Nghena endzeni

Hundzela eka leswi nga endzeni

Ndlela Yo Lwisana Ni Ku Titwa U Nga Pfuni Nchumu

Ndlela Yo Lwisana Ni Ku Titwa U Nga Pfuni Nchumu

 Ndlela Yo Lwisana Ni Ku Titwa U Nga Pfuni Nchumu

XANA minkarhi yin’wana u titwa u nga pfuni nchumu? A swo endleka eka wena ntsena. Namuntlha vanhu va karhatiwa hi xiyimo xa ikhonomi, madzolonga lama yaka emahlweni ni vuhomboloki. A swi hlamarisi leswi vanhu vo tala va nga ni gome, va tshamelaka ku tisola naswona va titwaka va ri swikangalafula.

Ku titwa hi ndlela yoleyo swi ni khombo. Swi nga endla leswaku hi nga ha titshembi, hi nga ha ehleketi hi ndlela leyi faneleke naswona hi nga ha tsaki. Bibele yi ri: “Xana u tikombise u hele matimba hi siku ra maxangu? Matimba ya wena ma ta va matsongo.” (Swivuriso 24:10) Hi lava matimba leswaku hi ta tshama hi tsakile emisaveni leyi, leyi nga ni maxangu. Kutani i swa nkoka leswaku hi ringanisela emhakeni leyi. *

Bibele yi ni swiringanyeto leswi pfunaka swinene malunghana ni ku titwa u ri xikangalafula. Yehovha Xikwembu, la nga Muvumbi ni Munyiki wa vutomi, a nga lavi leswaku u tshama u ri ni gome naswona u nga ri na ntshembo wa leswaku swiyimo swa wena swi ta cinca. (Pisalema 36:9) A hi kambisiseni tindlela tinharhu leti Rito rakwe ri nga hi pfunaka ha tona leswaku hi hlula ku titwa hi nga pfuni nchumu.

Xiya Ndlela Leyi Xikwembu Xi Ku Rhandzaka Ha Yona

Vanhu van’wana va ehleketa leswaku Xikwembu xi khomeke ngopfu lerova a xi nge swi koti ku xiya ndlela leyi va titwaka ha yona. Xana na wena u titwa hi ndlela yoleyo? Entiyisweni, Bibele yi hi tiyisekisa leswaku Muvumbi wa hina wa khathala hi ndlela leyi hi titwaka ha yona. Mupisalema u te: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” (Pisalema 34:18) Hakunene swa chavelela ku tiva leswaku Lowa Matimba Hinkwawo u le kusuhi na hina loko hi ri ni gome!

Xikwembu xi ni xinghana. Bibele yi vula leswaku “Xikwembu i rirhandzu.” (1 Yohane 4:8) Xi rhandza vanhu naswona xi hatla xi va vona lava xanisekaka. Hi xikombiso, loko Vaisrayele va ri evuhlongeni aEgipta emalembeni ya kwalomu ka 3 500 lama hundzeke, xi te: “Entiyisweni ndzi vone ku xaniseka ka vanhu va mina lava nga aEgipta, naswona ndzi twe xirilo xa vona hikwalaho ka lava va va sindzisaka ku tirha; hikuva ndza ku tiva swinene ku vava loku va ku twaka. Kutani ndza rhelela ndzi ya va kutsula.”—Eksoda 3:7, 8.

Yehovha wa yi twisisa ndlela leyi hi titwaka ha yona. Phela “hi yena la hi endleke, a hi tiendlanga.” (Pisalema 100:3) Kutani hambiloko hi vona onge vagandzeri-kulorhi a va hi twisisi, hi nga tiyiseka leswaku Xikwembu xa hi twisisa. Rito ra xona ri ri: “Xikwembu a xi voni hi ndlela leyi munhu a vonaka ha yona, hikuva munhu u vona ntsena leswi vonakaka ematihlweni; kambe loko ku ri Yehovha, u vona leswi mbilu yi nga swona.” (1 Samuwele 16:7) Xikwembu xa yi tiva ndlela leyi hi titwaka ha yona.

