Nghena endzeni

Hundzela eka leswi nga endzeni

Bibele Yi Hundzula Vutomi Bya Vanhu

Bibele Yi Hundzula Vutomi Bya Vanhu

 Bibele Yi Hundzula Vutomi Bya Vanhu

I YINI lexi susumeteleke n’wamapurasi wa fole leswaku a cinca ntirho wakwe ni vukhongeri byakwe? Xana wansati loyi a a ri xindzendzele u ma kume njhani matimba yo cinca mahanyelo yakwe? Hlaya leswi vanhu lava va swi vulaka.

“Ndzi Rhandza Ku Va Xiphemu Xa Ndyangu Lowu Lowukulu.”—DINO ALI

LEMBE RO VELEKIWA: 1949

TIKO: AUSTRALIA

MATIMU YAKWE: N’WAMAPURASI WA FOLE

VUTOMI BYA MINA: Vatswari va mina va rhurhe eAlbania hi 1939 kutani va ya tshama eMareeba, laha ku nga xidorobana lexi nga eQueensland, le Australia. Vanhu vo tala va le Bosnia, Grikiya, Italiya, Serbia ni vanhu van’wana na vona va tile va ta tshama endhawini leyi, laha va teke ni tidyondzo ta vona malunghana ni leswinene ni leswi hoxeke, mikhuva ni mindhavuko ya vona. Mareeba a ku ri vito ra ndhawu leyi eka yona a ku ri ni mapurasi ya fole naswona vatswari va mina va sungule ku ri byala.

A swi tekanga nkarhi leswaku ku velekiwa sesi wa mina, loyi a tlhandlamiweke hi vabuti va mina vambirhi kutani ku landzela mina. Lexi twisaka ku vava hileswaku Tatana u dlayiwe hi vuvabyi bya mbilu loko ndzi ri ni lembe. Manana u tlhele a nghenela vukati kutani a va ni vana van’wana va mune. Hinkwerhu ka hina hi kulele epurasini ra fole ra tata wa mina wa vumbirhi.

Ndzi rhurhe ekaya ndza ha ri emalembeni ya kondlo-a-ndzi-dyi. Loko ndzi ri ni malembe ya kwalomu ka 20, ndzi teke nsati, ku nga Saime, ekerekeni ya Mamoslem, tanihi leswi havumbirhi bya hina a hi ri Mamoslem. Vamalume va mina hinkwavo, vahahani ni vamuzala na vona va ve Mamoslem. A ndzi hlaya Korani ni buku leyi vulavulaka hi matimu ya muprofeta Muhammad. Hi nkarhi lowu fanaka a ndzi hlaya ni Bibele leyitsongo. Korani yi vulavule hi vaprofeta lava boxiweke eBibeleni naswona ku hlaya Bibele swi ndzi pfune leswaku ndzi twisisa nkarhi lowu va hanyeke ha wona.

Timbhoni ta Yehovha a ti ta ekaya ka mina naswona a ti tshamela ku ndzi siyela timagazini ni tibuku, leti mina na Saime a hi tiphina hi ku ti hlaya. Ndzi tsundzuka mabulo yo tala yo tsakisa lawa hi veke na wona na Timbhoni malunghana ni tidyondzo to hambana-hambana ta vukhongeri. Nkarhi na nkarhi a ti hlamula swivutiso swa mina ku suka eBibeleni ematshan’weni yo nyikela mavonelo ya tona. Entiyisweni sweswo swi ndzi khumbe swinene.

Timbhoni ti kombele ku dyondza Bibele na mina  ti tlhela ti ndzi rhamba eminhlanganweni ya tona, kambe a ndzi tshamela ku ala. A ndzi lava ku va ni purasi ra mina ni ndyangu lowukulu. A ndzi vanga na rona purasi ra mina kambe eku heteleleni ndzi ve ni vana va ntlhanu lava ndzi va rhandzaka.

