leswaku Xikwembu xi pfumelela ku xaniseka. Xana u swi xiyile leswaku vanhu lava hinkwavo va pfuniwe hi vutivi lebyi kongomeke bya Bibele leswaku va tiva leswaku hakunene Yehovha wa swi twa swikhongelo?

Xana wa swi lava ku kambisisa vumbhoni bya leswaku Xikwembu xi kona? Timbhoni ta Yehovha ti ta swi tsakela ku ku pfuna leswaku u dyondza ntiyiso malunghana na Yehovha ni ndlela leyi u nga tshinelaka eka “Mutwi wa xikhongelo” ha yona.—Pisalema 65:2.

[Tinhlamuselo ta le hansi]

^ par. 6 Leswaku u kuma rungula leri engetelekeke malunghana ni nkoka wa nkutsulo wa rifu ra Yesu, vona ndzima 5 ebukwini leyi nge Xana Bibele Yi Dyondzisa Yini Hakunene? leyi kandziyiseke hi Timbhoni ta Yehovha.

^ par. 12 Yi kandziyisiwe hi Timbhoni ta Yehovha.

[Marito lama tshahiweke exihlokweni lama nga eka tluka 10]

“Loko ndzi ri karhi ndzi twisisa xikongomelo xa Yehovha, ndzi titwe ndzi n’wi tiva tanihi munhu wa xiviri, loyi ndzi nga vulavulaka na yena hi ku ntshunxeka hi xikhongelo”

[Xifaniso lexi nga eka tluka 9]

Ripfumelo ra xiviri ri sekeriwe eka vumbhoni ni ku navela ku tiva ntiyiso malunghana ni Xikwembu