Nghena endzeni

Hundzela eka leswi nga endzeni

Ntlhantlho Wa Swiphiqo Leswi Tolovelekeke

Ntlhantlho Wa Swiphiqo Leswi Tolovelekeke

 Ntlhantlho Wa Swiphiqo Leswi Tolovelekeke

BIBELE a yi vuli leswaku swilo swi ta olova evukatini. Muapostola Pawulo u huhuteriwe hi Xikwembu ku vula leswaku vanhu lava tekaneke va ta “langutana ni swiphiqo siku ni siku.” (1 Vakorinto 7:28, Today’s English Version) Kambe vanhu lava ngheneleke vukati va nga swi kota ku hunguta swiphiqo leswi va langutanaka na swona kutani va tshama va tsakile. Xiya swiphiqo swa tsevu leswi tolovelekeke leswi endliwaka hi vavanuna ni vavasati, kutani u vona ndlela leyi milawu ya Bibele yi va pfuneke ha yona.

1

XIPHIQO:

“Mina ni nkatanga a ha ha ri na wona nkarhi wo dzumba swin’we.”

NAWU WA BIBELE:

“Tiyiseka hi swilo swa nkoka swinene.”VAFILIPIYA 1:10.

Vukati bya wena i swin’wana swa swilo swa nkoka swinene evuton’wini bya wena. Kutani u fanele u rhangisa byona. Kambisisa loko xiyimiso xa wena ku ri xona lexi vangaka xiphiqo lexi. U nga pfumeleli mintirho ya siku ni siku yi ku sivela ku dzumba ni nkataku. I ntiyiso leswaku ntirho wa ku tihanyisa ni swiyimo swin’wana leswi nga papalatekiki swi nga ha endla leswaku u nga heti nkarhi na yena. Kambe u nga swi kota ku hunguta nkarhi lowu u wu hetaka eka swilo leswi u kotaka ku swi lawula—swo tanihi ku titsakisa kumbe ku dzumba ni vanghana va wena.

 Hambiswiritano, vanhu van’wana lava tekaneke va tirha tiawara to tala kumbe va heta nkarhi wo leha va ri eku titsakiseni leswaku va nga heti nkarhi wo tala ni vanghana va vona va vukati. Vanhu volavo a vo titsona ntsena nkarhi wo dzumba ni vanghana va vona va vukati, kambe va balekela swiphiqo leswi va nga na swona. Loko wena ni nkataku mi endla leswi, mi fanele mi xiya xiphiqo xa n’wina kutani mi xi tlhantlha. Ku dzumba swin’we hi swona leswi nga ta mi pfuna leswaku mi “va nyama yin’we.”—Genesa 2:24.

Ndlela leyi van’wana va yi tirhiseke ha yona ndzayo leyi: Andrew * na Tanji lava tshamaka eAustralia se va ni malembe ya khume va tekanile. Andrew u ri: “Ndzi xiye leswaku ku heta nkarhi wo tala entirhweni ni ku heta nkarhi wo tala u endla mintirho leyi vuyerisaka van’wana swi ni khombo evukatini. Kutani mina ni nsati wa mina hi tinyika nkarhi wo bula swin’we ni ku byelana ndlela leyi hi titwaka ha yona.”

Dave na Jane lava tshamaka eUnited States naswona se va nga ni malembe ya 22 va tekanile, va tirhisa 30 wa timinete madyambu man’wana ni man’wana leswaku va bula hileswi va hlangavetaneke na swona siku rero loko va ha ku vuya entirhweni. Jane u ri: “Nkarhi lowu i wa nkoka eka hina lerova a hi pfumeleli nchumu leswaku xi wu kavanyeta.”

2

XIPHIQO:

“A ndzi swi voni leswi a ndzi swi languterile.”

NAWU WA BIBELE:

“Un’wana ni un’wana a a hambete a lava leswaku ku pfuneka un’wana, hayi yena n’wini.”1 VAKORINTO 10:24.

Munhu loyi a karhatekaka ngopfu hileswi a swi languteleke evukatini a nge pfuki a tsakile, hambiloko o nghenela vukati ko tala. Vukati byi famba kahle loko munghana ha un’we wa vukati a tiyimisela ku nyika ematshan’weni yo amukela. Yesu u nyikele xivangelo xa kona a ku: “Ku nyika swi tisa ntsako lowukulu ku tlula ku amukela.”—Mintirho 20:35.