NDLELA LEYI BIBELE YI HUNDZULEKE VUTOMI BYA MINA HA YONA: Endzhaku ka loko ku hundze malembe ya kaye ndzi hlangane ni Timbhoni ta Yehovha ro sungula, a ndzi nga si cinca vukhongeri bya mina. Hambiswiritano, a ndzi tiphina hi ku amukela ni ku hlaya minkandziyiso hinkwayo leyi ti yi kandziyisaka. Sonto yin’wana ni yin’wana, mina na Saime a hi tinyika nkarhi wo hlaya minkandziyiso leyi. Hi hlayise timagazini hinkwato leti hi ti kumeke eka malembe lama hundzeke. Timagazini a ti ri ni rungula leri pfunaka leri ndzi tiyiseke loko van’wana va sungula ku ringa ripfumelo leri a ri dzima timitsu embilwini ya mina.

Hi xikombiso, ndzi hlangane ni muchumayeri wa evhangeli loyi a ringeteke ku ndzi sindzisa ku amukela Yesu tanihi Muponisi wa mina. U swi kotile ku kucetela ndzisana ya Saime ya xinuna ni un’wana wa tindzisana ta mina ta xinuna hi Manana leswaku va n’wi landzela. Swi nga si ya kwihi, vanhu lava humaka eka vukhongeri bya mixaka hinkwayo va sungule ku ringeta ku ndzi khorwisa leswaku ndzi joyina mintlawa ya vona ya vukhongeri. Van’wana va ndzi nyike minkandziyiso leyi vulavulaka ku biha hi Timbhoni ta Yehovha. Ndzi kombele vaxopaxopi volavo leswaku va ndzi komba ku suka eBibeleni laha a va ti sekela kona tidyondzo leti a va ti dyondzisa, kambe a va swi kotanga ku hlamula swivutiso swa mina.

Nkaneto lowu hinkwawo wu endle leswaku ndzi lavisisa hi vuenti eBibeleni ni ku endla vulavisisi lebyi engetelekeke, ndzi tirhisa minkandziyiso leyi a ndzi nyikiwe hi Timbhoni. Eku heteleleni, ndzi xiye leswaku se nkarhi a wu fikile wo va ndzi hanya hileswi a ndzi swi dyondza.

Ku hava Mbhoni leyi a yi dyondza na mina Bibele; kambe ndzi sungule ku ya eminhlanganweni ya tona. Loko ndzi ya ro sungula, a ndzi khomiwe hi rhumbyana ndzi tlhela ndzi va ni tingana, kambe ndzi hlangane ni vanhu vo tala lava nga ni xinghana eminhlanganweni yoleyo naswona leswi ndzi swi dyondzeke swi ndzi tsakisile. Ndzi endle xiboho xo va Mbhoni ya Yehovha naswona hi 1981 ndzi kombise ku tinyiketela ka mina eka Xikwembu hi ku khuvuriwa.

Nsati wa mina a nga lwisananga na xona xiboho xa mina, hambileswi minkarhi yin’wana a ehleketa leswaku ndzi kanganyisiwile. Hambiswiritano, u ve kona loko ndzi khuvuriwa. Ndzi ye emahlweni ndzi n’wi avela tidyondzo to tala leti a ndzi ti dyondza. Endzhaku ka loko ku hundze kwalomu ka lembe ndzi khuvuriwile, loko hi ri karhi hi ya ekaya hi vuya hi le riendzweni ra hina, Saime u ndzi byele leswaku a tsakela ku va Mbhoni. Sweswo swi ndzi hlamarisile! U khuvuriwe hi 1982.

Ku endla ku cinca loku a ku laveka eka mahanyelo ya hina a ku nga ri matlangwana. Ndzi tshike ku rima fole hikuva ku endla tano swi lwisana ni milawu leyi nga eBibeleni. (2 Vakorinto 7:1; Yakobo 2:8) Swi teke nkarhi ku va ndzi kuma ntirho lowu amukelekaka lowu a wu ta hi nyika mali leyi ringaneke. Nakambe endzhaku ka sweswo ku hundze malembe yo tala, maxaka ya hina man’wana ma nga lavi ku hi endzela. Hi ringete ku ma khoma hi ku ya hi milawu leyi nga eBibeleni hi ku va hi ma kombisa rirhandzu. Eku heteleleni, ku avana koloko ku  kume ndzhuti ku yima naswona maxaka ya hina lamakulu a ma ha hi papalati.

