Nghena endzeni

Hundzela eka leswi nga endzeni

Xana Vanhu Hinkwavo Lavanene Va Ya eTilweni?

Xana Vanhu Hinkwavo Lavanene Va Ya eTilweni?

 Xana Vanhu Hinkwavo Lavanene Va Ya eTilweni?

EMAHLWENI ka vusiku lebyi Yesu a nga dlayiwa ha byona ni le ndzhaku ka xilalelo xo hetelela lexi a xi dyeke ni vadyondzisiwa vakwe, u va tshembise ndhawu etilweni. U te: “Endlwini ya Tatana ku ni vutshamo byo tala. Loko a swi nga ri tano, a ndzi ta va ndzi mi byerile, hikuva ndzi ya mi lunghiselela ndhawu.” (Yohane 14:2) Ha yini Yesu a ta va nyika ndhawu etilweni? I yini leswi va nga ta swi endla loko va ri kwale?

Loko Yesu a vula marito wolawo a a ehleketa hi xiavelo xa nkoka lexi a faneleke a xi nyika vadyondzisiwa vakwe. Hi vusiku byebyo u te: “Hi n’wina mi khomeleleke swin’we na mina emiringweni ya mina; kutani ndzi endla ntwanano swin’we na n’wina, hilaha Tata wa mina a endleke hakona ntwanano wa mfumo swin’we na mina.” (Luka 22:28, 29) Xikwembu xi tshembise Yesu leswaku a a ta va Hosi leyi nga ta enerisa swilaveko swa vanhu hi ku tirhisa hulumendhe leyinene. Yesu u ta kutsula vanhu eka maxangu lawa va langutanaka na wona naswona u ta herisa ni vanhu lava va va dyelelaka. Hambileswi Yesu a nga ta va ni vanhu lava a va fumaka “ku ya emakumu ka misava” xiluvelo xakwe xi ta va etilweni.—Pisalema 72:4, 8; Daniyele 7:13, 14.

Hambiswiritano, Yesu a nge fumi a ri yexe. U tshembise vaapostola vakwe ndhawu etilweni. Hi vona vo sungula ku hlawuriwa ku “va tihosi emisaveni.”—Nhlavutelo 5:10.

I vangani lava nga ta ya etilweni? Ku fana ni mfumo wun’wana ni wun’wana, vafumi eMfun’weni wa Xikwembu wa le tilweni i vatsongo loko va ringanisiwa ni vanhu hinkwavo lava va nga ta va fuma. Yesu u byele lava a nga ta fuma na vona a ku: “Mi nga chavi, ntlhambinyana, hikuva Tata wa n’wina u tsakele ku mi nyika mfumo.” (Luka 12:32) “Ntlhambinyana” wolowo wu ta hetelela wu ve nhlayo ya 144 000. (Nhlavutelo 14:1) Nhlayo yoleyo i yitsongo swinene loko yi ringanisiwa ni timiliyoni ta vanhu lava nga ta kuma vutomi lebyi nga heriki tanihi malandza yo tshembeka lama nga ta va ehansi ka Mfumo wolowo.—Nhlavutelo 21:4.

Xisweswo a hi vanhu hinkwavo lavanene lava nga ta ya etilweni. Malunghana na Hosi Davhida lonene, muapostola Petro u swi veke erivaleni a ku: “Davhida a nga tlhandlukelanga ematilweni.” (Mintirho 2:34) Yohane Mukhuvuri a a ri wanuna lonene. Kambe, Yesu u kombise leswaku a a nga ta tlakusiwa leswaku a ya fuma tanihi hosi etilweni. Yesu u te: “Exikarhi ka lava velekiweke hi vavasati a ku si humelela lonkulu eka Yohane Mukhuvuri; kambe munhu lontsongo emfun’weni wa matilo u nkulu eka yena.”—Matewu 11:11.

Xana Na Wena U Ta Yi Kuma Mikateko Ya Vanhu Lavanene?

I yini leswi munhu a faneleke a swi endla leswaku a kuma vutomi byo hanya hilaha ku nga heriki laha misaveni? Yesu u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Xiya leswaku rirhandzu leri Xikwembu xi nga na rona hi misava ri xi susumetela ku nyika vanhu hinkwavo vutomi lebyi nga heriki, kambe byi ta kumiwa ntsena hi lava “kombisaka ripfumelo.”

Ripfumelo ri fanele ri sekeriwa eka vutivi lebyi kongomeke. (Yohane 17:3) U nga kombisa leswaku u munhu lonene hi ku dyondza swo tala hi xikongomelo xa Yehovha hi vanhu. Naswona u kombisa ripfumelo eka leswi u swi dyondzaka. Loko u endla tano, u nga tiyiseka leswaku lunghelo ro kuma vutomi lebyi nga heriki ri ku pfulekerile.

 [Bokisi leri nga eka tluka 7]

Xana Bibele Yi Ri Yini?

Xivutiso:

Xana ku endleka yini hi vanhu lavanene loko va fa?

Nhlamulo:

“Loko ku ri lava feke, a va tivi nchumu nikatsongo.”EKLESIASTA 9:5.

Xivutiso:

Hi wihi ntshembo wa nkarhi lowu taka lowu vanhu lavanene va nga na wona?

Nhlamulo:

“Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena [Yesu] kutani va huma.”YOHANE 5:28, 29.

Xivutiso:

Xana vunyingi bya vanhu lavanene byi ta hanya kwihi?

Nhlamulo:

“Lavo lulama va ta dya ndzhaka ya misava, va ta tshama eka yona hi masiku.”PISALEMA 37:29.