Nghena endzeni

Hundzela eka leswi nga endzeni

Xana Xikwembu Xi Lava Leswaku Vanhu Va Tiphofula Swidyoho?

Xana Xikwembu Xi Lava Leswaku Vanhu Va Tiphofula Swidyoho?

 Xana Xikwembu Xi Lava Leswaku Vanhu Va Tiphofula Swidyoho?

Ku tiphofula swidyoho eka muprista kumbe eka mufundhisi swi tolovelekile etikerekeni to tala. Emisaveni ya namuntlha leyi nga riki na mhaka ni mahanyelo, xana swa ha pfuna ku va vanhu va tiphofula swidyoho swa vona?

VANHU va ni mavonelo lama hambaneke emhakeni leyi. Hi xikombiso, phepha-hungu ra le Canada leri vuriwaka National Post ri vule leswaku munhu un’wana u pfumerile leswaku a swi olovi ku byela munhu un’wana swidyoho swa wena, “kambe ku byela munhu la nga ta ku twisisa, a khongela na wena ni ku ku byela leswi u faneleke u swi endla swi ta ku pfuna leswaku u ntshunxeka.” Buku leyi nge Bless Me, Father, for I Have Sinned yi tshaha wanuna la nge: “Ekerekeni a ku na nchumu lowu tikaka ku fana ni ku tiphofula. Nkarhi lowu wu endla leswaku vanhu va chuha.” Bibele yi ri yini hi mhaka leyi?

Leswi Bibele Yi Swi Vulaka

Nawu lowu Xikwembu a xi wu nyike Vaisrayele a wu ri ni swiletelo leswi munhu a a fanele a swi landzela loko a dyohile. Hi xikombiso, loko munhu a dyohele munhu-kulobye kumbe a tlule yin’wana ya milawu ya Xikwembu, a a fanele a ya tiphofula eka muprista la nga wa nyimba ya Levhi, kutani yena a a ta n’wi endlela gandzelo ro kombela ku rivaleriwa eka Xikwembu.—Levhitika 5:1-6.

Endzhaku ka malembe-xidzana yo hlayanyana loko muprofeta Natani a sole Hosi Davhida hikwalaho ka swidyoho swakwe, xana Davhida u angurise ku yini? U te: “Ndzi dyohele Yehovha.” (2 Samuwele 12:13) U tlhele a khongela a kombela Xikwembu leswaku xi n’wi komba tintswalo. Vuyelo byi ve byihi? Hi ku famba ka nkarhi Davhida u te: “Eku heteleleni ndzi phofule xidyoho xa mina eka wena, nandzu wa mina a ndzi wu funengetanga. Ndzi te: ‘Ndzi ta phofulela Yehovha ku tlula ka mina nawu.’ Naswona wena u ndzi rivalele nandzu wa swidyoho swa mina.”—Pisalema 32:5; 51:1-4.

Evandlheni ra Vukreste ra lembe-xidzana ro sungula ra Nguva ya hina leyi Tolovelekeke, Xikwembu a xi lava leswaku vanhu va phofula swidyoho swa vona. Yakobo makwenu wa Yesu hi manana loyi a a ri un’wana wa vavanuna lava rhangelaka evandlheni ra le Yerusalema, u khutaze Vakreste-kulobye a ku: “Byelanani swidyoho swa n’wina, mi khongelelana, leswaku mi ta hola.” (Yakobo 5:16) Kutani xana Vakreste va fanele va phofula swidyoho swa vona, loko swi ri tano eka mani?

Swidyoho Leswi Faneleke Swi Phofuriwa

Leswi hi nga hetisekangiki, siku ni siku hi endla swilo handle ko anakanya kumbe hi tirhisa ririmi ra hina hi ndlela yo biha kutani hi dyohela van’wana. (Varhoma 3:23) Xana leswi swi vula leswaku hi fanele hi tiphofula swidyoho swin’wana ni swin’wana eka vanhu lava hlawuriweke?

Hambileswi xidyoho xin’wana ni xin’wana xi khunguvanyisaka Xikwembu, hi musa xa ku twisisa ku tsana ka hina tanihi leswi hi nga hetisekangiki. Loko mupisalema a vulavula hi Yehovha u te: “Loko a wu languta swihoxo, Wena Yah, Oho  Yehovha, i mani loyi a a ta yima? Hikuva u ni ndzivalelo wa ntiyiso, leswaku u ta chaviwa.” (Pisalema 130:3, 4) I yini leswi hi faneleke hi swi endla loko hi dyoha niloko hi dyohela van’wana handle ko swi xiya? Tsundzuka leswaku xikhongelo xa Yesu xa xikombiso lexi a xi dyondziseke valandzeri vakwe xi ni marito lama nge: “U hi rivalela swidyoho swa hina, hikuva na hina ha va rivalela hinkwavo lava nga ni nandzu eka hina.” (Luka 11:4) Xikwembu xi ta hi rivalela loko hi kombela ku rivaleriwa hi vito ra Yesu.—Yohane 14:13, 14.

