Nghena endzeni

Hundzela eka leswi nga endzeni

 Dyondza Eka Rito Ra Xikwembu

Ha Yini Xikwembu Xi Ri Ni Nhlengeletano?

Ha Yini Xikwembu Xi Ri Ni Nhlengeletano?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Ha yini Xikwembu xi hlengelete Vaisrayele?

Xikwembu xi hlengelete vatukulu va Abrahama va va tiko kutani xi va nyika milawu. Xi va vitane tiko ra Israyele kutani xi va nyika vutihlamuleri byo sirhelela vugandzeri bya ntiyiso ni Rito ra xona, ku nga Matsalwa yo Kwetsima. (Pisalema 147:19, 20) Xisweswo, vanhu va matiko hinkwawo va vuyeriwile.—Hlaya Genesa 22:18.

Xikwembu xi hlawule Vaisrayele leswaku va va timbhoni ta xona. Loko a va lo yingisa, a va ta va va vuyeriwile eka milawu ya Xikwembu. (Deteronoma 4:6) Loko hi hlaya matimu ya Vaisrayele, hi nga tiva swo tala malunghana ni Xikwembu xa ntiyiso.—Hlaya Esaya 43:10, 12.

2. Ha yini Vakreste va ntiyiso va hlengeletiwa?

Hi ku famba ka nkarhi, Xikwembu xi fularhele tiko ra Israyele kutani xi ri siva hi vandlha ra Vukreste. (Matewu 21:43; 23:37, 38) Enkarhini lowu hundzeke, Vaisrayele a va ri timbhoni ta Xikwembu. Sweswi, Vakreste va ntiyiso i Timbhoni ta Yehovha.—Hlaya Mintirho 15:14, 17.

Yesu u hlengelete valandzeri vakwe leswaku va va timbhoni ta Yehovha ni ku endla vadyondzisiwa ematikweni hinkwawo. (Matewu 10:7, 11; 24:14; 28:19, 20) Ntirho lowu wu karhi wu fika emakumu. I ro sungula Yehovha a hlengeleta vanhu va timiliyoni vo huma ematikweni hinkwawo evugandzerini bya ntiyiso. (Nhlavutelo 7:9, 10) Nakambe Vakreste va ntiyiso va hlengeletiwa leswaku va ta khutazana ni ku pfunana. Emisaveni hinkwayo, va tiphina hi nongonoko lowu fanaka wa ndzetelo wa Bibele eminhlanganweni ya vona.—Hlaya Vaheveru 10:24, 25.

  3. Manguva lawa, xana Timbhoni ta Yehovha ti sungule njhani?

Nhlengeletano ya manguva lawa ya Timbhoni ta Yehovha yi sungule hi va-1870. Ntlawa lowutsongo wa swichudeni swa Bibele wu tshubule ntiyiso wa Bibele lowu se a ku ri khale wu lahliwile. A wu swi tiva leswaku Yesu u hlengelete vandlha ra Vukreste leswaku ri chumayela. Kutani wu sungule tsima ro chumayela hi Mfumo ematikweni yo hambana-hambana. Hi 1931 wu amukele vito leri nge Timbhoni ta Yehovha.—Hlaya Mintirho 1:8; 2:1, 4; 5:42.

4. Xana Timbhoni ta Yehovha ti hlengeletiwa njhani namuntlha?

Hi lembe-xidzana ro sungula, mavandlha ya Vukreste ematikweni yo tala ma pfuniwe hi huvo leyi fumaka leyi tekaka Yesu tanihi Nhloko ya vandlha. (Mintirho 16:4, 5) Hilaha ku fanaka namuntlha, Timbhoni ta Yehovha ti teka Yesu tanihi Murhangeri wa tona. (Matewu 23:9, 10) Nakambe ti pfuniwa hi nkongomiso wa Huvo leyi Fumaka ya vakulu lava nga ni ntokoto lava nyikelaka xikhutazo ni nkongomiso wa Matsalwa eka mavandlha yo tlula 100 000. Vandlha ha rin’we, ri ni vavanuna lava fanelekaka lava tirhaka tanihi vakulu kumbe valanguteri. Vavanuna lava va khathalela ntlhambi wa Xikwembu hi rirhandzu.—Hlaya 1 Petro 5:2, 3.

Timbhoni ta Yehovha ti hlengeleteriwe ku chumayela mahungu lamanene ni ku endla vadyondzisiwa. Leswaku ti kota ku pfuna vanhu emisaveni hinkwayo, ti hundzuluxela ni ku kandziyisa minkandziyiso leyi pfunaka ku dyondza Bibele hi tindzimi to tlula 500 ti tlhela ti yi hangalasa. Ku fana ni vaapostola, ti chumayela hi yindlu ni yindlu. (Mintirho 20:20) Ti tinyiketela ku dyondza Bibele ni vanhu lava rhandzaka ntiyiso hi timbilu ta vona hinkwato. Leswi vanhu va Yehovha va lavaka ku tsakisa Xikwembu ni ku pfuna van’wana, i nhlengeletano ya vanhu lava tsakeke.—Hlaya Pisalema 33:12; Mintirho 20:35.

Leswaku u kuma rungula leri engetelekeke, vona ndzima 19 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.