Nghena endzeni

Hundzela eka leswi nga endzeni

Vuprofeta Bya Nkoka Swinene

Vuprofeta Bya Nkoka Swinene

 Vuprofeta Bya Nkoka Swinene

“Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—MATEWU 24:14.

SWIDYONDZI swa pfumela leswaku ndzimana leyi i ya nkoka swinene. I ya nkoka hikuva yi vulavula hi ntirho lowu faneleke wu endliwa emisaveni hinkwayo. Xin’wana lexi endlaka leswaku yi va ya nkoka hileswi yi vulavulaka hi ntirho lowu Vakreste va faneleke va wu endla, ku nga ntirho wo chumayela lowu faneleke wu rhangisiwa naswona wu hangalasiwa kukondza ku fika nkarhi lowu Yesu a wu vuleke “makumu.”

Ndzimana yoleyo ya vuprofeta yi karhi ya hetiseka namuntlha. Ni le ka wena i ya nkoka hikuva mahungu lamanene ma tamele xirhambo ni xilemukiso. Yi ku nyika tindlela timbirhi leti u faneleke u hlawula eka tona: U nga amukela Mfumo wa Xikwembu kumbe u nga wu amukeli. Leswi u swi hlawulaka swi ta khumba vutomi bya wena.

Xiya mongo wa kona. Eka masiku ma nga ri mangani Yesu a nga si beleriwa, vadyondzisiwa va ye eka yena kutani va n’wi vutisa hi vumundzuku. A va lava ku tiva leswi nga ta endleka loko Mfumo wa Xikwembu wu nga si fika, lowu Yesu a a tala ku vulavula ha wona. Nakambe a va lava ku tiva hi “makumu ya mafambiselo ya swilo” kumbe leswi Tibibele tin’wana ti swi vulaka “ku hela ka misava.”—Matewu 24:3, Bibele Ya Xitsonga.

Loko a hlamula, Yesu u profete leswaku a ku ta va ni tinyimpi letikulu, ndlala, mintungu ni ku tsekatseka lokukulu ka misava. U tlhele a vula leswaku vuhomboloki a byi ta andza, vukhongeri bya mavunwa a byi ta hambukisa vo tala naswona Vakreste va ntiyiso a va ta vengiwa ni ku xanisiwa. Leswi hinkwaswo a ku ri mahungu yo biha.—Matewu 24:4-13; Luka 21:11.

Kambe a ku ri ni mahungu lamanene. Endzhaku ka sweswo, Yesu u vule marito lama tshahiweke laha henhla, lama endleke leswaku ku hela malembe-xidzana vanhu va ri karhi va anakanyisisa hileswi va faneleke va swi endla hi vutomi bya vona ni ku va pfuna leswaku va va ni ntshembo. Vanhu va pfumela leswaku marito ya Yesu i ya nkoka kambe a va pfumelelani ni leswi ma vulaka swona. Kahle-kahle i yini mahungu lawa lamanene? I yini Mfumo? Xana vuprofeta lebyi byi ta hetiseka rini naswona i mani la nga ta byi hetisisa? I yini “makumu”? A hi kambisiseni tinhlamulo ta swivutiso leswi.

[Xifaniso lexi nga eka matluka 2, 3]

 Xifaniso xa le washington lexi nga ni tievhangeli ta mune leti tsariweke hi voko. Eka xona ku tshahiwe Matewu 24:14

[Xihlovo Xa Kona]

From the book Facsimile of the Washington Manuscript of the Four Gospels in the Freer Collection 1912