Hi hala tlhelo, Yehovha wa swi xiya swihoxo swa hina. Ha tsaka ku tiva leswaku Muvumbi wa hina wa rivalela. Davhida mutsari wa Bibele la huhuteriweke u te: “Kukota loko tatana a kombisa tintswalo eka vana vakwe, Yehovha u kombise tintswalo eka lava va n’wi chavaka. Hikuva yena u ku tiva kahle ku vumbeka ka hina, wa tsundzuka leswaku hi ntshuri.” (Pisalema 103:13, 14) Ndlela leyi Xikwembu xi hi langutaka ha yona a yi fani ni leyi hina hi tilangutaka ha yona. Xi languta leswinene eka hina, leswo biha a xi na mhaka na  swona, ntsena loko hi hundzuka eswidyohweni swa hina.—Pisalema 139:1-3, 23, 24.

Xisweswo, loko hi titwa hi nga pfuni nchumu, hi fanele ni lwisana ni miehleketo yoleyo. Hi fanele hi tsundzuka ndlela leyi Xikwembu xi hi langutaka ha yona!—1 Yohane 3:20.

Vana Ni Vuxaka Lebyikulu Ni Xikwembu

Xana hi vuyeriwa njhani loko hi tilanguta hi ndlela leyi Xikwembu xi hi langutaka ha yona? Swi ta hi olovela ku teka goza leri landzelaka ro va hi hlula ku va hi titwa hi ri swikangalafula, kutani hi va vanghana lavakulu va Xikwembu. Xana leswi swa koteka?

Ku fana ni Tatana la nga ni rirhandzu, Yehovha Xikwembu u tiyimisele ku hi pfuna leswaku hi va ni vuxaka na yena. Bibele yi hi khutaza yi ku: “Tshinelani eka Xikwembu, kutani xi ta tshinela eka n’wina.” (Yakobo 4:8) Ntiyiso wa mhaka hi lowu: Hambileswi hi tsaneke naswona hi velekiwaka hi ri ni xidyoho, hi nga swi kota ku va ni vuxaka ni Hosi leyi Lawulaka vuako hinkwabyo.

Xikwembu xi tihlamusele eBibeleni leswaku hi ta xi tiva. Ku hlaya Bibele nkarhi na nkarhi swi ta hi pfuna leswaku hi tiva timfanelo ta xona. * Loko hi anakanyisisa hi vutivi byebyo, hi ta ya hi va ekusuhi na xona. Hi ta xi tiva ku antswa tanihi Tatana la nga ni rirhandzu ni ntwela-vusiwana.

Ku anakanyisisa swinene hileswi hi swi hlayaka eBibeleni swi hi pfuna ni hi tindlela tin’wana. Hi va ekusuhi ni Tata wa hina wa le tilweni loko hi nghenisa vutivi byakwe emianakanyweni ni le timbilwini ta hina kutani hi byi pfumelela byi hi kongomisa, byi hi chavelela ni ku hi tshinya. Leswi hi fanele hi swi endla ngopfu loko hi titwa hi nga pfuni nchumu hikwalaho ka swiphiqo leswi hi langutanaka na swona. Mupisalema u te: “Loko ndzi ri maxangwini layo tala ndzi pfumala ku rhula, u khongoterile, ndzi kuma ku tsaka.” (Pisalema 94:19; BibeleMahungu Lamanene) Bibele yi nga hi chavelela. Loko hi amukela rungula ra ntiyiso hi ku titsongahata, a hi nge he titwi hi nga ha pfuni nchumu hikwalaho ko pfuniwa hi nchavelelo ni ku rhula loku tisiwaka hi Xikwembu. Xisweswo, Yehovha u hi chavelela ku fana ni mutswari la nga ni rirhandzu loyi a chavelelaka n’wana la hlundzukeke.

Nchumu wun’wana lowu nga hi pfunaka leswaku hi va vanghana va Xikwembu i ku vulavula na xona nkarhi na nkarhi. Bibele yi hi byela leswaku “ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” (1 Yohane 5:14) Ku nga khathariseki ku chava kumbe mivilelo leyi hi nga na yona, hi nga khongela eka Xikwembu, hi kombela leswaku xi hi pfuna. Loko hi xi phofulela leswi nga etimbilwini ta hina, hi va ni ku rhula ka mianakanyo. Muapostola Pawulo u te: “Eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu  ta n’wina ni matimba ya n’wina ya mianakanyo ha Kreste Yesu.”—Vafilipiya 4:6, 7.

