Nghena endzeni

Hundzela eka leswi nga endzeni

 Swivutiso Swa Vahlayi . . .

Xana Misava Yi Ta Herisiwa?

Xana Misava Yi Ta Herisiwa?

▪ Vanhu van’wana a va tshemba leswaku misava yi ta herisiwa hi October 21, 2011. Kambe a yi herisiwanga. Xisweswo, vuprofeta bya Harold Camping la nga muhaxi wa xiya-ni-moya xa le United States a byi hetisekanga. U vhumbhe leswaku Siku ra Vuavanyisi a ri ta fika hi May 21, 2011—a ku ta va ni ku tsekatseka lokukulu emisaveni hinkwayo naswona endzhaku ka tin’hweti ta ntlhanu, hi October 21, misava a yi ta herisiwa.

Hambiswiritano, misava a yi nge pfuki yi herisiwile. Muvumbi wa Misava a nge swi pfumeleli sweswo. Rito rakwe ri ri: “Misava u yi simeke yi tiya, leswaku yi tshama hi masiku.”—Pisalema 119:90.

Hambiswiritano, vahlayi van’wana va Bibele va nga ha kaneta va vula leswaku pulanete leyi yi ta herisiwa hi ndzilo. Leswaku va seketela vonelo rero va kombetela eka 2 Petro 3:7, 10 leyi nge: “Kambe ha rona rito rero, matilo ni misava leyi nga kona sweswi swi hlayiseriwe ndzilo naswona swa ha vekiwile ku fikela siku ra vuavanyisi ni ra ndzoviso wa vanhu lava va nga xi xiximiki Xikwembu. . . . Kambe siku ra Yehovha ri ta ta ku fana ni khamba, leri ha rona matilo ma nga ta hundza hi huwa leyi chavisaka, kambe swiaki swa wona leswi nga ta hisa ngopfu swi ta n’oka, naswona misava ni mintirho leyi nga eka yona swi ta yimburiwa.” Xana marito ya muapostola Petro ma fanele ma tekiwa hi ku kongoma?

Doo, a ma fanelanga ma tekiwa hi ku kongoma? Ha yini? Hikuva nhlamuselo ya tindzimana leti yi fanele yi pfumelelana ni mongo wa papila ra Petro ni Bibele hinkwayo. Loko tindzimana teto ti tekiwa hi ku kongoma swi ta vula leswaku matimba kumbe vuako hinkwabyo—tinyeleti ta ntsandza-vahlayi ni swilo swin’wana—swi ta herisiwa hi ndzilo hikwalaho ka leswi xiphemu xin’we xi nga ni vanhu vo homboloka. Xana u nga hisa saka hinkwaro ra timanga hileswi ku boleke manga yin’we ntsena? Sweswo swi ta va swi nga twali! Kutani Yehovha na yena a nge herisi vuako hinkwabyo lebyi a byi vumbeke hikwalaho ka leswi ku nga ni vaxandzuki eka xiphemu xin’we xa mintirho yakwe yo hlamarisa.

Langutelo ro tano ri lwisana ni marito ya Yesu Kreste, loyi a vuleke marito lawa: “Va tsaka lava nga ni moya wo rhula, hikuva va ta dya ndzhaka ya misava.” (Matewu 5:5; Pisalema 37:29) Xana tatana la nga ni rirhandzu a nga akela ndyangu wakwe yindlu yo saseka ntsena leswaku a ta yi hisa? (Pisalema 115:16) Sweswo swi ta va swi nga twali! Yehovha a ngo va Muvumbi ntsena kambe i Tatana la nga ni rirhandzu.—Pisalema 103:13; 1 Yohane 4:8.

Petro u tirhisa xiga lexi nge “misava” hi ndlela yo fanekisela, a kombetela eka vanhu—ku nga vanhu vo homboloka. Xiya leswaku Petro u yi fananisa ni Ndhambi ya siku ra Nowa. (2 Petro 3:5, 6) Hi nkarhi wolowo, ku herisiwe vanhu vo homboloka ntsena; misava na Nowa wo lulama swin’we ni ndyangu wakwe va ponile. Hilaha ku fanaka, Petro u tirhise “matilo” hi ndlela yo fanekisela. Emhakeni leyi, “matilo” ma kombetela eka vulawuri bya munhu eka vanhu lava nga xi chaviki Xikwembu. Xisweswo, vanhu vo homboloka va ta herisiwa, swin’we ni tihulumendhe hinkwato to homboloka, kutani yi siviwa hi vulawuri bya Xikwembu bya le tilweni kumbe Mfumo.—Daniyele 2:44.

Kutani, xana pulanete ya misava yi ta herisiwa? Doo! Lexi nga ta herisiwa i misava yo fanekisela kumbe vanhu vo homboloka. Misava yi ta tshama hilaha ku nga heriki swin’we ni vanhu lava enkarhini lowu taka va nga ta kombisa leswaku va chava Xikwembu.—Swivuriso 2:21, 22.