Nghena endzeni

Hundzela eka leswi nga endzeni

Vito Ra Xikwembu Ni Xikombelo Xa Alfonso de Zamora Xa Matsalwa Lama Pakanisaka

Vito Ra Xikwembu Ni Xikombelo Xa Alfonso de Zamora Xa Matsalwa Lama Pakanisaka

 Vito Ra Xikwembu Ni Xikombelo Xa Alfonso de Zamora Xa Matsalwa Lama Pakanisaka

HI LEMBE ra 1492, Ferdinand la nga hosi na Isabella la nga hosi ya xisati va le Spaniya va humese xileriso lexi nge: “Hi lerisa Vayuda hinkwavo va xinuna ni va xisati . . . leswaku eku heleni ka July lembe leri, va rhurha etikweni ra hina ni vana va vona va majaha ni vanhwanyana ni malandza ya vona ya xinuna ni ya xisati ku nga khathariseki malembe ya vona naswona ku ta va ni vuyelo byo biha loko vo tlhela va vuya.”

Hi nkarhi wa ku hlongoriwa ka vona, ndyangu wun’wana ni wun’wana wa Vayuda eSpaniya wu byeriwe ku hlawula exikarhi ka ku va wu ya evuchavela-hwahwa kumbe ku fularhela vukhongeri bya wona. Rabi la vuriwaka Juan de Zamora a nga ha va a vone swi antswa ku hundzuka a nghena Kereke ya Khatoliki kutani a sala eSpaniya, laha vakokwa wakwe va hanyeke kona malembe yo tala. Hikwalaho ka ndhavuko wakwe wa Xiyuda, Juan u swi kotile ku yisa n’wana wakwe wa jaha la vuriwaka Alfonso exikolweni xa tidyondzo ta Xiheveru eZamora. Hi ku famba ka nkarhi, Alfonso u sungule ku xi tiva kahle Xilatini, Xigriki ni Xiaramu. Endzhaku ka loko a hete tidyondzo takwe, u sungule ku dyondzisa Xiheveru eYunivhesiti ya Salamanca. Endzhakunyana ka sweswo, vuswikoti byakwe byo tiva tindzimi byi tirhisiwe swinene hi swidyondzi swa Bibele etikweni hinkwaro ra Yuropa.

Hi 1512 Yunivhesiti leyintshwa ya Alcalá de Henares yi hlawule Alfonso de Zamora leswaku a rhangela swichudeni swa Xiheveru. Leswi Zamora a ri un’wana wa swidyondzi swo sungula swa le nkarhini wakwe, khadinali Jiménez de Cisneros, la nga musunguri wa yunivhesiti, u kombele ku pfuneta eku lunghiseleleni ka Bibele ya Tindzimi to Tala ya le Complutum. Bibele leyi, leyi nga ni tivholumo ta tsevu yi tamele tsalwa ro kwetsima hi Xiheveru, Xigriki, Xilatini ni swiyenge swa Xiaramu. *

Eka tsima leri, xidyondzi xa Bibele Mariano Revilla Rico xi te: “Eka vahundzuluxeri vanharhu lava nga Vayuda lava katsekeke entirhweni wa Khadinali [Cisneros], loyi a dume ngopfu i Alfonso de Zamora, loyi a nga ri xidyondzi xa Xilatini, Xigriki, Xiheveru ni Xiaramu ntsena kambe a a ri mutivi wa ririmi, mutivi wa filosofi tlhelo xidyondzi xa Talmud.” Tidyondzo ta Zamora ti endle leswaku a gimeta hileswaku vuhundzuluxeri lebyi pakanisaka bya Bibele byi lava vutivi lebyi enteke bya tindzimi to sungula ta khale. Entiyisweni, u ve un’wana wa vahlohloteri-nkulu lava endleke leswaku ku va ni dyondzo ya Bibele eku sunguleni ka lembe-xidzana ra vu-16.

Nilokoswiritano, Zamora u hanye enkarhini wa mangava ni le ndhawini leyi nga ni khombo ku va a hlohlotela dyondzo ya Bibele. Vakonanisi va le Spaniya a va tinyike matimba naswona Kereke ya Khatoliki yi xixime vuhundzuluxeri bya Vulgate ya  Xilatini tanihi byona ntsena vuhundzuluxeri bya Bibele leyi nga enawini. Hambiswiritano, ku sukela eka Malembe ya le Xikarhi, swidyondzi swa Khatoliki se a swi yi xiyile mhaka ya leswaku tsalwa ra Vulgate ya Xilatini a ri nga hetisekanga nikatsongo. Eku sunguleni ka lembe-xidzana ra vu-16, Alfonso de Zamora ni van’wana va nghenele ntirho wo va va endla swo karhi hi mhaka leyi.

