Nghena endzeni

Hundzela eka leswi nga endzeni

Ha Yini Hi Hanya Hi Milawu Ya Bibele?

Ha Yini Hi Hanya Hi Milawu Ya Bibele?

 Ha Yini Hi Hanya Hi Milawu Ya Bibele?

XANA langutelo ra Bibele hi timhaka ta masangu ri hundzeriwe hi nkarhi naswona ri ni swipimelo leswi nga bohiki? Doo! Ku hambana ni sweswo, langutelo ra Bibele hi timhaka ta masangu ri nga hi pfuna ku papalata:

Mavabyi lama tlulelaka hi ku hlanganyela eka timhaka ta masangu

Ku tika hi nga tekiwanga

Vuyelo byo vava lebyi vangiwaka hi ku dlaya vukati

Ku kingindziwa hi ripfalo

Ku titwa hi ri swikangalafula

Muvumbi wa hina, Yehovha Xikwembu, * u lava leswaku hi tiphina hi ku tirhisa tinyiko takwe. Xikwembu hi “[xona lexi ku] dyondziselaka ku ku pfuna.” (Esaya 48:17) Munhu loyi a hanyaka hi swiletelo swa Bibele malunghana ni timhaka ta masangu u kuma leswi landzelaka:

U amukeriwa hi Xikwembu

U va ni ku rhula ka mianakanyo

U va ni vukati lebyi tiyeke

U va ni ndhuma leyinene

Wa tixixima

Kambe, ku vuriwa yini loko sweswi u nga hanyi hi milawu ya mahanyelo leyi nga eBibeleni? Xana swa koteka leswaku u cinca mahanyelo ya wena? Xana Xikwembu a xi nge ma rivali mahanyelo ya wena ya nkarhi lowu hundzeke?

Xiya mhaka leyi: Van’wana lava a va ri evandlheni ra Vukreste ra lembe-xidzana ro sungula a va ri timbhisa eku sunguleni, vaoswi ni vasodoma. Va hlawule ku cinca mahanyelo ya vona kutani va kuma vuyelo lebyinene. (1 Vakorinto 6:9-11) Namuntlha, vanhu va magidi emisaveni hinkwayo va endle hilaha ku fanaka. Va tshike mahanyelo ya vona ya vudlakuta naswona va kume vuyelo byo endla mahanyelo ya vona ma pfumelelana  ni milawu ya Bibele. Hi xikombiso, xiya ntokoto wa Sarah, loyi a boxiweke eku sunguleni ka xihloko lexi.

“Ndzi Hatle Ndzi Kuma Mpfuno”

Sarah u xiye leswaku mahanyelo yakwe lama nga lawulekiki a ma n’wi tiselanga ntshunxeko ni ku eneriseka loku a ku lava. U ri: “Ndzi sungule ku kingindziwa hi ripfalo. A ndzi khomiwa hi tingana ni ku vilerisiwa hileswaku ndzi nga ha tika kumbe ndzi khomiwa hi vuvabyi byo chavisa. A ndzi pfumela leswaku Xikwembu xi kona naswona a ndzi swi tiva leswaku mahanyelo ya mina ma xi vavisa. A ndzi titwa ndzi nga basanga naswona sweswo a swi nga ndzi dyisi byi rhelela.”

Eku heteleleni, Sarah u kume matimba yo cinca mahanyelo yakwe. U kombele mpfuno eka vatswari vakwe, lava nga Timbhoni ta Yehovha. U tlhele a kombela mpfuno eka vakulu lava fanelekaka lava nga Vakreste evandlheni ra ka vona. Sarah u ri: “Ndzi hlamarisiwe hi musa ni rirhandzu ra vatswari va mina ni vakulu va le vandlheni. Ndzi hatle ndzi kuma mpfuno.”

Sweswi Sarah u tikurisela vana vakwe vambirhi. Sarah u ri: “Ndzi phofulela vana va mina leswi ndzi swi endleke. Ndzi lava va twisisa ndlela leyi ku honisa milawu ya Xikwembu swi ndzi khumbeke ha yona. Xikongomelo xa mina i ku va pfuna va tlangela vuyelo lebyi munhu a vaka na byona emirini, emianakanyweni ni le mintlhavekweni loko a hanya hi milawu ya Xikwembu malunghana ni timhaka ta masangu. Ndza tiyiseka leswaku Xikwembu xi hi nyika milawu ya mahanyelo hikuva a xi lavi ku hi vona hi vaviseka.”

Na wena u nga vona vuyelo byo landzela nkongomiso wa rirhandzu wa Xikwembu. Bibele yi tshembisa leswi: “Swileriso leswi humaka eka Yehovha swi lulamile, swi tsakisa mbilu; xileriso xa Yehovha xi basile, xi hatimisa mahlo. . . . Ku swi hlayisa swi ni hakelo leyikulu.”—Pisalema 19:8, 11. *

[Tinhlamuselo ta le hansi]

^ par. 8 Yehovha i vito ra Xikwembu hilaha ri hlavuteriweke hakona eBibeleni.

^ par. 20 Leswaku u dyondza swo tala malunghana ni ndzayo leyi pfunaka ya Bibele, titwe u ntshunxekile ku ti hlanganisa ni Timbhoni ta Yehovha ta le ndhawini ya ka n’wina. Kumbe u nga ha tsalela eka adirese leyi faneleke eka leti xaxametiweke eka tluka 4 kumbe u endzela Web site ya hina ya www.watchtower.org.

[Marito lama tshahiweke exihlokweni lama nga eka tluka 8]

Lava honisaka milawu ya Bibele hakanyingi va vaviseka emintlhavekweni

[Marito lama tshahiweke exihlokweni lama nga eka tluka 9]

Lava hanyaka hi milawu ya Bibele va ni ripfalo leri baseke naswona va tiphina hi ku va ni mindyangu leyi tiyeke