Nghena endzeni

Hundzela eka leswi nga endzeni

Ku Vulavula Hi Tindzimi—Xana Swi Huma Eka Xikwembu?

Ku Vulavula Hi Tindzimi—Xana Swi Huma Eka Xikwembu?

 Ku Vulavula Hi Tindzimi—Xana Swi Huma Eka Xikwembu?

DEVON u ri: “Mhaka leyi a ndzi yi twisisi. Swi tikomba onge vhiki ni vhiki ekerekeni ya hina vanhu vo tala va vulavula hi tindzimi hi singita hikwalaho ko pfuniwa hi moya lowo kwetsima, hambileswi van’wana va nga ni mahanyelo yo biha. Hambileswi ndzi ringetaka ku hanya hi milawu ya Bibele ndzi tlhela ndzi khongelela ku va ni moya lowo kwetsima, a ndzi wu kumi. Ha yini swi ri tano?”

Gabriel na yena u nghena kereke leyi vanhu va kona va vonakaka va tala hi moya lowo kwetsima kutani va vulavula hi tindzimi. U ri: “Lexi ndzi karhataka ngopfu hileswaku loko ndzi ri karhi ndzi khongela, van’wana va ndzi kavanyeta hi ku vulavulela ehenhla lerova hinkwerhu hi nga ha twanani. Hinkwerhu a hi vuyeriwi. Xana nyiko ya moya wa Xikwembu a yi na xikongomelo?”

Ntokoto wa Devon na Gabriel wu endla leswaku ku tlakuka xivutiso lexi nge, Xana ku vulavula hi tindzimi namuntlha hilaha swi nga hakona etikerekeni tin’wana swi huma eka Xikwembu? Leswaku hi hlamula xivutiso lexi, a hi kambisiseni nyiko yo vulavula hi tindzimi hi singita leyi Vakreste va lembe-xidzana ro sungula a va ri na yona.

Va “Sungula Ku Vulavula Hi Tindzimi To Hambana-hambana”

EBibeleni, hi hlaya hi vavanuna ni vavasati lava a va nyikiwe matimba yo vulavula hi tindzimi leti a va nga ti tivi. Leswi swi humelele ro sungula hi Pentekosta ya 33 C.E., endzhaku ka mavhiki ma nga ri mangani Yesu Kreste a pfuxiwile. Hi siku rero, le Yerusalema vadyondzisiwa va Yesu va kwalomu ka 120 “va [tale] moya lowo kwetsima, va sungula ku vulavula hi tindzimi to hambana-hambana.” Vaendzi vo huma ematikweni mambe va “hlangane tinhloko, hikuva un’wana ni un’wana a a va twa va vulavula hi ririmi ra yena.”—Mintirho 1:15; 2:1-6.

Bibele yi boxa valandzeri van’wana va Yesu lava na vona a va ri na yona nyiko leyi yo hlamarisa. Hi xikombiso, hikwalaho ko pfuniwa hi moya lowo kwetsima, muapostola Pawulo u vulavule hi tindzimi hi singita. (Mintirho 19:6; 1 Vakorinto 12:10, 28; 14:18) Kambe nyiko yin’wana ni yin’wana ya moya lowo kwetsima wa Xikwembu yi ni xikongomelo lexinene. A ku ri xihi xikongomelo xo vulavula hi tindzimi eminkarhini ya Bibele?

A Ku Ri Xikombiso Xo Seketeriwa Hi Xikwembu

Loko Pawulo a tsalela Vakreste va le Korinto, lava van’wana va vona a va vulavula hi tindzimi, u vule leswaku ‘tindzimi i xikombiso eka lava nga riki vapfumeri.’ (1 Vakorinto 14:22)  Matimba yo vulavula hi tindzimi swin’we ni masingita lawa vandlha lerintshwa ra Vukreste leri simekiweke ri ma endleke, a ma komba lava nga riki vapfumeri leswaku ri seketeriwa hi Xikwembu. Tinyiko to endla masingita a ti fana ni tibodo leti nga etlhelo ka gondzo, a ti komba vanhu lava lavaka ntiyiso leswaku i vamani vanhu va Xikwembu.

Bibele a yi vuli leswaku Yesu kumbe un’wana wa vaprofeta lava hanyeke emahlweni ka Vukreste va tshame va vulavula hi tindzimi leti va nga ti tiviki. Nyiko yo vulavula hi tindzimi yi nyikiwe vadyondzisiwa vakwe, naswona a yi ri ni xikongomelo.

