Nghena endzeni

Hundzela eka leswi nga endzeni

Xana Vutomi Byi Ni Xikongomelo?

Xana Vutomi Byi Ni Xikongomelo?

 Xana Vutomi Byi Ni Xikongomelo?

“XANA vutomi byi ni xikongomelo?” Vanhu vo tala va tivutisa xivutiso xexo. Lexi twisaka ku vava hileswaku ku nga khathariseki ndlela leyi va byi langutaka ha yona vutomi, vo tala a va swi koti ku balekela leswi vuriweke hi Viktor E. Frankl, mutivi wa misiha wa le Austria loyi a vuleke leswaku “a va na xikongomelo” evuton’wini bya vona.

Ha yini vanhu vo tala va titwa hi ndlela yoleyo? Hikuva vanhu va timiliyoni emisaveni hinkwayo va hanya evuswetini lebyikulu, eka swiyimo leswi hlomulaka mbilu. Siku ni siku va langutana ni vusweti, mavabyi, madzolonga ni ku tshikileriwa. Entiyisweni, vutomi bya vona byi “taleriwe hi ku karhateka,” hilaha Yobo wa le minkarhini ya khale a vuleke hakona malunghana ni ku xaniseka ka vanhu. (Yobo 14:1) Xikongomelo xa vona lexikulu i ku va va kota ku tiyiselela swa siku rolero kutani va rindzela swa siku leri landzelaka.

Vanhu van’wana va timiliyoni va tsakisiwa hi ku va ni mali yo tala ni nsirhelelo. Va vonaka va ri ni swilo hinkwaswo swa nkoka leswi nga ta endla leswaku va kuma ku eneriseka ka xiviri evuton’wini. Kambe vanhu vo tala va koka exilogweni. Ha yini? Hikuva nkarhi na nkarhi, “ku karhateka ni swilo swo biha”—swihinga swa timali kumbe timhangu leti hlomulaka mbilu, to fana ni rifu ra n’wana—swi onha ntshembo wa vona wo fuwa swin’we ni milorho ya vona.—Pisalema 90:10.

Ku ni nchumu wun’wana lowu endlaka leswaku vanhu va titwa va “nga ri na xikongomelo.” I yini nchumu wolowo? I ku koma ka vutomi. Eka vanhu vo tala a swi twali ku va munhu, loyi a nga ni vutshila byo endla swilo swo tala, a hanya nkarhi wo koma. A va ku twisisi ku nononh’wa loku hinkwerhu hi langutanaka na kona: Hambiloko hi nga weriwi hi makhombo yo chavisa evuton’wini bya hina, rifu ra hi kanganyisa eka swilo hinkwaswo.—Eklesiasta 3:19, 20.

Xana Minkarhi Hinkwayo Vutomi Byi Ta Tshama Byi Nga Ri Na Xikongomelo?

Hosi Solomoni wa le Israyele wa khale u xi katsakanye kahle xiyimo lexi. U vone ndlela leyi vanhu a va tirha hi matimba ha yona enkarhini wakwe va tirhisa titalenta ta vona ni vuswikoti bya vona va byala, va hlakula, va aka ni ku khathalela mindyangu ya vona, hilaha hi endlaka hakona namuntlha. Entiyisweni u vutise a ku, ‘Hi wahi  makumu ya swona hinkwaswo?’ U gimete hi ku vula leswaku hinkwaswo leswi vanhu va swi endlaka i “vuhava ni ku hlongorisa mheho.”—Eklesiasta 2:17.

Xana Hosi Solomoni a a tshemba leswaku hinkwaswo leswi vanhu va swi endlaka minkarhi hinkwayo swi ta va “vuhava ni ku hlongorisa mheho”? Doo! A a hlamusela hi langutelo lerinene ra leswi humelelaka evuton’wini. Hambiswiritano, Rito ra Xikwembu leri huhuteriweke ri nga ku nyika ntshembo wa leswaku swilo a swi nge tshami swi ri hi ndlela leyi!

Xana u nga wu kuma kwihi ntshembo wolowo? Hi kombela u hlaya swihloko swimbirhi leswi landzelaka. Swi ta ku pfuna u twisisa leswaku ha yini vutomi byi vonaka onge a byi na xikongomelo, ndlela leyi xiyimo lexi xi nga ta lulamisiwa ha yona ni ndlela leyi u nga endlaka ha yona leswaku vutomi bya wena byi va ni xikongomelo hambi ku ri sweswi.