Ndlela leyi van’wana va yi tirhiseke ha yona ndzayo leyi: Maria na Martin lava tshamaka eMexico, se va ni malembe ya 39 va tekanile. Kambe va vula leswaku minkarhi yin’wana a va pfa va va ni  swiphiqo. Va tsundzuka nkarhi wun’wana lowu va veke ni xiphiqo. Maria u ri: “Siku rin’wana loko hi ri karhi hi holova, ndzi byele Martin marito lama nga kombisiki xichavo naswona sweswo swi endle leswaku a hlundzuka swinene. Ndzi n’wi byele leswaku leswi ndzi swi vuleke a ndzi nga tiyimiselanga ku swi vula, kambe ndzi swi vule hileswi a ndzi hlundzukile. Kambe u swi be hi makatla.” Martin u ri: “Loko hi ri karhi hi holova, ndzi tibyele leswaku a ndzi nge he swi koti ku tshama na yena naswona a ndzi vona swi nga pfuni nchumu ku ringeta ku endla leswaku vukati bya hina byi ya emahlweni.”

Martin a a lava leswaku nsati wakwe a n’wi xixima kasi Maria a a lava leswaku nuna wakwe a n’wi twisisa. Kambe havumbirhi bya vona a va nga swi voni leswi ha un’we wa vona a a swi languterile.

Xana va swi kotise ku yini ku tlhantlha xiphiqo xa vona? Martin u ri: “Ndzi tinyike nkarhi wo verhamisa vukarhi bya mina kutani havumbirhi bya hina hi endla xiboho xo tirhisa ndzayo ya vutlhari leyi nga eBibeleni ya leswaku hi xiximana naswona hi va ni musa. Loko malembe ma ri karhi ma famba, hi swi xiyile leswaku ku nga khathariseki swiphiqo hinkwaswo leswi hi vaka na swona, hi nga swi hlula loko hi khongelela mpfuno wa Xikwembu naswona hi tirhisa ndzayo leyi nga eBibeleni.”—Esaya 48:17, 18; Vaefesa 4:31, 32.

3

XIPHIQO:

“Munghana wa mina wa vukati a nga swi endli leswi a a fanele a swi endla.”

NAWU WA BIBELE:

“Un’wana ni un’wana wa hina u ta tihlamulela eka Xikwembu.”VARHOMA 14:12.

Swi le rivaleni leswaku swilo a swi nge fambi kahle evukatini loko munghana lowun’wana wa vukati a kokela etlhelo. Kambe xiyimo xi nga nyanya loko hinkwavo va nga ri na mhaka naswona va kombana hi tintiho.

Loko u tshamela ku anakanya hileswi munghana wa wena wa vukati a faneleke a swi endla a wu nge tsaki. Leswi swi nga nyanya ku biha loko u tibyela leswaku leswi nkataku a tsandzekaka ku hetisisa vutihlamuleri byakwe, na wena u to khondla mavoko. Hi hala tlhelo, loko u tikarhatela ku va nsati lonene kumbe nuna lonene, mi ta tiphina evukatini bya n’wina. (1 Petro 3:1-3) Xa nkoka swinene, u ta va u kombisa leswaku u xixima lunghiselelo ra Xikwembu ra vukati naswona sweswo swi ta xi tsakisa swinene.—1 Petro 2:19.

Ndlela leyi van’wana va yi tirhiseke ha yona ndzayo leyi: Kim ni nuna wakwe lava tshamaka eKorea, se va ni malembe ya 38 va tekanile. Kim u ri: “Minkarhi yin’wana loko nuna wa mina a hlundzukile a nga ndzi vulavurisi naswona a ndzi swi tivi leswaku ha yini a endla tano. Leswi swi endla ndzi vona onge a nga ha ndzi rhandzi. Minkarhi yin’wana ndzi tibyela leswi, ‘Ha yini a lava leswaku mina ndzi n’wi twisisa kasi yena a nga swi lavi ku twisisa ndlela leyi ndzi titwaka ha yona?’”