Yi Tirhisiwa Ku Hangalasa Mahungu Lamanene

Loko a sungula vutirheli byakwe, Yesu u byele vadyondzisiwa vakwe leswaku va chumayela mahungu lamanene ya Mfumo wa Xikwembu eka Vayuda ntsena. (Matewu 10:6; 15:24) Kambe vadyondzisiwa a va nga chumayeli etindhawini leti a ti lawuriwa hi Vayuda. Sweswo a swi ta cinca ku nga ri khale.

Endzhakunyana ka loko Yesu a pfuxiwile hi 33 C.E., u lerise valandzeri vakwe leswaku va ya “endla vanhu va matiko hinkwawo va va vadyondzisiwa.” U tlhele a va byela leswaku va ta va timbhoni takwe “ku ya fika endhawini ya le kule swinene ya misava.” (Matewu 28:19; Mintirho 1:8) Leswaku va hangalasa mahungu lamanene etindhawini teto hinkwato, a swi ta lava leswaku va tirhisa ni tindzimi tin’wana handle ka Xiheveru.

Hambiswiritano, vo tala va vadyondzisiwa vakwe a va nga ‘dyondzekanga naswona a va ri vanhu lava tolovelekeke.’ (Mintirho 4:13) Xana a va ta swi kotisa ku yini ku ya chumayela etindhawini ta le kule swinene laha tindzimi leti vulavuriwaka kwalaho a va nga ti tivi? Moya lowo kwetsima wu nyike van’wana va vachumayeri lava hisekaka matimba yo chumayela hi tindzimi leti a va nga ti tivi.

Xisweswo, nyiko yo vulavula hi tindzimi a yi hetisisa swikongomelo swimbirhi swa nkoka. Xo sungula, a yi kombisa leswaku va seketeriwa hi Xikwembu. Xa vumbirhi, a yi pfuna Vakreste va lembe-xidzana ro sungula ku hetisisa ntirho lowu a va lerisiwe wona wo chumayela vanhu va tindzimi to hambana-hambana. Xana ku vulavula hi tindzimi loku nga kona etikerekeni to tala namuntlha ku hetisisa swikongomelo sweswo?

Ku Vulavula Hi Tindzimi Namuntlha—Xana I Xikombiso Xa Ku Seketeriwa Hi Xikwembu?

Xana a wu ta wu veka kwihi mfungho lowu u lavaka leswaku wu pfuna vanhu hinkwavo endhawini ya ka n’wina? Xana a wu ta wu veka endzeni ka muako lowutsongo? Doo! Rungula leri vulavulaka hileswi nga endleka hi Pentekosta ri hi byela leswaku “vunyingi” bya vaendzi va swi vonile loko vadyondzisiwa va vulavula hi tindzimi hi singita. Hikwalaho ka sweswo, “ku engeteriwe mimoya-xiviri ya kwalomu ka 3 000” evandlheni ra Vukreste! (Mintirho 2:5, 6, 41) Namuntlha loko vanhu va vula leswaku va vulavula hi tindzimi kambe va swi endlela ekerekeni, xana sweswo swi nga va mfungho lowu vanhu hinkwavo lava nga riki vapfumeri va nga ta wu vona?

Rito ra Xikwembu ri kombisa leswaku vumbhisa ni “mintirho [yin’wana] ya nyama” swi lwisana ni moya lowo kwetsima, ri tlhela ri vula leswaku “lava hanyaka hi swilo swo tano a va nge dyi ndzhaka ya mfumo wa Xikwembu.” (Vagalatiya 5:17-21) Loko u vona vanhu lava nga ni mahanyelo yo biha va vulavula hi tindzimi, u nga ha tivutisa leswi, ‘Xana a hi vukanganyisi ku va moya lowo kwetsima wa Xikwembu wu chululeriwa vanhu lava nga hanyiki hi milawu ya Bibele?’ Phela sweswo swi fana ni ku veka mfungho lowu kongomisaka timovha endhawini leyi hoxeke.

Ku Vulavula Hi Tindzimi Namuntlha—Xana Swi Tirhiseriwa Ku Chumayela Mahungu Lamanene?