Xiya leswaku Yesu u tlhele a vula leswaku na hina hi fanele hi rivalela lava “nga ni nandzu eka hina.” Muapostola Pawulo u khutaze vapfumeri-kulobye a ku: “Kombanani musa, mi tsetselelana swinene, mi rivalelana hi ku ntshunxeka tanihi leswi Xikwembu na xona xi mi rivaleleke hi ku ntshunxeka hi Kreste.” (Vaefesa 4:32) Loko hi rivalela van’wana, hi ta va ni xivangelo lexi twalaka xo langutela leswaku Xikwembu xi hi rivalela.

Xana hi nga langutela leswaku Xikwembu xi hi rivalela swidyoho leswikulu swo tanihi ku yiva, ku hemba hi vomu, ku tikhoma ko biha hi tlhelo ra rimbewu, vudakwa ni swin’wana? Munhu un’wana ni un’wana loyi a endlaka swidyoho leswi u tlula milawu ya Xikwembu naswona wa xi dyohela. Xana munhu u fanele a swi phofula swidyoho sweswo?

I Mani Loyi Hi Faneleke Hi Tiphofula Eka Yena?

Xikwembu a xi nyikanga vanhu matimba yo rivalela swidyoho; hi xona ntsena lexi hi rivalelaka. Bibele yi ri: “Loko hi vula swidyoho swa hina, [Xikwembu] xa tshembeka naswona xi lulamile lerova xi nga hi rivalela swidyoho swa hina ni ku hi basisa evubihini hinkwabyo.” (1 Yohane 1:9) Kahle-kahle i mani loyi hi faneleke hi tiphofula eka yena?

Leswi Xikwembu ku nga xona xi hi rivalelaka, hi fanele hi phofula swidyoho swa hina eka xona, hilaha Davhida a endleke hakona. Kambe hi rivaleriwa swidyoho loko swi te yini? Bibele yi ri: “Hikokwalaho, hundzukani mi hundzuluka leswaku ku hlanguriwa swidyoho swa n’wina, leswaku tinguva ta ku phyuphyisiwa ti ta ta ti huma eka Yehovha hi xiviri.” (Mintirho 3:19) Leswaku munhu a rivaleriwa xidyoho, a swi titsheganga hi ku va a pfumela ntsena leswaku u dyohile kumbe ku tiphofula, kambe u fanele a tshika tindlela takwe to biha. Goza leri landzelaka i ra nkoka, kambe a ri olovi.

Tsundzuka marito ya mudyondzisiwa Yakobo lama tshahiweke eku sunguleni ka xihloko lexi, lama nge: “Byelanani swidyoho swa n’wina, mi khongelelana, leswaku mi ta hola.” Yakobo u tlhele a ku: “Xikombelo xa munhu la lulameke, loko xi endliwa, xi ni matimba lamakulu.” (Yakobo 5:16) “Munhu la lulameke” ku nga ha va ku ri un’wana wa “vakulukumba va vandlha” lava Yakobo a vulavuleke ha vona eka ndzimana 14. Evandlheni ra Vukreste ku ni “vakulukumba” kumbe vakulu lava hlawuriweke leswaku va ta pfuna lava lavaka ku amukeriwa hi Xikwembu. Hambi ku ri “vakulukumba” volavo a va swi koti ku rivalela vanhu swidyoho tanihi leswi ku nga riki na munhu la nga rivalelaka munhu-kulobye la dyoheleke Xikwembu. * Nilokoswiritano, va faneleka ku tshinya ni ku pfuna munhu la dyoheke leswaku a vona nkoka wa xidyoho xakwe naswona va n’wi pfuna leswaku a hundzuka.—Vagalatiya 6:1.

 Ha Yini Munhu A Fanele Phofula Swidyoho Swakwe?