A swi ta olova leswaku Kim a ehleketa ngopfu hi leswi nuna wakwe a swi endlaka. Kambe ku ri na sweswo, u endle leswi hambaneke. U ri: “Ematshan’weni ya leswaku ndzi hlundzuka, ndzi xiye leswaku i swa nkoka leswaku ku va mina loyi a rhangaka a kondletela ku rhula. Eku heteleleni, havumbirhi bya hina ha swi kota ku verhamisa ku hlundzuka ka hina kutani hi vulavurisana hi ku rhula.”—Yakobo 3:18.

 4

XIPHIQO:

“Nsati wa mina a nga titsongahati.”

NAWU WA BIBELE:

“Nhloko ya wanuna un’wana ni un’wana i Kreste.”1 VAKORINTO 11:3.

Wanuna loyi a vonaka onge nsati wakwe a nga titsongahati u fanele a rhanga a tikambisisa loko yena a tiyimiserile ku titsongahata eka Nhloko yakwe, ku nga Yesu Kreste. Wanuna a nga kombisa ku titsongahata ka yena hi ku landzela xikombiso xa Yesu.

Muapostola Pawulo u te: “Vavanuna, hambetani mi rhandza vasati va n’wina, hilaha Kreste na yena a rhandzeke vandlha hakona kutani a tinyiketa hikwalaho ka rona.” (Vaefesa 5:25) Yesu a a nga va ‘tikiseli’ vadyondzisiwa vakwe. (Marka 10:42-44) U nyike valandzeri vakwe nkongomiso lowu faneleke a tlhela a va lulamisa loko swi fanerile. A a nga va kariheli. A a ri ni musa eka vona naswona a a ku twisisa ku tsana ka vona. (Matewu 11:29, 30; Marka 6:30, 31; 14:37, 38) A a rhangisa swilaveko swa vona eka swa yena.—Matewu 20:25-28.

Wanuna u fanele a tivutisa xivutiso lexi, ‘Xana ndlela leyi ndzi byi langutaka ha yona vunhloko ni vavasati swi nga ha endleka leswaku yi kuceteriwa hi mikhuva ya le ndhawini leyi ndzi tshamaka eka yona ku ri ni ku kongomisiwa hi ndzayo ni swikombiso swa le Bibeleni?’ Hi xikombiso, xana u n’wi teka njhani wansati loyi a nga pfumelelaniki na wona mavonelo ya nuna wakwe kutani a vula mavonelo yakwe hi xichavo? EBibeleni, Sara nsati wa Abrahama i xikombiso lexinene xa wansati la titsongahataka. (1 Petro 3:1, 6) Kambe a a vula mavonelo yakwe loko swi fanerile. U swi endlile sweswo loko Abrahama a tsandzeke ku vona khombo leri a ri ta wela ndyangu wa vona.—Genesa 16:5; 21:9-12.

Swi le rivaleni leswaku Abrahama a a nga n’wi khomi hi tihanyi nsati wakwe lerova a nga swi koti ni ku tiphofula. Hilaha ku fanaka, nuna loyi a landzelaka ndzayo ya Bibele a nge n’wi sindzisi nsati wakwe leswaku a endla xin’wana ni xin’wana lexi a n’wi byelaka xona. Nsati wakwe u ta n’wi xixima loko a rhangela hi ndlela leyinene.

Ndlela leyi van’wana va yi tirhiseke ha yona ndzayo leyi: James la tshamaka eNghilandhi naswona se a nga ni malembe ya nhungu a tekile u ri: “A ndzi swi endli swiboho swa nkoka ndzi nga si vulavula ni nsati wa mina. Ndza n’wi ehleketelela naswona ndzi rhangisa swilaveko swakwe ku ri ni swa mina.”

George la tshamaka eUnited States naswona se a nga ni malembe ya 59 a tekile u ri: “Ndzi n’wi khoma kahle nsati wa mina naswona ndzi n’wi teka tanihi munhu wo tlhariha ni la nga ni vuswikoti.”—Swivuriso 31:10.

 5

XIPHIQO:

“Nuna wa mina a nga byi tirhisi kahle vunhloko byakwe.”

NAWU WA BIBELE:

“Wansati la tlhariheke hakunene, u ake yindlu yakwe, kambe loyi a nga xiphukuphuku wa yi hirimuxa hi mavoko yakwe.”SWIVURISO 14:1.

