Nghena endzeni

Hundzela eka leswi nga endzeni

Xana Nyimpi Ya Armagedoni Yi Ta Fika Rini?

Xana Nyimpi Ya Armagedoni Yi Ta Fika Rini?

 Xana Nyimpi Ya Armagedoni Yi Ta Fika Rini?

“Ndzi languta, kutani waswivo, a ku ri ni ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato . . . lava humaka enhlomulweni lowukulu.”—NHLAVUTELO 7:9, 14.

SWESWI ri tekiwile goza ra nyimpi ya Armagedoni. Njhani?

Se ku ni vanhu lava rhandzanaka emisaveni hinkwayo lava tirhelaka Yehovha naswona va hanyaka hi milawu leyi tlakukeke leyi nga eBibeleni. Hi ku pfuniwa hi Xikwembu, vanhu va timiliyoni vo huma ematikweni hinkwawo, tinxaka ni tindzimi va hlengeletana swin’we leswaku va va vamakwerhu lava nga ni vun’we swin’we ni rirhandzu. Vanhu volavo i Timbhoni ta Yehovha.—Yohane 13:35.

Ku nga ri khale Sathana u ta hlengeleta mavuthu yakwe kutani a sungula ku mpfhumpfhela vanhu lava rhuleke lava vonakaka va nga koti ku tisirhelela. (Ezekiyele 38:8-12; Nhlavutelo 16:13, 14, 16) Xana u nga tiyiseka njhani hi mhaka yoleyo? Bibele yi hlamusela swiendlakalo swo karhi leswi hi pfunaka ku tiva leswaku nyimpi ya Armagedoni yi ta fika rini. Swo tala swa swiendlakalo leswi yi swi hlamuselaka se swa hetiseka.

Swiendlakalo Leswi U Swi Vonaka Swi Hetiseka

Vadyondzisiwa va Yesu va n’wi vutise leswaku vanhu a va ta swi tiva njhani loko “makumu ya mafambiselo ya swilo” ma ri ekusuhi. (Matewu 24:3) Yesu u va hlamule hi ku va byela hi nkarhi lowu eka wona “tiko ri [nga] ta pfukela tiko rin’wana ni mfumo wu [nga] ta pfukela mfumo wun’wana, kutani ku ta va ni ku kayivela ka swakudya ni ku tsekatseka ka misava ku suka endhawini yin’wana ku ya eka yin’wanyana.” Hiloko a ku: “Swilo leswi hinkwaswo i ku sungula ka switlhavi swa maxangu.” (Matewu 24:7, 8) Muapostola Pawulo u hlamusele nkarhi lowu fanaka tanihi “[masiku] yo hetelela” a vula leswaku masiku wolawo ma ta va “minkarhi ya mangava leyi swi nonon’hwaka ku langutana na yona.” (2 Timotiya 3:1) Hakunene wa swi vona leswaku vuprofeta byebyo byi karhi bya hetiseka namuntlha.

Ha yini nkarhi lowu wu ta tika swinene? Muapostola  Yohane u nyikela xivangelo. U profete leswaku a ku ta va ni “nkarhi wo koma” lowu eka wona Sathana ni madimona yakwe va nga ta lahleriwa emisaveni. Sathana u hlamuseriwa tanihi loyi a “[hlundzukeke] swinene” enkarhini lowu. (Nhlavutelo 12:7-12) Xana wa swi xiya leswaku vanhu va ni rivengo ni madzolonga namuntlha, ku nga ri endhawini yin’we ntsena kambe emisaveni hinkwayo?

Yesu u tlhele a vula leswaku hi nkarhi lowu wo tika swinene, ku ta hetisisiwa ntirho wo hlawuleka. U te: “Mahungu lamanene lawa ya mfumo [wa Xikwembu] ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Namuntlha, ematikweni yo tlula 235, Timbhoni ta Yehovha ti chumayela mahungu lamanene ya Mfumo wa Xikwembu hi tindzimi to tlula 500. Timagazini timbirhi leti sekeriweke eBibeleni leti ti ti humesaka, ku nga Xihondzo xo Rindza ni Xalamuka! hi tona leti hangalasiweke ku tlula hinkwato emisaveni. Timbhoni ti tlhele ti hundzuluxela Bibele hi tindzimi ta kwalomu ka 100. Ntirho wa tona wu endliwa hi vatirhi va ku tirhandzela wu tlhela wu hakeleriwa hi minyikelo ya ku tirhandzela. Xana tsima leri xiyekaka ro chumayela ri hetisisa vuprofeta bya Yesu?

