Nghena endzeni

Hundzela eka leswi nga endzeni

 Dyondzisa Vana Va Wena

Mfumo Lowu Nga Ta Cinca Misava Hinkwayo

Mfumo Lowu Nga Ta Cinca Misava Hinkwayo

XANA wa swi tiva leswaku hi vulavula hi Mfumo wihi?— * Hi lowu Yesu a hi dyondziseke leswaku hi wu khongelela. U hi dyondzise leswaku hi kombela Xikwembu hi ku: “Mfumo wa wena a wu te.” (Matewu 6:9, 10) Se ku hundze malembe ya kwalomu ka 2 000, valandzeri va Yesu va ri karhi va khongelela leswaku Mfumo wa xona wu ta. Xana u tshame u wu khongelela?—

Leswaku u twisisa leswaku mfumo i yini, u fanele u rhanga u tiva leswaku hosi i yini. Hosi i munhu la fumaka. Tiko leri yi ri fumaka ri le hansi ka yona. Mfumo wa Xikwembu wu ta fuma misava hinkwayo. Loko Mfumo wa xona wu ta, vanhu hinkwavo va ta tiphina hi mikateko leyi mfumo wolowo wu nga ta yi tisa.

Mfumo wa Xikwembu i hulumendhe ya le tilweni. Esaya 9:6 yi boxa Mufumi wa hulumendhe yoleyo. Twana leswi yi swi vulaka: “Hi velekeriwe n’wana, . . . naswona ku fuma ka vuhosana ku ta va ekatleni ra yena. Kutani vito ra yena u ta thyiwa . . . Hosana ya Ku Rhula.”

Xana wa swi tiva leswaku hosana i yini?— Ina, i n’wana wa hosi. Xana i mani Hosi leyi tlakukeke ya le tilweni?— U tiyisile loko u ku i Yehovha. Bibele yi n’wi vitana “La nge Henhla-henhla emisaveni hinkwayo.” (Pisalema 83:18) Minkarhi yo tala, eBibeleni Yesu u vitaniwa “N’wana wa Xikwembu.” Xivangelo xin’wana hileswi Yehovha a n’wi nyikeke vutomi. Yehovha i Tata wa Yesu wa xiviri.—Luka 1:34, 35; Yohane 1:34, 49; 3:17; 11:27; 20:31; Mintirho 9:20.

Mfumo wa Xikwembu lowu Yesu a hi dyondziseke leswaku hi wu khongelela i hulumendhe yo hlawuleka. U ‘fuma tanihi hosana’ hikuva Yehovha u n’wi endle Mufumi kumbe Hosi ya Mfumo wolowo. Xana wa swi tiva leswaku ku na van’wana lava hlawuriweke leswaku va va tihosi na Yesu eMfun’weni wa Tata wakwe?— A hi bule ha vona.

Loko Yesu a nga si fa, u byele vaapostola vakwe vo tshembeka leswaku u ya “endlwini” ya Tata wakwe etilweni. U te: “Ndzi ya mi lunghisela ndhawu, . . . leswaku laha ndzi nga kona na n’wina mi va kona.” (Yohane 14:1-3) Xana wa swi tiva leswi vaapostola ni van’wana lava hlawuriweke va nga ta swi endla etilweni na Yesu?— Va “ta va tihosi swin’we na  yena.” Bibele yi tlhela yi hi byela nhlayo ya vona. Va ta va 144 000.—Nhlavutelo 14:1, 3; 20:6.

Xana u ehleketa leswaku ku ta va ku ri njhani laha misaveni loko Hosana ya Ku Rhula ni lava 144 000 se va fuma?— Ku ta tsakisa! A ku nge he vi na nyimpi. Swiharhi swi ta va ni vun’we swi tlhela swi hanyisana ni vanhu. Vuvabyi ni rifu a swi nge he vi kona. Lava nga voniki va ta vona, lava nga twiki va ta twa, xilema xi ta tsutsuma xi tlhela xi tlula ku fana ni mhunti. Misava yi ta va ni ndzalo ya swakudya. Vanhu hinkwavo va ta rhandzana hilaha Yesu a dyondziseke valandzeri vakwe hakona. (Yohane 13:34, 35) A hi pfule tindzimana leti xaxametiweke laha hansi leti kumekaka ebukwini ya Esaya kutani hi hlaya hi swilo swo tsakisa leswi nga ta endleka.—Esaya 2:4; 11:6-11; 25:8; 33:24; 35:5, 6; 65:21-24.

Hi mpfhuka Yesu a dyondzisa vanhu leswaku va khongela va ku, “Mfumo wa wena a wu te,” vanhu va timiliyoni se va dyondzile hi Mfumo wolowo. Vutivi byebyo byi cince vutomi bya vona. Leswi Mfumo wolowo wu nga ta fika ku nga ri khale, wu ta siva tihulumendhe hinkwato leti nga kona laha misaveni, vanhu hinkwavo lava tirhelaka Yehovha Xikwembu swin’we ni Mufumi wakwe la n’wi hlawuleke, ku nga Yesu Kreste, va ta tiphina hi ku rhula, rihanyo leri hetisekeke ni ntsako.—Yohane 17:3.

^ par. 3 Loko u hlayela n’wana, mfungho lowu wu endleriwe ku ku tsundzuxa leswaku u yima, kutani u rindzela leswaku a hlamula xivutiso xa kona.