Loko nuna wa wena a hlwela ku teka swiboho kumbe a nga rhangeli hi ndlela leyinene, ku ni swilo swinharhu leswi u nga swi endlaka. (1) U nga tshamela ku n’wi byela ha swona, (2) u nga tiendla nhloko ya ndyangu kumbe (3) u n’wi bumabumela swi suka embilwini eka leswi a swi endlaka. Loko wo hlawula yin’wana ya tinhla letimbirhi to sungula, u ta hirimuxa yindlu ya wena hi mavoko ya wena. Kambe ku hlawula leyi yo hetelela swi ta ku pfuna leswaku u aka vukati bya wena naswona u byi tiyisa.

Vavanuna vo tala va lava ku xiximiwa ku ri ni ku rhandziwa. Kutani loko u endla leswaku nuna wa wena a swi vona leswaku wa n’wi xixima naswona wa ma tlangela matshalatshala yakwe yo rhangela, u ta yi antswisa ndlela leyi a rhangelaka ha yona. I ntiyiso leswaku a mi nge pfumelelani eka swilo hinkwaswo. Kambe mi fanele mi bula hileswi mi nga pfumelelaniki ha swona. (Swivuriso 18:13) Kambe marito lawa u ma tirhisaka ni ndlela leyi u vulavulaka ha yona, swi nga ha endla leswaku u hirimuxa yindlu ya wena kumbe u aka vukati bya wena. (Swivuriso 21:9; 27:15) Vula mavonelo ya wena hi ku titsongahata naswona leswi swi ta ku pfuna leswaku u kuma leswi u swi lavaka—u ta va ni nuna la rhangelaka hi ndlela leyinene.

Ndlela leyi van’wana va yi tirhiseke ha yona ndzayo leyi: Michele la tshamaka eUnited States naswona se a nga ni malembe ya 30 a tekiwile u ri: “Leswi manana a kuriseke mina ni sesi wa mina a ri swakwe, a a ri ni ntshunxeko wo tala. Na mina a ndzi tekelela yena. Kutani nkarhi na nkarhi a ndzi boheka ku dyondza ku titsongahata. Hi xikombiso, ndzi dyondze ku rhanga ndzi vulavurisana ni nuna wa mina loko ndzi nga si endla swiboho.”

Rachel la tshamaka eAustralia naswona se a nga ni malembe ya 21 a tekane na Mark, na yena ndlela leyi a kurisiweke ha yona yi ve xiphiqo loko se a tekiwile. U ri: “Manana a a nga titsongahati eka tatana. Timholovo a ku ri tshamelo-maxelo naswona manana a a nga n’wi xiximi tatana. Loko ndza ha ku tekiwa, na mina a ndzi tekelela yena. Kambe loko malembe ma ri karhi ma famba, ndzi dyondze nkoka wo tirhisa ndzayo ya le Bibeleni yo kombisa xichavo. Sweswi mina na Mark ha tiphina evukatini bya hina.”

6

XIPHIQO:

“A ndza ha swi koti ku tiyiselela ndlela leyi nkatanga a ndzi karhataka ha yona.”

NAWU WA BIBELE:

“Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana.”VAKOLOSA 3:13.

Loko mi nga si tekana, swi nga ha endleka leswaku a wu vona timfanelo letinene ntsena eka nkataku lerova u nga swi voni swihoxo swakwe.  Xana u nga endla tano ni sweswi? I ntiyiso leswaku swi nga ha va swi tele swilo leswi ku endlaka u hlundzuka. Kambe tivutise, ‘Xana hi tihi timfanelo ta nkatanga leti ndzi faneleke ndzi dzika ngopfu eka tona, hi letinene kumbe to biha?’

Yesu u tirhise xifaniso lexi kombisaka nkoka wo honisa swihoxo leswi hi swi vonaka eka van’wana. U vutise a ku: “Ha yini u languta xilavi lexi nga etihlweni ra makwenu, kambe u nga lemuki ntsandza lowu nga etihlweni ra wena?” (Matewu 7:3) Xilavi ku nga ha va byanyi lebyi nga nyawuriki. Kasi ntsandza ku nga ha va ku ri mhandzi yo leha leyi tirhisiwaka ku fulela yindlu. Yinhla yakwe a ku ri yihi emhakeni leyi? “Sungula u susa ntsandza etihlweni ra wena n’wini, kutani u ta yi vona kahle ndlela yo susa xilavi etihlweni ra makwenu.”—Matewu 7:5.