‘Leswaku Vanhu Va Ponisiwa Ku Laveka Vuhundzuluxeri’

Exikarhi ka matsima lawa Zamora a tirheke eka wona, nkandziyiso wa Xiheveru lowu hi ntolovelo wu vitaniwaka Testamente ya Khale swin’we ni vuhundzuluxeri bya wona bya Xilatini, handle ko kanakana a wu ri lowu xiyekaka swinene. Swi nga ha endleka leswaku a lava leswaku nkandziyiso lowu wu tirhisiwa swinene eka tsima ra Bibele ya Tindzimi to Tala ya le Complutum. Rin’wana ra matsalwa yakwe ya voko ri le layiburari ya le El Escorial ekusuhi ni le Madrid, eSpaniya. Ri tsariwe G-I-4 naswona ri tamele buku leyi heleleke ya Genesa hi Xiheveru swin’we ni vuhundzuluxeri bya rito hi rito hi Xilatini.

Eka rito ro rhanga ku ni marito lawa: “Leswaku tiko ri ponisiwa ku laveka vuhundzuluxeri bya Matsalwa yo Kwetsima hi tindzimi tin’wana. . . . Hi swi vone swi ri . . . swa nkoka swinene leswaku vanhu vo tshembeka va va ni Bibele leyi hundzuluxeriweke hi rito hi rito, leyi tsariweke hi ndlela leyi nga ta endla leswaku rito rin’wana ni rin’wana ra Xiheveru ri fana ni leri tsariweke hi Xilatini.” Alfonso de Zamora a a ri ni timfanelo leti lavekaka to endla vuhundzuluxeri byo tano lebyintshwa byi va hi Xilatini hikuva a a ri xidyondzi lexi dumeke xa Xiheveru.

‘Moya Wa Mina A Wu Nge Yi Kumi Ndhawu Yo Wisa’

Entiyisweni, hi lembe-xidzana ra vu-16 Spaniya a ku ri ndhawu leyinene yo va swidyondzi swo fana na Zamora swi tirha eka yona. EMalembeni ya le Xikarhi, Spaniya ri ve ntsindza wa ndhavuko wa Vayuda. Encyclopædia Britannica yi ri: “Leswi emalembeni ya le xikarhi eSpaniya a ku ri ni Mamoslem yo tala ni vaaki lava nga Vayuda, tiko leri a ku ri rona ntsena eYuropa Vupela-dyambu leri a ri ri ni vanhu va tinxaka ni vukhongeri byo hambana-hambana kutani tidyondzo to tala ta le Spaniya leti sunguriweke eka vukhongeri, tibuku, vutshila ni maakelo endzhaku ka Malembe ya le Xikarhi swi ve kona hikwalaho ka sweswo.”

Leswi a ku ri ni vaaki vo tala lava nga Vayuda eSpaniya, ku ve ni Tibibele to tala leti tsariweke hi voko ta Xiheveru. Vatsari lava nga Vayuda eswiphen’wini swo tala swa Spaniya va endle matshalatshala yo kopa matsalwa lawa ya voko leswaku ku va wona Matsalwa lama hlayiwaka emasinagogeni. L. Goldschmidt, ebukwini yakwe leyi nge The Earliest Editions of the Hebrew Bible, u vule leswaku “tibuku ta ntlhanu to sungula ta matsalwa ya Xiputukezi xa le Spaniya a ti endlanga ntsena leswaku Swidyondzi swa Vayuda swi va ni ndhuma leyikulu yo tsala matsalwa lama pakanisaka, kambe ti tlhele ti endla leswaku ti kandziyisiwa hi xitalo.”

Ku nga khathariseki vuyelo lebyi tiko ra Spaniya ri endleke leswaku byi va kona, nkaneto eka lava a va lava ku hundzuluxela Bibele a wu ri karhi wu sungula. Hi 1492, mavuthu ya Khatoliki ya Hosi Ferdinand ni Hosi ya xisati Isabella ma hlule tiko ro hetelela ra Vamoor eSpaniya. Hilaha swi boxiweke hakona eku sunguleni, hi lembe rero vafumi va humese xileriso xa leswaku vanhu hinkwavo lava khomeleleke evukhongerini bya Vayuda va hlongoriwa eSpaniya. Endzhaku ka malembe ya khume ku tlhele ku humesiwa xileriso lexi fanaka xo hlongola Mamoslem. Ku sukela hi nkarhi wolowo, Kereke ya Khatoliki yi ve vukhongeri bya Tiko ra Spaniya naswona vukhongeri byin’wana a byi nga ha pfumeleriwi.

