Nghena endzeni

Hundzela eka leswi nga endzeni

Ndlela Yo Kuma Ntsako

Ndlela Yo Kuma Ntsako

 Leswi Hi Nga Swi Dyondzaka Eka Yesu

Ndlela Yo Kuma Ntsako

Hi wihi nchumu wa nkoka lowu nga endlaka leswaku hi tsaka?

▪ Yesu u vulavurile hi ntsako eka dyondzo yakwe leyi dumeke swinene. U te: “Va tsaka lava khathalaka hi xilaveko xa vona xa moya.” (Matewu 5:3) Xana a a vula yini? I yini xilaveko xa hina xa moya?

Leswaku hi kota ku hanya, hi fanele hi hefemula, hi nwa ni ku dya hilaha swiharhi swi endlaka hakona. Kambe leswaku hi kuma ntsako, hi fanele hi enerisa xilaveko lexi swiharhi swi nga riki na xona, ku nga xilaveko xo twisisa xikongomelo xa vutomi. I Mutumbuluxi wa vutomi ntsena la nga enerisaka xilaveko xexo. Xisweswo, Yesu u te: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Matewu 4:4) Lava khathalaka hi xilaveko xa vona xa moya va tsaka hikuva va va ni vuxaka lebyinene na Yehovha “Xikwembu lexi tsakeke” naswona u va nyika ntshembo leswaku va tshama va tsakile.—1 Timotiya 1:11.

Xana Yesu u wu nyikele njhani ntshembo?

▪ U te: “Va tsaka lava nga ni moya wo rhula, hikuva va ta dya ndzhaka ya misava.” (Matewu 5:5) U nyike vanhu ntshembo hi ku hanyisa lava vabyaka ni ku pfuxa vafi. U tlhele a va byela rungula leri nyikaka ntshembo loko a ku: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Vanhu lava yingisaka Xikwembu va ta tsakela vutomi lebyi nga heriki laha misaveni. Tianakanye u ri exikarhi ka vanhu lava nga ni moya wo rhula naswona u nga ha dyuhali! A swi hlamarisi leswi Rito ra Xikwembu ri nge: “Tsakani hi ntshembo.” (Varhoma 12:12) Yesu u tlhele a hlamusela leswi hi nga swi endlaka leswaku hi kuma ntsako sweswi.

 Hi yihi ndlela leyinene yo kuma ntsako leyi Yesu a dyondziseke ha yona?

▪ Yesu u nyikele ndzayo leyi nga erivaleni loko swi ta etimhakeni to tanihi ku va ni vuxaka lebyinene ni vanhu van’wana, vukati, ku titsongahata ni ku va ni langutelo lerinene hi rifuwo. (Matewu 5:21-32; 6:1-5, 19-34) Ku yingisa xitsundzuxo xakwe swi ta ku pfuna leswaku u kuma ntsako.

Ku nyika swi tisa ntsako. (Mintirho 20:35) Hi xikombiso, Yesu u te: “Loko u endla nkhuvo, rhamba swisiwana, swigono, lava khutaka, lava feke mahlo; kutani u ta tsaka, hikuva a va na nchumu lexi va nga ku tlheriselaka xona.” (Luka 14:13, 14) Ntsako wu kumiwa hi vanhu lava lavaka ku pfuna van’wana ku nga ri lava lavaka ku tivuyerisa.

Hi wihi nchumu wa nkoka swinene lowu nga hi pfunaka leswaku hi tsaka?

▪ I ntiyiso leswaku swa tsakisa ku endlela van’wana leswinene, kambe ku endlela Xikwembu swilo leswinene swi nga ku endla u tsaka swinene. Ntsako lowu hi wu kumaka hi ku endlela Xikwembu swilo leswinene wu tlula ni ntsako lowu vatswari lava rhandzaka vana va vona va nga na wona. Leswi swi vonake kahle eka leswi nga endleka siku rin’wana loko Yesu a chumayela erivaleni. “Wansati un’wana exikarhi ka ntshungu a tlakusa rito rakwe a ku eka yena: ‘Ra tsaka khwiri leri ku rhwaleke ni mavele lawa u ma an’weke!’ Kambe yena a ku: ‘E-e, ematshan’weni ya sweswo, Va tsaka lava twaka rito ra Xikwembu va tlhela va ri hlayisa!’”—Luka 11:27, 28.

Yesu u kume ntsako ni ku eneriseka hi ku endla ku rhandza ka Tata wakwe wa le tilweni. Ku rhandza ka Xikwembu hileswaku vanhu va dyondza hi ta ntshembo wa vutomi lebyi nga heriki. Endzhaku ko hlamusela munhu un’wana la tsakelaka hi ta ntshembo wolowo, Yesu u te: “Swakudya swa mina i ku endla ku rhandza ka loyi a ndzi rhumeke.” (Yohane 4:13, 14, 34) Na wena u nga kuma ntsako hi ku endla swilo leswi tsakisaka Xikwembu, swo tanihi ku byela van’wana ntiyiso wa Bibele.

Leswaku u kuma rungula leri engetelekeke, vona ndzima 1 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Xifaniso lexi nga eka tluka 16]

Ntsako wa xiviri hi wu kuma hi ku twisisa xikongomelo xa vutomi