Nghena endzeni

Hundzela eka leswi nga endzeni

Xi Languta Leswinene Eka Vanhu

Xi Languta Leswinene Eka Vanhu

 Tshinela Eka Xikwembu

Xi Languta Leswinene Eka Vanhu

1 TIHOSI 14:13

“YEHOVHA u kambisisa timbilu hinkwato, naswona u xiya mboyamelo wun’wana ni wun’wana wa miehleketo.” (1 Tikronika 28:9) Marito lawa, lama huhuteriweke ma endla leswaku hi tlangela ndlela leyi Yehovha a hi rhandzaka ha yona. Yehovha u languta leswinene etimbilwini ta hina hambileswi hi nga hetisekangiki. Leswi swi vonake kahle emhakeni ya Abiya leyi nga eka Tihosi to Sungula 14:13.

Abiya a a tshama ni ndyangu lowu a wu hombolokile. Tata wakwe Yerobuwamu, a a ri murhangeri wa vaxandzuki. * Xikongomelo xa Yehovha a ku ri ku lovisa ndyangu wa Yerobuwamu hinkwawo “hilaha munhu a susaka vulongo hakona.” (1 Tihosi 14:10) Kambe Xikwembu xi lerise leswaku munhu un’we ntsena endyangwini wolowo ku nga Abiya, loyi a a vabyela ku fa, a lahliwa hi ndlela yo xiximeka. * Ha yini? Xikwembu xi te: “Hikwalaho ka leswi Yehovha Xikwembu xa Israyele a kumeke leswinene eka yena endlwini ya Yerobuwamu.” (1 Tihosi 14:1, 12, 13) Xana marito lawa ma hi byela yini hi Abiya?

Bibele a yi vuli leswaku Abiya a a ri mugandzeri wa Xikwembu wo tshembeka. Kambe a ku ri ni swo karhi leswinene eka yena. Swilo swa kona a swi ‘voniwa hi Yehovha’ naswona swi nga ha endleka leswaku a swi fambisana ni vugandzeri byakwe. Vatsari va varhabi va vula leswaku Abiya u pfule riendzo ro ya gandzela etempeleni ya le Yerusalema kumbe ku susa varindzi lava tata wakwe a va vekile ku sivela Vaisrayele leswaku va nga yi eYerusalema.

Hambileswi hi nga riki na vuxokoxoko hinkwabyo bya leswi Abiya a a swi endla, mhaka-nkulu hileswaku vunene byakwe a byi xiyeka. Xo sungula, a byi ri bya xiviri. Xiga lexi nge “eka yena,” xi kombisa leswaku a byi huma embilwini. Xa vumbirhi, a byi hlawulekile. U byi kombisile hambiloko a ri “endlwini ya Yerobuwamu.” Xidyondzi xin’wana xi ri: “Swa tsakisa loko vanhu va hambeta va endla leswinene hambiloko va tshama etindhawini kumbe emindyangwini yo homboloka.” Xin’wana xi vule leswaku vunene bya Abiya a byi “vonaka . . . ku fana ni tinyeleti leti vangamaka loko xibakabaka xi ri munyama, ni mirhi ya mukedari yi saseka ngopfu loko mirhi leyi nga ematlhelo ka yona yi dzudzeke matluka.”

Xa nkoka swinene, marito lama nga eka Tihosi to Sungula 14:13 ma hi dyondzisa mhaka ya nkoka swinene hi Yehovha ni leswi a swi langutaka eka hina. Tsundzuka leswaku leswinene swi ‘kumekile eka’ Abiya. Swi tikomba onge Yehovha u kambele mbilu ya Abiya kukondza a kuma swo karhi leswinene. Loko Abiya a ringanisiwa ni swirho swa ndyangu wa ka vona, a a fana ni “perela leyi nga exikarhi ka maribye,” hilaha xidyondzi xin’wana xi vuleke hakona. Yehovha u n’wi katekisile Abiya hikwalaho ka vunene lebyi a byi kombiseke hambileswi a a huma endyangwini wo homboloka.

Hakunene swa khutaza ku tiva leswaku Yehovha u languta leswinene eka hina hambileswi hi nga hetisekangiki! (Pisalema 130:3) Onge mhaka leyi yi nga hi susumetela ku tshinela eka Yehovha, Xikwembu lexi kambisisaka timbilu ta hina hi vukheta leswaku xi vona vunene lebyi hi nga na byona, hambiloko byi nga nyawuli.

[Tinhlamuselo ta le hansi]

^ par. 5 Yerobuwamu a a simeke vugandzeri bya rhole emfun’weni wa le n’walungwini wa Israyele wa tinyimba ta khume ku endlela leswaku vanhu va nga ha yi eYerusalema va ya gandzela Yehovha etempeleni.

^ par. 5 Eminkarhini ya Bibele ku va munhu a nga lahliwi hi ndlela leyi xiximekaka a swi tekiwa tanihi xikombiso xa leswaku Xikwembu a xi n’wi tsakeli.—Yeremiya 25:32, 33.