Ku nga khathariseki leswaku xidyoho xa kona xi kule ku fikela kwihi, munhu la dyohaka u onha vuxaka byakwe ni Xikwembu ni vanhu-kulobye. Xidyoho xi nga ha endla leswaku a karhateka. Sweswo swi vangiwa hileswi Muvumbi wa hina a hi nyikeke ripfalo. (Varhoma 2:14, 15) Kutani i yini leswi hi nga swi endlaka?

Loko hi tlhela hi hlaya marito ya Yakobo, hi kuma marito lama khutazaka lama nge: “Xana u kona loyi a vabyaka [hi tlhelo ra moya] exikarhi ka n’wina? A a vitane vakulukumba va vandlha, kutani a va n’wi khongelele, va n’wi tota mafurha hi vito ra Yehovha. Kutani xikhongelo xa ripfumelo xi ta hanyisa la nga pfukiki swinene, naswona Yehovha u ta n’wi pfuxa. Nakambe, loko a lo endla swidyoho, u ta rivaleriwa swona.”—Yakobo 5:14, 15.

Nakambe, vakulukumba kumbe vakulu va ni vutihlamuleri byo khathalela ntlhambi. Njhani? Ku nga ri leswaku wu va phofulela swidyoho swa wona ntsena. Leswi wu vabyaka hi tlhelo ra moya, va fanele va endla swo karhi leswaku va “hanyisa la nga pfukiki swinene.” Ku ni swilo swimbirhi leswi Yakobo a swi vuleke leswi faneleke swi endliwa.

Xo sungula, u vulavule hi ku ‘totiwa mafurha.’ Xiga lexi xi kombetela eka matimba yo horisa ya Rito ra Xikwembu. Muapostola Pawulo u vule leswaku “rito ra Xikwembu ra hanya naswona ri ni matimba . . . naswona ra swi kota ku twisisa miehleketo ni makungu ya mbilu,” naswona ra swi kota ku fikelela mianakanyo ni mbilu ya munhu. (Vaheveru 4:12) Hi ku tirhisa Bibele hi vutlhari, vakulukumba va swi kota ku pfuna munhu la vabyaka hi tlhelo ra moya a xiya lexi endleke leswaku a dyoha naswona a teka magoza lama faneleke leswaku a tlhela a va ni vuxaka lebyinene ni Xikwembu.

Xa vumbirhi, i “xikhongelo xa ripfumelo.” Hambileswi swikhongelo swa vakulukumba swi nga cinciki vululami bya Xikwembu, i swa nkoka eka xona tanihi leswi xi hi rivalelaka exisekelweni xa gandzelo ra nkutsulo wa Kreste. (1 Yohane 2:2) Xikwembu xi tiyimisele ku pfuna mudyohi un’wana ni un’wana la tisolaka hi mbilu hinkwayo naswona a endlaka “mintirho leyi fambelanaka ni ku hundzuka.”—Mintirho 26:20.

Xivangelo-nkulu lexi endlaka hi phofula swidyoho swa hina—ku nga khathariseki leswaku hi swi endlele vanhu kumbe Xikwembu—hileswi hi lavaka ku amukeriwa hi xona. Yesu Kreste u kombise leswaku hi fanele hi rhanga hi ku tlhantlha swiphiqo leswi hi nga na swona ni vanhu naswona hi kondletela ku rhula na vona leswaku hi ta gandzela Xikwembu hi ri ni ripfalo leri baseke. (Matewu 5:23, 24) Swivuriso 28:13 yi ri: “Loyi a fihlaka ku tlula nawu kakwe a nge humeleli, kambe loyi a tiphofulaka kutani a tshika, u ta kombiwa tintswalo.” Loko hi titsongahata emahlweni ka Yehovha Xikwembu naswona hi kombela ku rivaleriwa, u ta hi amukela naswona u ta hi tlakusa hi nkarhi lowu faneleke.—1 Petro 5:6.

[Nhlamuselo ya le hansi]

^ par. 16 Van’wana va ehleketa leswaku marito ya Yesu lama nga eka Yohane 20:22, 23 ma seketela mhaka ya ku va munhu a phofula xidyoho xakwe eka munhu-kulobye. Leswaku u kuma rungula leri engetelekeke, vona Xihondzo xo Rindza xa April 15, 1996, matluka 28-29.

[Marito lama tshahiweke exihlokweni lama nga eka tluka 23]

Xikwembu a xi nge swi languti swidyoho swa hina naswona xi ta hi rivalela loko hi xi kombela hi vito ra Yesu

[Xifaniso lexi nga eka tluka 24]

Xivangelo-nkulu lexi endlaka hi phofula swidyoho swa hina hileswi hi lavaka ku amukeriwa hi Xikwembu