Nghena endzeni

Hundzela eka leswi nga endzeni

4 I Yini Leswi Hi Faneleke Hi Swi Katsa Loko Hi Khongela?

4 I Yini Leswi Hi Faneleke Hi Swi Katsa Loko Hi Khongela?

 Xikhongelo

4 I Yini Leswi Hi Faneleke Hi Swi Katsa Loko Hi Khongela?

A KU na xikhongelo xin’wana lexi Vakreste va xi tivaka ku fana ni xikhongelo xa Hosi! Ku nga khathariseki leswaku leswi i ntiyiso kumbe i mavunwa, vanhu vo tala a va xi twisisi xikhongelo xa Yesu xa xikombiso lexi minkarhi yin’wana xi vitaniwaka Xikhongelo xa Hosi. Vanhu va timiliyoni va phindha-phindha marito ya xona siku ni siku. Kambe Yesu a a nga xi endlelanga swona sweswo. Hi swi tivisa ku yini?

Loko Yesu a nga si vula xikhongelo xexo u te: “Loko u khongela, u nga vuli swilo leswi fanaka hi ku phindha-phindha.” (Matewu 6:7) Kutani, xana loko Yesu a vula xikhongelo xa xikombiso a a kaneta leswi a nga swi vula laha henhla? Doo, kambe a a hi dyondzisa leswi hi faneleke hi swi katsa loko hi khongela nileswi hi faneleke hi swi rhangisa. A hi xi kambisiseni hi vuenti xikhongelo lexi. Xi kumeka eka Matewu 6:9-13.

“Tata wa hina la nge matilweni, vito ra wena a ri kwetsimisiwe.”

Yesu u tsundzuxe valandzeri vakwe leswaku swikhongelo hinkwaswo swi fanele swi kongomisiwa eka Tata wakwe, ku nga Yehovha. Kambe, xana wa swi tiva leswaku ha yini vito ra Xikwembu ri ri ra nkoka naswona ri fanele ri kwetsimisiwa?

Ku sukela eku sunguleni ka matimu ya vanhu, vito leri kwetsimaka ra Xikwembu ri onhiwile. Nala wa Xikwembu, Sathana, u vule leswaku Yehovha i Mufumi la nga ni vuxisi ni vutianakanyi, la nga riki na mfanelo yo fuma swivumbiwa swakwe. (Genesa 3:1-6) Vanhu vo tala va pfumelelana na Sathana hi ku dyondzisa leswaku Xikwembu i mufumi la nga ni tihanyi naswona va vula leswaku swilo swi lo tiendlekela. Van’wana va kale va susa ni vito ra xona eka vuhundzuluxeri bya vona bya Bibele ni ku endla leswaku ri nga tirhisiwi.

Bibele yi dyondzisa leswaku Xikwembu xi ta herisa vuhomboloki hinkwabyo. (Ezekiyele 39:7) Hi ku endla tano, xi ta enerisa swilaveko swa wena ni ku herisa swiphiqo leswi u nga na swona. Hi ndlela yihi? Marito lama landzelaka ya xikhongelo xa Yesu ma nyikela nhlamulo.

“Mfumo wa wena a wu te.”

Namuntlha varhangeri vo tala va vukhongeri a va wu twisisi Mfumo wa Xikwembu. Kambe valandzeri va Yesu va swi tiva leswaku Xikwembu xi profete leswaku Mesiya, Muponisi la hlawuriweke hi Xikwembu u ta va hosi ya Mfumo lowu nga ta hundzula misava. (Esaya 9:6, 7; Daniyele 2:44) Wu ta kwetsimisa vito ra Xikwembu hi ku paluxa mavunwa ya Sathana kutani wu n’wi herisa. Mfumo wa Xikwembu wu ta herisa nyimpi, vuvabyi, ndlala ni rifu. (Pisalema  46:9; 72:12-16; Esaya 25:8; 33:24) Loko u khongelela leswaku Mfumo wa Xikwembu wu ta, u va u khongelela leswaku switshembiso sweswo hinkwaswo swi hetiseka.

“Ku rhandza ka wena a ku endleke emisaveni, hilaha ku endlekaka hakona etilweni.”