Loko Yesu a nga si vulavula hi xikombiso lexi, u rhange hi ku nyikela xitsundzuxo lexi nga biki mariri a ku: “Tshikani ku avanyisa leswaku mi nga avanyisiwi; hikuva ku avanyisa loku mi avanyisaka ha kona, mi ta avanyisiwa ha kona.” (Matewu 7:1, 2) Loko u lava leswaku Xikwembu xi nga swi languti swihoxo swa wena—ntsandza lowu nga etihlweni ra wena—swi ta va swinene leswaku na wena u honisa swihoxo swa nkataku.—Matewu 6:14, 15.

Ndlela leyi van’wana va yi tirhiseke ha yona ndzayo leyi: Jenny la tshamaka eNghilandhi naswona se a nga ni malembe ya kaye a tekane na Simon u ri: “Lexi ndzi hlundzukisaka ngopfu hi nuna wa mina hileswi a tsandzekaka ku endla swilo ka ha ri ni nkarhi. Leswi swa ndzi hlamarisa hikuva loko hi nga si tekana, a a endla swilo hi nkarhi. Hambiswiritano, ndza swi xiya leswaku na mina ndzi ni swihoxo hikuva ndzi lawula ngopfu. Mina na Simon hi karhi hi dyondza ku honisa swihoxo swa hina leswi nga nyawuriki.”

Curt la tekaneke na Michele loyi a boxiweke eku sunguleni u ri: “Loko u dzikisa mianakanyo ya wena eka swihoxo leswi endliwaka hi nkataku, u ta tshama u ri karhi u swi vona. Mina ndzi dzikisa mianakanyo ya mina eka timfanelo leti endleke leswaku ndzi n’wi rhandza.”

Lexi Nga Mi Pfunaka Leswaku Swi Mi Fambela Kahle

Swikombiso leswi swi nga ri swingani swi kombisa leswaku swiphiqo swi ta va kona evukatini, kambe swi nga tlhantlheka. I yini lexi nga mi pfunaka leswaku swi mi fambela kahle? Rhandza Xikwembu kutani u tiyimisela ku tirhisa ndzayo leyi nga eRitweni ra xona, ku nga Bibele.

Alex na Itohan lava tshamaka eNigeria naswona se va nga ni malembe ya 20 va tekanile va swi kotile ku endla leswaku swilo swi va fambela kahle. Alex u ri: “Ndzi xiye leswaku swiphiqo swo tala leswi nga kona evukatini swi nga tlhantlhiwa ntsena loko vatekani va tirhisa milawu ya Bibele.” Nsati wakwe u ri: “Hi xiye leswaku i swa nkoka ku khongela swin’we nkarhi na nkarhi ni ku tirhisa ndzayo leyi nga eBibeleni yo va hi rhandzana swi suka embilwini naswona hi lehiselana mbilu. Sweswi a ha ha ri na swiphiqo swo tala ku fana niloko ha ha ku tekana.”

Xana u nga swi tsakela ku dyondza swo tala malunghana ni ndlela leyi ndzayo leyi nga eRitweni ra Xikwembu yi nga wu pfunaka ha yona ndyangu wa wena? Loko swi ri tano, kombela Timbhoni ta Yehovha leswaku ti ta bula na wena hi ndzima 14 ya buku leyi nge Xana Bibele Yi Dyondzisa Yini Hakunene? *

[Tinhlamuselo ta le hansi]

^ par. 10 Mavito man’wana ma cinciwile.

^ par. 63 Yi kandziyisiwe hi Timbhoni ta Yehovha.

[Xifaniso lexi nga eka tluka 4]

Xana ha tinyika nkarhi wo dzumba swin’we?

[Xifaniso lexi nga eka tluka 5]

Xana ndzi tiyimisele ku nyika ku ri ni ku amukela?

[Xifaniso lexi nga eka tluka 6]

Xana ndzi va wo rhanga ku lulamisa timholovo?

[Xifaniso lexi nga eka tluka 7]

Xana ndzi rhanga hi ku vulavurisana ni nsati wa mina loko ndzi nga si endla xiboho?

[Xifaniso lexi nga eka tluka 9]

Xana ndzi languta timfanelo letinene eka nkatanga?