Xana vukhongeri lebyi lebyintshwa a byi ta byi khumba njhani vuhundzuluxeri bya Bibele? Ntokoto wa Alfonso de Zamora i xikombiso xa ndlela leyi ku cinca ka vukhongeri swi byi khumbeke ha yona vuhundzuluxeri bya Bibele. Hambileswi xidyondzi lexi xa Muyuda xi hundzukeke xi va Mukhatoliki, ntlawa wa vafundhisi va le Spaniya wu ale ku honisa ndhavuko wa xona. Vakaneti van’wana va sole Khadinali Cisneros leswi a tirhiseke vutshila byo hundzuluxela bya Xiyuda loko a lunghiselela Bibele yakwe ya Tindzimi to Tala. Minhlaselo yoleyo yi endle leswaku Zamora a nga dyi byi rhelela. Eka tsalwa ra voko leri nga kumekaka eYunivhesiti ya Madrid, Zamora u te: “Ndzi, . . . fularheriwe hi vanghana va mina hinkwavo va tlhela va ndzi venga—lava veke valala va mina—kutani a ndzi nge yi kumi ndhawu yo wisisa moya wa mina kumbe milenge ya mina.”

 Un’wana wa valala vakwe lavakulu a ku ri Juan Tavera, bixopo-nkulu wa Toledo, loyi hi ku famba ka nkarhi a veke mukonanisi-nkulu. Zamora u karhatiwe swinene hi minhlaselo ya Tavera lerova a kala a ya endla xikombelo eka mupapa. Xiphemu xin’wana xa papila rakwe a xi hlayekisa xileswi: “Hi kombela leswaku Vakwetsimi va N’wina va hi pfuna . . . ni ku hi sirhelela eka nala wa hina bixopo wa Toledo, ku nga Don Juan Tavera. Siku ni siku, handle ko hela matimba, u hi vangela maxangu yo tala lama nga tsakisiki. . . . Hakunene hi tikuma hi vaviseke swinene, tanihi leswi hi nga swifuwo leswi faneriwaka hi ku dlayiwa ematihlweni yakwe. . . . Loko Vakwetsimi va N’wina va yingisa xikombelo lexi, lexi kongomisiweke eka n’wina, ‘Yahweh u ta mi sirhelela naswona u ta endla leswaku milenge ya n’wina yi nga khugunyi hi nchumu.’ (Swivuriso 3:23)” *

Ndzhaka Ya Alfonso de Zamora

Ku nga khathariseki minhlaselo yoleyo, ntirho wa Zamora wu ye emahlweni wu tlhela wu va lowu humelelaka leswaku swichudeni swo tala swa Bibele swi vuyeriwa. Hambileswi a nga si tshamaka a hundzuluxela Matsalwa ma ya eka tindzimi ta xintu ta le sikwini rakwe, u endlele vahundzuluxeri van’wana ntirho wa nkoka. Leswaku hi twisisa swilo leswi a hoxeke xandla eka swona, hi fanele hi tsundzuka leswaku minkarhi hinkwayo vuhundzuluxeri bya Bibele byi titshege hi swidyondzi swa mixaka yimbirhi. Xo sungula, ku fanele ku va ni swidyondzi leswi hlayaka tikopi ta tsalwa ro kwetsima hi tindzimi to sungula—Xiheveru, Xiaramu ni Xigriki—leswaku ku humesiwa tsalwa leri hlutekeke ni leri pakanisaka hi tindzimi teto. Kutani muhundzuluxeri a nga tirhisa ntirho lowu tanihi masungulo ya vuhundzuluxeri byakwe lebyi yisiweke eka ririmi ra xintu.

Alfonso de Zamora a a ri xidyondzi-nkulu lexi lunghiseleleke ni ku hluta tsalwa ra Xiheveru leri eku heteleleni ri kandziyisiweke hi Tindzimi to Tala ta le Complutum hi 1522. (Leswi a tiva Xiheveru lexi a xi hundzuluxeleke xi ya eka Xilatini leswi vonakeke eka ntirho lowu fanaka swi tlhele swi hlohlotela matshalatshala ya vahundzuluxeri.) Erasmus, loyi a nga Zamora wa manguva lawa, u endle ntirho lowu fanaka eka Matsalwa ya Vukreste ya Xigriki, lawa hi ntolovelo ma vitaniwaka Testamente Leyintshwa. Loko se matsalwa wolawo lama hlutekeke ya Xiheveru ni ya Xigriki ma ri kona, vahundzuluxeri van’wana va sungule ntirho wa nkoka wo endla leswaku Bibele yi va hi tindzimi ta vanhu. Loko William Tyndale a hundzuluxela Bibele hi Xinghezi, a a ri un’wana wa vahundzuluxeri vo sungula lava endleke leswaku tsalwa ra Xiheveru ri tsariwa hi Tindzimi to Tala ta le Complutum.