Marito ya Yesu ma kombisa leswaku ku rhandza ka Xikwembu ku ta endleka emisaveni hilaha ku endlekaka hakona etilweni laha Xikwembu xi tshamaka kona. A xi kona lexi siveleke leswaku ku rhandza ka Xikwembu ku endleka etilweni; N’wana wa Xikwembu u lwe nyimpi na Sathana ni tintsumi takwe kutani a va lahlela emisaveni. (Nhlavutelo 12:9-12) Xikombelo xa vunharhu xa xikhongelo xa xikombiso xi hi pfuna leswaku hi karhateka hi ku rhandza ka Xikwembu ku nga ri ka hina. Ku rhandza ka xona hileswaku swivumbiwa swa xona hinkwaswo swi kuma swilo leswinene. Xisweswo, hambi ku ri Yesu wanuna la hetisekeke, u byele Tata wakwe a ku: “Ku nga endleki ku rhandza ka mina, kambe a ku endleke ka wena.”—Luka 22:42.

“Hi nyike namuntlha xinkwa xa hina.”

Yesu u tlhele a kombisa leswaku hi nga khongelela ni swilaveko swa hina. A swi bihanga ku khongela Xikwembu malunghana ni swikombelo swa hina swa siku na siku. Entiyisweni ku endla tano, swi endla leswaku hi tsundzuka leswaku Yehovha hi yena la “[nyikaka] vanhu hinkwavo vutomi ni ku hefemula ni swilo hinkwaswo.” (Mintirho 17:25) Bibele yi kombisa leswaku u fana ni mutswari la nga ni rirhandzu la nyikaka vana vakwe leswi va swi lavaka. Kambe ku fana ni mutswari lonene, a nge va nyiki swilo leswi nga ta ka swi nga va pfuni nchumu.

“Hi rivalele milandzu ya hina.”

Xana u ni nandzu eka Xikwembu? Xana u lava leswaku xi ku rivalela? Namuntlha vanhu vo tala a va swi twisisi leswaku i yini xidyoho nileswaku xi bihe ku fikela kwihi. Kambe Bibele yi dyondzisa leswaku xidyoho hi xona lexi hi vangelaka maxangu ni rifu. Leswi hinkwerhu hi velekiweke hi nga hetisekanga, minkarhi yo tala ha dyoha naswona ntshembo wa hina wa vutomi lebyi nga heriki wu titshege hi ku va Xikwembu xi hi rivalela. (Varhoma 3:23; 5:12; 6:23) Swa chavelela ku tiva leswaku Bibele yi ri: “Oho Yehovha, u lonene naswona u lunghekele ku rivalela.”—Pisalema 86:5.

“Hi kutsule eka lowo homboloka.”

Xana wa swi xiya leswaku hakunene u lava nsirhelelo wa Xikwembu? Vanhu vo tala a va tshembi leswaku “lowo homboloka,” ku nga Sathana, u kona. Kambe Yesu u dyondzise leswaku Sathana i munhu wa xiviri naswona u tlhele a n’wi vitana “mufumi wa misava leyi.” (Yohane 12:31; 16:11) Sathana u hambukise misava leyi hikwalaho ka leswi a yi lawulaka naswona u tiyimisele ku ku hambukisa leswaku u nga vi na vuxaka ni Tata wa wena, Yehovha. (1 Petro 5:8) Hambiswiritano, Yehovha u ni matimba ku tlula Sathana naswona wa va sirhelela lava N’wi rhandzaka.

Nkatsakanyo wa tinhla-nkulu ta xikhongelo xa xikombiso xa Yesu a wu boxi tinhla hinkwato leti fambisanaka ni xikhongelo. Tsundzuka leswi 1 Yohane 5:14 yi swi vulaka hi Xikwembu, yi ri: “Ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” U nga tibyeli leswaku swiphiqo swa wena a swi nyawuli lerova u nga khongela ha swona eka Xikwembu.—1 Petro 5:7.

Kambe xana ku vuriwa yini hi nkarhi ni ndhawu leyi hi khongelaka eka yona? Xana swi ni mhaka leswaku hi khongela rini naswona kwihi?