Ku vuriwa yini hi nyiko yo vulavula hi tindzimi leyi a yi ri kona hi lembe-xidzana ro sungula? Xana ku vulavula hi tindzimi loku nga kona etikerekeni ku tirhiseriwa ku chumayela mahungu lamanene hi tindzimi to hambana-hambana? Tsundzuka leswaku vaendzi lava a va ri eYerusalema hi Pentekosta ya 33 C.E. a va huma ematikweni  yo hambana-hambana naswona a va titwa tindzimi leti a ti vulavuriwa hi vadyondzisiwa. Kambe vanhu lava vulavulaka hi tindzimi namuntlha va vula swilo leswi van’wana va nga swi twiki.

Swi le rivaleni leswaku vanhu lava vulavulaka hi tindzimi namuntlha a va na yona nyiko ya moya lowo kwetsima leyi a yi nyikiwe valandzeri va Yesu. Entiyisweni, a ku na vumbhoni lebyi kombisaka leswaku ku ni munhu la tshameke a kuma lunghelo leri hi singita endzhaku ka loko vaapostola va file. Leswi a swi va hlamarisi vahlayi va Bibele. Loko muapostola Pawulo la huhuteriweke a profeta hi tinyiko ta masingita leti katsaka ku vulavula hi tindzimi u te: “Ti ta hela.” (1 Vakorinto 13:8) Xana hi nga n’wi vona njhani munhu la nga ni moya lowo kwetsima namuntlha?

I Yini Leswi Kombisaka Leswaku Munhu U Ni Moya Lowo Kwetsima?

Yesu a a swi tiva leswaku nyiko yo vulavula hi tindzimi a yi ta hela endzhaku ko simekiwa ka vandlha ra Vukreste. Loko a nga si fa, u vule mfungho lowu a wu ta fungha valandzeri vakwe va ntiyiso. U te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Eka ndzimana leyi Rito ra Xikwembu ri profeteke leswaku tinyiko ta masingita ti ta hela, ri tlhele ri ku: “Rirhandzu a ri heli.”—1 Vakorinto 13:8.

Rirhandzu hi rona ro sungula leri boxiwaka eka “mihandzu” ya moya lowo kwetsima wa Xikwembu. (Vagalatiya 5:22, 23) Lava hakunene va nga ni moya lowo kwetsima naswona va seketeriwaka hi Xikwembu, va rhandzana. Yinhla ya vunharhu leyi welaka eka mihandzu ya moya i ku rhula. Xisweswo, namuntlha vanhu lava nga ni moya lowo kwetsima va ni ku rhula, naswona va lwisana ni moya wa misava wa xihlawuhlawu ni madzolonga.

Nakambe tsundzuka vuprofeta bya Yesu lebyi nga eka Mintirho 1:8. U vule leswaku vadyondzisiwa vakwe a va ta va timbhoni takwe “ku ya fika endhawini ya le kule swinene ya misava.” Yesu u tlhele a kombisa leswaku ntirho lowu a wu ta ya emahlweni “ku ko ku hela misava.” (Matewu 28:20, Bibele—Mahungu Lamanene) Ntirho lowu endliwaka emisaveni hinkwayo a wu ta hambeta wu va mfungho lowu kombisaka vanhu lava hakunene va nga ni moya lowo kwetsima.

U nga swi hlamula njhani swivutiso leswi landzelaka? I vamani lava vonakaka onge va ni moya lowo kwetsima namuntlha? I vamani lava kombisaka mihandzu ya moya, ngopfu-ngopfu rirhandzu ni ku rhula, lerova emisaveni hinkwayo mimfumo ya va xanisa hikwalaho ko ala ku hlanganyela enyimpini? (Esaya 2:4) I vamani lava tikarhatelaka ku papalata mintirho ya nyama yo tanihi vumbhisa, hambi ku ri ku susa vanhu lava nga hundzukiki emavandlheni ya vona? (1 Vakorinto 5:11-13) I vamani lava chumayelaka mahungu lamanene emisaveni hinkwayo naswona va swi vekaka erivaleni leswaku Mfumo wa Xikwembu hi wona ntsena lowu nga ta pfuna vanhu?—Matewu 24:14.

Vakandziyisi va magazini lowu a va kanakani leswaku Timbhoni ta Yehovha hi tona leti Bibele yi vulaka leswaku ti ni moya lowo kwetsima. Ha yini u nga ringeti ku ti tiva ku antswa kutani u tivonela hi wexe loko hakunene ti seketeriwa hi Xikwembu?