Nghena endzeni

Hundzela eka leswi nga endzeni

‘Xi Vona Leswi Mbilu Yi Nga Swona’

‘Xi Vona Leswi Mbilu Yi Nga Swona’

 Tshinela Eka Xikwembu

‘Xi Vona Leswi Mbilu Yi Nga Swona’

1 SAMUWELE 16:1-12

KU LANGUTEKA ka munhu ka kanganyisa. Leswi munhu a langutekisaka xiswona ehandle a hi swona leswi a nga xiswona embilwini yakwe. Hi ntolovelo vanhu va avanyisa munhu hi ku ya hileswi a langutekisaka xiswona ehandle. Lexi tsakisaka, hileswaku Yehovha Xikwembu a nga languti ntsena leswi munhu a langutekisaka xiswona ehandle. Leswi swi kombisiwa kahle hi marito lama nga eka 1 Samuwele 16:1-12.

Vona xiendlakalo lexi hi mahlo ya mianakanyo. Yehovha u lava ku tota hosi leyintshwa etikweni ra Israyele. U byela muprofeta Samuwele a ku: “Ndzi ta ku rhuma eka Yese lowa le Betlehema, hikuva ndzi tihlawulele hosi exikarhi ka vana vakwe.” (Ndzimana 1) Yehovha a nga n’wi byeli vito ra n’wana wa kona kambe wo vula ntsena leswaku u ta huma exikarhi ka vana va Yese. Loko Samuwele a khoma ndlela a ya eBetlehema, swi nga ha endleka leswaku a ri karhi a tivutisa a ku, ‘Ndzi ta swi tivisa ku yini leswaku hi wihi n’wana wa jaha loyi Yehovha a n’wi hlawuleke exikarhi ka vana va Yese?’

Loko a fika eBetlehema, Samuwele u hlengeleta Yese ni vana vakwe va majaha leswaku va va kona exitlhavelweni. Loko Eliyabu, loyi a nga mativula a nghena, Samuwele u namba a ehleketa leswaku hi yena loyi a hlawuriweke hikwalaho ka ndlela leyi a langutekaka ha yona. Samuwele u vona onge ku leha ka Eliyabu swi n’wi endla a faneleka ku va hosi kutani a tibyela a ku: “Hakunene mutotiwa wakwe u le mahlweni ka Yehovha.”—Ndzimana 6.

Hambiswiritano, Yehovha a a vona swilo hi ndlela leyi hambaneke. U byele Samuwele a ku: “U nga languti ku languteka kakwe ni ku tlakuka ka xiyimo xakwe, hikuva ndzi n’wi bakanyile.” (Ndzimana 7) Ku leha ni ku saseka ka Eliyabu a swi nga n’wi koki rinoko Yehovha. Mahlo ya Yehovha ma kota ku vona swilo hinkwaswo eka munhu, ma vona ku languteka kakwe ka le handle ni ndlela leyi mbilu yakwe yi nga xiswona.

Yehovha u byele Samuwele a ku: “Hikuva Xikwembu a xi voni hi ndlela leyi munhu a vonaka ha yona, hikuva munhu u vona ntsena leswi vonakaka ematihlweni; kambe loko ku ri Yehovha, u vona leswi mbilu yi nga swona.” (Ndzimana 7) Ina, lexi nga xa nkoka eka Yehovha i mbilu, ku nga munhu wa le ndzeni, xihlovo xa mianakanyo ya munhu, langutelo rakwe ni ndlela leyi a titwaka ha yona. “Mukambisisi wa timbilu” u n’wi bakanyele etlhelo Eliyabu—ku katsa ni vana va Yese hinkwavo lava humeleleke emahlweni ka Samuwele.—Swivuriso 17:3.

Yese a a ri ni n’wana un’wana wa jaha wa rikotse, ku nga Davhida, loyi a a ri eku ‘byiseni ka tinyimpfu.’ (Ndzimana 11) Kutani Samuwele u lerise leswaku a landziwa. Hiloko Yehovha a byela Samuwele a ku: “Suka u yima, n’wi tote, hikuva loyi hi yena!” (Ndzimana 12) I ntiyiso leswaku Davhida “a a ri wa ribungwana, jaha leri nga ni mahlo yo saseka, ri sasekile.” Kambe lexi nga endla leswaku a amukeleka eka Xikwembu i mbilu yakwe.—1 Samuwele 13:14.

Leswi emisaveni leyi ku langutiwaka ngopfu ku saseka ka munhu ka le handle, hi nga chaveleleka hi ku tiva leswaku Yehovha Xikwembu a nga va languti hi ndlela yoleyo vanhu. Eka yena a hi swa nkoka leswaku munhu u lehe kumbe ku saseka ku fikela kwihi. Lexi nga xa nkoka eka yena i mbilu. Onge ku tiva leswi swi nga ku endla u navela ku hlakulela timfanelo leti nga ta endla leswaku u va la amukelekaka emahlweni ka Xikwembu!