Ku hangalasiwa ka Bibele namuntlha swi endla leswaku swi fanela ku ndhundhuzela mintirho ya vavanuna vo fana na Zamora, lava nyiketeleke vutomi bya vona leswaku va antswisa vutivi bya hina bya Matsalwa. Hilaha Zamora a swi xiyeke hakona, ku pona ku titshege hi ku twisisa ka vanhu Rito ra Xikwembu ni ku ri landzela. (Yohane 17:3) Hilaha ku fanaka, sweswo swi lava vuhundzuluxeri bya Bibele hi tindzimi leti vanhu va nga ta ti twisisa, hikuva hi yona ntsena ndlela leyi rungula ra yona ri nga ta khumba timbilu ni mianakanyo ya vanhu va timiliyoni.

[Tinhlamuselo ta le hansi]

^ par. 4 Leswaku u kuma nhlamuselo ya ntikelo wa Bibele Ya Tindzimi To Tala Ya Le Complutum, vona nkandziyiso wa Xihondzo xo Rindza xa April 15, 2004, matluka 28-31.

^ par. 15 Swa tsakisa leswi Zamora a tirhiseke vito ra Xikwembu, ku nga ri xithopo, eka xikombelo xakwe lexi yaka eka mupapa wa le Rhoma. Eka vuhundzuluxeri bya Xipaniya bya xikombelo xa Zamora, ku tsariwe vito leri nge “Yahweh.” A hi tiyiseki leswaku a ri tsariwe njhani eka Xilatini xo sungula. Malunghana ni vuhundzuluxeri bya Zamora ni ku tirhisiwa ka vito ra Xikwembu, vona bokisi leri nge “Ku Hundzuluxela Vito Ra Xikwembu” eka tluka 19.

 [Bokisi/Swifaniso leswi nga eka tluka 19]

Ku Hundzuluxela Vito Ra Xikwembu

Swa tsakisa ku vona ndlela leyi Alfonso de Zamora, wanuna loyi a dyondzeke ndhavuko wa Vaheveru, a hundzuluxeleke vito ra Xikwembu ha yona. Hilaha u swi vonaka hakona exifanisweni lexi, matsalwa ya le tlhelo eka vuhundzuluxeri byakwe bya rito hi rito bya Xiheveru ni Xilatini bya Genesa byi ni vito ra Xikwembu leri tsariweke ri ku “yehovha.”

Entiyisweni, Zamora u amukele ku hundzuluxela hi ku landza mpfumawulo wa vito ra Xikwembu hi Xilatini. Hi lembe-xidzana ra vu-16, loko Bibele yi hundzuluxeriwa hi tindzimi-nkulu ta le Yuropa, mpeleto lowu kumbe lowu fanaka na wona wu amukeriwe hi vahundzuluxeri vo tala va Bibele, lava katsaka William Tyndale (Xinghezi, 1530), Sebastian Münster (Xilatini, 1534), Pierre-Robert Olivétan (Xifurwa, 1535) na Casiodoro de Reina (Xipaniya, 1569).

Xisweswo Zamora u ve un’wana wa swidyondzi swo tala swa Bibele swa lembe-xidzana ra vu-16 leswi pfuneke vanhu ku tiva vito ra Xikwembu. Ku honisiwa ka vito ra Xikwembu swi humelele ro sungula hikwalaho ka vukholwa-hava lebyi a byi nga pfumeli leswaku vito ra Xikwembu ri vuriwa. Ehansi ka nkucetelo wa ndhavuko wa Vayuda, vahundzuluxeri va Vujagana va Bibele—hi xikombiso Jerome, muhundzuluxeri wa Vulgate ya Xilatini—va sive vito ra Xikwembu hi marito yo tanihi lama nge “Hosi” kumbe “Xikwembu.”

[Xifaniso]

Tetragrammaton ya Xiheveru leyi u yi vonelaka ekusuhi leyi hundzuluxeriweke vito ra “yehovha” leyi tsariweke hi Zamora

[Xifaniso lexi nga eka tluka 18]

Xileriso lexi humaka eka hosi ni hosi ya xisati ya le Spaniya, 1492

[Xihlovo Xa Kona]

Decree: Courtesy of the Archivo Histórico Provincial, Ávila, Spain

[Xifaniso lexi nga eka tluka 18]

Yunivhesiti ya Alcalá de Henares

[Xifaniso lexi nga eka tluka 21]

Xiphemu xa vuhundzuluxeri bya Zamora bya interlinear