Ku namarhela xiyimiso xa wena xo hlaya Bibele, ku anakanyisisa ni ku khongela, swi ta ku pfuna leswaku u va ni vuxaka lebyikulu ni Tata wa wena wa le tilweni. Vuxaka byebyo i bya nkoka eku lwisaneni ni ku titwa u nga pfuni nchumu. I yini swin’wana leswi nga hi pfunaka?

Tshama U Langutele Switshembiso Swa Nkarhi Lowu Taka

Hambiloko hi langutane ni swiyimo swo tika, hi nga swi kota ku anakanya hi swilo leswinene. Njhani? Xikwembu xi hi tshembisa vumundzuku lebyinene. Muapostola Petro u katsakanye ntshembo wolowo loko a ku: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa [Xikwembu], naswona ku ta va ni ku lulama eka swona.” (2 Petro 3:13) Xana sweswo swi vula yini?

Xiga lexi nge “matilo lamantshwa” xi kombetela eka hulumendhe, ku nga Mfumo wa Xikwembu wa le tilweni lowu rhangeriwaka hi Yesu Kreste. Lexi nge “misava leyintshwa” xi kombetela eka vanhu lavantshwa lava lulameke lava amukeriwaka hi Xikwembu naswona va nga ta tshama laha misaveni. Vanhu lava nga ta hanya ehansi ka mfumo wa “matilo lamantshwa,” a va nge he karhateki hi swilo leswi endlaka va titwa va ri swikangalafula. Loko Bibele yi vulavula hi vanhu vo tshembeka lava nga ta va va hanya hi nkarhi wolowo yi vula leswaku Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4.

Handle ko kanakana, u ta pfumela leswaku leswi i switshembiso leswi chavelelaka. Leswi hi swona leswi endlaka leswaku Bibele yi vulavula hi ntshembo wa hina wa nkarhi lowu taka lowu Xikwembu xi wu lunghiseleleke Vakreste va ntiyiso tanihi “ntshembo wo tsakisa.” (Tito 2:13) Loko hi tshama hi ri karhi hi anakanya hi switshembiso  leswi Xikwembu xi hi tshembisaka swona, nileswaku ha yini switshembiso sweswo swi ri swa nkoka, swi ta hi pfuna leswaku hi papalata ku titwa hi nga pfuni nchumu.—Vafilipiya 4:8.

Bibele yi fanisa ntshembo wa hina wo ponisiwa ni xihuku. (1 Vatesalonika 5:8) Eminkarhini ya khale, socha a ri nga ta ya enyimpini ri nga ri na xona xihuku. A ri swi tiva leswaku xihuku xexo xi ta ri sirhelela leswaku ri nga vaviseki. Tanihi leswi xihuku xi sirhelelaka nhloko, ni ntshembo wu sirhelela mianakanyo. Ku anakanyisisa hi swilo leswi nga ta endla leswaku hi va ni ntshembo, swi ta hi pfuna leswaku hi ehleketa hi ndlela leyinene naswona hi nga chavi.

Kutani swa koteka ku lwisana ni ku titwa u nga pfuni nchumu. Na wena u nga swi kota! Anakanya hi ndlela leyi Xikwembu xi ku langutaka ha yona, tshinela ekusuhi na xona naswona u tshama u ri karhi u anakanyisisa hi ntshembo wa vumundzuku. Kutani u nga tiyiseka leswaku nkarhi wu ta fika lowu u nga ta ka u nga ha titwi u ri xikangalafula!—Pisalema 37:29.

[Tinhlamuselo ta le hansi]

^ par. 3 Vanhu lava karhatiwaka swinene hi ntshikilelo, va fanele va ya vona dokodela.—Matewu 9:12.

^ par. 14 Xihondzo xo Rindza xa August 1, 2009, xi ni xiyimiso lexinene xo hlaya Bibele.

[Marito lama tshahiweke exihlokweni lama nga eka tluka 19]

“Ndza ku tiva swinene ku vava loku va ku twaka.”—EKSODA 3:7, 8

[Marito lama tshahiweke exihlokweni lama nga eka tluka 20]

“Loko ndzi ri maxangwini layo tala ndzi pfumala ku rhula, u khongoterile, ndzi kuma ku tsaka.”—PISALEMA 94:19, BIBELE—MAHUNGU LAMANENE

[Marito lama tshahiweke exihlokweni lama nga eka tluka 21]

“Ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo.”—VAFILIPIYA 4:7

[Bokisi/Xifaniso lexi nga eka tluka 20, 21]

Matsalwa Lama Chavelelaka Malunghana Na Yehovha Xikwembu

“Yehovha, Xikwembu xa tintswalo ni nsovo, la hlwelaka ku hlundzuka, la teleke musa wa rirhandzu ni ntiyiso.”—EKSODA 34:6.

