Nghena endzeni

Hundzela eka leswi nga endzeni

Ntiyiso Malunghana Ni Armagedoni

Ntiyiso Malunghana Ni Armagedoni

 Ntiyiso Malunghana Ni Armagedoni

“Madimona . . . ma ya etihosini ta misava hinkwayo . . . , hiloko ma ti hlengeletela endhawini leyi vuriwaka Har–Magedoni hi Xiheveru.” (Rito leri hi lo voyamisa.)—NHLAVUTELO 16:14, 16.

MINKARHI yin’wana rito leri hundzuluxeriweke ri ku “Har–Magedoni” i vito ra ndhawu. Hambiswiritano, ndhawu yoleyo swi tikomba yi nga ri kona eka ndhawu yin’wana ni yin’wana ya xiviri ya laha misaveni.

Xana hi wihi nkoka wa xiviri hi rito leri nge “Armagedoni”? Kutani, ha yini minkarhi yo tala rito leri ri fambisana ni xiendlakalo, xo tanihi nyimpi?

Ma Ti Hlengeletela eNdhawini Leyi Vuriwaka Armagedoni

Hi ku kongoma, rito ro sungula ra Xiheveru leri nge Har–Magedoni ri vula “Ntshava ya Megido.” Hambileswi ntshava yo tano yi nga vangiki kona hi ku kongoma, ndhawu leyi tivekaka tanihi Megido yi kona. Yi le kusuhi ni ndhawu ya nkoka laha magondzo mambirhi lamakulu ma tsemakanyaka kona endhawini ya le n’walungu-vupela-dyambu leyi eka yona a ku ri tiko ra khale ra Israyele. Tinyimpi to tala letikulu a ti lweriwa ekusuhi ni ndhawu yoleyo. Hikokwalaho, vito leri nge Megido ri fambisana ni nyimpi. *

Hambiswiritano, nchumu wa nkoka hi Megido a hi tinyimpi leti lweriweke kona kambe i xivangelo lexi endleke leswaku ti lwiwa. Megido a ku ri xiphemu xa Tiko leri Tshembisiweke leri Yehovha Xikwembu a ri nyikeke Vaisrayele. (Eksoda 33:1; Yoxuwa 12:7, 21) U hlambanyile  eka vanhu volavo leswaku a a ta va sirhelela eka valala va vona naswona u endle tano. (Deteronoma 6:18, 19) Hi xikombiso, eMegido hi kona laha Yehovha hi ndlela ya singita a sirheleleke Vaisrayele eka mavuthu lawa a ma va hlasela ya Hosi Yabini wa le Kanana ni ndhuna yakwe ya vuthu ku nga Sisera.—Vaavanyisi 4:14-16.

Hikokwalaho, rito leri nge “Har–Magedoni” kumbe “Armagedoni” ri ni tinhlamuselo to fanekisela. Ri fambisana ni ku nga twanani laha mavuthu mambirhi ya matimba ma jamelanaka.

Vuprofeta bya Nhlavutelo byi vulavula hi nkarhi lowu taka lowu eka wona Sathana ni madimona yakwe va nga ta kucetela tihulumendhe ta vanhu leswaku ti hlengeleta mavuthu ya tona naswona hi ku endla tano, ti xungeta vanhu va Xikwembu ni ntirho wa vona. Nhlaselo wu ta endla leswaku vanhu va timiliyoni va fa loko Xikwembu xi hlula vahlaseri volavo.—Nhlavutelo 19:11-18.

Ha yini Xikwembu, lexi Bibele yi xi hlamuselaka tanihi lexi nga ni “tintswalo, lexi hlwelaka ku hlundzuka kambe lexi xi teleke musa wa rirhandzu,” xi dlaya vanhu vo tala swonghasi? (Nehemiya 9:17) Leswaku hi twisisa swiendlo swa Xikwembu, hi fanele hi hlamula swivutiso swinharhu: (1) I mani a sungulaka nyimpi? (2) Ha yini Xikwembu xi katseka? (3) Hi byihi vuyelo bya hilaha ku nga heriki lebyi nyimpi leyi yi nga ta endla leswaku byi va kona emisaveni ni le ka vaaki va yona?

1. I MANI A SUNGULAKA NYIMPI?

Nyimpi ya Armagedoni a hi xiendlo xa tihanyi lexi vangiwaka hi Xikwembu. Ematshan’weni ya sweswo, Xikwembu xi ta sirhelela vanhu lavanene eka vanhu lava nga ta va hlasela. Vahlaseri eka nyimpi leyi i ‘tihosi ta misava hinkwayo leyi akiweke,’ ku nga varhangeri va misava. Ha yini va hlasela? Sathana u ta hlengeleta tihulumendhe ni masocha leswaku swi pfukela vanhu lava gandzelaka Yehovha Xikwembu.—Nhlavutelo 16:13, 14; 19:17, 18.

