Nghena endzeni

Hundzela eka leswi nga endzeni

I Yini Mahungu Lamanene?

I Yini Mahungu Lamanene?

 I Yini Mahungu Lamanene?

“Mahungu lamanene lawa . . .”—MATEWU 24:14.

VAKRESTE va fanele va chumayela ‘mahungu lamanene ya mfumo’ hi ku byela van’wana ha wona, va hlamusela leswaku Mfumo i hulumendhe ya misava ya nkarhi lowu taka leyi nga ta fuma misava hi vululami. Kambe xiga lexi nge “mahungu lamanene” xi tlhela xi tirhisiwa hi tindlela tin’wana eBibeleni. Hi xikombiso, ku na lexi nge “mahungu lamanene ya ku ponisiwa” (Pisalema 96:2); “mahungu lamanene ya Xikwembu” (Varhoma 15:16); ni lexi nge “mahungu lamanene malunghana na Yesu Kreste.”—Marka 1:1.

Hi ku komisa, mahungu lamanene ma katsa ntiyiso hinkwawo lowu Yesu a vulavuleke ha wona ni lowu vadyondzisiwa vakwe va tsaleke ha wona. Emahlweni ko va a tlhandlukela etilweni, Yesu u byele valandzeri vakwe a ku: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Kutani ntirho wa Vakreste va ntiyiso a hi ku byela van’wana hi Mfumo ntsena; kambe va fanele va tlhela va tikarhatela ku endla vadyondzisiwa.

I yini leswi tikereke ti swi endlaka emhakeni leyi? Vanhu vo tala a va swi twisisi leswi Mfumo wu nga swona kutani a va nge swi koti ku dyondzisa van’wana ha wona. Va dyondzisa tidyondzo leti tsakisaka vanhu naswona va vulavula ngopfu hi ku rivaleriwa swidyoho ni ku va ni ripfumelo eka Yesu. Va ringeta ku antswisa vutomi bya vanhu hi ku va akela swibedlhele, swikolo ni ku akela swisiwana tindlu. I ntiyiso leswaku leswi swa pfuna swinene, kambe a swi va pfuni vanhu leswaku va va Vakreste va ntiyiso lava tikarhatelaka ku hanya hileswi Yesu a swi dyondziseke.

Mufundhisi un’wana u tsale a ku: “Swidyondzi swo tala ni varhangeri va Vakreste va pfumela leswaku hi fanele hi endla vadyondzisiwa kumbe ku dyondzisa van’wana swilo hinkwaswo leswi Yesu a swi vuleke. . . . Swiletelo swa Yesu swi le rivaleni emhakeni leyi. Kambe a hi swi endli leswi a hi byeleke swona naswona a hi ringeti. Hi hala tlhelo, a hi swi tivi leswaku hi fanele hi wu endla njhani ntirho lowu.”

Hilaha ku fanaka, nkambisiso lowu endliweke eka Makhatoliki ya le United States, wu kombisa leswaku Makhatoliki lama endlaka 95 wa tiphesente ma pfumela leswaku ku chumayela mahungu lamanene i swa nkoka eka ripfumelo ra wona. Kambe yo tala ya wona ya vona onge ndlela leyinene ngopfu yo chumayela i ku vekela van’wana xikombiso lexinene xa mahanyelo. Un’wana loyi ku vulavurisaniweke na yena u te: “Ku veka xikombiso lexinene xa mahanyelo i swa nkoka swinene ku tlula ku chumayela Mahungu Lamanene.” Magazini lowu vuriwaka U.S. Catholic lowu nkambisiso lowu nga laha henhla wu humaka eka wona, wu tlhele wu vula leswaku Makhatoliki yo tala a ma vulavuli hi ripfumelo ra wona hikwalaho ka leswi “kereke ya ha ku hehliwaka hi ku va van’wana va xanise van’wana hi timhaka ta masangu ni hikwalaho ka tidyondzo ta kereke.”

Bixopo wa kereke ya Methodist u rile hileswaku swirho swa tikereke takwe swi avanile naswona swi pfilunganyekile. Kutani a swi na xona xivindzi xo endla ntirho lowu hikwalaho ka leswi mahanyelo ya swona ma fanaka ni ya vanhu lava nga ngheniki kereke. U vutise a ri ni gome a ku: “I vamani lava faneleke va chumayela rungula ra Mfumo?”

Bixopo loyi a a nga ri na yona nhlamulo ya xivutiso lexi. Kambe yona yi kona. U ta yi kuma eka xihloko lexi landzelaka.

[Marito lama tshahiweke exihlokweni lama nga eka tluka 6]

Mahungu lamanene ma vulavula hi Mfumo wa Xikwembu ni ku ponisiwa hi ku kombisa ripfumelo eka Yesu Kreste