Bibele yi tlhela yi xaxameta swiendlakalo leswi nga ta rhangela nyimpi ya Yehovha Xikwembu ni vanhu lava n’wi kanetaka. Xiya vuprofeta byo tano byinharhu lebyi u nga ta byi vona byi hetiseka.

Swiendlakalo Leswi U Nga Ta Swi Vona Swi Hetiseka Ku Nga Ri Khale

Vuprofeta byo sungula. Bibele yi vula leswaku matiko ma ta humesa xileriso lexi xiyekaka xa “ku rhula ni nsirhelelo.” Ma nga ha ehleketa leswaku ma lulamisa swiphiqo leswikulu. Hambiswiritano, swiendlakalo leswi nga ta landzela a swi nge vi na ku rhula.—1 Vatesalonika 5:1-3.

Vuprofeta bya vumbirhi. Kutani tihulumendhe to hambana-hambana ti ta endla xiboho xo lwisana ni tinhlengeletano ta vukhongeri ta misava. EBibeleni, tihulumendhe leti ti fanekiseriwa hi xivandzana; vukhongeri bya mavunwa bya misava byi fanekiseriwa hi wansati loyi a gadeke xivandzana. (Nhlavutelo 17:3, 15-18) Xivandzana xo fanekisela xi ta endla leswi Xikwembu xi lavaka leswaku xi swi endla hi ku va xi herisa vukhongeri bya mavunwa lebyi vulaka leswaku byi gandzela Xikwembu.

Hi ku tirhisa swifaniso, muapostola Yohane u hlamusela xiendlakalo xexo hi ndlela leyi: “Kutani timhondzo ta khume leti u ti voneke, ni xivandzana, ti ta venga nghwavava, ti yi hlakata ni ku yi swerisa, ti dya tinyama ta yona hinkwato ni ku yi hisa hi ndzilo yi hela. Hikuva Xikwembu xi swi nghenise etimbilwini ta tona leswaku ti endla miehleketo ya xona.”—Nhlavutelo 17:16, 17.

Vuprofeta bya vunharhu. Endzhaku ka nhlaselo lowu, lowu humeleleke eka vukhongeri bya mavunwa, Sathana u ta hlengeleta matiko leswaku ma hlasela vanhu lava gandzelaka Yehovha Xikwembu.—Nhlavutelo 7:14; Matewu 24:21.

Xana Wena U Ta Khumbeka Njhani?

Loko u nga si wu kuma nkarhi wo dyondza Bibele, u nga ha kuma swi ku tikela ku pfumela leswaku swiendlakalo leswi hlamuseriweke laha henhla swi ta endleka. Kambe ku ni xivangelo lexi twalaka xo tshemba leswaku vuxokoxoko byin’wana ni byin’wana byi ta hetiseka naswona swiendlakalo leswi swi ta endleka ku nga ri khale. Vuprofeta bya Bibele lebyi tsariweke khale lebyi ana se byi hetisekeke byi nyikela xitiyisekiso xexo. *

Ha yini u nga tinyiki nkarhi wo kumisisa leswaku ha yini Timbhoni ta Yehovha ti khorwiseka leswaku “nyimpi ya siku lerikulu ra Xikwembu xa Matimba Hinkwawo” yi le kusuhi naswona ha yini u nga fanelanga u yi chava? Ti kombele ti bula na wena hileswi Bibele yi vulaka leswaku u fanele u swi endla leswaku u va un’wana wa lava Yehovha Xikwembu a nga ta va sirhelela. (Nhlavutelo 16:14) Leswi u swi dyondzaka swi nga cinca langutelo ra wena hi vumundzuku.

[Nhlamuselo ya le hansi]

^ par. 17 Leswaku u kuma vumbhoni bya leswaku vuprofeta bya Bibele bya hetiseka, vona ndzima 2 na 9 ta buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

[Marito lama tshahiweke exihlokweni lama nga eka tluka 8]

Xana ntirho wa Timbhoni ta Yehovha i ku hetiseka ka vuprofeta lebyi nga eBibeleni?