“Mahlo yakwe ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.”—2 TIKRONIKA 16:9.

“Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—PISALEMA 34:18.

“Oho Yehovha, u lonene naswona u lunghekele ku rivalela.”—PISALEMA 86:5.

“Yehovha hi lonene eka hinkwavo, naswona tintswalo takwe ti le henhla ka mintirho yakwe hinkwayo.”—PISALEMA 145:9.

“Mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’”—ESAYA 41:13.

“A ku dzunisiwe . . . Tatana la nga ni tintswalo letikulu tlhelo Xikwembu xa nchavelelo hinkwawo.”—2 VAKORINTO 1:3.

“Hi ta tiyisekisa timbilu ta hina emahlweni ka yena malunghana ni xin’wana ni xin’wana lexi timbilu ta hina ti nga hi solaka ha xona, hikuva Xikwembu i xikulu eka timbilu ta hina naswona xi tiva swilo hinkwaswo.”—1 YOHANE 3:19, 20.

[Bokisi/Swifaniso leswi nga eka tluka 22]

Va Swi Kotile Ku Lwisana Ni Ku Titwa Va Nga Pfuni Nchumu

“Tatana i xindzendzele naswona leswi a swi ndzi dyisi byi rhelela. Ndzi hete nkarhi wo leha ndzi titwa ndzi ri xikangalafula. Kambe endzhaku ka loko ndzi sungule ku dyondza Bibele ni Timbhoni ta Yehovha, ndzi dyondze hi xitshembiso xo kuma vutomi lebyi nga heriki laha misaveni. Leswi swi ndzi tsakisile. Ndzi sungule ku hlaya Bibele nkarhi na nkarhi naswona ndzi tshama ndzi ri na yona. Loko ndzi titwa ndzi nga pfuni nchumu, ndzi hlaya Matsalwa lama chavelelaka. Ku hlaya hi timfanelo ta Xikwembu swi ndzi tiyisekisa hi ndlela leyi ndzi nga wa nkoka ha yona eka xona.”—Kátia, wansati la nga ni malembe ya 33. *

“A ndzi godzomberiwe hi byala, mbangi, khokheyini naswona a ndzi dzaha ni glu. Sweswo swi endle leswaku ndzi lahlekeriwa hi swilo hinkwaswo leswi a ndzi ri na swona, kutani ndzi sungula ku hanya hi ku kombela. Kambe endzhaku ko sungula ku dyondza Bibele ni Timbhoni ta Yehovha, ndzi cince vutomi bya mina. Ndzi sungule ku va ni vuxaka lebyinene ni Xikwembu. Hambileswi minkarhi yin’wana ndzi titwaka nandzu naswona ndzi twa onge a ndzi pfuni nchumu, ndzi dyondze ku titshega hi musa wa Xikwembu ni hi tintswalo ta xona ta rirhandzu. Ndza tiyiseka leswaku xi ta ya emahlweni xi ndzi nyika matimba yo lwisana ni ku va ndzi titwa ndzi nga pfuni nchumu. A ku na nchumu lexi ndzi nga xi ringanisaka ni ku tiva ntiyiso wa Bibele.”—Renato, wanuna la nga ni malembe ya 37.

“Ku sukela loko ndza ha ri ntsongo, a ndzi tshamela ku tiringanisa ni buti wa mina. A ndzi tivona ndzi nga ri nchumu ku ri na yena. Ni sweswi a ndzi titshembi, hambi ku ri swilo leswi ndzi kotaka ku swi endla a ndzi tiyiseki ha swona. Kambe a ndzi lan’wanga, ndzi khongele hi mbilu hinkwayo eka Yehovha naswona u ndzi pfunile leswaku ndzi hlula ndlela leyi a ndzi titwa ha yona. Swa ndzi chavelela ku tiva leswaku Xikwembu xa ndzi rhandza naswona xa ndzi khathalela!”—Roberta, wansati la nga ni malembe ya 45.

[Nhlamuselo ya le hansi]

^ par. 45 Mavito man’wana ma cinciwile.