Namuntlha, tanihi leswi vanhu va le matikweni man’wana va wu tekaka wu ri wa nkoka ntshunxeko wo vulavula ni ntshunxeko wa vukhongeri, mhaka ya leswaku tihulumendhe ti ta ringeta ku herisa fambiselo rin’wana ni rin’wana ra vukhongeri yi nga ha vonaka yi ri leyi nga ta ka yi nga humeleli. Hambiswiritano, minhlaselo yoleyo yi endleke hi lembe-xidzana ra vu-20 naswona yi le ku endlekeni ni sweswi. * Kambe,  ku ni ku hambana kumbirhi lokukulu exikarhi ka nhlaselo lowu hundzeke ni lowu fambisanaka ni Armagedoni. Xo sungula, nyimpi leyi yi ta va emisaveni hinkwayo. Xa vumbirhi, nhlaselo lowu humaka eka Yehovha Xikwembu wu ta va wukulu swinene ku tlula lowu a tshameke a wu endla. (Yeremiya 25:32, 33) Bibele yi hlamusela nhlaselo wolowo tanihi “nyimpi ya siku lerikulu ra Xikwembu xa Matimba Hinkwawo.”

2. HA YINI XIKWEMBU XI KATSEKA?

Yehovha u lerisa vanhu lava n’wi gandzelaka leswaku va va lava rhuleke naswona va rhandza valala va vona. (Mikiya 4:1-3; Matewu 5:43, 44; 26:52) Kutani a va nge teki matlhari leswaku va tisirhelela loko nhlaselo lowu wa tihanyi wu fika. Loko Xikwembu a xi nga teki goza leswaku xi ponisa vanhu va xona, a va ta lovisiwa. Hikokwalaho, vito ra Yehovha Xikwembu kumbe ndhuma ya xona a swi ta va ekhombyeni. Loko valala va vanhu va Xikwembu a vo kota ku va herisa, a swi ta vonaka onge Yehovha a nga na rirhandzu, u hombolokile kumbe a nga na matimba. Sweswo a swi nge koteki!—Pisalema 37:28, 29.

Xikwembu a xi lavi ku lovisa munhu, kutani xi hi lemukisa kahle hileswi xi nga ta swi endla. (2 Petro 3:9) Hi ku tirhisa rungula leri nga eBibeleni, xi tsundzuxa hinkwavo leswaku enkarhini lowu hundzeke xi rihiserile loko vanhu va xona va hlaseriwa. (2 Tihosi 19:35) Nakambe Bibele yi vulavula hi nkarhi lowu taka lowu eka wona Sathana ni vanhu vakwe va nga ta hlasela vanhu va Xikwembu, laha Yehovha a nga ta tlhela a teka goza kutani a tirhisa matimba eka vanhu lava xungetaka vanhu vakwe. Entiyisweni i khale Rito ra Xikwembu ri profete leswaku Yehovha u ta herisa vanhu vo homboloka. (Swivuriso 2:21, 22; 2 Vatesalonika 1:6-9) Hi nkarhi wolowo, a swi kanakanisi leswaku vahlaseri volavo va ta swi tiva leswaku va lwa ni Xikwembu xa Matimba Hinkwawo.—Ezekiyele 38:21-23.

3. HI BYIHI VUYELO BYA HILAHA KU NGA HERIKI LEBYI NYIMPI LEYI YI NGA TA ENDLA LESWAKU BYI VA KONA EMISAVENI NI LE KA VAAKI VA YONA?

Nyimpi ya Armagedoni yi ta endla leswaku ku ponisiwa vanhu va timiliyoni. Entiyisweni, i masungulo ya nkarhi wa ku rhula emisaveni.—Nhlavutelo 21:3, 4.

Buku ya Nhlavutelo yi vulavula hi “ntshungu lowukulu” lowu nhlayo ya wona yi nga tivekiki leyi nga ta pona nyimpi leyi. (Nhlavutelo 7:9, 14) Ehansi ka nkongomiso wa Xikwembu, wu ta hoxa xandla eku endleni leswaku misava yi va Paradeyisi hilaha xikongomelo xo sungula xa Yehovha a xi ri hakona.

Xana ha swi tiva leswaku ku hlaseriwa loku ka vanhu va Xikwembu ku ta endleka rini?

[Tinhlamuselo ta le hansi]

^ par. 6 Swi tolovelekile leswaku ku va ni tindhawu leti fambisanaka ni nyimpi. Hi xikombiso, doroba ra Japani ku nga Hiroshima, leri yayarheriweke hi bomo ya atomo, sweswi i xikombiso xa nxungeto wa nyimpi ya nyutliya.

^ par. 13 Ku dlayiwa ka Vayuda va le Yuropa hi Manazi i xikombiso xin’we xa hulumendhe xo ringeta ku herisa vukhongeri ni ntlawa wa tinxaka. Exikarhi ka 1917 na 1991, mintlawa ya vukhongeri leyi a yi ri ehansi ka mfumo wa khale wa Rhaxiya na yona a yi tshikileriwa swinene. Vona xihloko lexi nge “Vanhu Vo Rhula Va Sirhelela Vito Ra Vona Lerinene,” lexi nga eka Xihondzo xo Rindza xa May 1, 2011, lexi kandziyisiweke hi Timbhoni ta Yehovha.

[Xifaniso lexi nga eka tluka 6]

Yehovha Xikwembu u sirhelele vanhu vakwe enkarhini lowu hundzeke

[Xifaniso lexi nga eka tluka 7]

Yehovha u ta tlhela a sirhelela vanhu vakwe hi nkarhi wa nyimpi ya Armagedoni