Nghena endzeni

Hundzela eka leswi nga endzeni

Armagedoni—Xana Vanhu Van’wana Va Vula Leswaku I Yini?

Armagedoni—Xana Vanhu Van’wana Va Vula Leswaku I Yini?

 Armagedoni—Xana Vanhu Van’wana Va Vula Leswaku I Yini?

“Hiloko ma ti hlengeletela endhawini leyi vuriwaka Armagedoni hi Xiheveru.”—NHLAVUTELO 16:16, English Standard Version.

XANA u ehleketa yini loko u twa rito leri nge “Armagedoni”? Swi nga ha endleka leswaku u anakanya hi mhangu leyikulu. Hambileswi rito leri ri humelelaka kan’we ntsena eBibeleni, rito leri ri phindhiwe ko tala hi vahaxi va mahungu ni hi varhangeri va vukhongeri.

Xana tinhlamuselo leti dumeke hi Armagedoni ti fambisana ni leswi Bibele yi swi dyondzisaka? I swa nkoka leswaku hi tiva nhlamulo ya kona. Ha yini? Hikuva ku tiva ntiyiso malunghana ni Armagedoni swi nga ku ntshunxa eka ku chava loku nga riki kona naswona swi ku voningela eka ndlela leyi u langutaka vumundzuku ha yona ni ku khumba ndlela leyi u anakanyaka ha yona hi Xikwembu.

Xiya swivutiso swinharhu leswi landzelaka kutani u ringanisa tidyondzo leti dumeke malunghana ni Armagedoni ni leswi Bibele yi swi dyondzisaka hakunene.

  1. XANA ARMAGEDONI I MHANGU LEYI VANGIWEKE HI VANHU?

Hakanyingi vatsari va maphepha-hungu ni valavisisi va tirhisa rito leri nge “Armagedoni” ku hlamusela timhangu leti vangiwaka hi vanhu. Hi xikombiso, a ku vuriwa leswaku Nyimpi yo Sungula ni ya Vumbirhi ya Misava i Armagedoni. Endzhaku ka tinyimpi teto, vanhu a va vilerisiwa hileswaku tiko ra United States ni ra Soviet Union ma ta hlaselana hi matlhari ya atomo. Swihaxa-mahungu swi vitane nyimpi yoleyo leswaku i “Armagedoni leyi vangiweke hi nyutliya.” Namuntlha, valavisisi lava chavisiwaka hileswaku nthyakiso wu ta vanga ku cinca lokukulu eka maxelo ya misava va lemukisa hi ku ta ka “Armagedoni.”

Vonelo leri hoxeke: Vanhu va ni vulawuri lebyikulu hi vumundzuku bya misava ni swilo hinkwaswo leswi hanyaka leswi nga eka yona. Loko tihulumendhe ti tsandzeka ku endla swilo hi vutlhari, misava yi ta onhaka hilaha ku nga heriki.

Leswi Bibele yi swi dyondzisaka: Xikwembu a xi nge va pfumeleli vanhu leswaku va onha misava. Bibele ya hi tiyisekisa leswaku Yehovha * a nga yi tumbuluxelanga “swa hava” misava leyi. Ku ri na sweswo u yi vumbele leswaku “ku akiwa eka yona.” (Esaya 45:18) Ematshan’weni yo pfumelela leswaku misava yi onhiwa hi vanhu, Xikwembu xi ta “lovisa lava onhaka misava.”—Nhlavutelo 11:18.

2. XANA ARMAGEDONI I MHANGU YA NTUMBULUKO?

Minkarhi yin’wana vatsari va maphepha-hungu va tirhisa rito leri nge “Armagedoni” ku vula timhangu letikulu ta ntumbuluko. Hi xikombiso, hi 2010, xiviko xin’wana xi vulavule hi “‘Armagedoni’ leyi endlekeke eHaiti.” A xi hlamusela ku xaniseka, ku onhakeriwa ni ku fa ka vanhu loku vangiweke hi ku tsekatseka lokukulu ka misava loku onheke tiko rero. Vaviki va mahungu ni vaendli va tifilimi a va tirhisi rito leri ntsena eka swiendlakalo leswi se swi endlekeke kambe ni le ka leswi va chavaka leswaku swi ta endleka. Hi xikombiso, va tirhise rito “Armagedoni” ku hlamusela mhaka leyi ngo ehleketiwa ya leswaku pulanete leyitsongo yi ta hlasela misava.

Vonelo leri hoxeke: Armagedoni i mhangu ya xiwelo leyi dlayaka vanhu va nga dyanga xa munhu. A swi kona leswi u nga swi endlaka leswaku u tisirhelela eka yona.

Leswi Bibele yi swi dyondzisaka: Armagedoni a hi mhangu ya xiwelo leyi dlayaka vanhu. Ematshan’weni ya sweswo, hi nkarhi wa Armagedoni, i vanhu vo biha ntsena lava nga ta lovisiwa. Bibele yi tshembisa leswaku ku nga ri khale “lowo homboloka a nge he vi kona; kunene u ta languta endhawini yakwe, u ta va a nga ri kona.”—Pisalema 37:10.

3. XANA XIKWEMBU XI TA LOVISA MISAVA EARMAGEDONI?

Vanhu vo tala va vukhongeri va tshemba leswaku ku ta va ni nyimpi yo hetelela exikarhi ka vanhu vo lulama ni vanhu vo biha leyi nga ta endla leswaku pulanete ya hina yi hetelela yi lovisiwile. Nhlawulo lowu a wu ri eUnited States lowu a wu fambisiwa hi Princeton Survey Research Associates wu kume leswaku vanhu lavakulu lava endlaka tiphesente ta 40 lava ku endliweke ndzavisiso eka vona va tshemba leswaku misava yi ta hela eka “nyimpi ya Armagedoni.”

 Vonelo leri hoxeke: Vanhu a va nga vumberiwanga ku tshama emisaveni hilaha ku nga heriki naswona misava a yi nga endleriwanga ku tshama hilaha ku nga heriki. Xikwembu xi tumbuluxe vanhu hi xikongomelo xa leswaku hi ku famba ka nkarhi hinkwavo va fa.

Leswi Bibele yi swi dyondzisaka: Bibele yi swi veka erivaleni leswaku Xikwembu xi “simeke misava etindhawini leti [xi] ti endleleke tona; a yi nge tsekatsekisiwi hilaha ku nga riki na makumu, kumbe hi masiku.” (Pisalema 104:5) Malunghana ni vaaki va laha misaveni, Bibele yi ri: “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.

Swi le rivaleni leswaku Bibele yi kanetana ni tidyondzo to tala leti dumeke malunghana ni Armagedoni. Kutani, ntiyiso hi wihi?

[Nhlamuselo ya le hansi]

^ par. 9 EBibeleni, Yehovha i vito ra Xikwembu.