Nghena endzeni

Hundzela eka leswi nga endzeni

5 Xana Swi Ni Mhaka Leswaku Hi Khongela Kwihi Naswona Rini?

5 Xana Swi Ni Mhaka Leswaku Hi Khongela Kwihi Naswona Rini?

 Xikhongelo

5 Xana Swi Ni Mhaka Leswaku Hi Khongela Kwihi Naswona Rini?

HANDLE KO KANAKANA wa swi xiya leswaku vukhongeri byo tala byi ni tindhawu to khongela eka tona naswona byi veke ni minkarhi yo karhi leyi byi faneleke byi khongela ha yona. Xana Bibele yi dyondzisa leswaku ku ni tindhawu ni minkarhi leyi hi faneleke hi khongela ha yona?

Bibele yi kombisa leswaku ku ni minkarhi leyi fanelekaka yo khongela ha yona. Hi xikombiso, loko Yesu a nga si dya ni valandzeri vakwe, u rhange hi ku khongela eka Xikwembu. (Luka 22:17) Nakambe loko vadyondzisiwa vakwe va hlengeletanile leswaku va ta gandzela, va khongele swin’we. Xisweswo, va hambete va endla mukhuva lowu a ku ri khale wu endliwa emasinagogeni ya Vayuda ni le tempeleni ya le Yerusalema. Xikwembu a xi lava leswaku tempele yi va “yindlu ya xikhongelo ya matiko hinkwawo.”—Marka 11:17.

Loko malandza ya Xikwembu ma hlengeletana kutani ma khongela swin’we, swikhongelo swa wona swi nga va ni ntikelo. Loko munhu wo karhi a khongela hi ku yimela vagandzeri-kulorhi naswona sweswo swi pfumelelana ni leswi Matsalwa ma swi vulaka, Xikwembu xa tsaka ha swona. Xikhongelo xi nga ha endla leswaku Xikwembu xi hi nyika ni leswi hi nga swi kombelangiki. (Vaheveru 13:18, 19) Minkarhi hinkwayo loko Timbhoni ta Yehovha ti ri eminhlanganweni ya tona ta khongela. Wa rhambiwa leswaku u ta eHolweni ya Mfumo ya le kusuhi ni laha u tshamaka kona leswaku u ta titwela hi wexe swikhongelo swo tano.

Hambiswiritano, Bibele a yi hi vekeli nkarhi kumbe ndhawu leyi hi faneleke hi khongela eka yona. EBibeleni hi dyondza hi malandza ya Xikwembu lama khongeleke hi minkarhi ni le tindhawini leti nga faniki. Yesu u te: “Loko wena u khongela, nghena ekamareni ra wena, loko u pfale nyangwa ya wena, khongela eka Tata wa wena la nge xihundleni; kutani Tata wa wena la langutaka exihundleni u ta ku tlherisela.”—Matewu 6:6.

Mayana xirhambo xo tsakisa swonghasi! Nkarhi na nkarhi hi nga ha khongela eka Hosi leyi Lawulaka ya vuako hinkwabyo, endhawini leyi tumbeleke naswona hi tiyiseka leswaku yi ta hi twa. A swi hlamarisi leswi minkarhi yin’wana Yesu a a lava ku va swakwe leswaku a ta khongela! U tshame a khongela vusiku hinkwabyo eka Xikwembu, leswaku a ta endla xiboho lexi faneleke.—Luka 6:12, 13.

Swikhongelo swa vavanuna ni vavasati van’wana leswi tsariweke eBibeleni, swi kombisa leswaku va khongele loko va lava ku endla swiboho swo tika ni loko va langutane ni swiphiqo. Minkarhi yin’wana a va khongela hi rito leri twalaka kumbe hi mbilu; hi mintlawa ni loko va ri voxe. Mhaka ya nkoka hileswaku va khongerile. Xikwembu xi rhamba malandza ya xona xi ku: “Khongelani minkarhi hinkwayo.” (1 Vatesalonika 5:17) Xi tiyimisele ku yingisa swikhongelo swa vanhu lava endlaka ku rhandza ka xona. Xirhambo lexi xi kombisa ndlela leyi Yehovha a hi rhandzaka ha yona.

Namuntlha emisaveni leyi nga ni maxangu, vanhu vo tala va tivutisa loko xikhongelo xi pfuna hakunene. U nga ha tivutisa u ku, ‘Xana xi ta ndzi pfuna?’

[Marito lama tshahiweke exihlokweni lama nga eka tluka 9]

Hi nga khongela nkarhi wun’wana ni wun’wana ni le ndhawini yin’wana ni yin’wana