Nghena endzeni

Hundzela eka leswi nga endzeni

3 Hi Fanele Hi Khongela Njhani?

3 Hi Fanele Hi Khongela Njhani?

 Xikhongelo

3 Hi Fanele Hi Khongela Njhani?

LOKO ku tiwa emhakeni ya xikhongelo, vukhongeri byo tala byi karhateka ngopfu hi ndlela leyi munhu a faneleke a yima ha yona, leswi a faneleke a swi vula ni swin’wana. Kambe Bibele yi hi pfuna leswaku hi languta swilo swa nkoka, swo tanihi hi xivutiso lexi nge, “Hi fanele hi khongela njhani?”

Bibele yi vulavula hi malandza yo tshembeka ya Xikwembu loko ma ri karhi ma khongela etindhawini to hambana-hambana naswona ma yime hi tindlela leti nga faniki. Ma khongele hi mbilu kumbe hi rito leri twalaka, hi ku ya hi swiyimo swa wona. Ma khongele ma langute ehenhla kumbe ma korhamise tinhloko. Ematshan’weni yo tirhisa swifaniso, vuhlalu kumbe tibuku ta swikhongelo, ma khongele swi huma embilwini. I yini leswi endleke leswaku Yehovha a yingisa swikhongelo swa wona?

Hilaha swi boxiweke hakona exihlokweni lexi hundzeke, ma kongomise swikhongelo swa wona eka Xikwembu xi ri xin’we ntsena, ku nga Yehovha. Ku ni nchumu wun’wana wa nkoka lowu nga eka 1 Yohane 5:14, leyi nge: “Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” Swikhongelo swa hina swi fanele swi fambisana ni ku rhandza ka Xikwembu. Xana sweswo swi vula yini?

Swi vula leswaku hi fanele hi tiva leswi ku rhandza ka Xikwembu ku nga swona. Ku dyondza Bibele swi ta hi pfuna leswaku hi khongela hi ndlela leyi faneleke. Xana leswi swi vula leswaku Xikwembu a xi nge swi yingisi swikhongelo swa hina loko hi nga yanga exikolweni xa Bibele? A swi vuli swona, kambe Xikwembu xi lava leswaku hi tiva ku rhandza ka xona, hi ku twisisa kutani hi hanya hakona. (Matewu 7:21-23) Hi fanele hi khongela hi ku pfumelelana ni leswi hi swi dyondzaka.

Loko hi ri karhi hi dyondza hi Yehovha ni ku rhandza kakwe, ripfumelo ra hina ri ta kula naswona mhaka leyi i ya nkoka exikhongelweni. Yesu u te: “Swilo hinkwaswo leswi mi swi kombelaka hi xikhongelo mi ri ni ripfumelo, mi ta swi kuma.” (Matewu 21:22) Ripfumelo a hi ku pfumela xin’wana ni xin’wana. Kambe swi vula ku tshemba swilo leswi nga voniwiki kambe ku ri ni vumbhoni lebyi kombisaka leswaku swi kona. (Vaheveru 11:1) Bibele yi ni vumbhoni byo tala lebyi kombisaka leswaku Yehovha, loyi hi nga kotiki ku n’wi vona, i wa xiviri, wa tshembeka naswona u tiyimisele ku hlamula swikhongelo swa lava nga ni ripfumelo eka yena. Ku tlula kwalaho, hi nga hambeta hi kombela ripfumelo leri engetelekeke, naswona Yehovha u ta hi nyika leswi hi swi kombelaka.—Luka 17:5; Yakobo 1:17.

Hi leyi ndlela yin’wana ya nkoka yo khongela. Yesu u te: “A nga kona loyi a taka eka Tatana handle ko ta ha mina.” (Yohane 14:6) Yesu hi yena la endleke leswaku hi tshinela eka Yehovha. Xisweswo, Yesu u dyondzise valandzeri vakwe leswaku  swikhongelo swa vona va swi hundzisa hi vito rakwe. (Yohane 14:13; 15:16) Leswi a swi vuli swona leswaku hi fanele hi kongomisa swikhongelo swa hina eka Yesu. Kambe hi hundzisa swikhongelo swa hina hi vito ra Yesu, hi tsundzuka leswaku hi yena la endleke leswaku hi kota ku tshinela eka Tata wa hina la hetisekeke ni la kwetsimaka.

Vaapostola va Yesu va tshame va ku eka yena: “Hosi, hi dyondzise ndlela ya ku khongela.” (Luka 11:1) Swi le rivaleni leswaku a va nga kombeli leswaku a va dyondzisa leswi hi swi boxeke laha henhla. Kambe a va lava ku tiva leswi va faneleke va swi khongelela, entiyisweni a va ku, ‘I yini leswi hi faneleke hi swi katsa loko hi khongela?’

[Marito lama tshahiweke exihlokweni lama nga eka tluka 6]

Swikhongelo leswi hlamuriwaka hileswi fambisanaka ni ku rhandza ka Xikwembu, swi endliwaka hi ripfumelo ni leswi hundzisiwaka hi vito ra Yesu