NDLELA LEYI NDZI VUYERIWEKE HA YONA: Ku hlangavetana ni miringo yo hambana-hambana, leyi yin’wana ya yona a ku ri ku hlula tingana, ku langutana ni swiphiqo swa timali kumbe ku langutana ni nkaneto wa ndyangu, swi ndzi dyondzise ndlela leyi Yehovha Xikwembu a lehiseke mbilu ha yona leswaku a ndzi pfuna ku langutana ni swiphiqo swa mina. Hi xikombiso, sweswi ndzi nkulu evandlheni naswona ndzi fanele ndzi dyondzisa eplatifomo nkarhi na nkarhi. Lexi ka ha ri xiphiqo eka mina hikuva ndzi fanele ndzi lwisana ni manghanghamela hikwalaho ko chuha. Kambe hikwalaho ko khongela nkarhi na nkarhi ni hi mpfuno wa Yehovha ndza swi kota ku endla ntirho lowu.

Mina ni nsati wa mina hi ye hi va ni vuxaka lebyikulu naswona vuxaka byebyo i bya risima. Hi endle swihoxo loko hi kurisa vana va hina kambe hi ringeta ku endla leswi nga ematimbeni ya hina leswaku hi va dyondzisa tidyondzo ta Bibele leti hi ti dyondzeke. (Deteronoma 6:6-9) Entiyisweni, n’wana wa mina wa jaha wa mativula ni nsati wakwe i varhumiwa.

Ndzi tsundzuka siku rin’wana endzhakunyana ka loko hi sungule ku ya eminhlanganweni ya Timbhoni tanihi ndyangu. Ndzi pake movha wa mina kutani ndzi languta endzeni ka holo laha a ku ri ni ntshungu lowu a wu hlengeletanile. Ndzi vutise ndyangu wa mina ndzi ku: “I yini leswi mi swi vonaka?” Endzeni ka holo a ku ri ni vanhu va mindhavuko ni tindzimi to hambana-hambana—vanhu va le Aurukun, Albania, Australia ni le Croatia—lava a va tsakile ku hlangana swin’we. Ndzi rhandza ku va xiphemu xa ndyangu lowu lowukulu wa vamakwerhu va moya, lowu nga riki eAustralia ntsena kambe emisaveni hinkwayo.—1 Petro 5:9.

Sesi Wa Mina A Nga Ndzi Helelanga Mbilu.”—YELENA VLADIMIROVNA SYOMINA

LEMBE RO VELEKIWA: 1952

TIKO: RHAXIYA

MATIMU YAKWE: A A GODZOMBERIWE HI BYALA A TLHELA A RINGETA KU TIDLAYA

VUTOMI BYA MINA: Ndzi velekiwe eKrasnogorsk, laha ku nga xidorobana lexi rhuleke lexi nga ekusuhi ni le Moscow. Ndzi kulele emutini lowu nga ni mathicara. A ndzi ri xichudeni lexinene naswona ndzi dyondzele vuyimbeleri. Vumundzuku bya mina a byi vonaka byi ta va lebyinene.

Loko ndzi tekiwa, mina ni nuna wa mina hi rhurhele endhawini leyi eka yona nhlambha, vudakwa ni ku dzaha a ku ri tshamela-maxelo. A ndzi swi xiyanga hi nkarhi wolowo, kambe ndhawu yoleyo yi onhe mahanyelo ya mina. Eku sunguleni, a ndzi ya eswinkhubyanini ntsena leswaku ndzi ya yimbelela ni ku chaya katara. Hambiswiritano, loko ndzi ri kwale, vanhu a va ndzi rhamba leswaku ndzi dzaha ni ku nwa na vona. A swi tekanga nkarhi leswaku ndzi godzomberiwa hi byala.

Vutomi bya mina byi sungule ku onhaka hileswi a ndzi godzomberiwe hi byala. Loko ndzi nwile a swi ndzi tikela ku dya. A ndzi lava ku fa kutani ndzi ringete ku tidlaya kambe ndzi tsandzeka. Ndzi nkhensa leswi ndzi tsandzekeke ku tidlaya.

Enkarhini wolowo hinkwawo, sesi wa mina a ndzi endzela nkarhi na nkarhi. Se a ri Mbhoni ya  Yehovha kutani u ringete ku ndzi hlamusela ndlela leyi Bibele yi nga ndzi pfunaka ha yona. A ndzi nga swi lavi ku bula na yena hi Bibele kutani eku sunguleni ndzi ringete ku n’wi sivela leswaku a nga ha ndzi endzeli. Kambe a nga ndzi helelanga mbilu. U kombise ku lehisa mbilu ni rirhandzu lerova eku heteleleni ndzi pfumela ku dyondza Bibele.

