Nghena endzeni

Hundzela eka leswi nga endzeni

Ha Yini Hi Fanele Hi Dyondza Eka Xikwembu?

Ha Yini Hi Fanele Hi Dyondza Eka Xikwembu?

 Dyondza Eka Rito Ra Xikwembu

Ha Yini Hi Fanele Hi Dyondza Eka Xikwembu?

Xihloko lexi xi ni swivutiso leswi u nga ha vaka u tivutisa swona naswona xi ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku ku komba tinhlamulo ta kona.

1. Ha yini hi fanele hi dyondza eka Xikwembu?

Xikwembu xi khomele vanhu mahungu lamanene. Xi va byela wona hi ku tirhisa Bibele. Bibele yi fana ni papila leri hi tsaleriweke rona hi Tata wa hina wa rirhandzu wa le tilweni.—Hlaya Yeremiya 29:11.

2. I yini mahungu lamanene?

Vanhu va lava hulumendhe yo lulama. A ku na mufumi la tshameke a kutsula vanhu eka madzolonga, vuhomboloki, vuvabyi ni rifu. Kambe mahungu lamanene hileswaku Xikwembu xi ta nyika vanhu hulumendhe yo lulama, leyi nga ta herisa swilo hinkwaswo leswi cinisaka vanhu gija.—Hlaya Daniyele 2:44.

3. Ha yini swi ri swa nkoka ku dyondza eka Xikwembu?

Ku nga ri khale, Xikwembu xi ta herisa vanhu lava vangaka ku xaniseka. Loko xi nga si endla tano, xa ha rhanga xi dyondzisa vanhu va timbilu letinene lava endlaka timiliyoni leswaku va tiphina hi vutomi naswona va rhandzana. ERitweni ra xona, vanhu va dyondza ndlela yo langutana ni swiphiqo swa vutomi, ndlela yo kuma ntsako wa xiviri swin’we ni ndlela yo tsakisa Xikwembu.—Hlaya Sofaniya 2:3.

  4. I mani Mutsari wa Bibele?

Bibele yi endliwe hi 66 wa tibuku letitsongo. Yi tsariwe hi vavanuna va 40. Tibuku to sungula ta ntlhanu ti tsariwe hi Muxe kwalomu ka malembe ya 3 500 lama hundzeke. Yo hetelela yi tsariwe hi muapostola Yohane kwalomu ka malembe ya 1 900 lama hundzeke. Kambe vatsari va Bibele va tsale mianakanyo ya Xikwembu ku nga ri ya vona vini. Kutani Xikwembu hi xona Mutsari wa Bibele.—Hlaya 2 Timotiya 3:16; 2 Petro 1:21.

Ha swi tiva leswaku Bibele yi huma eka Xikwembu hikuva yi nyikela vuxokoxoko bya ndlela leyi vumundzuku byi nga ta va byi ri xiswona. A ku na munhu la nga endlaka sweswo. (Esaya 46:9, 10) Bibele yi tlhela yi hi paluxela timfanelo ta Xikwembu. Yi ni matimba yo hundzula vutomi bya vanhu. Leswi swi endle leswaku vanhu va timiliyoni va tshemba leswaku Bibele i Rito ra Xikwembu.—Hlaya Yoxuwa 23:14; 1 Vatesalonika 2:13.

5. U nga yi twisisa njhani Bibele?

Yesu a a dume hi ku va mudyondzisi wa Rito ra Xikwembu. Hambileswi vanhu vo tala lava a a vulavula na vona a va yi toloverile Bibele, a va lava mpfuno leswaku va yi twisisa. Leswaku a va pfuna, Yesu u pfule tindzimana to hlayanyana ta Bibele kutani a nyikela “nhlamuselo ya Matsalwa.” Xihloko lexi, lexi nge “Dyondza Eka Rito Ra Xikwembu,” xi ta tirhisa endlelo leri fanaka leswaku xi ku pfuna.—Hlaya Luka 24:27, 45.

Swin’wana swa swilo leswi tsakisaka i ku dyondza hi Xikwembu ni hi xikongomelo xa vutomi. Kambe swi nga ha endleka leswaku vanhu van’wana swi nga va tsakisi ku ku vona u hlaya Bibele. U nga heli matimba. Ntshembo wa wena wa vutomi lebyi nga heriki wu titshege hi ku va u tiva Xikwembu.—Hlaya Matewu 5:10-12; Yohane 17:3.

Leswaku u kuma rungula leri engetelekeke, vona ndzima 2 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.