Nghena endzeni

Hundzela eka leswi nga endzeni

Ku Hetisisa Vutihlamuleri Bya Hina Eka Xikwembu

Ku Hetisisa Vutihlamuleri Bya Hina Eka Xikwembu

 Tshinela Eka Xikwembu

Ku Hetisisa Vutihlamuleri Bya Hina Eka Xikwembu

XANA u tshame u tivutisa xivutiso lexi nge: ‘Hi xihi xikongomelo xa vutomi?’ Yehovha a nga lo hi vumba hi ri ni vuswikoti byo vutisa ntsena, kambe u tlhele a endla leswaku hi lava ku tiva nhlamulo. Lexi tsakisaka hileswaku Xikwembu xa hina xa rirhandzu a xi hi tshikanga hi ri emunyameni. Nhlamulo leyi hi yi lavaka yi kumeka eRitweni ra xona, ku nga Bibele. Xiya marito ya Hosi Solomoni lama kumekaka eka Eklesiasta 12:13.

Solomoni a a ri exiyin’weni xo hlawuleka. U yi veke erivaleni ndlela yo kuma ntsako ni xikongomelo xa vutomi. Leswi a a katekisiwe hi vutlhari lebyi nga pimanisiwiki ni bya munhu, a ri ni rifuwo ro tala naswona a ri hosi, swi n’wi oloverile ku swi lavisisa hi vukheta swilo leswi vanhu va kululaka va n’watseka leswaku va va na swona, ku katsa rifuwo ni swikhundlha. (Eklesiasta 2:4-9; 4:4) Hi ku huhuteriwa hi Xikwembu, u katsakanye leswi a swi kumeke hi ku vula a ku: “Loko hinkwaswo swi twiwile, makumu ya mhaka hi lawa: Chava Xikwembu xa ntiyiso u hlayisa swileriso swa xona. Hikuva leyi hi yona mfanelo hinkwayo ya munhu.” Marito lawa ma swi veka erivaleni leswi vanhu va faneleke va tikarhatela swona.

“Chava Xikwembu xa ntiyiso.” Eku sunguleni swi nga ha tikomba swi nga tsakisi ku chava Xikwembu. Kambe ku chava loku ku fambisana ni mbilu yo titsongahata. Hi nga ha ehleketa hi n’wana loyi a tikarhatelaka ku tsakisa tata wakwe la nga ni rirhandzu, ku nga ri hlonga leri chavaka ku hlundzukisa n’wini wa rona la nga ni tihanyi. Buku yin’wana yi vula leswaku ku chava Xikwembu i “mboyamelo wa xichavo lexi vanhu va xi kombaka xona hikwalaho ka leswi va xi rhandzaka naswona va xiximaka matimba ya xona ni vukulu bya xona.” Langutelo ro tano ri hi pfuna leswaku hi titsongahatela vulawuri bya Xikwembu hikuva ha xi rhandza naswona ha swi tiva leswaku xa hi rhandza. Ku chava koloko ku fanele ku kombisiwa hi swiendlo; ku nga ri hi marito ntsena. Njhani?

“Hlayisa swileriso swa xona.” Ku chava Xikwembu swi endla leswaku hi xi yingisa. Kutani a swi hlamarisi leswi hi faneleke hi yingisa Yehovha. Leswi a nga Muvumbi wa hina, u tiva ndlela leyinene leyi hi faneleke hi hanya ha yona, ku fana ni khampani leyi tivaka ndlela leyinene yo tirhisa swilo leswi yi swi endlaka. Ku tlula kwalaho, Yehovha u hi navelela leswinene. U lava leswaku hi tsaka naswona milawu yakwe yi endla leswaku hi sirheleleka. (Esaya 48:17) Muapostola Yohane u swi veke hi ndlela leyi: “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.” (1 Yohane 5:3) Loko hi yingisa Xikwembu hi kombisa leswaku ha xi rhandza naswona milawu ya xona yi kombisa rirhandzu leri xi nga na rona eka hina.

“Leyi hi yona mfanelo hinkwayo ya munhu.” Marito lawa ma kandziyisa nkoka wo chava Xikwembu ni ku xi yingisa. Ku endla tano i vutihlamuleri bya hina. Yehovha i Muvumbi wa hina, hi yena loyi a hi nyikeke vutomi. (Pisalema 36:9) Hikokwalaho, hi fanele hi n’wi yingisa. Loko hi hanya hi ndlela leyi a lavaka leswaku hi hanya ha yona, hi hetisisa vutihlamuleri bya hina.

Kutani hi xihi xikongomelo xa vutomi? I ku va hi hanyela ku endla ku rhandza ka Xikwembu. Leyi hi yona ntsena ndlela leyi nga ta endla leswaku vutomi bya wena byi va ni xikongomelo. Kutani ha yini u nga dyondzi swo tala hi ku rhandza ka Yehovha ni hileswi u nga swi endlaka leswaku vutomi bya wena byi pfumelelana na kona? Timbhoni ta Yehovha ti ta swi tsakela ku ku pfuna.

Tindzimana ta Bibele leti u nga ti hlayaka hi November:

Swivuriso 22-31; Eklesiasta 1-12; Risimu Ra Solomoni 1-8