NDLELA LEYI BIBELE YI HUNDZULEKE VUTOMI BYA MINA HA YONA: Endzhaku ka loko ndzi sungule ku dyondza Bibele, a ndzi tiyimisele ku tshika byala. Hi nkarhi wolowo, ndzi hlaseriwe ni ku biwa hi muakelani loyi a dakwile. Ndzi tikume ndzi ri exibedlhele laha a ndzi ri eka xiyimo xo chavisa. A ndzi tshoveke timbambu ta mune naswona yin’wana ya tisele ta mina ta le tihlweni a yi vavisekile. Nilokoswiritano, ku tshama exibedlhele swi ndzi pfune leswaku ndzi tshika ku va xindzendzele.

Hi nkarhi wolowo, a ndzi khongela nkarhi na nkarhi. Ndzimana ya Bibele leyi ndzi chaveleleke swinene a ku ri Swirilo 3:55, 56 leyi nge: “Oho Yehovha, ndzi huwelele vito ra wena ndzi ri emugodini lowu enteke ngopfu. U fanele u twa rito ra mina. U nga fihli ndleve ya wena leswaku u ndzi wisisa, u ndzi twa loko ndzi kombela ku pfuniwa.”

Hakunene ndza tshemba leswaku Yehovha u hlamule swikhongelo swa mina. U ndzi nyike matimba yo va ndzi nga tlheleli eka mahanyelo ya mina ya khale. Ku ni minkarhi leyi eka yona ndzi ringeteke ku tlhela ndzi sungula ku nwa. Ndza tsaka ku vula leswaku ndzi wu hlurile ndzingo wolowo.

Loko ndzi ri karhi ndzi ya emahlweni ndzi dyondza Bibele, ndzi dyondze leswaku ndzi fanele ndzi seketela nuna wa mina entirhweni wakwe wo va nhloko ya ndyangu. (1 Petro 3:1, 2) Sweswo a swi nga ndzi oloveli ku swi endla tanihi leswi a ndzi tolovele ku tiendla nhloko eka yena. Ndzi khongele Yehovha leswaku a ndzi pfuna. Swi teke nkarhi leswaku ndzi cinca kambe hakatsongo-tsongo ndzi ve wansati lonene ni ku seketela nuna wa mina.

Loko nuna wa mina loyi a rhandzekaka a vona ku cinca koloko u hlamarile. A a nga yi tsakeli Bibele. Kambe loko ndzi endla xiboho xo tshika ku dzaha, u te: “Loko u tshika ku dzaha, ndzi ta sungula ku dyondza Bibele!” Havumbirhi bya hina hi tshike ku dzaha hi siku rin’we.

NDLELA LEYI NDZI VUYERIWEKE HA YONA: Nuna wa mina u hetisise xitshembiso xakwe kutani a sungula ku dyondza Bibele. Sweswi hi hlaya Bibele swin’we siku ni siku ni ku anakanyisisa hileswi hi swi hlayaka ni ku ringeta ku tirhisa ndzayo ya yona evuton’wini bya hina.

Hakunene ku ta va ku ri ku twa ku xurha ku hlamusela ndlela leyi vutomi bya ndyangu wa mina byi veke byo antswa ha yona—ndzi nga ha vuli ndlela leyi mina ndzi vuyeriweke ha yona. Ndzi nkhensa Yehovha leswi a ndzi kokeleke eka yena. (Yohane 6:44) Nakambe ndzi nkhensa sesi wa mina loyi a nga ndzi helelangiki mbilu. Hikwalaho ka sweswo, ndzi tivonele hi ya mina leswaku hakunene Bibele ya byi hundzula vutomi.

[Marito lama tshahiweke exihlokweni lama nga eka tluka 11]

Ndzi xiye leswaku se nkarhi a wu fikile wo va ndzi hanya hileswi a ndzi swi dyondza

[Marito lama tshahiweke exihlokweni lama nga eka tluka 13]

Sesi wa mina u kombise ku lehisa mbilu ni rirhandzu lerova eku heteleleni ndzi pfumela ku dyondza Bibele